أ ح ب 6 6 6

[سعيد مقبل الأكلبي]

هواة التميّز طيّروا قيمة اللوحات=وكلٍ خذا لوحاته وجا يبَدّلها
وانا لوحتي متميّزه كلّها ستات=و(احب) الحروف مسجّلاتٍ على اولها
على خردةٍ من شافها يكّره المكشات=ولا يستوي حظه مادامه مقابلها
لا رفرف ولا كبّوت فيها ولا اسطبات=انهكها الزمان الشين وانهكت كاهلها
وانا امشي عليها مامعي رخصةٍ واثبات=وفقدت استمارتها ولانيب ناقلها
لا شفت المرور يفتّش ادوّر اللفات=وعلى اقرب ملَفْ آجض واجيك ناتلها
واذا ما معي مخرج وحدتني الصبات=دريت انّها كتبَت علي وآتحملها
لا قرّبت للتفتيش لجّيت بالدعوات=وتهتز رجلي لين تطفي واشغّلها
واذا جيت عند العسكري تطلع الضحكات=اجاملْه بالضحكه وهو ما يجاملها
اسلّم عليه وكانني عارفه بالذات=وانا صيدتي لو يصْمُل شوي ما اسهلها
احيانٍ تفوت بخير وآقول شرٍ فات=واحياناً تجيك مطَبْلَه يوم اطبّلها
وصلت المعارض وابتدا السوم بالميّات=ميات الالوف اللي تنومس فعايلها
انا كنت اظن ان قيمة الموتر ريالات=وعيّنت فيها قيمةٍ مآتخيلها
قامت على مخباي تسابق الشيكات=وكلٍ يقول الله يخلّيك تقبلها
واذا قلت ماني بايع استفحلت الاصوات=ولجّت علي صاحينها مع مهبّلها
قلت المشكله اوراقها ناقصه حاجات=قالوا انت بعنا خرّدتك بس وازهلها
تخيّرت من بين العروض اكبر السومات=وطلّقتها تطليقةٍ مآتحللها
وانا واحمد الله بيعتي احسن البيعات=وعسى الله يديم النعمه اللي نحصّلها
ناسٍ ماتعيّن شي تشري به اللنبات=على شان يولع نورها في منازلها
وناسٍ تفرط المليون على الكماليات=ومن زود نعمة ربها تلعب وتلّها
وناسٍ فالسجون وتحتري صرفة الزكات=على شان يِقضى الدين وتروح لهلها
وناسٍ مع بنات الليل وتْرُش دولارات=على شان يابلفيت تنسى مشاكلها
وناسٍ تحّتزم بالعُسر واتّذل مالشرهات=لاجا ضيفها يلقى الشحم في مناقلها
وناسٍ عندها الاموال لكنها هيهات=على هبلها والضيف ما يقُرب حللها
طرّاه الرقم والحرف وحكاية اللوحات=وناسٍ عندها الاموال وعقولها بلها

27/7/1430هـ

[منيع]

رائعه ومميزة ومعبره
كل الشكر والتقدير لكم
تحياتي

[مبروك بن ماضي]

اخوي المبدع :
الشاعر / سعيد مقبل الأكلبي
الف صح لسانك على هذه الرااائعه والممتعه
سعدت بقراءتها وتشرفت بحضوري هنا
بس طال عمرك أبسألك
ماقد حد أشر لك بالوقوف وسامها منك
من اجل اللوحه تراها تبي يجيب لك قيمة جيب صالون
سجل اعجابي وتقبل تحياتي وتقديري
أخوك / بن ماضي

[الطامي]

سغيد الأكلبي
صح السانك ملايين
جزلة وهادفه
لاهنت اخي

[عدنان كريزم]

صح لسانك يالغالي


ولا هنت


تحيتي لك

[مشعل الشايقي]

الله عليك اخي سعيد


لله درك ياجزل على هذه الرائعه


صح لسانك وعلا شانك



تحيتي وتقديري

[زهرة اللوتس]

سلمت وصح لسانك وفكرك
نص رائع من شاعر رائع
لاهنت
دمت بخير

[حي الضمير]

ياسلام يابومقبل
ابدعت حيل يامميز
وملياااااااار صح لساااانك يانجم

[داعي الشوق]

صدقت والله يالشاعر سعيد الاكلبي

و صح لسانك مدد بلا عدد

قصيدة جميلة

صوّرت واقع نشاهده في هذا الوقت

شاعر رائع و ليس هذا الابداع بغريب

صح لسانك مع التحية لك

[حوريه]

نص رائع من شاعر رائع

صح لسانك واحساسك

دمت ودام حرفك