القاف فـــن

هذه مساجله بين ابن جدعان وسعود بادي ومجارة للكرناف.

القاف فن وكل فن[ن] على قاف=احاول اعرف موقفي من حروفه
ما دام اله عندي معزه وميقاف=ببذل معه جهدي واقدر ضروفه
واذا بغيت اصف تأملت الاوصاف=والناس كل[ن] تبع شفه وصوفه
واذا بغيت امدح كريمين الاكفاف=ذكرتهم واللاش ممدح كفوفه
واذا قنصت اطلع على كل مشراف=واتشوف عيني ما تيسر،تشوفه
واذا نويت اغوص في موج واصداف=القا الجواهر يوم غيري تطوفه
واذا نويت الخيل فارس وعساف=العاصيه بعدي تقول معسوفه
واذا حصل زله ومنقود وخلاف=تركت للرديان كل الكلوفه
ولو عشت في عزله ومكتوف الاطراف=اخير لي من لقف ناس[ن] لقوفه
والحر تكفيه الاشاره اذا شاف=واذا انعمى راسه تشيله كتوفه
حسب اعتقادي ماعسر شي الاسلاف= وحنا خلفهم والسنين أمخلوفه
للي تبع سنة سبب بيت الاشراف=ومن رحمة الله ما يطري حسوفه
ما قل ، دل ، وللـزهـر فيه قطاف=بشاوره ويزود قطفي قطوفه
شاعر ومعجبني ، وفاهم وعراف=ومن راس ناس[ن] فالزمان امعروفه
يصرف درر، يوم اكثرالناس ينعاف=ريف الخوي والجار مكرم ضيوفه
اسعود بادي بنك صارف وصراف=الله يكافيه الزمان وصدوفه
================
القاف فنً عن فنون العرب كاف "=" سجل عناوين الفخر في كشوفه
ياشاعرً قبلي سعى فيه واطاف "=" اكمل طوافه ست واتبع بطوفه
صخر بيوتً ماتصخر كذا حاف "=" الا لمن قافه بفكرة يحوفه
شاعر بحر ماحط قارب ومجداف "=" يغوص غباتة ويشهر سيوفه
اخذ من بحورة على عرفه اصناف "=" وقمت اتفكر في عجايب صنوفه
الشاعر اللي صدر بيته على آف "="والعجز جابه من صميمه على اوفه
جيت وعقبته ياجماعه بمغراف "=" مرً زلال ومر طينً غروفه
الشعر ضيف لمن عنى فيه لاضاف "=" يكفي قليله عن كثيراً تعوفه
اسير له خطوة ويمشي لي آلاف "=" يلقى هنا شاعر بحضرة صفوفه
ورجلً مثل منصور حاوي وشواف "=" يجني من الجزلات دايم شفوفه
من ينتظر من وقتنا كلمة انصاف "=" تابس شفاه ولايشاف معروفه
مثل الشجر ياقف وله ظل واطراف "=" بس المصيبة من يقدر وقوفه
مات الضمير ولحفو فوقه لحاف "=" ومات الكلام الصدق فينا بخوفه
انص الذي بالمرجلة والكرم ناف "=" والا الردي لوقال جعله ذلوفه
لاجاء نهاراً فيه خفه وخفخاف "=" تقول تضرب وسط قلبه دفوفه
ناظر يمين وقدام وايسار وخلاف "=" ناس حذفت ناسً وناس محذوفه
===============
ياسيد الكلمه ويامطوع القاف = ويابحر زاخر البحور مغروفه
ويانايف(ن) بالشعر والشعر بك ناف = في نايف(ن)يزري الردي لا ينوفه
ابدعت في قولك وجاوزت الاتحاف = بغزاره المعني وقوة حروفه
ولو كان مابرقك علينا بكشاف = شوف الحيا يجذب عيون[ن] تشوفه
ويجبرك في روضه تمشى وتطاف = وتقطف وتنظم ماتحالى قطوفه
هذا وانا شاعر وللرمي هداف = اصيب مركوز الهدف وسط جوفه
وليا نويت اغزي تباعدت الانكاف = ودون الهدف ما اقنع ولا ابغى النكوفه
ولاني على المقفي شفوق(ن) ومزهاف = يعرض ونعرض لا عطانا كتوفه
واشهر كما يشهر على الخيل كرناف = بالعزوه اللي بالفعول معروفه
بسيف(ن) يجز الراس من فوق الاكتاف = من فعله ابصار الخصوم مخطوفه
والشعر يامنصور يسّمو بالاهداف =وتراجم السان العرب ومن حروفه
وللشعر يامنصور ناقد وعراف = صراف(ن) وعراف بفكره يحوفه
ومن يرمي الجمله بلاميز وجزاف = شوفه بعيد ولاتدانا بشوفه
ومن كان مثلك مايبي نصح واسعاف = يكفيه مد كفوف غيره كفوفه
وانته وانا نمشي على نهج اسلاف = اللي مواقفهم تجلي الحسوفه
والخاتمه اسلم ودم يابن الاشراف = ياشاعر(ن) منك البحور مغروفه

[سهيل الشمري]

مدارس شعريه هنا

لله دركم

وبيض الله وجهك يالغالي



سهيل

[الخنساء]

صح لسانك شاعرنا بن جدعان
قصيدة جزله المعني
من ينتظر من وقتنا كلمـة انصـاف "
" تابـس شفـاه ولايشـاف معروفـه
مثل الشجر ياقف وله ظل واطـراف "
" بس المصيبـة مـن يقـدر وقوفـه
رااائعه سلمت وسلم حرفك وشعرك
وسلم قائل الابيات
تحياتي

[أم ريما]

صح لسانك

ابيات جميله

يعطيكم العافيه

تحياااتي لك

الشاعر ...........ابن جدعـــــان

جميلة هذه القصــــــــــــائد
وجزلة

بيض الله وجهــــــــك

وصح لسانك

[أصالة تميم]

الشاعر القدير إبن جدعان يعطيك العافيه على القصيده الحلوه

لك تحياتي

[نسناس الهوى]

هنا تجمع الكبار ..

لاهانت حروفكم .. وصحّت السنتكم جميع ..

[الريم]

الشاعر /ابن جدعان

صح لساانك وسلمت يمناك على هذه القصيده الحلووه

ويعطيك الف عافيه

[سناعيس]

الشاعر القدير /ابن جدعان

عزالله انكم مدارس للشعر ننهل منها ونرتوي
مساجله ومجاراة بأبيات قويه ومعبره لله دركم

تحياتي

[نجم الإبداع]

ابن جدعان


صح لسانك ولسان سعود

حقيقه بدع ورد جزلين

تشرفت بقرأتهما



تحياتي واحترامي