نِعْمَـة الله وحِكْمـة الله ( من واقعنا

[محمد اسماعيل الرفاعي]

	نعمة الله وحكمة الله إنو بت من دابا تبت كان تقول وعلى الملا : أنا دايره لي راجل مره عندو القرش .. عندو الجنا واخلاقو سمحه مكملا زول مستقر.. لا ضاق عذاب لا بهدله راجل حنين .. في طبعو لين زول مؤتمن .. ما مستكين ينسيها كل رهق السنين بي عطفو دايماً يغمره وفي رايا كان بعض الشباب من قام غشيم فاقد النشاط تب ما هميم يقوم ويقعد زي سقيم واخلاقو مادار تستقيم معسول كلام .. تاجر غـرام يصبح يغازل في سهـام معجب كتير بقوام رهام بيموت عديل في عيون مرام كلما يشوفلو بنيه هـام وما عندو شيتاً أصلو هـام حالتو مايله.. عينو طايره .. إيدو طايله.. واحوالو ديمه مبرجله ***** وجاها العريس الفي الخيال مـا عندو إمكن واحتمال مستور تمام زول عندو مال محمول ووالد كوم عيال نفس الحلم يوم حلمتو زولاً سعيد في دنيتو وعاوز يحقق منيتو وما كان في يوم أصلاً تعيس جابو القدر كايس الأنيس ما الدين محلل أربعه وأبوها قال : مبروك عليك والدبله زانت اصبعه وريحة البخور ملت الفريق واتجمّع الحبان معاهم كم صديق عقدوا القِران والحلوة فِرحت بالرفيق واتمخطرت زينة البنات ما حلمها الكان حلمتو أصبح حقيقه موثّقه ***** وعاشت معاو عيشة السرور مبسوطة تب زي ما تدور تبرِق تضوي كما البدور ما العيشه بس عيشة قصور وما فيها قط أبداً قصور وفي الصفره كم حاكو الطيور وتمر شهور بعد الشهور وفجأه حالا اتبدّلت ما الأولى ديك أُم العيال عِرفت وقامت دجّلت وعملت عمل .. ما اتأخرت والحاج صِبح شاعر بضيق للبيت صِبِح تب ما بطيق بقى زي مكتّف وما طليق ومن دون مشاكل طلقه وعروسنا ما دارت تقول خافت تقول ما تلقى زولاً يصدقه ما الكل عارف كيف حياتا سعيده حلة مرونقه واصلاً هي كان إنسانة شيك دايماً تطل متأنقه لكين كمان حكم القدر وقال ليها لازم ننفصل وخليهو سر ما تحكي لي زول ما حصل إمكن نعود من تاني يتحقق أمل إمكن نطير في يوم نزور كوكب زحل بس إنتي اقبلي بالحصل ومن غير زعل ***** وعروسنا ما استحملت ناويالا رد .. ما استسلمت مـا من حياتا اتعلّمت غشت الشيوخ جابت بخور كتل العمل بقاهو بور رد الظلم مافيهو جور وعريسنا شعشع بقه نور إسبوع وحيد وبراهو جا طالب تحقق ليو رجا وتعود لبيتا مكرمه بس شرطو كان : ما فيش خبر يصل الأهل دايرين نعيش من غير عِلل ما دار نحس يوم بالملل ***** وإسترجعو الماضي التليد وإتلمو في العش السعيد واتمنوا ينعموا بالوِليد يتهنوا بالسعد المديد وكلما صباح يصبح جديد يحسوا بيهو كأنو عيد وكل ما يَعِبو من الهناء بيقولوا : هل .. هل من مزيد ؟؟ ***** يا خِلّي هوي يلاك ندق ناقوس خطر نسأل نفوسنا بِلا وجل وين الخلل؟؟ وين الخلل؟؟ ما الناس خلاص نست القدر صِبحت تتابع في الدجل لامن تعمّقت العِلل واتشتت بعض الأسر والحال صِبِح قط ما بسر وين الخلل؟؟ وين الخلل؟؟ وين الخلل؟؟

[/bor]

شروحات :
دابا تبت : لا زالت صغيرة السن
راجل مرا : رجل متزوج
عندو الجنا : لديه اطفال
ماعندو شيتاً : ليس لديه شيء مهم
مكتّف : مربوط
ينعموا بالوِلِيد : يُرزَقوا بطفلٍ وليد
هوي : للنداء
يلاك : هيا بنا
لامِن : حتى حدث
وإتشتت : تبعثرت

( هذه بعض المفردات التي خالجني ظن إستعصاءها على فهم الإخوة والأخوات الأعزاء )

الخرطوم
الأربعاء 15 / 10 / 2008م

[الخنساء]

اخى الفاضل الكاتب الادبى محمد

يسرنى اكون اول الحاضرين

لما كتبته من روعة المعانى

سلمت ودمت بخير

[حوريه]

خاطره جميله جدا

يسلم حسك ونبض قلمك

دمت بخير

[محمد اسماعيل الرفاعي]

ويسرني أن تعانق أعيني حرفك الموشح بالرهافة والرزانة والشعور أيتها الخنساء

[محمد اسماعيل الرفاعي]

حورية
أسعد دوماً أن أحظى بطلات حرفك الشجي

[زهرة اللوتس]

اخ محمد اسماعيل الرفاعي
خاطرة رائعة والاروع من ذلك
هو بساطتها هي تصل القلب
قبل العين حتى من غير شرح
فيها من السلاسة والعذوبة
الشيء الكثير
تحياتي
وتقديري

[ابومياس]

كم انت رائع يابو ملاذ

نص جميل وسرد راقي وحرف فاخر

دام القلم الممتع ودمت بخير

[محمد اسماعيل الرفاعي]

حورية .. دوماً اتشرف بطلة ( حورية ) من الزمن الجميل .. لك ودي

[محمد اسماعيل الرفاعي]

اخي ابا مياس
وهل يقدر الروعة غير الرائعين ؟

[محمد اسماعيل الرفاعي]

زهرة المغرب
لك ودي وتقديري .. دمت بكل خير .. مشكورة اختي على الإجتهاد