(أقصى طموحي)

[سناعيس]

أرجو قبول هذه المتواضعه على علاتها
والعتب على البطا
وهي بعنوان (أقصى طموحي)
.

لامن بدالي صبح الايام ممسي=وش عاد يبقى للمسا واوسط الليل
ولامن غابت في ضحى الوقت شمسي=وبدا يعم الجو كثر النوازيل
وعين الزمان يصيبها شبه عمسي=ويفوتها تمييز الاخطاء والمَيل
وعمري بدا يفتش عن رموز رمسي=ويحط نفسه عرضة للبهاذيل
وطمس مشاويره والايام طمسي=من شان ريفه يمتطي صهوة الخيل
ويبين ضعفٍ تشتكتي منه خَمسي =ويبرد جَهَدْهم لادنت حزة الشيل
وافقد بعض كلي مع حساس لمسي=ولا عدت أحس بحامايات المعاميل
وصار الكلام الصلف يادوب همسي=وقلت حركاتي ولا عاد بي حيل
وصارت رماح الموت تزداد غمسي=في جسمي لياجاه كثر الولاويل
وبكراي مايسأل عن أحداث امسي=والفايدة قلت ولا هنا محاصيل
فاقصى طموحي كيف ابصبح وابمسي=بحماك يارحمن يامجري السيل

[ابو أنس]

الفاضل النيزك...................
أنالك الله مبتغاك والبسنا ثياب المغرة والرحمة وإياك
ووالدينا ووالديهم والمسلمين
من يلتجئ لخالقه لايخيب وفي الحديث القدسي...(لو أتاني عبدي بقراب الأرض خطايا ثم أتاني لايشرك بي شيئا لغفرت له....أو كما جاء في الحديث
نص جميل مؤثر وقافية جميلة
لك شكري وودي

[عبدالله الدخيل]

النيزك
سليمان السالم


لامن بدالي صبـح الايـام ممسـي
وش عاد يبقى للمسا واوسط الليـل

يحــوووول

فاقصى طموحي كيف ابصبح وابمسي
بحماك يارحمـن يامجـري السيـل

والنعم بالله


قصيده ذات شجن راقت لي كثيرا
صح لسانك وبارك الله فيك


واقبل
ودي واحترامي

[الطائر المهاجر]

جزله من راس جزل
صح لسانك واعتلى شأنك
ولاهنت
تحيتي واحترامي

[داعي الشوق]

صح لسااااااااانك يا بو محمد

قصيدة معاناة

و الله يصلح الحال

و الله يعينك على بكراي ؟

صح لسانك مدد يالشاعر

ولاهنت

*************

[عبدالله راشد الثويني]

اهلا ً بالشعر

أهلا بـ من اطال الغيبه وافتقدناه يشهد الله


مصافحه جزلـه تنسينا مرارة الإنقطاع الذي طال

شاعرنا الغالي / سليمان السالم

صح لسانك مليون ولا يكفون يابعدي

رغم الألم الذي يكسو احرفك إلا انك اجدت صياغتها بإسلوب شاعر متمكن قادر على إمتاع المتلقي


سائل المولى عز وجل ان يجلي همومك وان يبدلها بالفرح والمسرات وجميع المسلمين

طامعين بجديدك دائماً بعيداً كل البـُـعد عن الألم بإذن الله


تقبـّـل مروري المتواضع ولا بد من العوده لهذه الرائعه

[عمر ال شيبي]

جزله من راس جزل
صح لسانك واعتلى شأنك
ولاهنت

[جهاد الشعلان]

وصـار*الكـلام*الصـلـف*يــادوب* همـسـي
وقـلــت*حـركـاتـي*ولا*عـــاد*ب ــــي*حــيــل !!


صح لسانك اخوي سليمان

كلٍ له الله وانا اخوك والغيم اذا اسوّد جاء عقبه السيل

مبدع

تقبل مروري

[عبدالعزيز العمار]

الله الله ياسليمان

صــــــح لسانك وقلبك وفكرك وكلك

مبطين عن قصايدك وناخوك

ابدعت وامتعت وماخاب من كان مع الله سبحانه

تقبل مروري مع خالص تحياتي وتقديري

[كظيم]

النيزك
صح لسـانك وفكرك يابعـــدي
قصيده جزلـه ووافيـه رغم الألم وحزنهــاا
هنـا وجدت شعرا ً يعتصره الغمـام ويفوح بمكنونـه
اجزلت وابدعت
تقبل مروري المتواضع لاهنت
ودي وتقديري