الشعر في صدري تداحم وأنا انهـاه

[الحربي عبدالله]

الشعر في صدري تداحم وأنا انهـاه=واقول ياشعـري تصبـر واداريـه
ويقول مل الصبر والصبـر مقـواه=ما عاد فيها صبـر بانـت مواريـه
قلت ابشر ابشر وازهلـه لا تـولاه=والله لا سفل بـه وابيـن خوافـيـه
القـاف زهبتـه وزينـت مـرمـاه=ما عاد يمدينـي ولا عـاد يمديـه
سر ياقلم واكتب من الشعر معنـاه=معنـاه فـي .... ولد .... البيـه
اللي وعدني وعد واخلـف نوايـاه=أنشهد انه خـان وعـد(ن) وعدنيـه
شهرين وعـده قالهـا مـاتعـداه=وهذي ثمان أشهور غابة طواريـه
الحر وعـده ديـن لكـن موفـاه=الحر دائـم لاعطـاء وعـد يوفيـه
الله يسـود وجـه .... ويمـحـاه=اللي نسى وش قال والناس توحيـه
يقول انا حرمـه تغشـى بمغشـاه=وهذي عليها كان موفيـت واحميـه
وش رايكم ياناس منطـق شفايـاه=منطق رجل ينعد وش رايكـم فيـه
لا والله الا اقولـهـا واتـحــداه=ماهو كفو والمرجلـه مـاتدانيـه
علم(ن) مؤكـد يـاصلـه ويتعـداه=علم(ن) وكاد العلـم والعلـم ياتيـه
ماهي على رجـال مثلـه وشـرواه=على مره مسترجله غصب ترضيـه
ماهو برجل اللي يسـوي سوايـاه=عيب(ن) على الرجال يمشي مماشيـه
ماكل من هو قال أنـا رجـل تلقـاه=ولا كل رجل الشـرط فيهـا تلاقيـه
الرجل في قولـه وفعلـه وممشـاه=ماهي مظاهر تخدع اللي نظر فيـه
الرجـل يحمـي كلمتـه لا توطـاه=عيب الرجل لا قـام هرجـه يلويـه
لكـن هـذا ميـت النـار مــدراه=يجهل دروب المرجله ويش يدريـه
درب المراجل صعب ماهـو بويـاه=ودرب الردا والنعم دربـه وراعيـه
لاشفت شكله قلـت رجـال محـلاه=وليا فتشته لاش كـل الـردا فيـه
ابو محالـه مـن عيوبـه حلايـاه=ماله امان يخـون حتـي مخاويـه
ملعون ثم ملعـون يانـاس مقـواه=بالكذب غيره لا حشى مـاتلاقيـه
الكذب عنوانـه وساسـه ومبـداه=والغـدر طبعـه فالظهـر مايخليـه
ياشين طبعه ياهل العـرف شينـاه=منقود في طبعـه وتنقـد مماشيـه
اللسلسه يعرفبهـا فـي زوايـاه=اتدلك اذنابـه مـع النـاس تتليـه
بالخير محد(ن) يذكـره عنـد مـولاه=مافيه خير الخير من ويـن ياتيـه
لا احساس لا ذمه ولا ديـن تلقـاه=والعقل مامن عقـل يمكن يلهيه
الله واكبـر يـا زمـن واحــلالاه=عجيب والله يا زمن ما تخفيه
البوم حتـى البـوم يأمـر وينهـاه=يأمر على اللـي عاليـات(ن) مراقيـه
والله لولا الحكم والشـرع لـولاه=لقطع لسانه مـن عروقـه ووطيـه
ماني بعاجز عنه عندي كما الشـاه=أطأ على راسـه برجلـي واذكيـه
لكـن علـى الله بطلبـه واترجـاه=ماخاب عبد(ن) يرفـع يديـه يرجيـه
عسـاه يبـلآ فـي عيالـه ويلقـاه=ولايهتنـي فيهـم وفيهـم تبكـيـه
وعساه يبـلآ بالمـرض والمعانـاه=أخبث مرض ماله علاج(ن) يداويـه
على سرير الموت عايـش بدنيـاه=اكله وشربه مـن جهـاز(ن) يغذيـه
وعساه في حـادث قريـب يتحـراه=بين الحديد الصلب ثم تحترق فيـه
وياجعل من هو لامني فيـه تبـلاه=تبلاه فـي نفسـه وباللـي بلانيـه
ياناس هذا خـان واخلـف نوايـاه=ياناس هذا خـان وعـد(ن) وعدنيـه
مني طلـب مهلـه يعـدل خطايـاه=ومن يومها لا اليوم غابة طواريـه
حلف يمين اقسم بها غيـر يحمـاه=فجربها الفاجر عسـى الله يخسيـه
هذا قليل الديـن والحلـف مشقـاه=ماهي غريبـه كـل شـي(ن) يسويـه
هذا لو ان الـرزق بيديـه معطـاه=من بغض في قلبه على الناس يرميه
منسـاه انـا والله منسـاه منسـاه=ما دام رب الكون فالارض محييـه
يوم ابتلاني وافترا بهـرج سـواه=تلفيق من راسه على شـان يبغيـه
كله عشان يقول مـا فنـت يبغـاه=يطمع ورى مدحه تسـره وتغنيـه
حسبـي عليـه الله يا كبـر بلـواه=باع الظمير بقـرش كلـه ليرضيـه
ماكنـه الآ حـرر القـدس هقـواه=هذا ضعيف النفس هـذي هقاويـه
لكن مـا جاتـه علـي مـا تمنـاه=معروف بين الناس والكـل يدريـه
يبـا يعـذرب والعذاريـب تمـلاه=كلن على طبعـه يجيبـه يهذريـه
لكن تحصلها علـى الزقـم تاطـاه=يستاهل اللـي جـاه لـو مايكفيـه
مامنه نفعـه خابـره مـاحسبنـاه=مير البلآ في داخل القلـب مخفيـه
شي(ن) بقلبـي كـل ماجيـت ببـداه=يردنـي كثـر الحكـي والمشاريـه
لولا الحياء واللوم لاكشـف خفايـاه=وابينـه للـنـاس والله ماعـديـه
اجيـه لـو ماجيـه قالـو تعـداه=ومن صد والله ماتبعه في خطاويـه
حبل الرفيق اللـي تقطـع عرفناه=الرمث رمث اللي تحزمت انـا فيـه
راحت بدون احساب يوم احتزمنـاه=راحت علومه مرس يقطع طواريـه
الرجـل ياقـف بالمواقـف وتلقـاه=الرجـل والله ماقـفـه مايخلـيـه
ولاني بناسي واحـد(ن) مـاتناسـاه=اللي عليـه الهـرج كلـن يمشيـه
راعي ولكن مـادرى عـن رعايـاه=الحق مايعنيـه والسمـع مرخيـه
ياكيف يسمـع واحـد(ن) ماسمعنـاه=ياخذ بهرجه ماسمـع هـرج ثانيـه
شغله يا كود الهرج يسمع ليا جـاه=والحق يسكت عنه ماله شغـل فيـه
يومه درى بالعلـم تلفيـق مشقـاه=وينه عن اللي جاه راسـه يدربيـه
ينعاف دام الظلـم يانـاس يرضـاه=اللي وهـذا اولـه ينعـاف تاليـه
العدل وين العـدل ويـن المسـاواه=في ذمتـه ماصـار ربـي يجازيـه
الحـق والله خـابـره واتحاشـاه=الحق كلـه همـزة ازنـاد وأنهيـه
هذا هو اللي غايـة القلـب ومنـاه=غيره فـلآ والله مـاعـاد يشقيـه
الشكوى لا الله والعطايـا عطايـاه=غيره حشـى والله مانـي بشاكيـه
تمـة وصلـو عد ماحـل طريـاه=على رسـول الله محمـد وهاديـه

اخــوكـــم / عـبـدالـلـه الـحــربـــي

[الطائر المهاجر]

سلمت وصح لسانك وقلبك
جزلة من راس جزل وشاعر متمكن
لا سفلبـه : اعتقد انك تقصد : اسولف به
لاهنت
تحياتي

[عبدالعزيز ابراهيم المنصور]

الحربي
قصيدة زفراتها غاضبة
صح لسانك
سلمت ولاهنت
دمت بخير

[الحربي عبدالله]

المشاركة الأصلية كتبت بواسطة الطائر المهاجر

سلمت وصح لسانك وقلبك
جزلة من راس جزل وشاعر متمكن
لا سفلبـه : اعتقد انك تقصد : اسولف به
لاهنت
تحياتي

سالم من كل شر انشاالله اخوي / الطائر المهاجر
وشهاده منك اعتز بها ،

وعن لا سفلبـه : اعتقد انك تقصد : اسولف به
مالك لو اخوي اقصد فيها : ( لا سفل به ) ومعنها : اسفل
ومادري احتمال يكون فيها خطاء املائي .

ولاهنت على مرورك الكريم ،، شاكر ومقدر لك ..

[الطائر المهاجر]

شكرا لك
هالحين اتضح المعنى
وعدلت الكلمه حتى لايأتي من قد لايفهمها مثلي
لاهنت
تحياتي

[حرف وشعر]

الحربي الله يعين من توليته تراك مهب سهل ههههههه


نص وهجاء مكهرب جدا

[داعي الشوق]

صح لساااااااااانك يالشاعر عبدالله

والله يعينك و يعــّوض عليك بخير

و الله يصلح الحال

ولاهنت

**********

[بدر العيد]

أخي عبدالله : ـ


نص شعري رائع وهجاء مؤلم ومؤثر

كنت أتمنى لو أنك أبتعدت عن الدعاء عليه لأن من ترك شئ لله عوضه خير اً منه

مبدع مبدع مبدع في كل حالتك حتى وانت غاااااضب ..

تقبل مروري

[ابو أنس]

الحربي عبدالله......................
القصيده من ناحية البناء واللغه قوية وصلفه
ولا أشد من بوح شعر الهجاء وانت شاعر فحل

أما من ناحية المؤدّى........
فقد لاألوم بوح زفرات صدرك الحارقه
ولكني أستدعي نفحات عقلك الراشد ليوقع التوازن
ومن يرمي حموله وهمومه على الله كما ذكرت في ثنا يا القصيده
يحجم عن بعض أو جلّ ما ورد فيها
وهي ان كانت زفرة مُوجَع
الا انها ستظل خالدة حتى لو لم تريد لها ذلك
كل شكري لك على سعة صدرك وحسن تقبلك
ولك من الود أجمله

[الحربي عبدالله]

المشاركة الأصلية كتبت بواسطة عبدالعزيز ابراهيم المنصور

الحربي
قصيدة زفراتها غاضبة
صح لسانك
سلمت ولاهنت
دمت بخير

صح بدنك اخوي / عبدالعزيز المنصور
وسالم وغانم انشاالله
ولاهنت على مرورك الكريم
شكرآ لك ..