انا رجل ستير الحال لاثروه ولاسلطان

[فواز الغسلان]

انا ماقلت لك طيبي مثل مـمدوح ابـن شعلان=سليل اللي تشيل الـثـقـل لا قـادت زمـاميله
ولاني في دروب الـطيب واجـواده مـثـل راكان=ولاني واصل(ن)بـالطـيب والنـخـوه مواصيله
ولا كل العـرب تـقـدر تـفـاخر فارس العـجـمان=مدامه شـاخ بسباع(ن)سروج المجـد مع خـيله
ولاني بالـقـهـاوي فـوق زيـد وراعـي الـسبـعان=ولا عـثـمـان ريـف اللي زمـانه جـادع(ن)حـيله
ولاني مثل ابـن هـادي سليل المجد في قحـطان=ولا عـزم الـعـطـاوي يـوم زاد الخـصـم في ميـله
ولاني مثل ثـقـل رويل لا ساروا كـمـا الجيلان=هل العـطـفـه ربـيـع اللي زبـنـهـم عـقـب تجـفـيله
ولاني مثل من ساق الذبـيـحه لاسحم السرحان=ولا حـطـاب راع الـجـوف لا قـلـت محاصـيـله
ولاني في كـرم حـاتم وصبر جـديـع بـن قـبلان=او اللي صاح للـضيـفان عـقـب الثـلث من ليله
ولاني طيب ابن جـلعود ريـف الجايع البردان=ولا وقـفـة خـلـف لاجـاه رجـل(ن)يـشتكي ويله
ولاني بالـبـنـادق حـول كاسب نـقـوة الشلـقان=ولا سطـوة عـقـاب الـخــيل لا ثـارت رجـاجـيله
ولاني في صـخـى تـركـي وفـزعـة ربـعـه العـتبان=ولاني مثـل ابن ناحـل مـزون الوسـم مع سيله
ولاني في ثبات مطـيـر لا ساروا مع الـدوشـان=مثل جـطـلـي وابـن لامـي الـيـا دارت محاحـيله
ولاني فـي نقى الـمـنـديل لا بانـت لـي الغزلان=ومـعـهـن جادل(ن) تسحر خفوقي في مـجـاديله
ولاني مثل قـاف عبيد والـعـوني وابـن هـدلان=وشعر اللي بــحرف القاف ياصف لك معاميـله
ولا النـجـدي ولا سعدون والقرقاح مع عدوان=ولانـي بـنـدر ابـن سـرور لا ضـاقـت مداخـيله
ولا مثل الـقـريـفـه يـوم عــاب الـبـخــل بالقيفان=وقـال الـرزق رزق اللي يـجـيـنـا الخـير من كيله
انا رجل(ن)ستـير الحـال لا ثـروه ولا سـلـطـان=وعـلـمـي نـاقــص(ن)بـالـناس لو حاولت تكميله
ولا لي فـي بـنـوك الـغرب لا شـفـره ولا عنوان=ولا صـيـفــت فـي بـاريـس مـع بــارق هـمــالـيله
اعـيــش بـراتـبــي يـومــيـن وابـقــى عقبها طفران=واداري كـلـمـتـي بـالـنـاس عـن هرجـة مـهـابيله
ولكني رفـضـت الـمـال والـثـروه وانـا الكـسبان=مدامـه من كـفــوف اللي نــوى للـنـفـس تـذلـيله
اذا قلت الخـبر بالناس جـبـت لـهـرجـتـي برهان=ولا اسـولـف مـدام الـنــاس ماتشفق وتصغـي له
واذا شفت الغلط مني رجعت وقلت انا غلطان=ولا ني ضـايـق(ن)يـانـاس من مسـحـه وتـعديله
واقول القـول باسنـاده بـلا زود(ن) ولا نـقـصان=وغـلــق الـقــاف مانـبـلــش على فـهـمـه وتحـلـيله
وعند الحكم لاهل الطيب حكـمي يضبط المـيزان=وراع الصدق مانسـكت على من راد تـجـهـيـله
ورجل(ن)عاش بالحيلات يسكن حفرته خسران=ولا يـمـشـي كـلام الزور مـهـمــا رمـت تـجميله
واذا شفت العرب خاضوا بعرض فلان ثم فلان=اعــاف اللـي بـعــرض الـنــاس سـلـواه وتـعـاليله
هوان الشعر عند اللي يـتـابـع شـاشـتـه طـربـان=تـحـاكـي واحــد(ن)طــربــان مــع نـغـمــة مواويله
انا كـيـف ارفــع الـمـثـبـور مع رتـبــة رفـاع الشان=واحط اهل الطرب والرقص مـع قـاري تراتـيله
وكيف اجـمـع رجـال الـطـيب واللي تفـتح البيبان=مـع اللي يـشـتـكـي بـابــه عـنــاه وكـثــر تـقــفــيله
انا لو نـمـت ليل الشبط في وسط الخلا جـيعان=وعـشـت الـعـمـر بالخـلـيـان مـع ضـايـع مخــالـيله
اخـيـر من الـمـنـام اللي يـذيـقـك حـفـرة الحـقران=وعـز الـنـفــس راس الـربـح عـن ذلـه وتفـشيله
واذا كان الزعـل كله سبب مدحي صخى الويـلان=مدحت اللي تشيل الـثـقـل ماترتاع من شيله
ويشـهـد لي جـمـيـع اللي تـهـاب الـكـذب والـبـهتان=بـمـن حـازوا جـديـد الـمـجـد كله مع مساميله
جـمـلـهـم فـي نـهـار الـكـون فـيـه الـقـيـد للشجـعان=ولا يـغـويـك خـرط اللي خـذتـكـم فـي تهاويله
شيوخ(ن)تنجب الفرسان مثل جـديـع مـع مـشـعـان=ومثل مـحـمـد ابـن سـمـيـر راع المجـد في جيله
وفيهم ساجـر اللي صـار مـدعـاة(ن)عـلـى الذيدان=ولا تـسـمـع لـمـن يـجـمـع خـبـولـه ثـم يـفـتـي له
وفيهم مثل ابن عـيـده عـطـوف الـجـوف بـالـيـتـمان=من اللي تكرم الـجـيـران بالـحـشمه وتـوصي له
وفيهم مدخـل الـمـطـلـوب فـي بـيـتـه مـثـل عـمـران=ولـولا شـيـمـة الـويـلان مـايـسـلـم مـن الـغـيله
ومن يقـدر على جـحـدان شـيـخ(ن)بـان بالـفـدعان=شيوخ(ن)تدعي الضـيـفان بالـظلـماء وتومـي له
اخـاف الـظـلـم حـيـث الـظـلـم ظـلماء ياهل العرفان=ولا يظلم هل المـعروف رجل(ن)يرتـجـي عيله
وترىالاقوال دون افـعـال ماتـروي ظـمــى العـطشان=ونور الشمس مايخـفـيــه رجل(ن)حط منديله
ضـنـى الـــويـلان ماتـحـــتــاج لـلـفــزعـــات يـاكــوبــان=وبالـفــرقــان ماتـعــــتـــــاز تـوراتــه مــع انـجــيـــله
عـطـيـتـك فـلــم فـيــه الـعـلــم عـقــب الـحـلـم يانعسان=وهوش الزلـم وقت السلم ماتـخـفــى مـهــازيله
حروف(ن)ثـابـتـه كالـشـمـس فـي تاريخ ابن غسلان=ومن يزعل مـهـو مـجـبور يسمع له ويوحي له

[ابومياس]

نص جزل من شاعر جزل

يتمتع باصالة المعنى

وجمال الاسلوب

وروعة الحروف

صح لسانك وبيض الله وجهك

دمت بخير

[الخنساء]

انا رجل(ن)ستير الحال لا ثروه ولا سلطان
وعلمي ناقص(ن)بالناس لو حاولت تكميله
ولا لي في بنوك الغرب لا شفره ولا عنوان
ولا صيفت في باريس مع بارق هماليله
اعيش براتبي يومين وابقى عقبها طفران
واداري كلمتي بالناس عن هرجة مهابيله
ولكني رفضت المال والثروه وانا الكسبان
مدامه من كفوف اللي نوى للنفس تذليله
اذا قلت الخبر بالناس جبت لهرجتي برهان
ولا اسولف مدام الناس ماتشفق وتصغي له
واذا شفت الغلط مني رجعت وقلت انا غلطان
ولا ني ضايق(ن)ياناس من مسحه وتعديله
واقول القول باسناده بلا زود(ن) ولا نقصان
وغلق القاف مانبلش على فهمه وتحليله
وعند الحكم لاهل الطيب حكمي يضبط الميزان
وراع الصدق مانسكت على من راد تجهيله
ورجل(ن)عاش بالحيلات يسكن حفرته خسران
ولا يمشي كلام الزور مهما رمت تجميله
واذا شفت العرب خاضوا بعرض فلان ثم فلان
اعاف اللي بعرض الناس سلواه وتعاليله
هوان الشعر عند اللي يتابع شاشته طربان


صح لسانك اخى الشاعر فواز

لاهنت والنعم فيك والانسان دائما باخلاقه

سلمت ودمت بخير

[زهرة اللوتس]

وترىالاقوال دون افعال ماتروي ظمى العطشان
ونور الشمس مايخفيه رجل(ن)حط منديله
ضنى الويلان ماتحتاج للفزعات ياكوبان
وبالفرقان ماتعتاز توراته مع انجيله
عطيتك فلم فيه العلم عقب الحلم يانعسان
وهوش الزلم وقت السلم ماتخفى مهازيله
حروف(ن)ثابته كالشمس في تاريخ ابن غسلان
ومن يزعل مهو مجبور يسمع له ويوحي له


نص جزل من شاعر متمكن
تسلم اخي الشاعر فواز
ويسلم فكرك
نثرت فابدعت
تقبل اخي
تحياتي
واحترامي

[الطامي]

الغسلان
صح الله السانك اخي
والنعم بك وبمن ذكرت
قصيدة طافت بنا الجزيره العربيه وذكرتنا بمن رحل من امجادها الخيار
ولا قصور بالموجودين منهم
لافض فوك
وشكرا لك

[عذب القوافي]

نص يريد تكرارالمروربالفعل أخي وليست يعلم الله مجاملة

لي عودة تليق بهذه العاليه

تقديري أخي ,,,,, فواز

[عيد بن سعدون]

صح لسانك

ونعم بك وبمن مدحت

وكل عاده قصيده مفعمه بالابداع

اتمنالك التوفيق

اخوك
عيد بن سعدون

[يوسف بن صالح]

ورجل(ن)عاش بالحيلات يسكن حفرته خسران
ولا يمشي كلام الزور مهما رمت تجميله
واذا شفت العرب خاضوا بعرض فلان ثم فلان
اعاف اللي بعرض الناس سلواه وتعاليله

الله الله

ما هذا الابداع يا مبدع


صح الله لسانك


روعة والشاهد الله



لاعدمناك ياطويل العمر

اخوي فواز الغسلان

[عبدالله راشد الثويني]

نص شامخ بشموخ كاتبه
وشموخ الاسماء المذكوره من خلال أبياته
الشاعر الراوي فواز الغسلان
خبرتك الطويله من مجال الروايه جعلتك تمتلك قاموس ثري
في معرفه العرب وأهم الشخصيات التي لا بد من ذكرها
صح لسانك وعلا شانك ولا عدمناك يا الغالي
وُدي وإحترامي لشخصك الكريم

[عبدالعزيز ابراهيم المنصور]

كَلِمَات رَائِعة ..يا أبن غَسَلان

ونَّص قِمَة فِي الجَمَال

وقِمَة الجَزالةْ والرَوعَةْ

لاَفَضّ فُوك

دُمْتَ بِهَذا الجَمَال

دُمْتَ بِخَير