[ما عاد بي شدّه ..!]

[رفيعة الشان]

.

.

.

.

أغبط عيونٍ على العكّاز محتدّه=شامت عن اللي عيون الناس تعتاده
مادام كلٍ بصير وعوقه بيدّه=يا حسرة القلب دام الشوف مافاده
ما عاد فيني على شوف الخطا شدّه=أشوف واصبر وكظم الغيظ لي عاده
ولسان شعري مدامه حي باكدّه=يِطريه فكرٍ على وضح النقا قاده
ما كل ماصاب قلبي بيّح بسدّه=لكن بلا البوح راعي الجرح لا زاده
والمشهد اللي تدهور بي قبل مدّه=وصوّب خفوقي ووجّه صوبي زناده
لازالت آثار شوفه فيّ مشتدّه=نيران وقعه الى ذلحين وقّاده
منه غدا للوجع صفعه على خدّه=مطبوعةٍ فوقها الدمعات ورّاده
ومنّه غديت ابني الطاروق وآهدّه=الين مااعلن سمين الهرج ميلاده
انتج بيوتٍ تحد الراس وتلدّه=أرهت على الجرح من ملحه ومن زاده
أمثال هذا تودي البال وتردّه=وفي كل مرة مهو ياتيه ماراده
واللي سلب ربنا غيرتْه من قدّه!=اقلّ حاجه تهنّا يوم برقاده
واللي عيونه على العكّاز محتدّه=ما نقّصه عازته للشوف بل زااااده

[سناعيس]

ومنّه غديت ابني الطـاروق وآهـدّه
الين مااعلن سمين الهـرج ميـلاده

الفاضله رفيعة الشان

الله الله
صح لسانك واعتلا شانك
قصيدة رائعه وجزله من شاعرة متمكنه
لاهنتي وبيض الله وجهك

تحياتي

[يوسف الشقران]

الله الله

تصفيق حاد لهالتألق

ابدعتي وتفننتي

صح لسانك وعافاك الله

تحيتي

[محمد عبدالله البدراني]

العزيزه الفاضله رفيعة الشان سلمها الله


ماقول الا صح السانك


ولاهنتي يارفيعه


وسوف يكون لي عوده تليق

تحيتي

[منيع]

ابيات رائعة وافكار متألقه
بارك الله فيكم
تحياتي

[عذب القوافي]

الجزلة / رفيعة الشأن

صح لسانك

نص وافي كما هي عوايدك

تقديري,,,,,,

[ناصر عبيد الهواوي]

شفــت القصيــدة واعيد القاف وآرده
مـيـراد عــذب ٍ يبــل اكـبــــود وراده
اشـتــاق انا للــكلام الـجـزل وأوده
نفسي على كل شي ٍ جزل معتادة
يسلـم هـجوس ٍ نضم ما خطه بيده
انا أشهد ان القـوافي معه منقاده

[الطامي]

المشاركة الأصلية كتبت بواسطة رفيعة الشان

.

.

.

.

أغبط عيونٍ على العكّاز محتدّه=شامت عن اللي عيون الناس تعتاده
مادام كلٍ بصير وعوقه بيدّه=يا حسرة القلب دام الشوف مافاده
ما عاد فيني على شوف الخطا شدّه=أشوف واصبر وكظم الغيظ لي عاده
ولسان شعري مدامه حي باكدّه=يِطريه فكرٍ على وضح النقا قاده
ما كل ماصاب قلبي بيّح بسدّه=لكن بلا البوح راعي الجرح لا زاده
والمشهد اللي تدهور بي قبل مدّه=وصوّب خفوقي ووجّه صوبي زناده
لازالت آثار شوفه فيّ مشتدّه=نيران وقعه الى ذلحين وقّاده
منه غدا للوجع صفعه على خدّه=مطبوعةٍ فوقها الدمعات ورّاده
ومنّه غديت ابني الطاروق وآهدّه=الين مااعلن سمين الهرج ميلاده
انتج بيوتٍ تحد الراس وتلدّه=أرهت على الجرح من ملحه ومن زاده
أمثال هذا تودي البال وتردّه=وفي كل مرة مهو ياتيه ماراده
واللي سلب ربنا غيرتْه من قدّه!=اقلّ حاجه تهنّا يوم برقاده
واللي عيونه على العكّاز محتدّه=ما نقّصه عازته للشوف بل زااااده

رفيعة الشان
ينخرس الللسان من الرد عليها
فكل مأريد ان اقوله لايوفي حقها
وافية بالحيل صح السانكي
وشكرا لكي

[منصور العبدالله]

ما عاد فيني على شوف الخطا شـدّه
.............................. .أشوف واصبر وكظم الغيظ لي عـاده
ولسان شعري مدامـه حـي باكـدّه
.............................. ....يِطريه فكرٍ على وضـح النقـا قـاده
ما كل ماصـاب قلبـي بيّـح بسـدّه
.............................. ....لكن بلا البوح راعي الجـرح لا زاده


الله الله رفيعه الشان

وهذا البوح الرفيع بمعناه وجزالته

صدق الشعر مرأه الروح

تحياتى لروحك النقيه

وجزاله فكرك ولسانك

[داعي الشوق]

صح لسانك يالشاعرة رفيعة الشان

معاني رائعة و تصوير رائع

من شاعرة إعتدنا الروعة منها دائما

لاهنتي يا رفيعة

وصح لسانك مع التقدير لك

،،،،،،،،،