سلسلة سواليف ذيب السنافي

هذا الموضوع بخلي سلسلة ورى بعض يعني كل ماشفت نفسي رايق سجلت لكم حلقة ,,

راح تكون هذي الحلقات كوميديه في الغالب إن لم تكن كلها هذا تصوري لها الآن ,,,

المواضيع الي راح تنطرح راح أجيب مثلاً نكته في بالي وأحولها لحوار قصير مبهر بشوي بهارات يعني نكته مطورة,,

أيضاً لو لاحظت شيء في المجتمع وأبي أنقده راح أنزله هنا حلقه لو لا حظت شيء في المنتدى أيضاً لو حبيت أداعب أحد الأعضاء مثلاً أو حتى أنقد نفسي ,,
بدايةً حسب التصور الي أضعه في ذهني أني سأجعل هناك شخصيتين رئيسيتين للحلقات وهي شخصية شليويح وزنيفير شخصيات خيالية من وحي الخيال ولكن مع هذا لا يلزم أني أجيبهم على طول الخط يعني يمكن يوم أستخدم شخصيتي أو شخصية أحد الأعضاء والعتب والزعل مرفوع وتكفون بليا مشاريه,,
والحلقات ستكون كما وضعت في تصوري مستقله عن بعض إلا إذا حسب ماتدعي الحاجه إليه فلربما أربط مثلاً الحلقة العاشرة بالحلقة الأولى وهكذا والشخصيات ربما تمر ولا تمر مرة أخرى وربما تمر مرة أخرى إذا دعت الحاجة
وأيضاً لن أستخدم أسلوب معين :روايه- قصة لا بل الدعوى سوالف بخلط كل شيء ببعضه كنها سالفه في مجلس ألا ماندر
-------------------------------------------------------------------------

الحلقة الأولى

(((((((( زواج زنيفر ))))))))))))))

ملاحظة : بعض الأشياء أقروها بالعامي
------------------------------------------
زنيفر : آآآآآآه

أم زنيفر: وش فيك يايمه ؟؟

زنيفر : ألا وش الي ماهوب فيني يايمه فيني الساحق والماحق لا ويطردني فشق امتلاحق بعد .

أم زنيفر : أيه عرفت وش فيك ياوليدي دواك عندي يمال الجدري

زنيفر : وشو دواه سلمتس الله يمه ؟؟

أم زنيفر : مالك خص بعلمك بعدين,,

((طبعاً أم زنيفر فاهمه أن الولد عنده مغاط عامر ,, مادرت أن زنيفر ثور الله في برسيمه ماعنده ماعند جدته))

--في الليل:

صوت طقطقه جاي من بعيد وصوت غناء زنيفر مايدري وش الطبخة جت أمه لبسته غترة حقت الأولين ذيك الي تلبسها ويطلع علباك وعقال كنه يادافع البلى كفر شيول---

شوي ألا منفتح الباب ألا البشوت السود ذا الحريم من كل شكل وكل لون وذزنيفر طايرتن بوهته فاقن خشته

شوي ألا يمطقونه عماته وخالاته مبروك مبروك وشوي تنحاس الأمور مادرى ألا وهو في غرفة ويا حرمه وعم المكان سكون وصمت مطبق ألا من صوت خرفشة الثوب الأصفر القديم الي يلبسه زنيفر من كثر الوسخ والغسل (ضعوف من أول مساكين فقر وعوز)

المهم دام الصمت ساعة شوي ألا تنحنحت العروس

زنيفر : وش ذا حرمة أنتي حرمة <<<<<<

وضحى : لا رجال <<<<<<تذب من الضيقة أو مدري من الجنون الي في راسها

زنيفر : لا والله قولي والله أنك رجال

وضحى : أههههههه أخس بس

زنيفر : مامعك بيت ولا بيتين تسمعينا <<<<<<يحب الشعر ويبي يسولف صدق من قال ثور

وضحى : ألا معي بويتات مووت توني سامعتها في إذاعة طامي*

زنيفر : تابعين إذاعة طامي ماشاء الله عليك عز الله أنك مثقفة (وصكها بذاك البقس يقاله يمزح)

وضحى : آي يمال والله السلال كسرت تستفي(كتفي)

زنيفر : المهم الأبيات عطينا وقبل ماتهذينها علي هنيا أبي أعرف من هي له

وضحى : هذي الأبيات من قصيد شاعر قابلو معه في طامي أسمه اممممممممم الله يجيب أسمه وش أسمه

زنيفر : بسرعة كنتس تعصرين يادافع البلى

وضحى : ايه ايه ذكرت أسمه الطاير المهاجر

زنيفر : بالله الطاير المهاجر ماغيره

وضحى : أيه ماغيره

زنيفر : الله واكبر أذكره يومه طفل في رعيان شبابه حتى أني يوم كبر طلعته من كذا ميدان هو والشاعر حامد زيد والشاعر الأبنودي في مراده مرة من المرارير<<<<<<<<نصاب يبي يتميلح قدام البنت جعل مايشوفك أبو عبدالله

وضحى : طيب أسمع يمال الصقه <<<<<<<<يدل على حسن التربيه للحياة الزوجيه

زنيفر: هاتي

وضحى : أيه ايه ايه ايه أحممممم أحح توزن الحبال الصوتيه بتشيل الصوت

الروح لا حبّت فلا تجهليها=تذوب في حبٍّ تعزّه وتغليه
ولوه ابتعد عن ديرةٍ تنزليها=حسّه يصل لك سامعٍ من يناديه
تدرين نار الحب لو يصطليها=وتدرين ما يخفي ولو ما سألتيه
وأنا عرفت بنيتّك فا امهليها=ياعلّ يطلع فجر نفرح بتاليه
دام الزمن باحلامنا مبتليها=وصارت سرابٍ مبعدات هقاويه

وش رايك حلوة

زنيفر : ألاعلى فكرة ماتعرفنا عليتس من أنتي ترى أنا أسمي زنيفير

وضحى : وأنا وضحى

زنيفر : ألا وش جابتس هنا

وضحى : والله مدري حطت أمي الديرم في ثمي وقالت ألبسي برقعتس يابنيتي اليوم عرستس

زنيفر : !!!؟؟ والله حتى أنا أمي قالت لي نفس الكلام

وضحى : بس المشكلة مني معرسه عليه

زنيفر : والله مااعلم يمكن مابعد جاء

وضحى : (وهي تتثائب فيها النوم ) يوه طلع الصبح ألا شوي بقوم أتوضى وأصلي وبرقدأنا برقد هنيا أمي تقول خلاص بدلين ترقدين عند العرب ذولاك تقصدكم

زنيفر : زين أجل ندلي نسولف أنا وأنتي والله عندك قصيد وعلوم ماهيب سهله

وضحى : على خير ياله أطلع بفسخ ...

يقاطعها زنيفر : وش تفسخين ؟؟؟

وضحى : بفسخ برقعي قم قامت عصب رجليك يالي ماتستحي

زنيفر : (ينقز مرتاع خايف منها الحرمة عصبيه)

(المهم زنيفر طلع راح صلى ورجع يوم دخل البيت ألا يشم ريحة اللحم أمه طابخته وقرص ويوم دخل أول شيء شافه الشعثى خر الولد يحب الشعثى(أكلة معروفه) جاء ماكذب خبر فسر كمه بسم الله ويدخل يده لين حد ذراعه وياكل (أمه متوصيه صباحية عرسه) المهم جت أمه

أم زنيفر:هلا بوليدي بشر هاه عساك أنبسطت

زنيفر: وشو منه

أم زنيفر: تعاينه بنظرات خبث وإبتسامة صفراء وتستطرد : خل عنا الكلام وش سويت ؟؟

زنيفر: أبد بس البارح عندنا يمه وضحى

أم زنيفر : (تضحك) خابره وأنا أمك

زنيفر : بس يمه ياهي شنب عندها سوالف وعلوم زينه

أم زنيفر : الله يوسع صديرك يايمه

زنيفر : يمه تكفين طلبتس تكفين

أم زنيفر : أطلب ياوليدي عطيتك

زنيفر : تكفين يمه خليها تمسي عندنا بكرة بس

أم زنيفر : (في تعجب وذهول وإستغراب ,, ثم أتبعت هذه المشاعر بضحكة خبث : أبشر ياوليدي<<<<<يقالها صايدته مادرت أنها هي وولده مولين الله يستر عليهم,,,

----------------------------------------------------
*طامي:إذاعة كانت في الرياض لواحد مخترعها من نفسه ومكرمته الدولة مخليته يشغلها .
أنتهت الحلقه الأولى

لا تدققون تراها أول مرة يعني لا زم فيه خرابيط زايده وإطالة مالها داعي بس مع الوقت نتطور ,,وأبي متابعة علشان أكتب ولا ترى ببطل <<<<وين يلعب حبشة الأخ

الحلقة القادمة (( زنيفير بعد 45 سنة واللبنانية))

[ثار التميميه]

خخخخخخخخخخخخخخخخ

من قريت زنيفر وانا غاسلتن ايدياتي

يازين سواليفك

[نسناس الهوى]

هههههههههههههههههه

جازت لي والله .. علمنا متى تيتجي الحلقه الجايه عشان نركّ خديّاتنا على يديّاتنا ونناظرهن

من بداية المسلسل .. قويّ ،، الله يقويييك

[ابو أنس]

اسلوبك ممتع وخبرتك ليست قليله
لك تحيتي وشكري

الأخت ثار

سواليفك الأزين

مرحبا بك

نورت المتصفح

الأخ نسناس الهوى أبشر بسعدك

الحلقة الجاية قريباً بس عسى الأفكار تسعفنا

وشكراً لك على مرورك

أبوأنس

مشكور على تشجيعك وإطرائك اللطيف

أتمنى ان اكون عند حسن الظن

[الطائر المهاجر]

تصدق انا اتوقع منك كل شئ ، ماشاء الله تبارك الرحمن خيشة إبداع من كل قيق رقعه اقصد من كل بحر قطره
مواهب متعدده ، وين الله وداك لدراستك ، عز الله ضيعت عمرك ..
الظاهر إن هذي سالفة الأذن حمرا والنصيب على الله
كفو ياسنايدي عز الله إن مجلسك ما ينمل
عشت ولاهانت يالغالي
تحياتي الطيبة

هلابك أبو عبدالله

لبى قليبك يالغلا من جنبها بس نحاول نطقطق

أما بالنسبة للدراسة مقدر ومكتوب يارجال ترى أنا رايح بقدم على شيء ثاني سبحان الله توني واصل دخلت مدري وشلون فريت يم ذيك الطاولة قدمت أليني عندهم لا تسألني شلون بس مقدر سبحان الله

أما بالنسبه للمواهب مافيه مواهب بس باقي موهبه وحده مخبيها لين تحطون قسم ياناسبها بطلعها مع أني تركتها لي فترة شكلي نسيتها بس يالله

مشكور يابوعبد الله

ماقصرت يالغلا

[الطائر المهاجر]

والله حنا في هالمنتدى متفقين على ان الأعضاء هم اللي يطلبون وعلى الإدارة التنفيذ
فلا يردكم شئ
تحياتي