الذيب والبنشر (قصيدتي الفكاهية )

[احمد الجريفاني]

لي ثلاث ايام مـا جانـي كفـر=
واعنـا قلـب المبنشـر واعنـاه =
واقفـن مابيـن رفحـا والحفـر=
بنشر الحنتور واستملـس سمـاه =
طحت في خطن جلد كلـه جفـر=
ارض جردا ما نجا حين وطـاه =
ارض صبخا ما بها ريحة شجـر=
تستحي تسكن بها حتـى السفـاه =
السبير انشـق مـن مـدة شهـر=
وضاعت الرقعه اكيد احدن خذاه =
وين مفتـاح العجـل مالـه اثـر=
من سرق عفريتتي هـذا عصـاه =
يوم حل الليـل والنـور انحسـر=
ابتدا ذيبـان يستعـرض عـواه =
دق لي سرحان ناقـوس الخطـر=
كان هو جيعان خلانـي عشـاه =
بي جلادة بدو لو ربعـي حضـر=
ما يخوفني عـواء ذيـب الفـلاه =
بتت وسط الجيب والدنيـا مطـر=
جايعـن بـردان يـا الله النجـاه =
ليلتـن خرمـس تمنيـت القمـر=
لجل اشوف الذيب وشـو منتهـاه =
ليلتن شلتى والامعط مـا شعـر=
لا قعد بارضه ولا ربـي هـداه =
المطـر والبـرد لقاهـن ظهـر=
ناوين لـه واحـدن ربـي بـلاه =
عنده انه با العـواء يرمـي درر=
وشهي الدبره لمن حظـه رمـاه =
قمت ابسحب فروتي طاحت حدر=
فوقهـا مطارتـي منكـب مـاه =
ليلتن من طولها صـارت عمـر=
ما تفيدن قولتـي ويـش السـواه =
صرت اهيجن لين ما شق الفجر=
منحشر هلكـان وسلاحـي قنـاه =
احمد الله يا عـرب ربـي ستـر=
النهار ارحم مـن الليـل وشقـاه =
يوم صار ضحي مديـت النظـر=
المطر كل الـذي حولـي مـلاه =
صارت الصبخا من الديمه بحـر=
من نوى يمشي تعثر فـي خطـاه =
سرت مشمل يا عسى حين يمـر=
عشر كيلو يمكـن اكثـر باتجـاه =
مومنن يا خوك في حكـم القـدر=
واعرف الله ما يخيب من رجـاه =
عند اذاني تقل بـه شـي يهـدر=
استدرت وقمت اشاور با العبـاه =
احمد الله ساق لي راعـي شفـر=
اجودي با الحيل ركبنـي معـاه =
موتـره مضبـوط لعنبـو الفقـر=
ودي ادري بس من وين اشتـراه =
قلت هذا جمس قال اسمـه همـر=
شد في دترويت ماهو في مـراه =
الاكيد انه مصنـع مـن حجـر=
كان هو مية سرنـدل مـا كفـاه =
ضاع جوعي تقل شبعانـن هبـر=
صرت امددح فيه واشكر بخويـاه =
قال وين انت امتعطل يـا بشـر=
قلت هذي جررتي سيروا حـذاه =
جيت للماخوذ يـا وجـه القشـر=
قـال هـذا موتـرك رديـت اه =
المعاون قام فـي لمـح البصـر=
حربث وهمهم اظـن انـه قـراه =
مادري وشلون قالوا بـا الكفـر=
ادخلوا بـه سيـم قالـوا ذا دواه =
اسحبوا جيبي شوي عـن الحفـر=
قال لي حرك قبل يدمـس مسـاه =
قلت عشتو دربكـم كلـه خضـر=
جاوب اتبعني ورحت اسحب وراه =
النصيحـه للـذي ينـوي سفـر=
التهقـوي علـة القلـب وعمـاه =
شل معك قربه وشل خيشة تمـر=
وشل معك عده من الفه لين يـاه =
وشل معك شوزن وكبريت وسمر=
مخطين من راح من دون خويـاه =
اعتبر هذي نصيحه مـش امـر=
مثلكـم يفهـم وقصـدي ماخفـاه =
لا تضيع التجربه عنـدك هـدر=
الذكي منهوا يترجـم مـا قـراه =

[نايف عليان الذويبي]

هههههههههههههه كل الشكر وصح لسانك هههههههههههه

[الطامي]

الجريفاني
صح الاسنك
الله يعينك
الليل والذيب او مطيح بالقليب
ههههههههههههههههه
فكاهية من جد
لاهنت اخي

[الطائر المهاجر]

سلامتك ماهذي الرواية الصحيحة للي حصل لك
الشهود يقولون انهم لقوك ذبحت الذيب وجالس تشوي في لحمه وتاكل وتهيجن
قدعت بالذيب فجريّه= من بعد ما كان بي ناوي

الين جوك وصلحوا سيارتك

صح لسانك ودام ابداعك
مع أطيب تحياتي

[بنت العز]

ههههههههههههههههههههههههههههه
صح لسانك اخوي
قصيده خفيفه وحلوه
يعطيك العافيه

[احمد الجريفاني]

نايف الذويبي شكرا جزيلا يا الغالي

[منيع]

ابيات طريفة ورائعه
شكرا لك
تحياتي وتقديري

[داعي الشوق]

هههههههههههههه

صح لسانك يالشاعر المميز

احمد الجريفاني

قصيدة رائعة بالحيل

سيناريو و حوار رائع

تصوير مباشر للحدث

صح لسانك مليووووووون يالجرفاني

لاهنت

،،،،،،،،،،،،،،،،،،،

[رفيعة الشان]

الله
طريفه جميلة شاعرنا الفاضل
ابدعت وامتعت
صح الله لسانك
ولاهنت

[دايود صالح الخلف]

استاذي / ابو فراس

صح لسانك ولاهنت
ههههههههههه

كان هو جيعان خلاني عشااه !!

لله دررك

تحيتي