لاصرت تبحث عن مقرّ الرجاجيل

[الطائر المهاجر]

لاصرت تبحث عن مقرّ الرجاجيل = فانص الفطاحل ماتبي لك دلوله
حصنٍ حصين يهدي لساري الليل= يشع نوره في دروب الرجوله
تلقى به رجالٍ نشامى حلاحيل = مافيهم اللي هايفاتٍ اصوله
ما يقبلون اللي امتهن للتخاتيل= ولا يقبلون اللي بعقله طفوله
نقوة رجال من خيار المشاكيل = كلٍ بدربه واضحاتٍ فعوله
في كل امانه ما يدانون تطبيل = وسيوفهم فالحق تردع جهوله
حتى سطع نوره وغطى على سهيل= واجهر حصاني ماكراتٍ ختوله
قامت تنافر تايهه فالمجاهيل = ثمن تجمّع كود تصنع بطوله
ترسم بخبث وتفتل المكر تفتيل = وكل كشف نابه وخافي ذيوله
وقامت تكلم ناشره للأقاويل= محدٍ عطاها وجه فاللي تقوله
ومن حر ما توجس تجيب التهاويل= تدخل باسامي ناقصتها الفحوله
لعلها تلقى دروب و مداخيل = نسيت بأن الحصن محدٍ يطوله
شامخ ولا تاصله حتى الدرابيل = ولا من بقلبه حقد لو حال حوله
فالعاقل اللي لا سمع للأباطيل= يدرك هدفها ما تطوف بسهوله
والعاقل اللي لامشى ليل بالسيل= يجس دربه قبل تزلق رجوله
والعاقل اللي لا وطى درب به ميل= يعدل مساره قبل تهلك ذلوله

[مروان الشيخ]

لاصرت تبحث عن مقرّ الرجاجيـل=فانص الفطاحل ماتبي لـك دلولـه

انا اشهد يابوعبدالله

ونعم بالفطاحل وكل من تشرف بالانتساب لهذا الصرح الشامخ

[عبدالعزيز العقيدي]

يا سلامي عليك يا مبدع
دكتورنا الغالي الله يعطيك العافيه
تسلم وصح السانك
على هذه الرائعة
تحياتي لك

[احمد الجريفاني]

عزالله صدقت 000اعجبني ويعجبني استخدامك للذخيرة الوافرة من المفردات لخدمة المعاني دونما تكلف000 سلمت وسلمت سبوقك 0

[الطامي]

الطائر
صح السانك وبنانك وفكرك استاذي
قول وفعل
نعم انهم الفطاحله
يقولون ويفعلون وهاهم الأن بالمقدمه
افكار وتنفيذ ومعلومات سبَاقةٌ للأخرين
وهكذا الفطاحله لايرضو الا بالتميز
شكرا لك

[صعبة المنال]

والنعم بالفطاحلة وصاحبها

صح لسااااااااانك يا عووود

صعووب

[نجم الإبداع]

الله الله

ابدعت وامتعت يابو عبدالله


وصح لسانك على المصافحه الجزله

لاهنت

تقبل مروري

وودي

[همس الورد]

صح لساانك مليون

و صح بدنك

بوووح رائع

يسلمووووووووووا

[مبروك بن ماضي]

الاخ الفاضل الدكتور / عثمان العبدالله
أفضل الصمت ..
لأني لا أرغب في خدش جمال هذه الفاتنة
التي نافست الابداع وطرحت المضمون بكل روعة واتقان
قصيدة أجد فيها دستور الفطاحله وكم تمنيت لو تُثبت
صح لسانك ودمتِ للروعة والتألق
تقبلي تحياتي واحترامي
أخووووك ///

[بنت العز]

صدقت وصح لسانك
ونعم بالفطاحله الرجاجيل
بس شكلك نسيت الفطحولات تراهن يبن لهن قصيدتن خاصه
اجل مالهن رب
يعطيك العافيه شاعرنا
تسلم لاهنت