اليكم نشرة الأخبار(بالصوت)

[الطائر المهاجر]

اليكم نشرة الاخبارلا بالصوت والصوره = ولكن بالإشاره تنفهم للي يعرفوها
بعد استقبل وودع اشوف العين مجبوره = على ستر الحقائق دام بالمكياج يخفوها
وجمله ما تبي تمشي تعثّر تقل مكسوره = عن التقتيل والتشريد في امّه تناسوها
شجبنا أو تظاهرنا وغدينا الذل والعوره= ومات فلان وفلانه بغاراتٍ يشنّوها
وحوادث سير ما تحصى وفاة ورجل مبتوره= واعاقه كامله محدٍ تفكّر كيف ينهوها
شوارعنا مقابرنا ولا احدٍ انقبل شوره= فهي الأحدث وهي الأجمل فليش اللوم خلوها
ولو هي مايله متحفّره ماهيب مخطوره= تقارير الرشاوي تدفن عيوبٍ يلاقوها
تريله ، وايت ، وقلاب ما تمنع من الخوره= عماله تجمع الثروه بليّا عقل قادوها
يسوق وفالخه عينه على الدولار محفوره= وكفيله ما يهمه غير هات وهات حفظوها
والى من طالب الموتور بالتحقيق من فوره = يلاقوا كلمة "مقدّرٍ" تناسب حال غطوها
وناصل نشرةٍ بالطقس فالأجواء مخموره = وعاصوف وعجاج لو تهدي لاتحقروها
اساس البيت لا حرّك تلاقي ثقوب وجخوره= بها نيم وبها صاحي من بذورٍ بذرتوها
ونبدا بعدها نحكي عن الألعاب والكوره = جماهيرٍ كبيره زاحفه فالكلّ حبّوها
تلاقي بعدها بعض الخبال وخلق مسعوره= تحرّش في البنات ومن تكلم ما يهابوها
ونقول ان البلى في بوش من طغيانه وجوره= وحنا البوش دام إنّا على حالٍ خبرتوها
اخذنا ما عطونا من الحضاره ما فقع نوره= وتأمركنا بطريقه تفضح اللي يوم جابوها
فلا حنا خذينا علم يرفع جنح مكسوره= ولا حنا خذينا صنعةٍ واعمال قادوها
نورّد كل ما نحتاج حتى الفول بقشوره = وحتى التبن والسيكل وكل اشياء يبيعوها
اخاف تطول هالنشره واقول اشياء محظوره= اوقفها على هذا وباقيها فهمتوها

[الأموره]

يا سلام يا سلام ،،

نشره واقعيه مريره ،،

صح لسانك و علا شانك ،،

تسلم عالبوح العذب يالشاعر ،،

الف شكر لك ،،

دمت برعاية الخالق ،،

[داعي الشوق]

صح لسانك يالطائر المهاجر

نشره غير النشرات حتى المذيع غير

تسلم وصح لسانك .

دمت بخير ،،،

[محمد عبدالله البدراني]

العزيز الغالي الطائر المهاجر سلمه الله

صح السانك يابو عبدالله ونشرة اخبار ولا اي نشره

سلمت سلمت سلمت ودمت

لاعدمناك وبيض الله وجهك ايه المبدع الراقي الذوق مرهف الاحساس

تحياتي
مع اسمى ايات الشكر والامتنان فائق التقدير واطيب المنى رعاك الاله

[إبتهال الجنوب]

بسم الله الرحمن الرحيم

أنه الصدق ما قرأت هنا
فأراح نفسي وخاطري
فالمبدع في كل خطاه مبدع
جيد الابصار مرهف الحس
ملم بمفردات الحياة وجنباتها
ما وضح منها وما خفي.. بإذن الله
الأخ الفاضل القدير د . عثمان العبد الله
سأداوم المرور والتواجد هنا
لأسعد بالمعنى والكلمات ورقي الإبداع
مع أطيب تحياتي وتقديري
إبتهال الجنوب