هجره عذاب وشوفته مستحيله

[فواز الغسلان]

قالوا سهرت وقلت من شهر شوال=ومانـاض مـن بـرقٍ عـيـونـي تخـيـله
اخيل بـرقٍ بالـدجـى يشعل اشعال=يوضـي على روس الرجـوم الطـويله
قالوا علامك قلت من شدهة البال=ولااخـبـر عـيـن الشهـم ترقد ذلـيـله
ولولا على كـتـفـي عـواجـيز وعـيال=يكـفـيـن عـن بـشـت الـمـطرز فـنيله
قالوا دروبك قلت شيـنـات وطوال=الـقـيـــظ كـاوي والـــمــوارد قـلـيـله
لا من ولـد عــمٍ ولا من ولـد خـال=وهـرجٍ بـوسـط الكـبـد يـوقـد فتيله
لانـي وصـلـت لـجـمــة الـبـيـر بحبال=ولا هـم عـطـوا روحـي توالي جميله
واليوم كتفي طاح من زود الاحمال=قالـوا نخـيـت وقـلـت مافـيـه حـيـله
هـذاك دور الحـثـربـي وابـن هـذال=يوم الـعـرب بالطيب تدخل دخـيله
لـو كان ابن عيده مع الناس مازال=والـلـه فـلا اذوق الـسـهـر كـل ليله
شيخٍ ويـغـنـي عـن ثـمـانـيـن خـيـال=الا ويــغــــنــي عـن رجـــال وقـبـــيــــله
واليوم لا تغويك كشخات الازوال=كـم كـاشـخٍ رايــه بـحـكــم الحـلـيـله
قالوا غـرامك قـلـت للـقـلب سلال=هـجـره عذاب وشوفـتـه مستحـيـله
عين اشـقـرٍ يـنـزل على نايف الجال=ولا حـام فـوق الـجـول يكـثر قـتيله
والجسم مـهـرة حـاكـمٍ بالعدى صال=والشلف بكـفـوف الـنـشـامى سليله
او غصن موزٍ مع هبوب الهواء مال=والـراس يـاصـل لـلــردايـف جـديله
والـريـح روضٍ جـاه بالوسـم هطال=وصارت زهور الريف مثل الخـمـيله
اقفى بها زمل العـنى يـهـذل اهـذال=وبـعـض الـطـرايـق للـنـشـامى فشيله
لا هو سـقانـي من ثـنـايـاه فـنـجـال=ولا هو ترك سيل العرب في مسيله
وغديت مثل اللي طمع بأشهب اللال=في لاهــب الجـوزاء وخـلا صـمـيـله
قالوا جـوابـك قلـت يانـاس رحال=مادام مـالــي بالـمــواصـل وسـيـله
لاصار مالي مع هوى البال مدخال=افضل من نزول الـضـعـاين رحيله
الزمل مايـقـوى على الـثـقـل لامال=والـــذود مايـرويــــه نـقــع الـثـــمـــيـله
قالـوا حـلالك قلت ماعـاد لي مال=لانــي وزيـر ولا كـفــوفــي بـخـيـــله
قالوا بـعـيـد وقلـت لو يجـدع الحال=والجــدي في شـهب الـفـيـافي دلـيـله
اقطع مـهـامـيــهٍ بـهـا الـقـلـب يـهـتـال=تطفي عـن قـلـوب الـنـشـامـى غلـيله
قالوا ونيـسك قلت زيـنـات الامثال=والشعـر هـو طـب الـقـلـوب العـليله
عندي قصيد الخلق في كل الاجـيال=وان هضت جبت من القوافي جزيله
ياما سـرى شـعـري مـع الناس موال=وش عاد لو يكتب عـن اسمي بديله
لـي ضـامـرٍ يـبـدع عـلى كل مـنـوال=وان ثار جمر الـكـبـد يـطفي غـلـيــله

[داعي الشوق]

صح لسآآآآآآنك يا بن غسلان

شاعر كبير و رائع في كل الحالات

صاحب مسار مستقل

لا أحد يستطيع أن يسلكه

إلا فواز الغسلان

لله دررررررك من رائع

صح لسآآآنك

مدد بلا عدد

تقديري لك

و الاحترام

[الفاضل]

قالوا بعيد وقلت لو يجـدع الحـال

والجدي في شهب الفيافـي دليلـه

اقطع مهاميهٍ بهـا القلـب يهتـال

تطفي عن قلوب النشامـى غليلـه

صح لساااااااااااااااانك

[الطامي]

فواز الغسلان
صح السانك ملايين تاخي
وافية بالحيل وهادفه
شكرا لك

[ابومياس]

مررت من هنا لاستفيد

لانني متيقن بان امامي حرف متقن

قصيدة ارتقت الى قمه الهرم الشعري

مفردات عذبه ومعاني جزلة

واسلوب اصيل في بنا الكلمة

لتصل الينا بدون تكلف

هكذا هو نموذج الشعر الاصيل

صح لسانك وبيض الله وجهك

تحياتي واعجابي

دمت بخير

[رفيعة الشان]

قالوا ونيسك قلت زينـات الامثـال
والشعر هو طب القلـوب العليلـه
عندي قصيد الخلق في كل الاجيـال
وان هضت جبت من القوافي جزيله
ياما سرى شعري مع الناس مـوال
وش عاد لو يكتب عن اسمي بديله
لي ضامرٍ يبدع علـى كـل منـوال
وان ثار جمر الكبد يطفـي غليلـه
الله الله
عز الله قول وفعل
سلمت يمينك وصح الله لسانك
على القصد الجميل والاصيل

لااااهنت

[الخنساء]

صح لسانك ولاهنت
بوح رائع وصادق
سلمت ودمت بخير

[عبدالرحمن بن زهير]

واليوم لا تغويك كشخـات الازوال
كم كاشـخٍ رايـه بحكـم الحليلـه

لم ارى في هذه القصيده إلا الحكم والشعر لله درك يا فواز فعلا مميز صح الله لسانك ولا هان شانك

[ناصر عبيد الهواوي]

بدعت واجزلت بالحيل يالغسلان
لله درك ولا فض فوك كلام يسوى ذهب
احسنت وامتعت تقبل تحياتي واعجابي
والسلام

[ام العمده]

فواز صح لسانك واعتلا شانك لاهان راسك ابدعت تحياتي وتقديري