شاورت لي باليمين(بالصوت)

[الطائر المهاجر]

شـاورت لي باليمين وضيّع القلب اتزانه = ليتها ما شاورت لي كان سالم من بلاها
درةٍ من صنع ربي مشيها ثقـل برزانه = صوّبت قلب المعنى من وميضٍ من سناها
عاقلٍ في الدرب أمشي مالي بْطرق الشطانه = أدري دروب المحبة ويل من يركض وراها
بين عقلي والعواطف حرب بين انسه وجانه = ومن سهام الظبي أرجف جاهلٍ قوّة مداها
قمت اثقّل كل خطوه مظهرٍ بعض الذهانه= لكن بْقلبي جحيمٍ ما قوى صالي لضاها
تنتظرني في هدوء وطرفها يرسل حنانه = لين صرت بْلا شعوري جنبها اسمع نباها
قلت حاضر وش مرادك .. قالت ظروفي أمانه = اجبرتني للمسير لغاية مالي سواها
شايبي في البيت طايح والدوا تْعذّر مكانه = قلت ابمشي للشميسي رحم ربي من بناها
جيتهم قالوا مخلّص وهقوتي هذي لعانه = شوف عيني الأجنبيّه تنعطى ويركض وراها
وما معي حق التكاسي فالفقر جامح حصانه = وبيتي بْعيدٍ ورجلي تشتكي مما عناها
لو توصلني لبيتي ما على مثلك مهانه = فالشويب في انتظاري .. تكسب من الله جزاها
خذتها والقلب يخفق خايفٍ بلوى زمانه = لاني محرمها ولاني راعي تكسي لو خذاها
وجهتني للطريق بلحن اعذب من كمانه = يدخل بقلبي ويسقي روح تشكي من ظماها
واسرق النظرات عجله كودي افهم وش كيانه = غصن بان لا تحرك حركت روحي معاها
ما الومك يا قليبي رحت وطيٍ في فلانه = يشهد الله ما رأيت بْكل عمري في حلاها
ان لمحت الرمش واقف مثل من جرّد سنانه = يرفع الغطوه ويكشف نور ربّي في بهاها
لمعة الألماس توضي لا عقيق ولا جمانه = مبسمٍ والشهد ريقه فيه لجروحي دواها
شمس بالخدّين تعكس ورد والنرجس وزانه = شمس قدّامي وشمسٍ في المرايه لاتضاها
كلمةٍ منّي ومنها .. وابتدينا بالميانه = "حدثيني بالأماني" .. قلتها ابنزع حياها
" منيتي القى وظيفه ورجل يعطيني حنانه" = ردّدتها ودمعة بالعين تكشف عن شقاها
جامعتهم خلّصتها من سنين ولا ضمانه = والرجال اليوم صعبٍ تفهم اسرارٍ وراها
وابتدت تشكي وانا اشكي وكل يشكي من زمانه = موتري باقساط حلّت ونفسي تبحث عن مناها
الفقر ياكبر عيبه فالرجل ما له مكانه = والمره خطرٍ عليها لامن ابليسٍ غواها
وانتهى فينا الطريق لبيت يحتاج لصيانه = بيت طينٍ وسط حاره والفقر لونه كساها
وشايبٍ واقف ببابه يجتلد واضح جنانه = يوم شاف البنت تنزل بالعصى يصلخ قفاها
قلت ياعمي ترفق .. وابتدا يغلط لسانه = كلما حاولت اشرح .. قال تسكت ياخناها
خفت من شره وانا اشخط ..قلت مالي بالمهانه= كان لي فيها نصيبٍ يوم اسعد في لقاها
وبعد عامٍ جيت ادور علي افهم بعض شانه = قالوا الشايب توفي بعدما البنت ابتلاها
يوم زوجها غصيبه لشايبٍ كبره لعانه = يطلبه قرشين واوفى ..باعها وهذا اشتراها
وجرها للبر ترعى بين بعرانه وضانه = وآخر الاخبار مرضت ما اشترى حتى دواها
وانطلق مدري بروحي دون عقلٍ او فطانه = اسأل الرعيان وامشي لين ما جيت لحماها
والتقي الشايب منوّخ ..قلت ياعمي امانه = وينها والا توفت .. قال "يا ليتي معاها"
وابتدى يبكي عليها مثل طفلٍ بالحضانه = وهلت دموعي وعيني ما سبق وان فاض ماها
"اطلب الغفران للي ما عرف قلبه ملانه = كيف انا اجبرت ابوها يبيعها ولامن حماها"
" ثمّ اعذّبها بليّا ذنب واخون الأمانه = حتى مرضت ثم ماتت واستراحت من شقاها"
"ومثل شوفك صرت مقعد والشلل مطلق عنانه = ربي امهلني ولا اهمل ..والسبب كنت بعماها"
من ظلم لابد يندم لو تضاحك له زمانه = وكل زوجه كالأمانه اكسب بْعمرك رضاها

[الأموره]

يا سلام ،،

من جد يا سلام ،،

روعه هالقصيده تبارك الرحمن ،،

و قصتها روووووعه ،،

بس محزنه ،،

صح لسانك و علا شانك ،،ا

الف شكر لك ،،

دمت برعاية الخالق ،،

[ابومياس]

هادفة هادفة هادفة

يابوعبدالله كعادتك لاتاتي الا بالراقي

صح لسانك ودام حرفك

دمت بخير

[الطامي]

ابو عبدالله
لاهنت وصح السانك
انها من القصائد المهمه في عصرنا هذا
والذي تعالج فيه قضية الطمع لدى الغير
نسأل الله العفو والعافيه

[داعي الشوق]

قصيدة رائعه من شاعر رائع

كأنها مسلسل عاطفي يسبح في خيال الابداع

تحياتي وإعجابي ،،،

[نجم الإبداع]

صح لسانك يادكتور

والله نص يلامس شغاف القلوب لنبله

لاهنت

تقبل مروري

وتقديري

[منيع]

ابيات رائعه
بارك الله فيك
تحياتي لكم

[ياسر عبدالرحمن الخالدي]

من ظلم لابد يندم لـو تضاحـك لـه زمانـه
وكل زوجه كالأمانه اكسـب بْعمـرك رضاهـا


الله الله الله ياطائرنا

جميل ما بدعته جميل والله والاجمل ارفاقك للصوت بالنسبة لي حلّت كلمات كثيرة

الله عليك ياشاعر

[زهرة اللوتس]

الشاعر الطائر المهاجر

من عمق الروح

خلف أروقة النبل

وبأريحية العشق

استطعت ترجمة

اروع سيمفونية البوح

اسعدني ان اكون بين

عفوية همسك ورقة حرفك

همسات ذات عطر رقيق

اختزل الصدق والشفافية

دمت شامخا





زهرة

[النهج المختلف]

الشاعر الرائع الطائر المهاجر ,, ,,

الله الله

صح السانك يابوعبدالله ياسلام عليك وصف جميل ورائع ,, ,,

من شاعر يمتاز بالجزالة والصور الشعرية الرائعة ,, ,,

لاهنت والله يعطيك العافية يامبدع ,, ,,

تحياتي وتقديري ,, ,,