كلمـا قلت قـام الحظ عـوّد ينـوم

[الطائر المهاجر]

كلمـا قلت قـام الحظ عـوّد ينـوم = يالله انك عليم الحال ويش السواه
والزمن من عرفته ما يبي الا الرخوم = ما يبي الحر الاشقر دام فكره معاه
لـو احـاول اجامل انكشف ما ادوم = تفضح العين سري بلمحةٍ او غضاه
ولو اسايس حروفي بان منها السموم = دام قلب المعنّـا يشتكي من لضاه
صرت مثـل اللذي خبره بحاله يعوم = لين طبّ البحر والموج يلعن ثواه
ضاع عمره يجـدّف بين قهر وهموم = والنهـايه سحب عمره الى منتهاه
غسّل ايـديه من وقتٍ جحـد للسلوم = وصار تايه بدربه ما تشيله خطاه
لا (تأمرك) نقـول اليوم سهمه يقوم = ولا تقرّب لدرب الذلّ يرخي الجباه
قالـوا اصبر ازياده كود تطلع نجوم = قلت انا ادري نتاج الوقت بوم وشاه
يكفي اللي مضى فالصبر ماله لزوم = لاني قادر اغيّر ولاني طالب رضاه
ابتعد عن طريقٍ ما وضـح بالرسوم = واترك اللي مشى به تايهٍ في عماه
كيف انا اصبرعلى وقتٍ يذل الخشوم = يشـوي الصقر حيٍّ بالقهر من بلاه
كيف انا اصبرعلى وقتٍ اشوفه ظلوم= كل حر يعـاني من زمـانه وطـاه
وين حقـك وحقـي يا ترى من نلوم = دام مالك ومالي جـاه والا وجـاه
من يدافـع عن المظلوم شق الهـدوم= من هـو اطعم فقيرٍ في زمان الرفاه
وين حـق التساوي والعـدل للعموم = "وين" .. جرحٍ نزيفه ما عرفنا دواه
ويستمر التفاخر .. صرنا فوق الغيوم= والحقيقة انحدرنا في حضيض الرداه
يمـدح السوق رابـح يحسبنه يدوم = ما حسب للخساره لحظةٍ في عماه
وبيت يسكت على عيبه بساس هضوم= يوم يسقط على راعيه هذا جزاه

[ابومياس]

حظي المكنوب نام ولاقعد
0000000 قلة الحيلة مع الحظ العنيد
ــــــــــــــــــــــــــــــ ــــــــــ
ذكرتني بالقصيدة يابوعبدالله

صح لسانك لاهنت

ننتظرها تشرفنا بالهمس كان ماسبق ان نشرتها

دمت بخير

[عبدالرحمن الصباح]

والزمن من عرفته مايبي الا الرخوم====== مايبي الحر الاشقر دام فكره معاه
وربي انك صادق يادكتور بيض الله وجهك جزله من راس جزل تقبل ودي وتقديري استاذي

[الأموره]

غسّل ايديه من وقتٍ جحـد للسلـوم
وصار تايه بدربه ما تشيلـه خطـاه

صح لسانك يالشاعر ،،

سلم بوحك و دام نبضك ،،

الف شكر لك ،،

دمت برعاية الخالق ــ