زوجتي تزوجت مسيار !!!!!!!!!!!!!!!!

لاصـار خلـك يستحـق المسبـه""سبه ترى العشاق غيـرك يسبـون
لاآبوه لاآبو الحب من قلـب سبـه""لاآبو الغرام اللي يحدك على الهون
يالعـن ابـو قلـب غشيـم يحبـه""ملعون والقلب اللي يغليه ملعـون
آقـول مـن هبـاك ياخبل هبـه""الدون مايسلك معاهم سوى الـدون
عـز الجفـا ولا هـوان المحبـه""ماخوذ من يصبر على الذل مغبون
أظهر قواة البأس والضعف خبـه""ترى الضعيف ضعيف لاطعم لالون
الرأس ماحد يقطعـه غيـر ربـه""آقول عز النفس ماقول لـك هـون
خلـه يولـي لايـذلـك بحـبـه""إبعد وتلقاهم علـى البعـد يدنـون
والا انت لو ترقـد وبالعيـن شبـه""أبرك من اللي يجرحونك ويسلـون
الرجـل عقلـه دائماقبـل قلـبـه""ماهو عمى بالقلب ومفتـح عيـون
لاقدمـوا حبـه تقـدمـت حـبـه""وإن وخروا وخرت والعز مضمون
ترى غـلا هالوقـت هبـه وهبـه""إغنم هبوب الريح لاتقلـب سكـون
لاساعـدك حظـك تغانـم مهبـه""لاترتهي يجيـك يـوم ويصـدون
قبـل يذبـك نـاب الارداف ذبـه""ترى حلاة الرجل طاعن ومطعـون
كم عاشق خلوه مـن غيـر سبـه""يصفق بكف كف مايدري وشلـون
مالـه جـدى ياكـود دمـع يكبـه""عليه سيف الهجر والصد مسنـون
هذا من أول يوم لو دل دربه مادش في دنيا المجانين مجنون
لكن تبع قلبـه وقلبـه لعـب بـه""واليوم يبغا عون ماحصل العـون
روض فؤادك ياإبن الأجـواد ربـه""البيض مايصلح لهن كود فرعـون
وإلا ضعيف النفـس دايـم مسبـه""ودك مساكيـن البشـر مايحبـون
صح لسانك ياطلال السعيد

قصتي قصه واحوالي عجب.. انا ياطويلين العمر والسلامه ومن يوم اني قعينبه وهذا طولي >> ياشر على أخوه الصغير اللي مايطول عروة الباب

وانا طايحن في (الغرام ) والا (الحب ) ماطحت فيه لأني ما اعرف ( اقشم ) وكان ولله الحمد والمنه والفضل يعود الى الله ثم الى المسلسلات المصريه الله لايخلينا منهن
فهي كانت تعرض لنا ان مافي الدنيا مشاكل الا مشاكل المحبين
واكبر مشكله تواجهم هي الماده

ومن هذا المنطلق انطلقت وبقوه في تجميع الدراهم بل وكنت انشب في ( حلدز ) ابوي الين يعطيني ريالين مع انه كان يرفض وبشده بحجة انه ماخلى علينا قاصر وانه عارف اني آخذ من البيت فسحة (صاموليتين ملفوفات في باغه )الا اني بينت له ان هذا حق من حقوقي ويجب ان ادخر ليوم زواجي >> مولم العصابه قبل الفلقه

مشيت في حياتي على هذا النهج والحمدلله تخرجت وتوظفت
وتزوجت من المرأة التي كانت تبادلني نفس المشاعر فالكل منا يموت في الثاني >> مدري وش لاقين في بعضهم ؟

عشنا حياة سعيده وحصه وهيله اخت بدريه والحمدلله جاني ثلاثة اطفال ماشاء الله عليهم كناري ..من شافهم قال ياحظك يا ابووفى.. اما عيالك هذولي.. فعز الله اللي مهيب جايتهم العين أبد.. ولاينخاف عليهم حتى لو يرقدون في الشارع ..والله اللي محدن مفكر(ن) يخطفهم !

وانا اقول بلاكم ماتدرون وش لون جوني ذا العيال ؟
الأوله بنيتي (وفا) الله يصلحها .. ولدتها امها في سيب مستشفى من مستشفيات الوزاره (ماودي اذكر اسمه ) قعدت فيه خمس ساعات يحترون يفضى لها سرير والحمدلله ولدت وطلعت من المستشفى وهم مازالوايحترون هالسرير يفضى لها .

و الثاني ( سالم ) نفصنا نبي امه تالده في متشفى الملك خالد
لكن عيا يستقبلنا ..فهو لايستقبل الا اللي لها ملف او تكون اول ولاده لها واثناء خروجي من المستشفى الا وهي ماصطتن به ..
حتى شوفوا لزخة القير باينة(ن) في دمجته

و الثالث ( عدنان ) هالمره اشكوى لله رحنا لمستشفى أهلي .. وقلنا يالعنبو الدراهم اللي مهيب عازتن راعيها
يوم دخلنا المستشفى استقبلونا ذاك الاستقبال اللي مامثله ويوم استانسنا.. طلعوا فيها وفي جنينها البلا والجلا وماخلوا مرض(ن) ماحطوه فيها ..
لا وقرروا انها ماهيب والده الا بعمليه.. ويوم شفت أن البيعه خسرانه.. فالصراحة المصاريف اللي ابخسرها على الزوجه والجنين ماتغطي الفائده المرجوه لامن هالزوجه ولاحتى من جنينها..عند ذلك اخذتني العزه بالاثم فقلت: يامره الحرمه اللي تموت وهي تالد تراها شهيده

واوقع عشرين توقيع على خروجها من المستشفى وانها تحت مسؤليتي التامه وأن المستشفى لايتحمل اي مسؤليه
عند مغادرتها باب المستشفى
نطلت زوجتي في البيت واروح انقز للمقبره اولم قبرها بسرعه اخاف لاتخيس عندي ثم ابلش بها..

ويوم رجعت آخذها لمغسلة الاموات لقيتها قاعده مافيها الا العافيه ومعها هالجعري اللي تشوفون.. ولا شفنا اللي يقولونه دكاترة المستشفى الأهلي ولايحزنون ( متحسف )

كان عندي حلم يراودني عن نفسي ودي احققه في حياتي .. ودي يصير لي بييت(ن) يضفني انا وبزراني
وارتاح من هالايجار (الدم الفاسد) لذلك حرمت نفسي من اشياء كثيره في سبيل الوصول الى مبتغايىالمنشود ..
لذلك كنا نفطر على خبز(ن) نغطه في الشاهي ..
والغدا رز(ن)على ماجي .. وحذفنا ووجبة العشا من اجل الرجيم وخوفا على ارواحنا من الكلسترول والسكر ..(الا اذا انعزمنا فكنا نضرب بأنظمتنا عرض الحائط ونطبق المثل اللي يقول الحياة فرص فماكل فرصة(ن) تنتعوض)

وطبعا الدنيا معد فيها خير وللأسف طار الكرم مع مهب الريح وصارت الناس تدقق على بعض (فمعدهمب) يعزمون الا اللي يعزمهم واذا عزموك صاروا يناظرونك وانت تاكل ..

علشان تسذا صرنا معد ننعزم الا في الزواجات الكبيره ..
فلذلك كنت اظطر بين الحين والآخر اني امر بعائلتي الكريمه على المطاعم حتى يتسنى لهم ان يتروحو( يتنشقون ) المشاوي والمندي واحيانا اخربها وامر ابهم على المطعم الصيني ووقف عند بابه اللين يقولون عيالي: انطبخنا من الحر خلاص امش تكفى لانسبح من العرق
وانا اقول لهم تمتعوا ياعييلي ابيكم تدرون انكم مانتمب رخيصين عندي.. ابيكم باتسر الى كبرتوا تقولون الله يذكر ابونا بالخير ماخلى علينا قاصر

جمعت مبلغ من المال وأخذت قرضا من البنك وتقسيطا من احدى الشركات وبحثت عن فله علشان اشتريها.. وللأسف لم يسعفني المبلغ اللي معي مما جعلني اظطر الى اني انقز الى (الجفره) واخذ لي(عوض) والعشر باربع طعش وياقلب لاتحزن..
ايضا دخلت في جمعية مع مدرسات فأحد اصدقائي

كانت اخته مدرسه
كذلك بعت موتري( كابرس بقس موديل 87 احمر نظيف مره ومادزد طقه الشاكوش بس ابراء للذمه دزد اندزلبت به مره والمرة الثانيه دزد صدمت به بعير)

جمعت دريهماتي ويا الله جابت لي فله درجها في الصاله لأنها ارخص من المفصوله (الله واكبر تسن المستاجر يسدد الإيجار.. تطلع روح الواحد وأنت اتحداك تسكر تطلعه)

وبما ان علي ديون ومايصفى من راتبي الا حق الخبز والشاهي والرز بس هالمره بدون ماجي ( يا الله الى متى وحنى نمتع ارواحنا ؟)
طرت علي حيله كما تطري على اكثر العرب وهي اني اسجل البيت باسم زوجتي
حيث جيت لزوجتي وقلت لها علشاني احبتس واموت فيتس وما اسقم عنتس ابكتب الفله باسمتس.. بس هاه لاتعلمين احد
( مهوب لله الا علشاني داري انه بيجي يومن ولا اقدراسدد وحينها سأقول للي يطلبوني وبالفم المليان كلوا تراب عندكم المحكمه اشتكوني عليها)

سكنا الفله على خير..وبعد مدة واثناء عودتنا من قصر الأفراح ماش تسن الزوجه متغيرتن علي ! مدري وش طاعونها ؟
حاولت اتميلح واغصب نفسي على مدحها بس ماش المره ما انفلت
فقلت يامره قطتس حامل ومتنسية فيني؟ فردت بقولها
ههههههه قال حامل قال ! وين احمل معه ؟ وانا مانيب اصلي ! ..
الله يخلف عليك الله لوك مثل رجل اختي دايم مرزامهم يصب والخضار نابتن حدره ...مهوب مثل مرزامنا الله يخلف معششتن فيه العصافير!
(ليت الكاتب ماسح هالمقطع وماجاب لنا الفشيله )

عقب هالكلام اللي يسم البدن صار وجهي تسنه ينغز بدبابيس فتهورت لاثبت وجودي وارد على المشككين ..ولكن للأسف كل محاولاتي باءت بالفشل فحاولت تصريف الموضوع بأني مجهد ونفسيتي تعبانه..
بل وفقدت السيطره على نفسي مما جعلني اسب واشتم فيها واسب الساعة اللي عرفتها فيها ..
وهي طبعا ماسكتت لي.. بل ردت علي الصاع صاعين ونصف وثلاثة ارباع ..
بل وقالت: إن تساني ماجزت لك فبيت اهلي اولى بي
فما كان مني الا ان اقول :
على كيفك ترى عندي مناعه &&&على لم الشمل ولا اجتماعه
وتهور صاحب القصه وطلق زوجته فأخذت الزوجه تبتسي
( سبحان الله يصايحن يبن الطلاق واذا طلقن صاحن ثانيه ..صدز ماينعرف لهن )

وهنا المخرج يطفي اللمبات ويولع اللمبات السهاريه
والممثلين يسكتون لحظات من الحزن
عشرة سني وافترقنا في ليله &&&باسباب كلام فارق عشيرن عشيره
لي بنت عمن ماوطت درب الادناس &&&مادنست يوم النسا يدنسني
ضربتها وانا احسب الضرب نوماس&&&طلقتها يوم اخفت العقل مني

طبعا الزوجه ضفت عفشها واتصلت على اهلها يجون ياخذونها لكن امها قالت( طاعونين بريالين ) تطلعين من بيتس ( زرن يبخق عينه )هو اللي خليه يطلع جعل روحه تطلع.. انت نسيتي ان البيت باسمتس؟
وهو ماله الا التبن في وجهه !
( هذا وانا قايل(ن) لها لاحد يدري )

بعد المكالمه رجعت الزوجه شنطتها وجمعت هدومي ( ثوبين وصروال وفنيله ) وحطتهن في باغه وجدعتهن في وجهي وقالت: البيت بيت ابونا والقوم طردونا ..انت اللي قم واطلع من بيتي.. طلعت روحك بلا طلعت روحك .. ( ولاتم )اشوفك مدزبل لم باب بيتي لاكسر كراعينك ..

لفت بي الدنيا وتدزلبت عيوني وطحت على قفاي من هول( الغبينه )اللي انا فيها.. ومسكت قلبي وبغيت اموت..

الا ان كاتب هذه القصه آثر حياتي وأراد ان يبقيني على قيد الحياة مشكورا بل وحنن قلب الزوجه علي زوجها شوي ..حتى قالت ماتهون علي العشره يابووفا وعلشان تدري اني مانيب كفارة بالعشير ..انطق في الملحق فاللي مثلك ماعلى الحريم خوفن منه

بعد مده بل ومن يوم انتهت ( العدة ) اذ بريحة البخور والكادي يفوح في البيت من عقب ريحة البصل والثوم
بل وذا برجل صغير السن( متزكرت ) ومافي مخباته ولا ريال يطق الباب وهذي الزوجه نازلة ومعها البزران
وتنطلهم عندي طالبة مني ان انتبه لهم فهذه الليله هي اول ليالي زواجها فهي تزوجت زواج مسيار ( لاوتقول ادع لي ان الله يوفقني مع ابن الحلال )
العروسه ياهلي وين ودوها &&& خبروا المجبور عن بنت الاجوادي
فز قلبي واحترق يوم ودوها&&& ماترى العرس الذي قطـــع فوادي

اخذ يتردد هذا الزوج بين الحينة والاخرى على زوجتي على حسب مزاجه ما ادري على حسب مزاجها
والراجح والله اعلم انه على حسب مزاجه فلو كان على حسب مزاجها لأبقته كل الوقت عندها

كانت جيات الزوج الجديد بدون اوقات محدده فاحيانا بعد صلاة العشاء ..واحيانا في منتصف الليل ..
واحيانا اخرى في وقت( الصفره )

والمشكله مامعه مفتاح فكان يزعجني اما يعلق على الجرس او بطق جدار الملحق بحصاة
لا واذا قلت له قص لك مفتاح وريحني من غثاك قال : تبي الناس تدري ان معرس مسيار؟
هذا الزوج الجديد لم يكن محبوبا لدى الزوجه فقط.. بل البزران ايضا يحبونه فهو لايأتي الينا الا ومعه (حلاو مصاص) يعطي البزران ثلاث حلاوات ويحسبني في الرابعه فظليمة ولد الحلال شينه..ولو ابن الحلال فيه الخير مانساني
( مهوب صيده الا بلا الأربع حبات بالريال)

وكنت اذا دخل رجل زوجتي البيت شغلت المسجل على
فكرت والمكتوب مافيه حيله &&&وليت الليالي علمتني بالاقدار
وارفع صوت المسجل عن جهده فكانت اصواتهم تضايقني (يالعنبوها تقول له كلامن ماقد سمعته منها في حياتي) ثم ما ادري الا بقولة صك المسجل الله ينزع عمرك ولا طردناك من البيت

طبعا مايكون بوسعي الا الخروج من المنزل وتطليق رجلي في الحاره انا وبزراني (من قدنا في اثامينا حلاو مصاص)
واذا رجعت للبيت القى الزوج الجديد توه نازل ومابعد صك زرته هو وهالصدر اللي تسنه صدر سيد زيان ..فمايكون مني الا ان اقول له رفق(ن) بالبراميل وصك زرتك انت وهالصدر اللي تسنه صدر غرلا وهو يرد علي بقوله اللي مايطول العنب حامضن عنه يقول اجل مثل صدرك هاللي تسنه صدرمحمود عبدالعزيز

لا وياخذ تلفونه ويكلم ربعه بقول :لا الحمدلله لقيناها استعمال حشمه
وقبل مايركب سيارته امسك راس ولدي الصغير من حر ما اونس وادخله عليه من دريشة موتره واقول وين حشمه معه ؟ وهالراس اللي تسنه كورة سله بالله عليك وين هو طلع منه ؟
قال حشمه قال
وصرت كلما جاء رجل زوجتي الى البيت افتح له وانا منزل راسي ولا اقدر حط عيني بعينه ولسان حالي يقول الله يلوم اللي يلوم المرأه اللي نحقد على ضرتها اثرهن لهن مشاعر مثلنا وحنا مادرينا

راحت الإيام وجت الإيام ومثل ماتوقعت معد قدرت اسدد الأقساط اللي علي فخربت ابوالدعوه وصرت ماعاد السدد الا قسط البنك ولاهوب جود(ن) فيني الاعلشانه يقصه من راتبي غصب(ن) من ورى خشمي

اما الإقساط الثانيه فوقفتها وقلت اصلا التقسيط ربا والربا حرام >>هذا حنا نتفلهق نبي من يدينا واذا خذنا الدراهم فأنس انحنا نبي نسدد

.. طبعا كلموني الديانه فقلت ماعندي شي عندكم الكفيل..
كلمني الكفيل افا يابووفا هذا جزاي كافلك ؟ هذي آخرة فزعتي لك؟
او جزا المعروف سبع كفوف !

انا رديت على الكفيل : تسانك تدور الاجر فالاجر عند الله
بعد الشكاوي وسداد الكفيل >> احسن علشان ياخذ درس ومعد يكفل احد

تقدم الكفيل بشكواهـ علي طبعا انا راد بابو الدعوه ..تجيني الماحضر من المحضرين ولا طقيت لهم خبر الين وصلت الدعوه الى الشرطه وركزوا على بابي كم واحد من الشرطه باللبس المدني يحتروني بس اطلع ثم مايردني الا التوقيف
يوم وصلت الدعوه الى هالمواصيل ذبيت مفاتيخ البيت على رجل حرمتي
رجل حرمتي استغرب وقال اجل ناوي تطلع ؟ تعوذ من بليس وخللك في متسانك
انا رديت عليه بقولي : انا عطيتك المفاتيح علشاني معد لي حاجه به لأني معدنيب طالع من هنا الا على النعش
رد علي زوج زوجتي : ايه اشوى تسان نتوهق بالزران ومعد نلقى من يمسكهم الى مني جيت
انا عاد فيني نذاله يوم سمعته يقول تسذا وحسيت ان في بقائي فايده لهم خربتها وقلت علي وعلى اعدائي وطلعت مع الباب ولا ردني الا سجن الملز
وانا الآن في سجن المز انتظر من أهل الخير تسديد ديوني الله يسدد عنهم

مايستفاد من الموضوع

خسرت كل شيء خسرت الزوجه والفله والصدقائي اللي فزعوا وكفلوني بس كل هذوليماتحسفت عليهم ماتحسفت الا على موتري( كابرس بقس موديل 87 احمر نظيف مره وماطقه الشاكوش
بس ابراء للذمه دزد اندزلبت به
مره والمرة الثانيه دزد صدمت به بعير) ياسفاب نظافته

2- قد تقولون القصة مبالغ فيها اقول نعم ولكن الله من زوجه فعل بها زوجها مثل مافعلت هذه الزوجة بزوجها فالنتقي الله في نسائنا وفي اموالهن فكم من معلمه او موظفه اوقل عندها خير (كلها ) رجلها ورماها رمية التسلب لابوه لابو من زوجه
( استوصوا بالنساء خيرا فإنهن عوان عندكم)

3- اثناء توقيع عقود شراء سيارات التقسيط صادف تواجد احد مندوبي المبيعات اليابانيين في المعرض فمسك راسه عندما رأى عقود البيع مما أدى الى زيادة سعر السيارات علينا( ماينلام الموتر ابوثلاثين الف طالع علي بسبعين الف ريال ريال)

4 - نصيحه للي يرجع للبيت متأخر وتافل العافيه لايحاول اثبات الوجود بتأدية واجب قمحاولته حتما ستبوء بالفشل فلذلك ننصح بتغيير التكتيك ومحاولة مقابل الصياح بالصياح تسلم

5 - في اعتقادي ان اكثر الطلاق بأسباب تافه ويتم بسرعه دون تريث أوتفكير .. بل وبدون الطلاق الشرعي ..وهو اذا اراد الرجل تطليق زوجته فإنه يطلقها في طهر ويبقيها في منزله وتتمتع بكامل حقوقها الزوجيه فمتى ماحصل منهما مايحصل بين المرأه وزوجها (كلام مشفر) فيكون هذا بمثابة ارجاعها وان تمت شهر ولم يراجعها فإنه يطلقها وان اراد ارجاعها ففي هذه الحاله يلزمه عقد نكاح ويلزمه مهر اذا ارادة الزوجه ذلك أي المهر اما العقد فغصبن من ورى اذنه

6 - السؤال الأهم لماذا الزوج يعيب زوجته عيانا بيانا حين تقصيرها في فراشه وكأنها معدومة الأحاسيس
بينما الزوجه لاتفعل ذلك بل تراعي مشاعره ..
بل وكيف سيكون شعورك لوحدث لك ذلك؟(الاستفهام للتوبيخ )
اذن عامل زوجتك كما تحب ان تعاملك

[الطائر المهاجر]

روعه ولا هو مستغرب انه يطلع منك هذا
لكن كان وقفت ولا كملت مايستفاد منه ، وتركت للقراء
كل يدلي بدلوه فيما استفاد .
اسلوب مميز لمعالجة مشاكل معينة بطريقة ابداعية
وهذا مانحتاجه في زمان "كم من كلمة قالت لصاحبها دعني"
شكراً من الأعماق
تحياتي الطيبة

[منيع]

ابووفىماعنه خفى
كني قدام وجهك وقاعد تكلمني بصراحة شدتني للنهاية رغم طولها ولهجتها اللي تفوتني بعض الشئ
والمسكين الذي يكون عبرة لغيرة لذالك اعتبرو ياذوي الزيجات

[الخنساء]

شكرا اخي الفاضل ابو وفي
القصه هادفة وواقعيه وحصلت كثير واكثر الضحايا
نساء وهذي حالة شاذة
والله ماقصرت اسلوبك رائع وتسلسل جميل وواقعي
تحياتي وتقديري

[ابو زياد]

ابو وفى كتبت لك معلقة كاملة ردآ وتفنيدآ وتمحيصآ لما كتبته
وكنت ناوي اكفلك واطلعك من سجن الملز ومن زود الطفاقة ابرعص على ((اعتمد الرد السريع )) ورعصتعلى الاxاللي في علو الصفحة وعرفت اني لازم اروح ارقد بس قلت بعلمك اني مريت وبمرمر على كلشن تكتبه
بس راس الولد مع الدريشه حركه

[أم ريما]

اخوي ابو الوفا

والله قصه مضحكه وفيها حكم ما شاء الله عليك

الله يعطيك العاااااااافيه والف شكررر لك

وبأنتظار جديدك الرائع دوما

[صعبة المنال]

بصراحة ومن دون مجاملة
مع انى وجدت بعض الصعوبة فى فهم بعض الكلام الى انها تستحق القراءة والوقوف عندها
حيا الله القلم الى كتب والافكار النيرة
بس اقول جد ترى الفكرة واردعه واعجبتنى بس هل المسيار هو الحل واحلى جملة قلتها
وصرت كلما جاء رجل زوجتي الى البيت افتح له وانا منزل راسي ولا اقدر حط عيني بعينه ولسان حالي يقول الله يلوم اللي يلوم المرأه اللي نحقد على ضرتها اثرهن لهن مشاعر مثلنا وحنا مادرينا

صح لسانك هو كله احساس
هههههههههههههههههه

نريد المزيد من المعالجة لمثل هذى القضايا

تحياتى يا ابو وافى


صعبة المنال

[ابو أنس]

الفاضل ابو وفى.............
ماعنك خفى . والله اني رحمتك وبكيت يوم حطت عندك البزران
وحنقت يوم قابلك وهو مازر زرارره.
(أما استعمال حشمه).......
الله يصبرك بس
أمتعتنا أخي الفاضل ووجهتنا لكثير من السلبيات باسلوب كاريكاتوري جميل وظريف ومحبب
زادك الله من فضله
ولك شكري وتحيتي

أبو وفى

تحية عبقة وردية اللون لقلبك اللؤلؤي <<-- متأثر باللكزس اللؤلؤي

عز الله قصه ما بعدها قصه حلوتن بالحيل بالحيل

شكراً لك

تحياتي يافاضل

المشاركة الأصلية كتبت بواسطة المشرف العام

روعه ولا هو مستغرب انه يطلع منك هذا
لكن كان وقفت ولا كملت مايستفاد منه ، وتركت للقراء
كل يدلي بدلوه فيما استفاد .
اسلوب مميز لمعالجة مشاكل معينة بطريقة ابداعية
وهذا مانحتاجه في زمان "كم من كلمة قالت لصاحبها دعني"
شكراً من الأعماق
تحياتي الطيبة

شهاده اعتز بها سيما انها من دكتور وشاعر وله تجاربه في الحياة

اما مايستفاد فهو بينت فيه الجد بعد ماطرحت الموضوع بنوع من الكمومديا
فأردت ان ابين موقفي
واظن ان القراء قادرين عى ان يعلقوا فمجال التعليق وتبيين المواقف مجال واسع

شكرا اخي واستاذي الغالي على مرورك وتشجيعك لي

ولك خالص تحياتي