رفعت صوتي كلهـم صارو أذناب=قصرت صوتي واب

[بنت النور]

رفعـت صوتـي كلـهـم صــارو أذنــاب=قصـرت صـوتـي وابـتـدوا بالطـلايـب




قلت الصراحه .. قالو الناس كذاب
كذبت .. وسموني أمير الحبايب


واجهتهم .. لكنها ثارت أعصاب
جاملتهم .. وأصبحت عاقل وصايب


عاندتهم .. وأنفتحت بوجهي أسباب
سايرتهم .. وأقفت هذيك السبايب


فضحتهم .. وأصبحت مذنب ونصاب
سترتهم .. شنوا علي الحرايب


طلبتهم .. وأنصك في وجهي الباب
عطيتهم .. قالو لي يا ابو الوهايب


رفعتهم .. وأرتفعت أرقاب وأشناب
نزلتهم .. صار أسود الراس شايب

بنيتهم .. حطو لي أسوار وحجاب
هدمتهم .. قالو حرام الخرايب


شديت .. وصار كلهم ربع وأصحاب
وأرخيت .. وخلو حبل الأيام سايب


أقبلت .. وصارو كلهم دوني أحزاب
وأقفيت .. وصارو كلبوهم قرايب


داويتهم .. قالو لي الجرح ما طاب
جرحتهم .. قالو لي الجرح طايب


حبيتهم .. قالو لي الحب غلاب
كرهتهم .. هلت دموع وسحايب


واصلتهم .. لقيتهم مثل الأجناب
هجرتهم .. قالو لك ايام غايب !!


رفعت صوتي .. كلهم صارو أذناب
قصرت صوتي .. وابتدوا بالطلايب


غيرت شكلي .. قالو رائع وجذاب
رديت شكلي .. قالو إنسان خايب


ياقلب لاتشره ولاتبدي عتاب
خل العتب عنك وخل النشايب


مافيهم اللي يستحقون الإعجاب
لو شفتهم كتلة غموض وعجايب


من لا أفتهم درس الليالي ولا تاب
يموت ما يفهم ولاهو بتايب


ومادمت ساري والقمر عنك ما غاب
لاعاد توقف لو تثور الهبايب


ما انت الوحيد اللي مشى الدرب مرتاب
غريب وتمشي في زمان الغرايب





الشاعر
فالح الغشام

[الطامي]

نعم وهي كما قال الشاعر :- الناس لايعجبها العجب دائما
والكمال لله سبحانه
صح السانه
ولاهان من نقل

[بنت النور]

شكراًعلى حضورك المخملي الهادي..
شكراًعلى تواجدك العذب المحفز للإبداع.
لك من التحاياأسماها

[ساهر الليل]

وان طاحت الغيمه على كل مرقاب ... صار الهوى غلاب واللول ذايب



صح لسان شاعرها

ومشكوره على النقل الرائع

بروعة حضورك وتميزك في الانتقاء

تقبلي تحياتي

[بنت النور]

شاكره حضورك متصفحي
وتكتب لكِ الاجر
ننتظرجديدك
دآمَ لَنآ عَطآئُكــ ..