ما للعرب والعز من ماض الأدهار !!!

[محمد عبدالله البدراني]

السلام عليكم ورحمة الله وبركاته

اصافحكم بهذه المشاعر والخاطرة العابرة بعد طول انقطاع عنكم هنا بمنتدانا الغالي

واتمنى ان تحوز على النزر اليسير من رضاكم وان تشاركوني الشعور فإن رأيتم بها هنات او تجنيات فخبروني

والعذر مسبقاً لتقصيري معكم :

اذا افترضنا شخص حاكم وجبار = والناس قيد أمره ورهن احتماله
يحكم مصير الخلق مومن وكفار = كل البشر يفعل بهم مابداله
ولا احدٍ ايعارض حكمه بكل الاقطار = الكل يذعن له ويخشى سؤاله
عن أي شيءٍ كان والفلك دوار = مافات شخص اليوم بكره يناله
غاشم مهيمن سلطه وال الاقدار = الواحد المعبود بأمره جراله
ماراد من قوة وهيأ له اطوار = يعيشها والفكر حقق مناله
وش قولكم ياللي تديرون الاشوار= هل اكتمال البدر يسبق هلاله
والا ان راي المختصر غير الاشهار= وكل على الثاني يعقد حباله
من المجتمع للبيت للفرد منهار = واضحى مقام الرجل سكبة عقاله
عميت بصاير امة الضاد واحتار = فيها الطبيب وكل خيّر ال حاله
معزول مايقبل كلامه ولو غار = على مروات العرب والشكاله
امة تعيش الوهن وتمثل ادوار= حتى غدى إرثٍ تعيشه سلاله
والا جرى بدميها خزي ٍ وعار = والعروة الوثقى بلفظ الجلاله
والفكر ما يعجز يفتّق للأبكار = ابكار فكرٍ ماعليها وكاله
الله امركم بالتدبر والإبصار = وامعانكم للفكر بأمر الرساله
تدبروا لأمر ٍ يخلص هل الكار = من سطوة اهل الغرب يا أهل البساله
لا للخنوع ولو خشى الطير ماطار = لكن عزمه رف به ثم شاله
عن الوطاء وحرب الفضاء عبر الاقمار = وحرب العرب فوق الوطى مع عياله
واطهر بقاع الأرض وأعز الأمصار = هي عزكم ياهل الفتن والضلاله
من غيرها بالشرع يحكم وبتار = سيفٍ على العدوان في كل قاله
كر النظر ياللي تمعن بالأشعار = درة بحر ماهي بوسط البقاله
ومضات فكر ٍ موجزه نفحه ونار = قبل تجف الصحف دوزن مقاله
ولو ترفع الاقلام او يسدل ستار = نقش الصخر يبقى وتبقى الأصاله
يامن غذاء روحه وفكره بالاسفار = العلم نورٍ والظلام الجهاله
والحل عند كبار والفتنه اصغار = ماللحشو والزمل والا الزماله
واليا تعلى القرد في روس الاشجار = للكل بانت سؤته واختلاله
ياهل العلوم العلم ماهو بالانكار = ولاهوب. فتوى .. العلم صعب ٍ مناله
ليش التصادم والتعالي والاصرار = على الدسائس والفتن والجهاله
ولاينعذل راع الهوى صار ماصار = موت الجواب احيان فحوى سؤاله
والا الحقايق واضحه سر واجهار = مار الهوى زاد الشرار اشتعاله
وصارت محطات الفضاء البس والفار = حتى غدى للهرج والمرج هاله
والمرجفات بكل ديره وفي دار = والحر شاف الضيم لو قيل داله
يا من غزيتم للقنوات فجار = شاشة قنوات العرب جيش باله
مؤاخرات جيوشكم عبر تيار = جيشتم المومس والهّتم آله
وان خيالتكم زرق الاعيان شزار = يا عنك مايملى نظرهم حثاله
وانتم رضيتم نظرة الدون والبار = رواده الأ غبى والأغنى بماله
ماللعرب والعز من ماض الأدهار = تّباع فرس وروم قبل الرساله
وسدتم بهدي المصطفى خير الأخيار = وضيعتوا الدين الحنيف ومجاله
وعدتم الذلتكم توابع الكفار = هذا جزاء التفريط هذا نكاله
لا لا تلوم الوقت يا موجد اعذار = العيب قل الدين واخطاء رجاله
والحق بيّن ماعلى وجهه غبار = والظلم كم ظالم عن الحكم ازاله
ولو افترضنا الوقت حاكم وبوار = من عادة اهل الظلم كره العداله

*********** محمد عبدالله البدراني**********

[الطائر المهاجر]

كتبت فأبدعت
جزلة من راس جزل وشاعر مبدع
صح لسانك ولا هنت
تحياتي الطيبة

[الطامي]

صح السانك بو عبدالله
رائعة كشاعرها
شكرا لك

[حي الضمير]

حي هالشوف ابوعبدالله
والحمدلله ع السلامه
ولافض فوك
ابدعت
وعوااايدك

[طوفـــان]

قصيدة وافية وتبين مانعيشه للأسف

ياهـل العـلـوم العـلـم مـاهـو بالانـكـار
ولاهوب. فتوى .. العلـم صعـب ٍ منالـه

لـيـش التـصـادم والتعـالـي والاصــرار
عـلـى الدسـائـس والفـتـن والجهـالـه

ولاينـعـذل راع الـهـوى صـــار مـاصــار
مـوت الجـواب احيـان فحـوى سـؤالـه

والا الحقـايـق واضـحـه ســر واجـهــار
مــار الـهــوى زاد الـشــرار اشتـعـالـه


هالأبيات لحالها تلخص الواقع ..

بارك الله فيك وسلم فكرك ومنطوقك أخي الشاعر أبو عبدالله

تحيتي لك

[منيع]

جزل ومبدع
كل الشكر لكم
تحياتي

[الراقي]

امتعتنا بهذه الرائعه
صح السانك الوف

دمت بمودة

[محمد عبدالله البدراني]

اجزل الشكر والثناء لمروركم الكريم


ولي عودة اليكم فرداً فردا



تحيتي وتقديري

[هترل]

هالله هالله
صح لسانك يالبدراني ماتعاقب الليل والنهار
نص جزل وفاخر لله درك ولافض فوك يالامير

تيحاتي وتقديري

[داعي الشوق]

صح لسانك و طاب حالك يا جزل

.. الله يصلح الحال يا بو عبدالله .

و ليل العناء يجلاه نور الصباحي

وصح لسانك مدد ولاهنت