عجـــــاج الوقــــــــــت

[احمد الجريفاني]

ياهل العرف عقب اليوم مالي صبر=ولا لعيني هناتن فـي لذيـذ المنـام
وقتنا يحسد المييـت بوسـط القبـر=وش يبي في حياتن كل ابوها عـدام
المريح الذي بـاع الحيـاة وظفـر=صار همه رضى ربه وصلى وصـام
ما حدن فكر بويـلات يـوم الحشـر=استوت عندهم كلمة حـلال وحـرام
السروق امتهنـي والعفيـف بفقـر=والصدوق امتعني والكذوب ابسـلام
والنحييف يضيع بجنب واف الهبـر=الجهامه تضييع كـل قرمـن همـام
البس البشت يصبح لك مقام وقـدر=افصخ البشت ما يبقى لشخصك مقام
الغني لو هو اهبل قيل كلـك نظـر=اشهدوا في نبوغه واسعيـن الافـام
والمسيكين ضايع مـا لليلـه فجـر=وان شكى قيل له يكفيك كثر الكـلام
وصنفوا كل نسل ادم نظيـف وكـدر=تقل فيه ادم(ن) ثاني طلع عقب سـام
من مسك صنعتن تغنيه نززل حدر=ومن قعد ينطر الشرهه له الاحتـرام
راح عصر الرجال اللي تفك الاسر=راح عهد الفحول الطيبيـن الكـرام
صابهم من عجاج الوقت ضيقة صدر=وخيلهم لو تهده ما يثور العسـام
كدرتهـم تهاويلـن بتـال العـمـر=اشهد ان الذي في وضعهم ما يـلام
من يلوم الذي باالفرش ماتـوا قهـر=شاقهم شيلة الشلفى ولبـس الحـزام
ذا زمانن حرام يعيش فيـه الصقـر=والرخم مشبعاتن في مكـب القمـام
ومن كدح يحلم ان فكر تملك قصر=وحاملين الاقامـه يعتلـون السنـام
والوفا عقب ماهـو جاريـن كاالنـهر=صار مثل الذهب نادر مقاسه غرام
آه واشيب حالي من صـروف الـدهر=ناشف الريق ملتاعن وروحي تضام
اكتب ابيات شعري والمحاني جمـر=انتخي با القصايد يوم طـال السقـام
شعر ما يشرح الواقع فلاهو شعـر=وشعر مايوقف القاعد مجـرد كـلام

[عدنان كريزم]

صح لسااااااااااااااااانك يالغالي


ولا هنت


ابداع يا احمد

[وليدالبسطي]

مشاء الله عليك


يااحمد ابدعت



نص شامخ



يحمل الكثير من الحكمة والجزالة




تحياتي وتقديري


اخوك

وليدالبسطي

[الطائر المهاجر]

شعر ما يشرح الواقع فلاهـو شعـر
وشعر مايوقف القاعد مجـرد كـلام
لافض فوك
هكذا هي رسالة الشعر
صح لسانك مدد بلا عدد
ولا هان راسك
تحياتي وتقديري

[احمد الجريفاني]

فريد الحرف غالينا سلمت

[سناعيس]

المريح الذي بـاع الحيـاة وظفـر
صار همه رضى ربه وصلى وصـام

الشاعر الجزل أحمد الجريفاني
صح لسانك ولله درك
لاتأتي الا بالسمين ولاغرابه
لاهنت


تحياتي

[نجم الإبداع]

الله الله


صح لسانك يااحمد الجريفاني

مصافحه وافيه من شاعر ملهم

لاهنت

تقبل مروري

وتقديري

[حي الضمير]

صح لسانك وعلا شانك
قصيده جزله من راس جزل
ولا عدمنااااك
أجزل التحايا والاحترام يامميز

[منيع]

ماشاء الله
حكم وشموخ
مااسعدني بهذه الابيات التي تثلج الصدر
وتوقظ الحس الادبي وتقول بكل قوة لايزال الشعر في خير
شكرا لك ولحرفك الناصع
تحياتي وتقديري

[احمد الجريفاني]

وليد البسطي اطال الله عمرك على الخير