الطائر المهاجر .. بأول مواضيعي اناديك : )

[نسناس الهوى]

سنا البرق لا ضوّا شِهابه في سما خافي = بمثله ببتدي قافي على في حرفه الميسور
ابي طير(ن) يحاورني على الجمره ولو حافي = ترا ضوّي الى جمّر خفا بيت(ن) لها مكسور

[الطائر المهاجر]

ارحب يانسناس الهوى
وياهلا بك في محلك

الا يا مرحبا بك وين ما يممت يسنافي = تقهو ولا تعجل بالسفر فالشعر بالمقدور
نسانيس الهوى هبت مع الإعصار ياكافي= رعود وبرق باولها ومطرها اتضح مخطور

ارحب يالغالي
خلني اروح اولم القهوة في الإستقبال الين تخلص
تحياتي

[نسناس الهوى]

والا ياصاحبي حيّاك بين البيت والقافي = سبقتك بأشرب الفنجال لقيته ردّ لي معذور
مدام ان الطيور اللي تجيلك وقت وتلافي = ولاظني يشيب القاف دام الفيش بالماطور

[الطائر المهاجر]

لفيت والطيور بمسجد الله ترجي الشافي= يغفر الذنب من زلات شعر دربها محضور
وفتحنا الباب للضيفان واللي عابر ولافي= واظنك ما لقيت الدلال ولا لقيت الجمر والمجمور

[نسناس الهوى]

عسا الله يقبل الأعمال والأعمال بأصنافي = وماعمري سمعت ان القوافي صارت بمحظور
لقيت الضوّ والدلّه وحيثه فاق بأوصافي = تركته وجيت لك ناوي الاعب قافك المشهور

[الطائر المهاجر]

انا طير ضعيف الحال عسى الله يستر الخافي = اركب في الشعر مره ومره اتركه مبتور
فلاني شاعر ولا لي بدرب الشعر لو يافي = تركته للشباب اللي بشعره لايزل مغمور

[نسناس الهوى]

يوقف قاف أي شاعر. يوقف كل هو مافيّ = اذا انته يا عديل الشعر تبي تنكر فعول طيور
طيور(ن) صادفت حظّك غدت بالحيل بإلهافي = تبيك اليوم تسقيها حلا ماقلت فيها سطور

[الطائر المهاجر]

انا تلميذ واتعلم وادور نبعك الصافي = ابشرب من علومك كاس لاكدر ولا مخمور
علوم رجال من حر تعلىّ بعلمه الضافي= رقى شمخ الجبال ولا توقع خايف المحذور

[نسناس الهوى]

تجيد الحرف ياعثمان تجيده بالشعر وافي = ونا التلميذ ونت اللي تصبّ القاف بالتنور
نبي نركب طواريق(ن) وابيك بيدّ مجدافي = بحور الشعر نخطيها نصيدّ الزين والمنثور

[الطائر المهاجر]

تبي نبحر ونا خايف تجمد بعض اطرافي = وخاف البحر ما يرحم يهيج بموجه الممرور
اقول لك خلنا نركد ندور شاطي دافي = نتفرج مثل خلق الله نشوف السحر والمسحور