( ياهيه )

[سناعيس]

أخواني وأخواتي الفطاحلة الكرام
لإحساسي بالانقطاع عن البوح
حاولت أن أجد لنفسي العذر
بكتابة هذه المتواضعه وطرحها بلا تنقيح
والتي آمل ان تجد القبول والاستحسان

ياهيه ياللي في سويداه مخفيك=عن كل مايوذيك حب ونجاعه
ليه التجافي يابعد عين مغليك=وانت تعرفني صرت عندك وداعه
وشفيك تقسى ياريش العين وشفيك=هذا دلع يازين والا لكاعه
ما احتاج لاخطه ولا منك تكتيك=جيتك انا كلي وكلي قناعه
انت الطبيب اللي مريضك يناجيك=عندك دواء نفسي وطب ومناعه
وعندك علومي والقلم دوم ينبيك=وعن غيرك اعلومي يشح بيراعه
مالي غناة عنك لاني بأراضيك=وخارج حدودك فاقد الاستطاعه
ومهما تباعد ياحبيبي مساريك=غصب علي اتبعك ماهي براعه
وامشي معك ماوين تمشي أجاريك=أيضا ولا أرضى فيك أية شفاعه
وأغار حتى من ظلالك يباريك=وصرت اتمنى طيحته وانصراعه
مركب غرامي راسي في موانيك=لاهتز موجك ياهوا البال راعه
من قو باسك مركبي لاوقف فيك=هبط لك الصاري ونزل شراعه
كل المشاعر تضطرب لك وتفتيك = عني ويعلن خافقي لانصياعه
المنطق اللي في حدوده يطرّيك=يجبرني أطيعه وغصب اتباعه
يكفيني اشوفك عسى الله يخليك=اطرب على صوتك وأهوى إستماعه

[عذب القوافي]

صح لسانك سناعيس

نص وافي من وافي

لله درك يالغالي

تقديري ,,,,,,

[مبروك بن ماضي]

الاخ الفاضل الشاعرالكبير / سناعيس
حضور يروي الذائقه..وحروف راقيه
ابدعت وامتعت بهذه الدره الرائعه بكل المقاييس
صح لسانك واعتلى شانك
لك تحياتي وتقديري ،

[سعيد مقبل الأكلبي]

صح لسانك ياسليمان
واحسنت العذر بهذه القصيدة الجميلة
سلمت ودمت على العز والطاعة

الغالي الشاعر :سليمان السكيبي

صح لسانك ...والله لايهينك

وتقول ياسناعيس:

مركب غرامي راسي فـي موانيـك
.....لاهتز موجك ياهـوا البـال راعـه

وانا أقول :
وأنت راع لنفسك ..ماهو صرت مديرعام

تترك الشعر ..... ههههه

وعساك لنا بالوجود

وتحياتي لك يالغالي

[سلطان العطاوي]

سناعيس

صح لسانك وأعتلا شانك

ابيات رائعه بروعة حضورك
لا خلا ولا عدم

صح لسانك قصيدة جزلة

[سعد الشقحاء]

صح لسانك
واعتلا شانك
قصيده رائعه

[الطائر المهاجر]

صح لسانك
ولا هنت
جزلة من راس جزل
وشاعر متجدد الإبداع
تحياتي

[داعي الشوق]

صح لسآآآآآنك

يا بو محمد

شاعر جزل و صاحب كلمة

معاني جميلة

نابعه من قلب شاعر مرهف الحس

لله درك

و صح لسانك

مع التحية والتقدير