من مجرب

[نافع بن محمد البويت]

نصيحه

أحد(ن) على كسب المراجل لحوحي=واحد(ن) قصر من دونها مارقاها
وحد(ن) عن الدنايا بوجهه يشوحي=يغضي ونفسه تمنعه من حياها
كم واحد(ن) لأسرار غيره فضوحي=من ساعته تلقاه ينشر نباها
ناس لها فطنه وفهم ووضوحي=تقرا لك أفكارك بحدة ذكاها
حذراك لا تجعل لسانك جموحي=يكثر من الزلات و تبلش بـ ذاها
والوالدين خلك معهم سموحي=لا تشغلك دنياك وتركض وراها
وخلك مع ربك صدوق و نصوحي=وقم بالفرايض لا تهاون فـ داها
الطيب يبقى والا غيره يروحي=ومن يفعل الجودات يلقى جزاها
ومن عاش يبني بالتمني صروحي=يمسي ويصبح حاجته ما قضاها
والمجد ما حازه كثير السدوحي=ومن لا بغى الطولات يقعد بلاها

[الطائر المهاجر]

هلا بك اخي الكريم
النص جيد ولكن فيه بعض الأخطاء المطبعيه
والإملائيه ، ارجو تدقيقه
من جهة اخرى فالنشر في الفطاحلة يتطلب
الإسم الثلاثي الصريح ، وروابط نشر الأعمال
السابقة في المنتديات الأخرى ، لمعرفة المزيد
ارجو الرجوع للتعليمات في قسم الإستقبال
ارحب
مع أطيب التحيه

[نافع بن محمد البويت]

شكرا اخي الكريم على ملاحظاتك فعلا هناك بعض الاخطاء الاملائية
لا يوجد رابط للتعديل اما بالنسبة للاسم الثلاثي كيف استطيع تعديله شكرا مرة اخر ى

[الطائر المهاجر]

فقط ضعه هنا
مع روابط نشر قصائدك السابقة في مواقع اخرى
سواءا بهذا الإسم او بأسماء مستعاره
اما بالنسبة للقصيدة فيمكن اعادة نشرها هنا بعد التعديل
لنقوم بإحلال النسخة الجديدة محل القديمه
تحياتي

[الطائر المهاجر]

صح لسانك وفكرك
جزلة من راس جزل
القصيدة في معظمها جيده
يمكن
والوالدين خلك معهـم سموحـي
افضل قراءته كما يلي
للوالدين وخل وجهك سموحي

لاهنت
ويامرحبا بك
مع أطيب التحية

[سناعيس]

صح لسانك يانافع
وبيض الله وجهك
على هذه المصافحة الجزله
وياهلا بك ويامرحبا

تحياتي

[نافع بن محمد البويت]

شكرا اخي الطائر المهاجر على متابعتك وأتقبل كل ملاحظاتك بصدر رحب

[نافع بن محمد البويت]

صحت ابدانكم جميع شاكر ومقدر تجاوبكم الله لايهينكم وكلكم ذوق

[عبدالعزيز البليهد]

صح لسانك اخوي وجزاك الله خير على النصايح

[الخنساء]

صح لسانك ولاهان راسك

ابيات جميلة

سلمت ودمت بخير