ثارن بقلبي مثل بندق وبارود

[محمد مطر المطرفي]

زارني بعد وفاة الشاعر فهد عواد المطرفي أخوه / سعود وكلمني من جواله رحمة الله عليه وأترككم مع الأبيات التي كتبتها بعد ذلك الموقف وأقول فها ........

الله يرحم راعي الرقم يا سعود = يا سعود ليه دق منه عليه
شفت الاسم يا سعود وقفت بركود = وبكل ثقه يا سعود فرحة عنيه
هذا فهد عواد لازال موجود = الآن دق الآن توه عليه
والله أي والله ربٍ ومعبود = إني شعرت بفرحة داخليه
فرحه تخلى شايب قاظين عود = يرجع شباب وضحكته بالثنيه
فرحة تنسى مثلي اليوم مقرود = انه قبل يومين دافن خويه
صحت ورفعت الصوت بفرحه بلا حدود = هلا فهد وأهلين راعي الحميه
هلا بولد عمى هلا براعي الجود = لك وحشه والله ما هي شويه
وقالي اطلع أنا الحين موجود = عجل يا أبو سلطان أطلع عليه
طلعت له أجري وأشتقتله زود = وشوفه أبو خالد هي أكبر هديه
ماهو فهد أثره يكلمني سعود = وثري فهد ميت خذة المنيه
وقفت مذهول وكل حيلي مهدود = وشو جرى يا ناس ويش القضيه
ثم سال دمعي فوق خدي بلا فود = ما فاد دمع أمه لو صرت زيه
عزي أنا لمه بكت بعد وصدود = وعزي أنا لعواد وعزي لخيه
يا لله لا تجعل من دعاي مردود = وأقبل دعاي اليوم رب البريه
أرحم فقيد مات والعالم وشهود = وكل الذي عرفوه حزنوا سويه
وسع عليه القبر ولو كان مسدود = وفتح عليه أجنان خلد عذيه
وأصلح ضناه اليوم يا راعي الجود = وأجعل عملهم صالح ولك رضيه
وارحمه في يوم به العيد موعود = وأغفر له الزلات ويا الخطيه
هيظتني يا سعود والعالم رقود = وكتبتلي بويتات ماهي رديه
ثارن بقلبي مثل بندق وبارود = ووذيتني ياخوك اية اذيه
الله يرحم راعي الرقم يا سعود = ويهديك ليه تدق منه عليه

كلمات / محمد مطر هزاع بن حويل المطرفي

[بنت النور]

اخي محمد مطر المطرفي


بما أن القصيدة كُـتـبـت بالشاعـر الوافي


فهد عواد المطرفي ( يرحمة الله ويسكنه الجنة )


بهذا لشهر.. شهر الخير ان شاء الله


للفقيد الراحل حق كبير علينا جميعاً بالدعاء له أيها الاوفياء


شكراً على هذا الاحساس الصادق ودمت كما أنت وفياً


اسعدني ان اول من يرد عليك
بصفحتك الرائعه
كروعة...كلماتك
تلألأ النجوم في ليله مقمره
تعلمت منك ولازلت اتعلم واستفيد
ربي يسعدك
دنيا واخره " محمد مطر

[محمد مطر المطرفي]

اللهم ارحم واغفر للشاعر فهد عواد المطرفي

وارحمنا إذا ما سرنا إلى ما سار إليه

صح بدنك

اختي بنت النور

ونور الله قلبي وقلبك

وجميع المسلمين والمسلمات

بالإيمان وطاعة الرحمن

[الطامي]

المطرفي
صح السانك ملايين
وغفر الله للميت وادخله الجنه
ابداع في من يستحقه
لاهنت

[داعي الشوق]

رحمة الله عليه
و يجبر عزاكم فيه

و صح لسانك يالمطرفي ولاهنت

[محمد مطر المطرفي]

اللهم ارحم واغفر للشاعر فهد عواد المطرفي

وارحمنا إذا ما سرنا إلى ما سار إليه

صح الله بدنكم

أخي الطامي والاخ داعي الشوق

نور الله قلبي وقلوبكم

وجميع المسلمين والمسلمات

بالإيمان وطاعة الرحيم الغفار