الطريق الى المجهول

[الطائر المهاجر]

يقولون ولا هكالواحد والواحد الله في سماه العالي وكل ابليس مخزيه الله
ولا هاكالرجال ، اللي والله العالم في حدود الخمسة وخمسين سنة ، سمع عن
الإكتتاب في شركة اعمار في دبي ، وجمع معه ثلاثة شيبان من ربعه ، واخذهم معه في دتسنه ابو غمارتين
وتوكلوا على الله ، بعد ما صلوا الفجر ، في احد الأيام ، معهم اكلهم ومويتهم ، وراعين
سواليف وهيجنه ، مسكوا الخط يوم وصلوا مفرق الحسا ، اختلف الراي ، احد يقول نروح معه
اقرب لنا من طريق الدمام ، واحد يقول الطريق ولو طال ، وتعاندوا ، شيبان يابسة روسهم ، فصاحبني طرت عليه فكرة ، يرضي فيها الطرفين ، وليش ما ناخذ خط وسط بين الاثنين ، وفي هذا توفير مسافة وكف مشكل
حصل وما كان متوقعه . وبالفعل طلع الأخ من الخط المزفلت ، وبدا يمشي مع هالطريق الترابي ، اللي في باله
رايح يحدره على دبي مباشرة ، ويوفر مسافة ووقت ، خاصة وان الرجال متوجد معبي توانكي المويه وتوانكي البنزين ، ومعهم كل ما يحتاجونه يمكن لمدة 3 ايام . استمر الرجال وربعه يهيجنون ، ومبسوطين ، ولا عندهم من الشيطان طاري ، لكن لامعهم خارطة ولامعهم بوصلة ، ولا أي شئ يمكن يساعدهم على معرفة الجهات ، ماعدا
الشمس ، اللي حطها السواق على حجاجه الأيمن واستمر كافخ ، طبعا بين ساعه وساعه يوقفون وياكلون
ويشربون ويريحون ثم يستمرون ، المهم جاء عقب العصر ، وهم على الخط الترابي الضيق وما حولهم يمين ويسار إلا كثبان رملية ، غابت الشمس ، وهم مستمرين ، اظلم الليل ، والرجاجيل تعبوا ، ولا حولهم من يقول ربي الله ..
وكل واحد يشجع في اخوياه ، وإلا في داخله حاس بأنهم في خطر ، ولا وده يبينه خايف ينقدون عليه الربع ..
ناموا الجماعة فالجو ماكان بارد ، وعينوا من ربهم خير ، ومن الفجر دقوا سلف وواصلوا ، وعلى نفس السوالف
والذكريات القديمة والهجيني والمراد بيناتهم ، السواق ط . هـ ، واخوياه ، س ، و م ، والرابع ماشاء الله تبارك
الرحمن عن اثنين ، راح الوقت ، زلت الشمس ، قرب المغرب ، وهم يعمتون ، لكن المشكلة ماشافوا في دربهم
ولا مودماني ، وعلى نفس الوضعية ، حتى ثالث يوم ، والاهم يشوفون من بعيد شئ كنه بحر ، ويفرحون الرجاجيل
ويستانسون ، بس ، هذا الخليج وصلناه ، اتجهوا للبحر ، قابلهم بعض التليعات الخفيفة ، تجاوزوها ، وبعد كل مشقة وصلوا البحر ، لكن البحر ماحوله احد ، لاحول ولا قوة إلا بالله وين الناس راحوا!! ، مشوا بالونيت على الساحل ، ولا والله يوم شافوا هالكسفينة الصغيره واقفة ولكن ما حولها احد ...

يتبع في الحلقة القادمة ..

[نسناس الهوى]

تشويق مابعد تشويق

ليتي مافتحته لين اكتملت هههههههه

بإنتظار التكمله ابو عبدالله ،، لا تطول علينا

[الأمـــل]

وأنا أيضا أتابع بشغف وأنتظر بشوق تتمة السبحونة

[أم ريما]

هلا مشرفناااااااا


بأنتظاااااااار باقي القصه

تحياتي لك

[الريم]

حلوااااا مشرفناا

بنتظار التكمله بفارغ الصبر

[الطائر المهاجر]

كانوا الجماعة جواعا ، ولا عاد معهم اي شئ ياكلونه ، قال لهم واحد منهم ، وش رايكم لو ندخل هالسفينة
اللي واضح مافيها احد ، وحتى لو فيها احد ، ماعلينا ، لازم نلقى شئ ناكله ، ولعلنا نلقى عندهم بنزين
يسعفونا . وبعد تداول الرأي بينهم ، توكلوا على الله ، وطافشوا في الماء حتى وصلوها ، وطبوا في وسطها.
دوروا ، صوتوا ، مالقوا احد ولا شافوا احد ، والمشكلة ما يدرون وين الأكل ، لو كان فيه اكل . واحد منهم
كان يدور ، إلا والرجال يصوت باعلا صوته ، ابشروا بالأكل ، واذا بهكالثلاجة الكبيرة ، اللي موزية خلف دواليب
وفيها من كل النعم ، والله والرجاجيل يعثون في أي شئ لقوه ، ويشربون اي شئ يشوفونه مما لذ وطاب ،
الا والله يوم دروخوا ، وجاهم النوم ، واذا بهكالغرفة اللي فيها فرش ولحف ، والله وكل واحد يحط راسه وينام.
واحد منهم مع كثرة الأكل كبس عليه كابوس وحس باختناق وطمر من غفلة النوم ، واذا هو يحس ان الأرض تحته تحرك ، انتهض الرجال ، يوم طاح ، كلما قام تمايلت به الأرض وطاح ، بعد جهد جهيد طلع من الغرفة ، وعرف إن السفينة تمشي بهم ، والظلام حالك ، وفي وسط البحر ، ولا حولهم احد ، والأمواج تصفق يمين ويسار لكن السفينة
ثابتة في مسار واحد ، ركض الرجال يقوم ربعه ، ولكن كلهم رايحين في آخر نومه ، إلا واحد : قم .. قم يافلان
السفينة تمشي مدري وين ماخذتنا ، رد عليه صاحبه : نم .. نم .. الله يصلحك الظاهر الفيمتو اللي شربت منه بان تأثيره ..

يتبع....

خخخخخخخخخخخ الله يستر من الي فاهم

[نسناس الهوى]

الله يستر .. مشت بروحها

بإنتظار التكمله

[الطائر المهاجر]

وقاموا باقي الجماعة على الكلام اللي يدور بين الأثنين ، السفينة تمشي بروحها ، وهم في وسط البحر ،
والمشكلة كلهم ما يعرفون سبحون ، ،،، يبون انوار يبون اثر لأي مخلوق ، ما حولك احد ، قال واحد منهم
هين خلوها على هواها ، يبي يخلص الديزل وتاقف من نفسها ، وهكالوقت فيها حلال ، المهم هالحين
انتبهوا لا بعد تقضون على باقي الأكل اللي في الثلاجة ، ونقعد بها في هالبحر ، ،، ياليل ما اطولك ،
الساعات تمر ثقيلة عليهم ، والخوف محاصرهم من كل جهة ، ، ، قال واحد منهم للي جابهم : الله لا يعيدك انت
والمساهمة اللي طلعتنا من ديرتنا على شانها ، ، وشوي إلا يبون يطقونه ، قال لهم يالربع مهيب ذي ، انا وياكم
في الهوى سوى ، لو الله اراد وعرفنا الطريق ، كان ساهمنا ورجعنا للديرة ، ولا حصل شئ ، هذا امر مقدر
ونرجي الله سبحانه وتعالى أن يلطف بنا ،،، كانت الوقت متأخر من الليل ، إلا ويسمعون ديك يذن ، اصيبوا بالدهشة ، فهم مفتشين السفينة بدقة ، ولا فيها ديك ... وين جاهم هالديك ، تراكضوا عليه ، والديك بدأ يدور بهم
في السفنية وهم ركض وراه ، ولكن ما قدروا يمسكونه . تعبوا الرجاجيل ، وكل حط راسه ونام ، والسفينة
تدرهم في البحر ، والديك غدا يهبل بهم كل شوي يذن من مكان مختلف عن الأول ، حتى إنه دخل عليهم الغرفة
واذن ، زعلوا منه ، يبدون على الأقل يمسكون ويذبحونه ويستريحون من ازعاجه ، لكن من يوم حس بهم يتحركون
انحاش ، ويلحقونه ، ولكن مافيه فايدة ، قرروا يتحاوشونه من جميع الجهات ، يعني ماعاد فيه مجال إنه ينحاش مرة اخرى ، لكن كانت المفاجأة....

يتبع ...

خخخخخخخخخخخخ مازال ذيب ينتظر الأحداث بتلهف