خلك عزوبي ولا لك في الحريم

[الطائر المهاجر]

في بلاد الواسطه فوق النظام = خلك عزوبي ولا لك في الحريم
مايكدر خاطرك بعض اللئام = لا كبر ورعك على النهج القويم
لاقبول(ن) حصله لو هو تمام = ولا وظيفه لو معه علم وعليم
كلما يطرق بويب(ن) في الزحام= ينكسر خاطره من وضع(ن) سقيم
الاجانب من هنود ومن شوام = لاعبين(ن) اليوم في راس اليتيم
وين ما وجهت لو لاعلا مقام = تحصل الاجناب من خلف الخميم
من بطانه فاسده تسعى الهدام = بإسمها الوافد غدا امره عظيم
وفي الوزاره صار مفلوت اللجام= من بغوا جابوه لو انه عديم
وطلعوا له رقم من تحت الركام= لاجل عين فلان من بعض الفديم
ولو كشفت اللي يخبوا في العتام= الوظايف كوم عند ابن اللئيم
ولانه الموثوق في فعل وكلام = يوخذ بقوله وينظر لك غريم
ودام هذا السوس ينخر في العظام = ما تعدل وضع في ميله جسيم
والحكومه من تلقى للملام = رغم ما تدفع تبينا في نعيم
الفساد اليا انتشر ماله زمام = غير قطع جذور سوس(ن) مستديم
والمواطن عين لو تعطى اهتمام= بخط ساخن ينقل الوضع الأليم
لهيئة(ن) عليا من رجال(ن) كرام= ماعرف عنهم افا لو هو قديم
ولين هذا الوضع يصلح بالتمام= لا تزوج فانت في فعلك اثيم

ياهلا بالشعر وصاحبه

صح لسانك قصيده رائعه وهادفه تسلم عليها واسمح لي بمداخله بسيطه

والله انّك صادق وهرجك تمام0000حاشيه ماهي على الوضع السليم
بس ضعنا دون راعات اللثام0000دونهـن ياشـيخ والله في جـحيم

مع اجمل تحياتي

[صوت الإحساس]

صح لسانك وعلا شانك


وكل عام وأنت بخير وعافية

[الطامي]

الطائر
صح السانك وسلم بنانك ولاهنت
عيدك مبارك
وطلق الحريم ؟؟ ابداء بها ونحن ورائك
هاهاهاهههههههههههههههه
كلام صحيح الواسطه والبطانه الخفيه تلعب دور ،، اما خير والاغيره
ولاكن كل له رزق يأخذه(( وما من دابة الا على الله رزقها )) صدق الحق سبحانه
وخلك عزوبي

[منيع]

امادعوة غير مجابه ولن تحضى باالتأييد ليه مافيه حل في نظرك يادكتور الا بترك الزواج طيب خلهم يزوجون ويستخدمون حبوب منع الحمل هذا حل مؤقت لين ربك يفرجهاولا شايف الدعوة بابها مسدودة ههههههههههه
عموماابياتك معبره وتتطرق الى مشكلة اجتماعية يعاني منها الكثير من الشباب في هذه الايام وماتطرقت اليه ماهو الامن هذا الجانب
تحياتي وتقديري

[عمر ال شيبي]

ولين هذا الوضع يصلح بالتمـام
لا تزوج فانت فـي فعلـك اثيـم

==============
اولا صح لسانك ما عليك زود

طال عمرك مو حل والله مو حل

المواجه بشد الظهر وقول الحق
هو الحل السليم

**********************

الحر لا حكم يملك كل لحكام=والعقل زينه يا دكتورنا الكريم
العاصفه نواجها بخندق والثام =والصبر ساعه قالها واحدن حكيم
دور على يد المحبه والسلام= واحدن مفرد ما يواجه هاللئيم

وسلامتك والعذر منك

[عبدالرحمن الصباح]

ولين هذا الوضع يصلح بالتمام===لاتزوج فانت في فعلك اثيم
راحت علينا يابو عبدالله الف مليون صح السانك مبدع ومن ابداع في ابداع وعيدك مبارك وكل عام وانت بخير تقبل ودي وتقديري استاذي

[نجم الإبداع]

صدقت يابو عبدالله

لافض فووووووووووووووك

وكل عام وانت بخير

فائق الاحترام

[ملاك الصمت]

طائرنا المهاجر ...... ناوي يهاجر ويتركـ نصفه الآخر....!!
ولكن الهروب من المشكلة هو المشكلة بحد ذاتهـــــــا ..

صححح لساانكـ ...

ودامـ ابداعكـ ...


لكـ من التحايا مايليق بكـ

[عيد مشعل]

صح لسانك

جزله من شاعر جزل


تحياتي وتقديري