هزعت غضيض الورد

[محمد بن عمار]

سمان الهرج تطربني وانا ، من قبلها محزون
ويهيّضني جزيل القاف يشعل نار الأشواقي
تواقد في محيط الصدر ، لاعج شوقي المكنون
على روض الحشا نار ٍسناها يحرق احراقي
وفاحت دلّة المعنى ، على جمر الحشا المدفون
ومن عذق الفراق ،، أقدع مرار الصبر ،، ترياقي
ومسباح القصايد ناظمه ،، من فكري المشطون
على الإبهام ، والشاهد ،، اقلّب ،، جملة اوراقي
تصافحني ،، تصاريف الزمان ، بكفها المدهون
خضاب ٍ نصفه اهموم ٍ ونصفه ضيق وارهاقي
على اللي شفت لون الورد في وجناتها يبدون
وبياض اللولو اللي فى الثنايا يشرق إشراقي
تهزّع ،، بالمشي ،، مع نابيات ٍ ،، خلفها يشكون
كما هزعت غضيض الورد ، في ظل ٍ على ساقي
متى مالدّت بطرف ٍ ، حجاجه ،، بالشعر مقرون
كفخ قلبي ،، مع النظرات ،، وسط الصدر خفاقي
على سدرة غدير الوجد ،تبكي ، الفاخته بلحون
يجاوب نوحها الخفّاق بأقصى روض الأعماقي
وانا لولا الحيا واخشى يقولون ، الفتى مجنون
وحق اللّي بنى ،، من فوق خلقه ،، سبع ٍ طباقي
لأجهز ،، عدّة الغازي ،، واصبّح ،، ديرة المضنون
واطفّي ،، من لهيب ٍ ، داخل ، الوجدان ،، حرّاقي
ويحلى النوم من بعد اللقاء ، بالصاحب المزيون
ونفتح ،، للوصل صفحة ،، على عهد ٍ ، وميثاقي
محمد بن عمار

[الطائر المهاجر]

صح لسانك يالقرم
جزل ومتمكن
لاهنت
تحياتي وودي

[منيع]

جزل ومبدع وممتع ياابن عمار
تحياتي لكم

[داعي الشوق]

تهزّع ،، بالمشي ،، مع نابيات ٍ ،، خلفها يشكون
كما هزعت غضيض الورد ، في ظل ٍ على ساقي


الله الله يابو عبدالعزيز

صح لسانك مدد

[الصمت الثائر]

اخي محمد بن عمار
كعادتك مبدع ورائع
صح لسانك مدد بلا عدد
تحياتي

[الطامي]

صح السانك
جزل ومبدع
لاهنت

[نجم الإبداع]

صح لسانك ابو عبدالعزيز

[داعي الشوق]

قصيدة جميلة تستحق العوده لها
صح لسانك ياجزل