بي أم دبليو Bmw

[سعيد مقبل الأكلبي]

راكب اللي صانعينه في مصانع هتلر=وارد البي ام دبليو والبلد الالماني
افخم شعار المواتر فوق خشمه لبتر=كنّه زميّم هنوفٍ خدها ملياني
كن ماطوره قعودٍ باركٍ في المنحر=مالي الكبوت لازودٍ ولانقصاني
اثنعش بستم تعاون في جنوبه لا احتر=لااشتغل قامت تخابط كنها ديباني
لانصاه معزّبْه واقبل عليه وكبّر=قال بسم الله على بدْيك من الشيطاني
وان لمس بابه فتح له كل شي مسكّر=بصمة ابهامه مبرمجها على البيباني
وانحنى قُدمه دركسونه تقول مكسّر=باسطٍ عنده كفوف الشكر والعرفاني
والكبينه تبتسم له بين عاج ومرمر=ودها تاخذ طويل العمر في الاحظاني
رايحٍ جو الغماره طيب عود وعنبر=مابعد مرّت عليها ريحة الدخاني
قدمه الشاشات فيها كل شي محضّر=ماعليه الا يوازنها على الميزاني
واشتغل حسه تقول انه بريق مخدّر=مايبيّن شغله الا هزة الشكماني
واشرقت شمس الضحى من نوره اللي نوّر=مثل برّاقٍ سرى ليله على الصمّاني
عشّق النمره ولاكنه عليها ما اصبر=مايبي الاول ولايصبر بعد في الثاني
مايبي الا راحته لامن قيره دقّر=لاخذا الخامس وطالت سجة الميداني
فرّه السواق من فوق الكباري وافتر=فرّة النمر الجويع وشايف الغزلاني
وارتخى خشمه تقول انه بعِلم مخبَّر=طايره فالليل الاسود مالها جنحاني
انحذف مثل الشهاب اللي ولع هم جمّر=باجدٍ ليل الظلام بضوّه الفتاني
ما يوكَّد منه كود اصطب نوره الاحمر=لاتهيّا له رفاعٍ في بعَض الاحياني
سايقه لاكان يسرع مايطب المخفر=هيبة الموتر تخلّي صاحبه سلطاني
كنه مسوّي حجابٍ في عيون العسكر=لاوصل عند العساكر غمّضوا الاعياني
بين اساطيل المواكب حاضرٍ ومقدّر=فارهٍ فيه المدايح مالها حدّاني
ماركبته غير مره وحده وماتذكر=حالمٍ به حلم ليل وفيه من صحّاني
موترٍ حتى حضوره في المنام معبّّر=علموا عبد اللطيف وعلموا الحمراني
لاحضر راعي القصيده هرجهم لايكثر=الحقايق ثابته والمجتمع فهماني
راعي البي ام يكبر والهقاوي تكبر=من يسوقه مرةٍ مايمدح الياباني

[الطائر المهاجر]

سلمت وصح لسانك
واعتلى شأنك
نص رائع من شاعر رائع
لاهنت ياسعيد
دمت بخبر

[نفحات حساسة]

لا هنت ياسعيد
وصح الله لسانك اخوى..

[صعبة المنال]

التميز يفرض نفسه
حضور انتظره
صح لسااااااااانك

صعووب

[ترانيم المطر]

الشاعر القدير سعيدمقبل الأكلبي

صح لسانك مدد لا عدد

لقد أسعدني تواجدي هنا

حيث الإبداع والمتعه

دمت ودام تميزك

[صوت الإحساس]

صح لسااانك



القصيدة فكر وقاق وروح



روعه لله درك

[الطامي]

سعيد ا|لأملبي
صح السانك ملايين
شوقتنا للبي ام دبل يوووووووووووووووووووووووووو
كلمات صيغتها ووزنها يسوى الذهب
جزلة من جزل متمكن لافض فوك
شكرا لك

[منيع]

ياسلام عليك
تصوير وابداع
يستحق التميز
بارك الله فيكم
تحياتي

[عدنان كريزم]

واشتغل حسه تقـول انـه بريـق مخـدّر

مايبيّـن شغلـه الا هــزة الشكمـانـي

============================== =========

والله مبدع يالغالي

هالبيت هذا في حركه شعريه جميله

[الـزلـزال]

ماركبتـه غيـر مـره وحـده وماتذكـر=حالمٍ به حلم ليـل وفيـه مـن صحّانـي

سعيد الأكلبي
رائع رائع شاعرنا في معانيك وفي وصفك
أبدعت وليس بغريب عليك الأبداع
رعاك الله ونولك كل أحلامك
صح لسانك ملايين ملايين
ولك فائق تحياتي وتقديري