الشاعر عبدالله بن العاصي الجربا

[داعي الشوق]

*
الشاعر : عبدالله بن العاصي الجربا من شيوخ شمّر* يقول :

لاصار بشتك مايلحف قرابتك
لفّه و خلّه مع عباة الحليله

الناس ماتنظر لوجهك وصورتك
لاصار ثقل الحمل ماترتكي له

ترى المراجل وانت نايم تعدتك
وراحت لمن حملك وحمله يشيله

واحذر مقصّك لايعود لّلحيتك
واحفظ كلامك لايجي فيه عيله

ودليل عقلك لاتكلمت هرجتك
مثل السراج ومثل نور. الفتيله

والناس ماتغفر مع الوقت غلطتك
ارفع مقامك عن دروب الرذيله

ترى لسانك هو علامة كرامتك
ومن يخطي الجزله يصيد الهزيله

واحفظ فروض الدين فيها معزتك
والزم كتاب الله وسنّة خليله

واعرف حقوق اللي من الديد غذّتك
من قبل ماتردم عليك النثيله

امّك تراها من مفاتيح جنّتك
حافظ على المفتاح بِأيّة وسيله

كم ليلةٍ تسهر على شان راحتك
عسى جزاها في الجنان الظليله

وخدمتك للوالد علامة رجولتك
لامات ماتلقى مكانه بديله

لشيبته رباك ولاهو ب ذاخرك
يبيك ترقابه براس الطويله

حتّى ايش لو تنثر على القبر دمعتك
مادام كفّك في حياته بخيله

وعلى خوانك لا تمارس شجاعتك
اخوك عضدك ماتحصّل مثيله

للضيف رحّب حين ينزل بساحتك
وكرامته واجب عليك وفضيله

اعطيتك الموجز وعلمي سلامتك
يكفيك عن فلم الف ليله وليله

وترى المنايا يمّ غيرك تخطتك
وموعدك معها واليالي قليله

هذي نصيحه وانت راجع مسيرتك
واعرف طريقك لايجي فيه ميله

واحذر عدوٍّ في طريقك يباغتك
وبرقٍ يجنّب عنك لا تستخيله

يا الله طلبتك في الخواتيم رحمتك
ماغيرك احدٍ كلّ كربٍ يزيله.

^^^^^^

[الطائر المهاجر]

كلام جميل لكن في عصر الماده قليل من يتقيد بمثل هذه النصائح
صح لسانه
وشكرا على النقل
تحياتي

[منيع]

(ودليل عقلك لاتكلمت هرجتك)
الامام علي عليه السلام يقول
تكلموا تعرفوا ، فإن المرء مخبوء تحت لسانه
ابيات رائعة وجزلة
شكرا اخي داعي الشوق لنقلها لنا
تحياتي لكم

[داعي الشوق]

المشاركة الأصلية كتبت بواسطة الطائر المهاجر

كلام جميل لكن في عصر الماده قليل من يتقيد بمثل هذه النصائح
صح لسانه
وشكرا على النقل
تحياتي

الله يعين يابوعبدالله..
العفو ولاهنت

[داعي الشوق]

المشاركة الأصلية كتبت بواسطة منيع

(ودليل عقلك لاتكلمت هرجتك)
الامام علي عليه السلام يقول
تكلموا تعرفوا ، فإن المرء مخبوء تحت لسانه
ابيات رائعة وجزلة
شكرا اخي داعي الشوق لنقلها لنا
تحياتي لكم

العفوو ابو حمد
سلمت ولاهنت

معليش بسوي اقتباس وضغط تعديل

[الطامي]

ياسلام على الحِكم النادره
سلمت اهي داعي على اتحافنا بها
ولاهنت