زرعت زرعٍ ماه من دمي وعرقه بالظلال

[نشمي المويعزي]

اعزائي رواد هذا المنتدى العريق اعتذر لكم عن الانقطاع واطرح بين أيديكم هذه الابيات لعلها تنال شيء من استحسانكم

حبيبتي ما للعمر قيمه ليا قل الوصال=وانتي لك اكثر من ثلاث ايام وانتي غايبه
هل تعلمين إني بعد غيبتك صايبني هبال=ماعاد اميز بالأمور المخطيه والصايبه
اجتاحني جيشٍ من التفكير ياسمح القبال=جيشٍ مايهزم من كثر عتاده وكتايبه
استوطن بعقلي وصار العقل دار الاحتلال=والله يسامح هجرك اللي يعتبر سبايبه
القلب ينزف يالغلا والحب يصرخ لك تعال=يصرخ لك انقذني من افكار الزمان السايبه
والعين مسهرها الوله والقلب مافيه احتمال=إن ماتضمد من وصالك مابرت صوايبه
وأنا على بعض الأمال اعيش ياكل الأمال=وأقول في نفسي لنفسي مانسي حبايبه
اخلق من الاعذار مايمكن ولا يمكن يقال=واروي ظما كبدٍ من اشواق المحبه ذايبه
وليا ذكرت إن الزمن مهما يباعدنا وطال=إنه كذا طبع الزمن لكن مصيره جايبه
اخذني الحب الحقيقي لآخر حدود الخيال=حتى تخيلته معي وجروح قلبي طايبه
وإلا الحقيقه والحقيقه مايجي فيها جدال=مهما تخيلته معي تبقى الحقيقه خايبه
زرعت زرعٍ ماه من دمي وعرقه بالظلال=وإن هب ذعذاع الهوى ماياصله هبايبه
مايعرف الماء والهوى والشمس واملاح الرمال=مايعرف إلا تربةٍ بين الحنايا رايبه
ينمو وانا اقول الثمر باقي له ايام وليال=في كل يوم أقول يمكن تستوي رطايبه
ولا دريت إلا انها تفهق غصونه بالشمال=وتمد لي بيمينها حلو الثمر واطايبه
من لامني في حبها ماشاف ربات الجمال=ولا بعد عاش الحنان ولا عرف عجايبه
أنشهد إني ذايبٍ في حبها والحال حال=وأنا ادري إني يوم ذبت إن البنيه ذايبه

https://twitter.com/nashmi_almoyazi

[كظيم]

الله الله الله

نشمي المويعزي
سلمت وصح لسانك وكلك يابعـدي
ابيات في قمة العذوبه والجمـال
قصيده جزله ووافيه ابدعت فيها يالغـلا
اطربتني حد الثمالـــه لله درك
تقبلني وتقبل مروري المتواضع لاهنت
ودي وتقديري

[سناعيس]

الله الله
صح لسانك يانشمي
ولاهنت

تحياتي

[منيع]

مبدع ومميز
شكرا لك
تحياتي لكم

[الـزلـزال]

نشمي المويعزي

بوح في قمة الجمال
من شاعر متميز ورائع في كل بوحه
أبدعت وأمتعت شاعرنا
دمت بقرب من تحب ودام لنا حرفك
صح لسانك ملايين ملايين
ولك فائق تحياتي وتقديري

[سعيد عوده الحويطي]

قصيده رائعة من شاعر مبدع صح لسااانك مليوووون ولا يفووون تحياتي لك اخي الكريم

[حنان الكون]

نص مميز ورائع
أبدعت وأمتعت
صح لسانك ملايين ملايين
ولك فائق تحياتي وتقديري

[نشمي المويعزي]

الأخ كظيم لاهنت يالغالي

شاكر لك مرورك العذب

صح بدنك وتقبل وافر تحياتي ,,,

[نشمي المويعزي]

سناعيس

صح بدنك واشكرك على المرور ودمت بخير

[نشمي المويعزي]

منيع

صح بدنك يالغالي ولا هنت

تقبل ودي وتقديري