لو ما الهواء

[عبدالعزيز البليهد]

بسم الله الرحمن الرحيم

السلام عليكم ورحمة الله وبركاته

كثيراً ما يعاني المواطن العادي من الأمراض والأكثر منها معاناته عند مراجعة المستشفيات

حيث المحسوبية والواسطة وهذه القصيدة تعبيراً عن ما تمرون به

(الله لا يحيجينا للمستشفيات ويغنينا عنهم بالعويفيه).

لو ما الهواء من فضل رب المخاليق
محدٍ تنفس مثلنا لو دقيقة

ضفوه شرهين الريا يا مشافيق
ولو تختنق كل الحياة إبحريقة

مار الله أعلم بالنفوس المطافيق
اللي سعتها تلحق الناس ضيقه

مريضنا يشرف على الموت ويويق
محدٍ ربع له لو تعالا شهيقه

ينظر بحاله عقب ما نشفت الريق
وحب الخشوم وكل كلمة رقيقه

متى على الله يشعر الطب ويفيق
إن الامانه للاطباء وثيقه

الواسطة تنفذ مع العسر والضيق
يرقابها الباطل متون الحقيقة

المعرفة عز الرجال المطاليق
ترفع ولا تاطا البشر في طريقة

وهضم الحقوق البينه بالمعاليق
ياكبر جرح الضيم محدٍ يطيقه

لرضاك يانجد الغلا والخفافيق
اسوق لك روحي فديتك عقيقه

استعذب العلقم ونا كنت ماطيق
إلا حلاك اللي تسلسل رحيقه

[منيع]

صورت واقع غير حضاري ولاانساني لشريحة يتوجب عليها الكثير من التعاطف وليس المحسوبيه والواسطة المقيته
شكرا لهذا الشعور منكم
تحياتي

[نجم الإبداع]

صدقت ياعبدالعزيز

وصح لسانك على المصافحه الوافيه

جزل

لاهنت

تقبل مروري

وودي

[سعيد الصاعدي]

الاخ الفاضل / عبد العزيز البليهد
صح لسانك لاهنت
متى على الله يشعر الطب ويفيق
إن الامانه للاطباء وثيقه

نص شعري رائع
من شاعر رائع
تسلم ويسلم فكرك يالغالي
تحياتي
أخـــوك
س / ص

[الطائر المهاجر]

صح لسانك وفكرك
ولا هان راسك
جزلة وهادفة
تحياتي

[ابومياس]

صورة لكل مسؤول

البليهد بيض الله وجهك

وصح لسانك مدد بلا عدد

نص هادف وجزل من شاعر جزل

دمت بخير

[سناعيس]

متى على الله يشعر الطب ويفيق
إن الامانه للاطباء وثيقه

الواسطة تنفذ مع العسر والضيق
يرقابها الباطل متون الحقيقة

الاخ العزيز عبدالعزيز البليهد
صح لسانك وبيض الله وجهك
اجتماعية رائعه وتحقي الواقع
لاهنت

تحياتي

الشاعر الغالي بن بليــهــد

صح لسانك والله لايهينك

قصيدة اجتماعية ...تحمل معها هم نعاني منه كثيراً ..

الواسطة تنفذ مع العسر والضيق @@ يرقابها الباطل متون الحقيقة

ابدعت .... وتقبل تحياتي بالغالي

[الخنساء]

الواسطة تنفذ مع العسر والضيق
يرقابها الباطل متون الحقيقة

المعرفة عز الرجال المطاليق
ترفع ولا تاطا البشر في طريقة

وهضم الحقوق البينه بالمعاليق
ياكبر جرح الضيم محدٍ يطيقه

لرضاك يانجد الغلا والخفافيق
اسوق لك روحي فديتك عقيقه

صح لسانك ولاهنت

ابيات شامخة

سلمت ودمت بخير

[محمد عبدالله البدراني]

صح السانك ياعبدالعزيز البليهد وعلا شانك


ومليون صح السانك ولايكفون


اخي عبدالعزيز حضورك دائما مشرف ولاينقصه الا تفاعلك مع الاخرين


فان من يمرون على مشاركات ويؤازرونك من حقهم ان ترد الثناء لهم وكما ان من حقهم ان تمر على مشاركاتهم


لاعدمناك يابن الاوصل الطيبه


وبيض الله وجهك


تحيتي