الأًصدقاء الأربعه

[أنس]

تحت ضوء القمر وفي وقت كانت الشمس حاره جالس احووووس بفكري الناهض مع رنات البلاك بيري حقت العيال موب حقاتي>>>> مامعي بس شكله بتجي مادام فيها فهوااان

المهم نرجع لموضوعنا الراجع

ايه كان الجو حلو كل الفصول الأربعه سيرت علي صيف خريف شتاء ربيع
ترى اللي فوق كله مقدمات >>> ما أعرف اكتب مقدمه

نعووووود لصلب السالفه >>> وأنت قلت سالفه أصلا
محمد عبيد صالح مصطفى هذولا شخصيات القصه القصيره >>> اصمل قصه او سالفه

كان بيوم من الأيام بالجو البديع تبع الرياض وفي شوارعها اللتي مهيب زحمة أبد أبد أبد

اتصل محمد على عبيد وجرت هذي المكامله
محمد: هلا عبيد
عبيد: هلا محيميد وش تبي مزعج أمي من الصبحيه تدقدق ياخي مارديت عليك اعرف اني نايم >>>>> مسكين محمد جااه تزبيد قوي
محمد : ماكل هذا ..... وساكت متعود على التهزئ عشانه
عبيد ويكمل تهزيئه ياخوووي وش تبي أنت ترى اذا صرت فاضي موب كل الناس فاضيه مثلك العالم وراها دراسه واشغال
محمد : طيب تطلع معي بس ولا لا لايكثر اله من زين الدراسه يوم تدرس ويوم تسحب
عبيد : اقول أها ولايكثر بس و طوط طوط طوط <<ماسكر بوجهه أبد

..... طبعا محمد كان انسان فاصي ولا عنده ولا مشغله وماغير يتصل على العالم ويشغلهم
عبيد أنسان وده يصنع له شي ويمشي بدراسته بس مرات يتراخى ومرات يشد طبعا على حسب اللي يتكي معه

صالح أنسان كان زلابه وساحب على أم الدعوة بس أنتبه لعمره وضبط اموره ولحق على عمره

مصطقى انسان مجتهد بمعنى الكلمه ولايطلع واجد الا بأوقات الفراغ والأوقات اللي محدده
طبعا كلهم بقسم واحد بس كل واحد يختلف على درجه أجتهاده
كلهم نفس العمر بس صالح اكبر منهم بشوي



نرجع لمحور القصه هذي >>> أكيد هذي ولا فيه غيرها

عبيد بعد هذيالمكالمه عبيد قام يفكر

اللي من يساره >>> يعني فكره الموب زين :اقول ابو العبد وش لك بالدراسه ووجع الراس دوام وازعاج وقلة حيا
اللي من يمينه: اقول عبوود ترى مافايدك الى دراستك كلها كم ساعه وتطلع تفلها
اللي من يساره ماعليك بس يوم موب ضار >> طبعا الحمار قام يعطيه مغريات وفله والجو كااايف وانت بتصير بالجامعه وشوله تضيق صدرك وفله

عاد عبيد رضخ للفكر البايخ ذا ورجع اتصل على محمد طبعا التهزئ اللي عطاه محمد محمد رده له وقال داري ياححمار انك بترد ومرد الكلب لقصابه >>> حتى التهزئ فاشل فيه

المهم طلع عبيد ومحمد مع بعض وضيعو وقتهم كان دوامهم من 1 الضهر الى 4 العصر

صالح عقب ماخلص دوامه طلع وكلمهم واجتمع معهم اللي هم أنت يامحمد وعبيد وفلها معهم ولاصار شي اللهم انه استفاد من وقته

مصطفى طلع وسيدا للبيت كان عنده أختبار بعد ثلاث ايام >>> قايلهم مجتهد الرجال

مرت الأيام ومحمد ساحب نفس الوضع ويدقدق على العالم ومحمد يداوم ايام وايام يسحب لأنه داايم يصير مطاق بين فكره الزلابه وفكره الرجال

مصطفى وصالح لاحضو على محمد انه دايم فاضي ودايم عنده اوف ولا الدكتور غايب ومن هالكلام>>> أعذار واحد بين انه زلابه

قالو لازم نجتمع بمحمد نشوف وش وضعه
قال صالح أنا اشك أنه يسحب او انه حاذف الترم >>>> له خبره أول في الأمور هذي>>ترى هذا انت ياصالح موب تحسبونه أنا>> الأيقونه الخضراء > شرح يعني <<

مصطفى :: والله مدري يمكن بكره ندق عليه ونشووف وضعه وترى عبيد بعد لك عليه اوقات اشوفه واوقات ماشوفه بالكليه

قال صالح ماعليك هذا يداوم على الأقل موب ذاك الزلابه بس كلهم ربعنا ولازم نشوف وضعهم بس محمد ماش وضعه مايسر لاعدو ولاصديق

جاء يوم الأربعاء وهو يوم اجازة اكيد



ويوم جاء الاربعاء تواعدو ((بحدا)) هالشوارع اللي مافيه الا هي بالرياض البديعه الجميله عاصمة السعوديه للشباب طبعا >>> مانتف أبد

ابو صلوح اللي هو صالح ضبط الجلسه هو وعبيد وقام صالح يزين الشاهي واتصلو على العيال محمد ومضطفى وجو لهم
محمد نزل ومعه مركته ومصطفى شايل الكيسه اللي فيها أغراض الطبخ والفله

وتكو وسواليف وفله وسعه صدر ومزح بعد ماتعشو وخلصو يقوم صالح ويضبط لهم ذاك الشاهي اللي مايخرش >> يعني مهبوووول >> لاعاد تشرح تككفى

قام يصب الشاهي عبيد ويم كل واحد وصلت له بيالته

قال صالح بلهجه حاده هاديه >>> وشلون تجي حاده هاديه >>> لا بس يعني ببين للقراء كيفية الحديث >> قاعد اشرح لمخي الجمله

صالح وهوم ماسك البياله :: محيميد ترى وضعك ماجاز لي هالأيام

قال محمد : وش تبي وهو يضحك ضحكة بارتياب >>>> لأنه حس انه بيكلمه عن الدراسه

قال صالح : شف يامحمد بصراحه انت تداوم محمد: ايه اداوم صالح:عاد اللي ملاحضينه انك ماتداوم محمد: من قاله انا اداوم وما أغاب الا ومعي اعذار

خش عبيد : وقال ايه مررره تداوم قبلك فاضي ودايم تتصل علي قال محمد: اقول اها بس انا اداوم ودوامي لي موب لك

صالح :: اقول عبيد لاتقطع كلامي لاتجي البياله بجبهتك

عبيد ::......... ساكت خايف من البياله ومصطفى نفس الحاله ساكت ويسمع الكلااام

صالح: شف يامحمد أنا أكلمك من مبدأ أنك خويي وعزيز علي زي أخوي ترى دراستك لك وش بيضرك كم ساعه تقضيها بالدوام
محمد : ودي بس ياخي ملل >>>> كع الدبشه انه مايداوم
صالح : أها يعني ماتداوم بس شف ترى أنا والعيال والناس الثانين سواء ربعك او اللي تطلع معهم موب فايدينك شفني انا ضيعت سنتين من عمري على غير فايده
كنت اطلع مع ناس وافلها معهم بس وش فادتني طلعاتهم كلهم مشو وانا جلست تشوفني للحين ادرس المفروض اني خلصت وتخرجت اخوياي اللي كانو معهم كلهم توضفو وانا للحين ادرس
ولا فادني شي

عبيد : اي والله من جد محمد انتبه لعمرك ترى محد فايدك

محمد : اقول شف عمرك بس أنت وسكت

صالح : ,انت بعد ياعبيد ماش العيال يقولون دوامك نص دوام ويوم تسحب ويوم تداوم يعني لاتسوي نفسك طالع منها

مصطفى يرفع يده وييقول ممكن مداخله استاذ صالح >>> خايف يجيه تزبيد زي عبيد وخايف من البياله اللي مع صالح

صالح تفضل بروفيسور مصطفى
مصطفى : شباب انا أحب اضيف نقطه على كلام صالح انا ولله الحمد ماشي بدراستي صحيح جاني ترم وبزوطت بس لحقت على عمري بنفس الترم وانا اقولكم من خلال تجربه شخصيه
أنا ولله الحمد تشوفوني اطلع معك وافلها ومستانس وبنفس الوقت مرتب وقتي ومعطي اهتمام للدراسه والحمدلله ماشي فيها وانشالله تصيرون مثلي طبعا اقولها من حبي لكم وابيكم تصيرون
مثلي موب فشخره وقلة حيا
صالح: مشكور مصطفى ها محمد وش قلت
محمد :: أأأأ إن شالله بس تراني اداوم وكل شي >>> قام يكابر
صالح : وانت ياعبيد الحق عمرك
عبيد : أنشالله ومايصير الا الخير واشكركم على نصيحتكم اللي عارف ان المستفيد الوحيد هو انا من دراستي

خلصو سواليف وتفرقو كل واحد راح لبيته

مرت الأيام
عبيد تحسن عن اول ومحمد مازااال متكبر على نفسه ويوهم نفسه انه توه ولاحق على الدراسه
قربت الأختبارات وكل واحد لها بعمره ودراسته

خلصت الأختبارات وجت الأجازه
واجتمعو كلهم ثانيه ونفس الوناسه والفله صااارت بس محمد كان اقل وناسه منهم


قال صالح وأخيرا خلصنا الحمدلله نجحت

مصطفى : تقوله من جد يوووووووووك مابغينا بس الحمدلله على النجاح وعقبال مانتخرج

عبيد : اي والله الحمدلله واشكر بعد الله صالح واقوله يامال العافيه مدري وش اقولك وشلون اشكرك قسم بالله انك خليتني الحق على عمري


صالح: لا ياحوي مايحتاج شكر وحنا لبعض واللي مافيه خير لأحوياه مافيه خير لأهله. والتفت صالح على محمد هاه وانت بشر كييف

محمد قام يوزع ابتسامات >>> مايدري وش يقول من الدجه
محمد : ايه الحمدلله نجحت >> يقولها باستحياء
صالح نقول انشالله مع اني ماضن
أنتهت السنه الدراسيه وكلهم نحو وكل واحد باقي له ترمين ويخلصون ومحمد مازال يفحط بالمستوى الثاني من دجته وعشانه يسير وفق هواه اللي مافادته

هذا وانتهت القصه المقصوصه عليكم من قبلي

مايستفاد ::
1- ياشباب مع اني اتوقع كلكم كبار >>>> كمل وانت ساكت بس
ترى مافايدكم الا دراستكم والهبال لاحقين عليه
2- ترى الندم ماينفع بعد وقوع الألم ولكم عبره بمحمد
3- أني أنا أول مره أكتب موضوع بعد توقف دام لأكثر من سنتين ونص يعني لاتشرهون على عدم الترابط والحوسه
4- ان الواحد ينضر لمن قبله وتجاربه بالحياة ويستفيد منها قبل لايصير له مثل اللي صار للي قبله


وبالنهايه شاكر لكم قراءتكم لموضوع من كتابة وتأليف أنا اللي هو أنت يأنس
تقبلوو تحياتي وجميع الحقوق محفوظه
والى اللقاء

ملاحضه // انا جلست ساعة ابي الموضوع ينزل بعدين عرفت ان مالي حق بالفيسات الا 9 مرات واذا كثرت مايتقبل الموضوع بس أتمنى فتح الفيسات لأنها تعطي جمال القصه ولموضوع لأنه يبين ملامح الشخص المقصود وانا ما اعرف الا باستخدام الفيسات هذي فبصراحه عشان يرفع الموضوع اضطرييت امسح كثيرمن الأمور عشانها بتكونبدون أي فايده بدون الفيسات هذي وشاكر لكم

[عمر ال شيبي]

شكرا لك ويعطيك العافيه

[همس الورد]

يسلمووووووووا عالقصة

الي ما فهمتها ههههههههه

تحيتي

[أنس]

مشكورين على المرور

[نفحات حساسة]

ههههههههههههههههههههههههههه

بصراحه شئ,,تسلم منيع..

[أنس]

هلا ومرحبا ومشكوره ع المرور
بس وش دخل منيع:d

همس الورد ودي اعرف وشلون مافهمتيها اللي بثالث ابتدائي يفهمها
على العموم هذي هي فايدة أنكم تحطون حد مورلأيقونات لأن لها فايده كبيييره في توضيح بعض الأمور

[الهميم]

كتبت فأمتعت
شكراً لك
تحياتي

[البديعي]

مشكور
على المعلومه الجيده
تحياتي

[البديعي]

بارك الله فيك
على ما تقوم به
احترامي

[الهامس]

بارك الله فيك
كتبت فقرأت فاستفدنا
تحياتي واحترامي