يقول من هو ؟؟ انه الطامي المري

[الطامي]

لست بأكبر الناس سنا وتجاربي في الحياة بسيطه ولاكن العمر له دور ولي ولكم من الأبناء والأخوان والمعارف من يحتاج هذه ومثلها ؟؟؟؟؟؟؟؟؟؟؟؟

يقول منصور بن منيخر مثايل = ابن لوذين ومري من اعماقه
سلالة قوم من عبق الجزيره = اهل قول واهل فعل وعراقه
تسمع لي يامدور للنصيحه = واخص اعيالي وكل الرفاقه
وانا باعطيك نصايح من سبقنا = واجددها بعد درس ولباقه
قبل هاذي وهاذي ضم دينك = وخمس اركان طبقها طباقه
فعقوق الوالدين اكبر مصيبه = يجي نسلك مثل فعلك اتلاقه
وصن رحمك ولا تقطع مجيهم = ترا في وصلهم حسن الخلاقه
وتر جمع القرايب هي المعزه = وتشتت شملهم قطع العلاقه
ولا تبدي لعدوك كل بغضك = فرب يومن تاتي به صداقه
ولا تفشي لصديقك كل سرك = فرب يومن يبغضك بحماقه
ولا تامن بما تخفي اليالي = فكم من امنن كثرة عواقه
ولا تشمت بغيرك في مصيبه = تحيط بك الشماته في نطاقه
وكن حذرا اذا هرجت غيرك = عن الزلات حيث انها حماقه
واذا خاويت قوم في طريقن = وصارو مثل قعدان الزلاقه
يرومون الدنايا والدنيه = اياك اتصير لهم مثل الفقاقه
عليك بعزة الهامه عليهم = ولا تدنس شرفك بكل عاقه
وخويك لاتضيمه او يضاما = من اقرب منه جهز له اسياقه
وجار البيت له حق عليكا = بحرمه في الجلايل والدقاقه
وتر عانيك حقه فاق غيره = اذا مخطا عليه وجا شقاقه
يعيب الوجه لو راحت احقوقه = ذكر عيبك يغنى به اطراقه
واذ ادليت الرفاقه في وليمه = فاعرض الغانمه وحذر المشاقه
واذا وفقك ربي في الولايم = ترى اعيون البشر تاكل اشلاقه
واذا منه بلاك الله ابعاقه = تجاوز له حيث انه خقاقه
وكبير القوم له عز ومهابه = على شانه يدارون الرفاقه
وحذاري تصد منها لقبلت لك = ولا تفتح على المكمين طاقه
وذا دارت رحاها فدر معها = ولا تعاند وتطردها الحاقه
واذا رديت شان اهل المصايب =فوقف دونهم لو بالتفاقه
لين يروحون والبيضا لوجهك = وطبع الغيث يروي باندفاقه
وان شفت الضول والعربان لمه = وفيه الشرلاتاتي له اعشاقه
ياكون ان كان جمع في معزه = فكن موجود لاتصبح اعلاقه
واذا ضامك زمانك فااحتمل له = وصبرك عند شداته افراقه
وتاليها اذا قصرت فيها = تعذروني وترى ماهي اغلاقه

منصور منيخر الوذين البحيح المري
الطامي بشحمه ولحمه

[ابوعبدالرحمن القريشي]

ولا تشمت بغيرك في مصيبـهتحيط بك الشماته فـي نطاقـه
وكن حذرا اذا هرجـة غيـركعن الزلات حيث انها حماقـه



عز الله ماقصرت يا خوي وفيت وكفيت وبيض الله وجهك
نصائح وحكم يحتاجها الجميع

صح لسانك وسلم بنانك يالطامي

[الطامي]

لاهنت ياراعي الكيف
مرورك من طيبك
تقبل ودي وتقديري

[منيع]

بارك الله فيك
على هذي النصيحة الطيبة
وتقبل مني جزيل الشكر والامتنان
تحياتي

[الطائر المهاجر]

منصور منيخر الوذين البحيح المري الطامي بشحمه ولحمه
أرحب يامنصور وراك أجل ما كتبت اسمك واقتصرت على الطامي المري
تبي ابدله ..
واضح من القصيده إنك بالفعل مخضرم
لذلك جاءت القصيدة درة من درر الشعر النفيس
الملئ بالحكمة والموعظة من رجل خبر الزمان
ايضا يتضح انك متأثر بالشعر الفصيح
ففيها كم بيت جات بالفصيح وانت جبتها على الصخري
وهو الوافر بالفصيح ومنه قول عمرو بن كلثوم
الا لا يجهلن احدٌ علينا = فنجهل فوق جهل الجاهلينا

صح لسانك مدد بلا عدد
تحياتي واحترامي

[متعب المتعب]

اخوي الطامي

صح لسانك

وعتلا عند الله شانك

فحل من فحول الشعراء

ونعم فيك يالعزيز

وطاب وقتنا ومكاننا فيك وبشاعر مثلك

ربي يحييك

اخوووووك متعب

[ماجد الزيد]

صح الله لسانك وجاد بنانك
حكم وتجارب ونصائح لاتخرج الا من مجرب مبدع
صح الله لسانك اخي الفاضل
تقبل مروري اخي
اخوك ماجد الزيد

[ابومياس]

والنعم فيك يامنصور

كفيت ووفيت

قلت ما يكفي من النصح

لله درك

صح لسانك مليار يالغالي

دمت بخير وعافية

[الخنساء]

صح لسانك اخي الشاعر الطامي

لاهان راسك قصيدة رائعة

سلمت وسلم شعرك

دمت بخير

[الطامي]

المشرف العام
المشرفين الكرام
الأعضاء في المنتدى
الأخوة الزوار
السلام عليكم وصباحكم ورد وفل وياسمين
يسعدني مروركم الكريم وهذ من طيبكم
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
الطائر المهاجر
هرجت وأصبت
نعم في القصيده من الفصيح الكثير وفيها من الأقوال المأثوره والحكم التي صخرتها بفضل الله على نهج النبطي والحمد لله
اما الأسم فان اسمي الكامل يشرفني الا انني اميل الى الأسم المتعارف عليه في اكثر المنتديات التي اشترك فيها وهو فخر لي وللطيبين امثالك وامثال الجميع ،، وحيث ان القصيده جات على نهج النصح والتجارب فانني احببت ان افصح عن اسم قائلها حفظا لحقوقي لأننا في هذا الزمان كثر الطش في المنتديات من ضعفاء النفوس حشاكم.
تمنياتي لكم بالصحه والعافيه ودمتم على معزة ورفعه ومحبة من الله سبحانه .
اخوكم / الطامي المري