رباعيات العياش !!.

[عبدالكريم العياش]

هنا رباعيات مختاره لقصائد فوريه لم تكتمل ولأني احسب ان لها مدلول ومعنى قوي

وضعتها هنا وهي اخر ماكتبت تقريبا !!!.

لاتغرّك دمعة الرجل العطوف = ولايغرّك طيبة القلب اللطيف
كان جد الجد انا رجل معسوف = للشدايد بي جبل عالي منيف
ولي مساري ذيب ماداخله خوف = وكان شح الوقت بي للناس ريف
ماهوى قلبي سوى الناس الضعوف = وما عشقت من البشر الا النظيف

مبااااااااااشر

توي تحرّرت من نيرك وطغيانك = يالعنبو جد وقت(ن) فيه تحكمني
ماتستحق اتعب احساسي على شانك = من راس خشمك وفي منّه تكلمني
وش انت ومن هو تكون تطيّر اعيانك= بدري على من مثل شرواك يهدمني
عاملتك بطيب وسوس فيك شيطانك = مسكين اذا كان تنوي يوم تهزمني

ف

و

ر

ي

تتذكرين ايام لعب الهريبه ؟ = في حي اهلنا يسعد الله لياليه
من ذلك التاريخ وانتي حبيبه = يالله عسى الجنّه لهاذيك الوجيه
حيث انّهم ضموا لقلبي نصيبه = وفيك امتلى عمري سعاده وترفيه
لولاك في دنياي ياهي مصيبه = يامرتبتني في حنان (ن) وتنزيه

تجليّات

فوريه

لحبي

الخالد

رجل الاماني كسيحه والدروب بعاد = وعوامل التعريه سوّت سواياها
مايكسر الظهر الا فقدي الاولاد = والا بقايا تعب دنياي اقواها
متى على الله نشوف احبابنا عوّاد = من قبل ماتفضح اشواقي خفاياها
لاالحال حاله ولا حتى البلاد بلاد = من دونهم تفقد الايام معناها

كيبورديات

شوق

صباحيه

الجوري اللي تبلّل من مضاليلك = كاني سبب فيه الله لايوفّقني
يالله تبسّم وهذا الصدر منديلك = الدمع من عين عطفك حيل يحرقني
واناالذي لاتردى الوقت اشكيلك = واليوم حزنك كلا قلبي وأرقني
ياليت تشكي لي الاحوال وابكي لك = فديت قلب(ن) برمش العين علقني

مبااااااااااااااااااشر

وبوح صادق

الوحده احسن من اعز القرايب = أفرح واحزّن بين نفسي وبيني
يقوله اللي عاش كل التجارب = اللي بخاصرته طعون السنيني
ياطالب الفزعات مات المحارب = لو شفت انا المضيوم غمّضت عيني
عن شاربي تنذل كل الشوارب = وتسقط جباه الغير وارفع جبيني

والله اني منكسر لكن أكابر = كسرتي اهون ولاكسر الجميع
وكل كسر(ن)له مع الايام جابر = دام انا متعود وبالي وسيع
صابرا غصب(ن)علي لازلت صابر = والا من يصبر عن الوجه الوديع
حرّتي حطيّتها بنزف المحابر = يالرحيل المر في فصل الربيع

رباعية البوح العميق

يكفي ياشعاع النفس مليّت العنى والبوح = ومليّت البياض اللي احسّه في شراييني
ابي شيطان يزرعني رصاصات لحمام الدوح = ابي غدر وابي قسوه وابي حقد (ن) يعبيني
مادام ان المسارح كلها تمثيل مابها روح = ابي اضحك مثل غيري وامثل دور وجهيني
يكفيني عمر ابيض مضى . خلّف كثير جروح = اوزّع للفرح باقات مقابل نار تكويني

ثورة انقلاب مبااااااااااشر على الذات

عليك لو ثارت خلايا الغضب = القلب مايطاوع اضايق رقيقين
تبقى عزيز (ن) واحترامك وجب = يكفيني انك من عربنا العزيزين
باقي على إثرك بقايا تعب = يزول انا متأكد بظرف يومين
ومن بعدها يحرم عليّ اللعب = مايصاحب الاجرب سوى ناقص الدين

الله يسعد يام احمد صباحك = الله يذكر وجهك الطيب بخير
ياللي خفضتي بالموده جناحك = اللي ابيه يصير لاقلته يصير
شلتي جراحاتي على كف راحك = ينام بااهدابك ويصحى الضمير
والله لو يسعى الزمن في جراحك = انّي لااخلي المملكه كلها غير

[يوسف الشقران]

يالسلام عليككك كل مقطوعه اجمل من الاخري


تسلم وساقراها الان مره اخرى .. واخرى

[عبدالكريم العياش]

ماعليك زود اخوي يوسف
وسعيد انها نالت رضاك
تحياتي واحترامي لك

[احمد القاسم]

صح لسانك اخووي على هذه القطرات الجميله شاعر جميل

تحياتي لك

[الطامي]

العياش
قطرات رائعة جداى
لافض فوك اخي
شكرا لك

[داعي الشوق]

صح لسانك أخي عبدالكريم

منوعات رائعة جدا

سلمت و لاهنت

[عبدالله راشد الثويني]

ياسلام عليك يالعياش
وافي ومبدع بكل حالاتك
صح لسانك مليون ولا يكفون
وعساك ع القوّه
تقبـّـل تحيتي

[عبدالكريم العياش]

المشاركة الأصلية كتبت بواسطة احمد القاسم

صح لسانك اخووي على هذه القطرات الجميله شاعر جميل

تحياتي لك

ياهلا اخوي احمد
صح بدنك وماعليك زود
تحياتي

[عبدالكريم العياش]

المشاركة الأصلية كتبت بواسطة الطامي

العياش
قطرات رائعة جداى
لافض فوك اخي
شكرا لك

ياهلا الطامي
صح بدنك وماعليك زود اخوي
تحياتي

[عبدالكريم العياش]

المشاركة الأصلية كتبت بواسطة سعود سعد العتيبي

صح لسانك أخي عبدالكريم

منوعات رائعة جدا

سلمت و لاهنت

هلا سعود
صح بدنك الله لايهينك اخوي وربي يسلمك من كل شر
تقبل تحياتي