مفرق الخطين

[محمد بن عمار]

بعد فترة من غيبوبة القريحة
التي يدعمها الإنشغال التام مع
امور الحياة ، الله لايشغلنا الا
في طاعته ...
نعود مجددا ًبهذه المشاركة ،،،

مفرق الخطين

ألا، وآبري حالي من غزال ٍناعس الطرفين = ذبحني يوم سلهم لي وتل القلب يومي به
تلاقينا أنا وياه في درب الولع ، ماشين = طريق ٍ من مشاه يعاف طاري الحب وتجريبه
أنا ماجابني ياناس صوبه ، كود حظي الشين = رمابي في طريق ٍ متعب ٍ ما كان ودي به
عجب ياعارفين الحب من حال ٍ طواه البين = سبايب من نظرني وأوجع الخافق بتصويبه
نحرني ، في وريد القلب ، ببلا سلاح ٍ وسكين = طعونه ، بينات ٍ ، ما بها شك ٍ ولاريبه
صوابه بي تمركز بالحشا موسوم في ضلعين = تمكّن وسط جوفي مثل وسم النارمكوي به
وأنا وش لون أنام ونازف المدمع على الخدين = لذيذ النوم عيني عافته ماعاد تغضي به
إلى من صار قلبي والقدم في مفرق الخطين = أعذل القلب وإلاّ أنهى القدم عن مشيه مصيبه
حقيقة صرت أنا محتار باللي قلت في الثنتين = أطيع القلب ، وإلاّ للقدم أنقاد وأمشي به
ولاني في طريق أهل الهوى من أول الشاكين = جميع الناس تشكي لوعة الحب وعذاريبه
شكيت ومانفع قد لي على هالحال عشر سنين = وأناعدّي هماج ، وما صفالي في مشاريبه
على جرح ٍ سطا بالقلب قبله في الحشا جرحين = غدالي فوق عشري عشرأشكي من تسابيبه
عقب وقت ٍمضا والحال ماتدري به الواشين = عليه اللهُ اكبر ، كيف ؟ خلا الناس تحكي به

خالص الود والتقدير
محمد بن عمار

[الطائر المهاجر]

سلمت
وسلم فكرك
مبدع يالعود في كل حالاتك
تحياتي

[كظيم]

محمد بن عمار
الله الله . قلبك خضر ماشاء الله
سلمت وصح لسـانك وقلبك
قصيده جزله ووافيــه
ابيـات في قمـة الجمـال والروعـه
ابدعت لله درك
تقبلني وتقبل مروري المتواضع لاهنت
ودي وتقديري

[أم ريما]

صح لسانك

قصيده جميله

يعطيك العافيه

[منيع]

كل الروعة والابداع
تسلم يامحمد بن عمار
تحياتي لكم

[زهرة اللوتس]

صح لسانك ونبضك
لاهنت
ويعطيك العافيه
تحية طيبه

[حرف وشعر]

بن عمار اذا غبت غاب الشعر واذا حضرت جبته معك


تسلم على هالروعه يامحمد

[خيالة الشعر]

الاخ الشاعر محمد
ابيات تفوق الوصف
وتلامس الاحاسيس والوجدان
راقت لي كثيرا

صح لسانك مدد بلا عدد
لاعدمناك

[عبدالعزيز العمار]

صح لسااااانك يابن العم

رائع كالعاده في طرحك

سلمت ولاهنت وتقبل اطيب التحايا

[داعي الشوق]

الله عليك يا بن عمار

وش هالجمال و الزين كله ،، سبك و حبك

لله دررررررررررك يا مبدع

وصح لسانك ملاييييين

ولاهنت