كــي بــو ردْيــــّـه ( مجارات ورديّه يابوو عبدالله )

[نسناس الهوى]

ابيات كيبورديّـه .. ونت خابر يجي منها القصور وابيك تستر ماقصر منها .. وأستلم :

قبل السلام وقبل كل التحيّه = اهدي سلام الهم للي هويته
اهديه من هميّ ونا اسقيه ريّه = هو من سباب الهم والحق جيته
خذ له من الملبوس بالزين زِيّه = سحر الحكي ماقال والقول صيته
لوّى ثنايا القلب بلسان حيّه = حيّـه تزور القلب و تبيت ميته
منه القمر يشكيه بأنوار ضيّه = وٍدّه يسد النور والود ليــتـه
ون جزت فالوصف ماوفيت شيّه = هذا القمر لا جاك هاليوم فيتــه(1)
قد جاك هالبيت كيّ بو ردْيـّه = وقد جاك هالطبخ لو زاد زيته
وابغيك فالبيت وافي بردّيـــّـه = تردّ لي بيت ٍ على صفّ بيته

-----

(1)ايته : " رح له باللهجه النجديه "

[الطائر المهاجر]

يامرحبا بك والهلا اجمل هديّه = من دون هم وعارف ما شكيته
يوم اني بسنك ونفسي شقيّه = وقلبي مشى دربٍ اشوفك مشيته
الله خلقهن للقلوب الفتيّه = سنّارةٍ من قربها طاح صيته
صيّاد مصيود ويصبح ضحيّه = مسجون قلبه منسجن وسط بيته
ان كان تشكي لا تشكّى عليّه = تحيي جروح سالفه تقل ميته
حلقت راسي فالهوى به بليّه = وخليت دربٍ كنت يومٍ هويته
ودامك وقعت بدون فكر ورويّه= الله يردك من طريقٍ غويته

[نسناس الهوى]

يا سعد حظي بالردود الوفيّه = واغلى هديّـه مالفى القلب ليته(1)
نور ٍ يبان ٍ للذي ينويّ مجيّـه = افدا لفاه اليوم جـزل ٍ فديته
عاش السنين وعاش سنّ الفتيّه = وذوق المراره ماهو لقم الفتيته(2)
يجني الخبر منها سنين ٍ رديّه = يشقى بها المهيوم ريم ٍ هويته
جيت الخبير اسجع بيوت ٍ نديّه = وش مايشور اليوم كله وفيته
للي فتنه الريم عذراء البليّـه = ضوّ ٍ لهبّ تبّاً له اليوم جيته
وابغى يشور الشور مرسول ليّـه = ويعْلم بهالمعلوم كيت ٍ وكيته

-----
(1) ليته : من ليت ، النور باللهجة الكويتيه .
(2)الفتيته : أكلة شماليه معروفه .

[الطائر المهاجر]

شورى تبّعد لا تطب الركيّه = من طبها ملسوع لسعه مميته
فيها حيايا لو وطتها المطيّه = جابت اجلها في ضحى ماهقيته
ومن قال احبك صادقٍ بالطويّه = اثقل الينه ينكشف ماخفيته
هالوقت وقت القرش مابه مريّه= كلٍ يبيع اللي يبي لو بشيته

[نسناس الهوى]

شورك وماقلته وربي الهديّـه = بأبعد عن المفتون لو طال صيته
وختامها سبحان خـلاّق البريّـه = ينصونه العبّـاد في وسـط بيـتـه

------------

صح لسانك ولاهان حرفك استاذي .. كلمات رائعه وفوائد جمه ، اقتبستها من مجاراة ابياتك الجزله
سعدت بذلك استاذي ،، تقبل تحياتي العطره ..

[يزيد النمي]

ياسلام عليكم

صح لسانك يا نسناس الهوى

وصح لسانك يابو عبد الله

تحيتي لكما جميعا

[نسناس الهوى]

المشاركة الأصلية كتبت بواسطة يزيد النمي

ياسلام عليكم

صح لسانك يا نسناس الهوى

وصح لسانك يابو عبد الله

تحيتي لكما جميعا

صح بدنك .. واسعدني مرورك
تقبل تحياتي

أها متوزين فيذا وتاركينا في الصاله لا شاهي ولا قهوه

بس يا زين ما كتبتوا وصحت ألسنتكم ....

[نسناس الهوى]

المشاركة الأصلية كتبت بواسطة أبو الفيصل

أها متوزين فيذا وتاركينا في الصاله لا شاهي ولا قهوه

بس يا زين ما كتبتوا وصحت ألسنتكم ....

صحّ بدنك وتوما الموضوع نوّر والله

وبعدين ماتوزينا طالعتن روسنا .. والقهوه مهيب زينتن لك

[ثار التميميه]

ماشاء الله تبارك الله

روعه

واصلو