واضحه من بدري

[شاكـر محمـد]

من سلهمة رمشك ومن ضحكاتك=دوّرت قلبي غير ما هو بصدري
نِشْدِي عيونك وانشديها شفاتك=يمكن خذوه وصار رهن الأسري
ما بينهن ومروراً بوجناتك= آخر علومي عنه وآخر خبري
وفيه احتمال انه دخل بعباتك= وعني توارى ليتني عنه ادري
والا علق بكفوفك وراحاتك= وانتي تأشْري مع السلامه باسري
يرحم أبوك وديرتك وعزاتك= رديه صوبي واكسبي فينا اجري
وبعدين باعلمك شي ٍ فاتك=بس للأمانة شي مو للنشري
تراه فيه جروح كم تتهاتك=من كثرها موصّي يوسّع قبري
اعزّ انا جروحي وأخص الفاتك= اللي ثمان سنين فيني يهري
وأزيد لك حاجه لمعلوماتك=تراه فيه جنون فعلاً مزري
يعني ولو كنتي على نياتك=هو يحسب انك ذايبه له حصري
وهاتك سوالف وامنيات وهاتك=خيال وروايات حبٌ عذري
تصحى عصافيره على همساتك=وتروى وروده من نداك الفجري
ويجول فكره في فضا غمزاتك= حتى انه يسميك ضحكة عمري
ويشوف كل الكون في نظراتك= ويجمّع انفاسك بغرشة عطري
وانتي ولاهو كان بحساباتك=أصلاً تراها واضحه من بدري
وأما شجيع فميزي هقواتك=ما دام عندك كل هذا الفكري
اللي قفز من صدري لبسماتك= ظنّك به يولي نهار الذعري؟
ذي حالته وانتي ومرئياتك = أرجو السماح وقد تبيّن عذري
رديه لكن سجلي بنوتاتك=قلبه رهيّف حيل لكن فطري

[الطائر المهاجر]

امتعتنا بهذه الرائعه
صح لسانك
ولاهنت
تحية وتقدير

[مشعل التريباني]

شاكرمحمد
صح لسانك ابدعت وامتعت
بيض الله وجهك على هذا التالق

[رووبين]

لله دِركَ وَصَحِ لسٌانكَكِ حِتىَ تُرضِىَ عَ هَذاَ الاًبداَعِ


دمَتِ ذخِراً لمَنِ تحِبَ أيهُاَ الفاَضِلُ

[الطامي]

شاكر محمد
صح السانك ملايين
ابدع مميز لافض فوك اخي
شكرا لك

[عبدالله الشويمان]

صح لسانك يا اخ شاكر

قصيده رائعه يارائع

دمت بخير ولا هنت

[داعي الشوق]

صح لسانك و طاب حالك

ولاهنت يا مبدع

قصيده رائعه بكل معانيها

[عادل بوبدر]

صح لسانك
وبيض الله وجهك يا شعر

[الـزلـزال]

شاكر محمد

نص رائع وجميل
من شاعر متميز ورائع في كل حالاته
أبدعت وأمتعت شاعرنا
دمت بخير ودام لنا حرفك
صح لسانك ملايين ملايين
ولك فائق تحياتي وتقديري

[نجم الإبداع]

ياسلام سلم

صح لستنك ياشاكر

ابداع

لاهنت