بوح الجروح

[احمد الجريفاني]

يا ناشدن في تال الايام عني=هرجن بصدري من يطيق استماعه
حديث مجروح العواطف يعني=وشلك بسمعه يا عزيز الجماعه
بوح الجروح الداميات امتحني=لو ما حكيته نازف الجرح ذاعه
مثلوم قلبي من عنا الهم جني=عجزت لاخلف خافقي عن طباعه
ماني مريض فراش با الليل اوني=بيني وبين الهم قرب ورضاعه
الحزن هو دمي وفنجال بني=سفينة الاحزان قلبي شراعه
دمعي نزيف الروح كنت امتهني=قبل انولد يامن شقى في متاعه
يقبل علي ليلي بسهر وتجني=ويبخل علي يومي بلمحة شعاعه
ويقبل علي ميلاد حبي وفني=بشموع طفتها سنين القطاعه
كنت احسب الدنيا طيورن تغني=للحب لسنين الوفا والوداعه
ولا بين خلانن حروبن تشني=والناس زاده با الحياة القناعه
واللي يغيب ايام لازم يحني=كنت اعتبر غدر المحبين اشاعه
ولا فيه منهو يسرق الفرح مني=ولا يضيع العمر في ربع ساعه
ولا هدايا الحب يومن تمني=ولا يفرق شمل عقب اجتماعه
لا والله الا خالف الوقت ظني=صار الوفا يحتاج حب وشفاعه
وين الملاك الطاهر المستكني=اللي حلف با الله ليلة وداعه
انه على العهد القديم امتثني=يخونه الله كان لمست ذراعه
راح ونسى عهد الهوى غاب عني=سار بطمان القاع واهمل رفاعه
شرى القصور وكل حلمن يمني=زيف الحياة وصافي الود باعه
ضاع الذي يمه همومي دعني=يا ليت قلبي ماسمع له وطاعه
ياقلبي انسه وش يفيد التمني=مادام عندك يا دليلي شجاعه
ماكل حلون في مذاقه يهني=ولا كل من غنى يطيب استماعه

[الطائر المهاجر]

وسع الله صدرك بالصحة والعافيه وكثر الدراهم
سلمت وصح لسانك وفكرك
واعتلى شأنك
نص رائع من شاعر رائع
لاهنت
أطيب التحية

ابداع × ابداع
صح لسانك وقلبك
ولاهان راسك
تحياتي

[الـزلـزال]

ياقلبي انسـه وش يفيـد التمنـي=مادام عندك يـا دليلـي شجاعـه
ماكل حلون فـي مذاقـه يهنـي=ولا كل من غنى يطيب استماعـه

احمد الجريفاني
بوح في قمة الروعه والجمال
من شاعر لا ياتينا إلا بكل مميز وعذب
أسعدني تواجدي بين حنايا هذا النزف الراقي
مبدع ورائع وجزل شاعرنا رعاك الله
صح لسانك ملايين ملايين
ولك فائق تحياتي وتقديري

[زهرة اللوتس]

سلمت وصح لسانك
جزلة من شاعر جزل
لاهنت وبيض الله وجهك
تحية طيبة

زهرة

[بنت العز]

صح لسانك ولا هنت
قصيده رائعه
يعطيك العافيه

[دايود صالح الخلف]

استاذي ابو فراس !!

لا اخفيك ان نصوصك الشعريه دائما ً تلامسنـي
واجدها فيني كثيرا ً
صح لسانك يالغالي
تحيتي واحترامي لك

[مبروك بن ماضي]

الاخ الشاعر / احمد الجريفاني
صح لسانك ولاهان راسك

قصيده طيبة بطيب راعيها

تقبل مني أجمل تحية

واعجابي بما قرأت

[منيع]

ابيات رائعه جدا
بارك الله فيكم
تحياتي وتقديري

[الطامي]

لا والله الا خالـف الوقـت ظنـي
صار الوفا يحتاج حب وشفاعـه
وين الملاك الطاهـر المستكنـي
اللي حلف بـا الله ليلـة وداعـه
انه على العهـد القديـم امتثنـي
يخونه الله كـان لمسـت ذراعـه
راح ونسى عهد الهوى غاب عني
سار بطمان القاع واهمل رفاعـه
"""""""""""""""""""""""""
الجريفاني
ناقضات العهوووود من يأمنهن
صح السانك ملايين
جزلة وطيبة جدا قاف ومعنى لافض فوك
شكرا لك