لاتعتذر مانيب من يقبل اعذار(بالصوت)

[الطائر المهاجر]

لاتعتذر ما نيب من يقبل أعـذار= ولا نيب من يخدع بهرج الغواني
ودي اعذرك لكن جـروحي كبار= وودي بشوفك غير عقـلي نهاني
لامن ذكرتك قمت اسجم بالافكـار= ومن كثر صدماتك اجامل واعاني
اسقيتني في بادي الـوقت الامرار= واليـوم جيت تكمّـل اللي لضاني
ما أحتمل جورك كفاني الزمن جار= خصمين ضدّي ليش ربي بلاني؟؟
يا موقـد النيران خفف على النـار= احرقت قلبي وش تبي بالمحاني
اصرخ ونادي وانتظر زين الاخبار= يرجع صدى صوتي يحطم كياني
ما كنت احسّب دورة الوقت لا دار= وما كنت افكّر انطعن منك ثاني
يا قــاتلٍ قـلبي بـلا ذنب أو ثار= تمشي بجنازة واحد وانت جاني
تجينـي تتعــذّر وتلـعب للادوار= لعبه وانا ادري اللعب ماشٍ خفاني
ويـلك من الله كاشفٍ كل الاسـرار= وش كان ذنبي يوم جورك وطاني
ذنبـي احب بصـدق ما نيب غـدار= واللي على قلبي يقـوله لساني
كنك نسيتي اللي مضى يومنا صغار= طفلين نلعب لين وقت الاذاني
ندله سوى طيرين في وسط الازهار= واحميك من زلة فلان وفلاني
حتى كبـرنا وابتـدا حب الاخيـار= من غيرتي ما طيق وجهك يباني
اقف بـذيك الـزاويه تقـل سبّار= وتمشي على مهلك وانا ادري عشاني
ولا من تقـابلنا بدى الدمع ينهـار= ما كننـا شفنا بعض من ثواني
وتبدا السوالف همس في عشق الاطيار= وعيوننا تضحك وترسل تهاني
ونخطط الاحـلام في كل اصـرار= بيت السعاده والأمل والأماني
والخـاتمه اطعن بقلبي بـلا انـذار = ياليت منتي من طعني عياني
هـذي النهـاية واضحه دون انكار= شوفي حدٍ غيري بحبي وحناني
حبٍ بديتـه اشطبـه كن ما صـار= وانتي اعدك مثل من كان فاني

[الأموره]

كم هي جميله هذه الـأبيات

ذكريات و طعنآت ،،

جمعت كل شيء تبارك الرحمن

جدا روعه

صح لسانك و دام نبضك

الف شكر لك

دمت برعاية الخالق

[نجم الإبداع]

صح لسانك يابو عبدالله

احاسيس وشجن

ابدعت ياشاعر

لاهنت

فائق الاحترام

[الطائر المهاجر]

شكرا للفاضلة الأمورة
على كريم الحضور والتفاعل
لاهنتي
تحياتي

[ابومياس]

ابو عبدالله

نص كما عهدتك تفوح منه رائحة الجمال

صح لسانك وبيض الله وجهك

تقبل تحياتي

دمت بخير

[محمد عبدالله البدراني]

العزيز الغالي الطائر المهاجر سلمه الله


الف مليون صح السانك يابو عبدالله


قمه في كل شيء

ماشاءالله عليك

لله دررررررررررررررررك

ولافض فوك


تحياتي

[عايض ابوشيبه]

اخوي الغالي الطائر المهاجر

انت كما النبع الصافي

اللذي لاينقطع

منك نستفيد

وبك نرقى

[الطامي]

الطائر
صح الله السانك واعتلا شانك
دائما مبدع يالغالي
وافي من وافي متمكن
قديمه يتجدد دائما
شكرا لك ولاهنت

[داعي الشوق]

صح لسانك يالطائر المهاجر

جزلة ومعنى جميل وقافية رائعة

صح لسانك مدد بلا عدد

تحيتي لك ،

،،،،،،،،،،،،

[حوريه]

ودي اعـذرك لكـن جروحـي كبـار
وودي بشوفك غيـر عقلـي نهانـي

لامن ذكرتـك قمـت اسجـم بالافكـار
ومن كثر صدماتـك اجامـل واعانـي


نص راااقي ومعني جزل.....

صح لساااااانك على هذا الأبداااااع

لا هنتـــ................. ولا هان مغليك