يا هنوفٍ رمابي

عبدالله الدخيل · 13-02-2011, 04:57 PM

بسم الله الرحمن الرحيم
السلام عليكم ورحمة الله وبركاته

يا هنوفٍ رمابي منْ رهاف ٍ سنينـه لحْمـة ٍ بضْلوعـي=صوّبت قلْب شاعر للهوى ما يساير مير جـا مصْراعـه
منْ سبايب عيون ٍ تشْبه عْيون حايم منتحـي بفْزوعـي=شايف ٍ له فريسه وسْط روض ٍ خليّه عقْب جوع ٍ لاعـه
مقْلتين ٍ شقرْ والرمْش صفّة سيـوف ٍ زاهيـه بدْروعـي=حدْر غرّة مزون ٍ مـعْ نسايـم هواهـا كنّهـا مرْتاعـه
معْ شذا غمْزتين ٍ مثْل توأَمْ خزامـا بالصفا مزْروعـي=ما حضيت بْرحيق ٍ أرْتويْ منْ زلالـه لـ السقـي منّاعـه
آه واجثّ قلبي جثّة الجمْـس لرْطـا راسيـن بجْذوعـي=في دجا ليل بارد منْ شمالـي هبوبـه ذايـرات سْباعـه
ثمّ شعّل جذوعه بعْد ما كـان زامـيْ بالفـلا مقْطوعـي=وانْفهقْ له بنقْره وقْدها لحْـم قلْبـي فـي ربـا مرْباعـه
صار ليلي طويلي نصْف شهْر ٍ مسيره والنهار سْبوعـي=مثْل منْ سار قانص فيْ ربوع الخوالي وانْقطـعْ بقْطاعـه
لا سبيل و طريقه في هيـارة عتـاده وابْتعـاد رْبوعـي=ضامي ٍ شرْب ميّ ومزْعج ٍ صوت مرْهق يرْتجي سمّاعه
يالعضيّان غالب دوك يا معْ مربّيـة العسيـف تْبوعـي=والرساله بلاغ ٍ كود يلْفي مـردّك مـنْ جزيـل سْناعـه
واخر القول صلّو عدّ ما قام مسْلم فـي دعـا ورْكوعـي=صوب طه عسانا ضمْن فوج ٍ رجاته من رحيم شْفاعـه

وسلامتكم
أخوكم \ عبدالله الدخيل

كظيم · 13-02-2011, 06:06 PM

اللهم صلي وسلم على سيدنا محمد

الشاعر / عبدالله الدخيل
قصده رائعـه ومحبوكـه
ابدعت في نظمهـا وسبكهــا
وصف .. وجزالـه .. وشاعريـه
صح لسانك وفكرك وقلبك

تقبل مروري المتواضع لاهنت
ودي وتقديري