الى سعادة المشرف العام .........حفظه الله

سعادة المشرف العام بعد التحيه والاحترام

ارجوا من سعادتكم منحي اجازه بدون راتب لمدة اسبوع وذلك لغرض اداء العمره والله يحفظكم
مع العلم اني راح اجيب ربطة مساويك هديه لسعادتكم مع جركلين ماء زمزم
وباقي المشرفين راح اجيب لهم كميرات الي فيها صور مكه مع بعض الالعاب المسليه
لسيدات المنتدى (وقريض)لباقي الاعضاء.

تحياتي دعواتكم

متفائل جدااا

[أم ريما]

اخوي متفائل جدا

تروح وترجع بالسلامه والله يتقبل منك مقدما

بس اهم شي الهدايا لا تنساها


يعطيك العافيه وتحياتي لك

[الريم]

عمرررره مقبووله ان شا الله مقدمااً يعني

وان شا الله تروح وترجع لنا بالسلامه يا رب

[الطائر المهاجر]

تروح وترجع بالسلامة
بس مافيه داعي للمساويك ، لأن ماعندي سنون ...
وفقك الله
وعمرة مقبوله
تحياتي الطيبة

[سناعيس]

أخي متفائل
عمرة مقبوله ان شاء الله لك ولمن معك والله يردكم سالمين غانمين
والله الله بصادق دعواتك لنا

والهدايا بعد ترى مانسامحك اذا ماجبتها ( وعد الحر دين ) بالنسبه للمشرف هات له بدل المساويك معصوب هو اللي مايحتاج أسنان والباقين لاتنساهم بعد

بانتظارك

مـاشـاء الله .. تــبـاركـ الله ..

شكلي وصلت متـأخره .. هـنـا !!



ياليتي لاحـقـه .. عـلـيــه ..

عـشـان أقـول لـه .. يدعي لي ..



تـقـبـَّـل الله .. طـاعـاتـكـ ..

وأعـادكَـ .. سـالـمـاً .. غـانـمــاً ..

لـ إخــوتـكَـ .. في .. الـ فـطـاحـلــه ..

/

مـسـاويـكـ الـ مشرف ..

حـول لي .. واحـــد .. مـنـهـم .. ..

ونصـهـم .. لـ .. ذيـب ..

والـ بـاقي .. للي .. باقي له سنــون ..

عمرة مقبولة

وتروح وترجع بالسلامة يارب

واذا بتجيب قريض جيب لين مو قاسي اوكي الله لا يهينك

شكرا للجميع والله يتقبل منكم صالح الاعمال ..والحمدلله كانت العمره ميسره مره ولافيه زحمه وبصراحه
الي عنده عجوز تعورها رجولها ولاشايب على حبه ونص يروح الحين لانه انسب وقت للي محركاتهم مش
ولابد (بالنسبه للهدايا قلت مافيه داعي استبدلناها بدعوات يمكن تكون احسن وانفع ومجاني)
واحلى مافي الموضوع انا جالس ادعي ومي تدعي معي وقول اللهم وفق اعضاء الفطاحل ومي معي وتقول
امين اول مره مشتها والثانيه سئلت قالت ياوليدي اول مره اسمع بالدعاء كم مره رحت مع ابوك الله يرحمه
ماعمري سمعت بالفطاحل ..وش سالفتهم وعلمتها بالسالفه وضحكت قالت والله احسبهم مجاهدين جدد بفلسطين.

[الطائر المهاجر]

"ولابد (بالنسبه للهدايا قلت مافيه داعي استبدلناها بدعوات

نقهويك وإلا شارب لبن؟؟؟ الظاهر إنك من اهل البيزه!!

والله ماني عارف منهم اهل البيزه بس اذا انت شايف كذا ابشر بسعدك يابوعبدالله..
والظاهر اني بطالبك بالحق .
بس ابي اوضح لك شي انا ماعرف اهل البيزه بس اذا ودك تعرف انا منين اسئل سناعيس
ويقولك.....