مساجلة،، خابرك يامنصور رجل مثالي

الطامي · 13-11-2018, 11:16 AM

طالت المدة لم نلتقي مع بعض الأصدقاء والأقارب ومنهم الأخ على محسن علي فطيس المري ،، فأرسل لي ابيات تعبر عن مافيها ،،يقول:-

ياغايب قد له ايام وليالي = قل لي عسى اللي غيبك ياولد خير
قد لك شهر وشوي منته تسالي = غياب ماله يابن الاجواد تبرير
انا جنوب مدور لك لحالي = هذا ومن غيري شمال مداوير
وارسل علوى مكرمين السبالي = يدورونك في ضواحي الحمارير
قلنا لعله قانص في السهالي = يسرح من الغبشه ومرجاعه عصير
واذا انت تغلى فأنت بالحيل غالي = واذا انت زعلان نزورك مسايير
خابرك يامنصور رجل مثالي = صدرك وسيع وكل ماتفعله خير

رديت عليه اقول:-

اشوف ضوح في مقدم خيالي = وبروق تلعب في قنوف مزابير
يحيي القاع الممحله والمفالي = وبل حقوق غيث مزنه شخاتير
فزيت له فزة كريم السبالي = جاله من الغربه ضيوف ومسايير
اثره نديب من رجال غوالي = علي الا ذكرو الرجال المناعير
وارد وارحب به من اول وتالي = عداد حبات الرمل بالجوافير
حييت بان فطيس زبن التوالي = وان قلت ابو محسن فلابه محاذير
وياناشد مني على كل حالي = ياجعل يفداه الردي والمعيثير
انا بخير وصحتي بالعلالي = وانا على خبرك ولا فيه تغيير
ويقول قد لك مدة ماتسالي = هو ماكذب وانا مادور معاذير
انا وصلتك ياكريم المعالي = وبالهاتف اللي بينا زود تذكير
وردك ابا اشوف الجماعه واسالي = واجيب لك منهم علوم وتفاسير
ومن عقبها قطعت كل الحبالي = وقلنا ندور لك عذر حيثك كبير
كبير في عيون الجماعه وعالي = ولك منزله في عيونا شكلها غير
وانا الا شفت الرفيق الموالي = يحب ينزح دون عذر وتبرير
وغدا له شفوف ورفاقه وحلالي = ويفرح ببعده في اليالي المخاضير
خليته بفاله وانا اسرح بفالي = جعله بخير وكل ايامه تياسير
والا ذكرنا بمقبلات الليالي = فحنا على خبره بحسن التفاسير
ومشروهنا الطيب على كل غالي = والا الرخيص يخيس ونشوفه صغير
وانتو رجال من رجال ثقالي = ونعم بها في وردها والمصادير
في عيونا اغلى من الذهب والريالي = خوال واعمامٍ وبني عم مناعير
واسلم ودم وجعل دربك زلالي = وسلم على الاخوان لصغير وكبير