سلام يانجد العرب والناس معطى ومحروم ..!!

[عايض المقاطي]

من باب التواصل يالفطاحل أضعها



أمامكم



آملاً

في أن تنال الرضى




,,
,

لا ضاق صدري وابتدا المشوار مع ركب الهموم=والناس كل"ن" في حواله منشغل ما لد لي
يطري علي الموتر اللي ما توخر فاللزوم=الموتر اللي فالخليج اليعربي ماله حلي
اللي ليا مني زهمته قال فالدرب مخدوم=جر القوافي فوق متني يالمقاطي وازهلي
واشر تبا السيل المسمى ..أو تبا خط الجموم=ما فيه درب يالمقاطي فالوطن يصعب علي
ودقيت سلفه وابتدى المسرى تحت لمع النجوم=السيل قدمي والبلد قافيه ومودع هلي
ومحدن معي في طرقتي كود الطواري والعزوم=والسبحه اللي لا توامت كل غيمٍ ينجلي
والديره اللي صوبها يممت مرباع القروم=نجد العذيه والحشا ..يطبخ مراده ويغلي
سلام يا نجد العرب والناس معطى ومحروم=وأحدن يقنع بالجمل واحدن يقنع بالطلي
وأنا بعد حمد الولي قسمي من خيار القسوم=ورد العدود الراويه نعمه لها حمد الولي
أسرجت خيل المرجله منذ الصغر والعز دوم=أما رقى فيه الفتى ولا بحيله ينزلي
ولا هوب عيب إن الفتى لا طاح في دربه يقوم=العيب والله لا بغا الوقفه تعثر فالخلي
ولو كل عيب فالزمن تقدر تغطيه الهدوم=عيب اللحى ما ينتغطى باللباس المخملي
وسلام يانجد العرب واليوم في صدري علوم=ماحت على قلب العنا وسط الحشا ميح الدلي
والعلم لا منه بدا من صاحبه قيل محشوم=إن جمله ولا ترى ما قيل عنه مجملي..!!
وأنا ليا مني نويت أبدي بها بين القروم=أحسب مخارج كلمتي قدام لأحسب مدخلي
الوقت قاسي والزمن ساوى القروم مع الرخوم=واللي علا به طمنه ,,واللي طمن به معتلي
حتى الصبي وهو الصبي عقب العصا شال الختوم=وليا سألته قال ورثٍ عن أبي لا تسألي
وإن شاف عمه ينتفخ علباه من كثر السموم=ويموت سمه ما تحرك فالعلابي ممتلي
الله وأكبر يالزمان اللي عن الطيب تشوم=فيك السعف ياقف مواقف سيف أبو طالب علي
شي عجيب ولا يصدق فالحكاوي والحلوم=ولا له مدى فالمذهبين الشافعي والحنبلي
مار أسترح ياهاجسي والله يبارك فالوسوم=ابها نميز في حلال الهاشمي والعبدلي
صحيح مالي فالقضيه لا خصوص ولا عموم=ما جيت أدور ناقتي ما جيت أدور لجملي
مار الحقيقه طيرها لا من بدا فوقي يحوم=رمية هدف من بندقي لا من بدا ويحولي
ويالله يارب السما يالحي يالرب الرحوم=تقلع من ضروس الليالي كل ضرس يرقلي

[الصريح العتيبي]

عايض المقاطي

صح لسانك واعتلى شانك
جزله من شاعر جزل.
دمت بخير حال

[ضعيان البدرانى]

الله...الله...الله

الشاعر:عائض المقاطي...صح لسانك

احسنت وابدعت وتميزت بالوصف

تقبل تحياتي واعجابي

@ سامت ودمت @

[عايض المقاطي]

صح بدنك يابو فايز



وحييت مليون





ضعيان

صح بدنك وياهلا ويامرحبا

[ابومياس]

صح لسانك يالمقاطي

وبيض الله وجهك نص جزل من جزل

يزخر بجميل المعاني

دمت بخير

[ام العمده]

عايض

صح لسانك واعتلى شانك
لاهنت
دمت بخير

[محمد عبدالله البدراني]

العزيز الموقر عايض المقاطي سلمه الله

حي والله هالتواصل الطيب وتكفى لاتغيب وليتك دايم موجود حضورك مميز ومرورك مطلب لاتغاااااااااااايب يالمقاطي

والقصيده اشهد بالله انها قصيده موقفه ورااااائعه بروعة حضورك البهي


الله الله عليك:

ولا هوب عيب إن الفتى لا طاح في دربه يقـوم
العيـب والله لا بغـا الوقفـه تعثـر فالخـلـي
ولو كل عيـب فالزمـن تقـدر تغطيـه الهـدوم
عيب اللحـى مـا ينتغطـى باللبـاس المخملـي



ياسلام عليك

لله دررررررررررررررررررررررك ياعايض


وبيض الله وجهك


ومليوووووووووووووون مليووووووووووون صح السانك ولايكفوووون



وكفو كفووووووووووو والله :

مار الحقيقه طيرها لا مـن بـدا فوقـي يحـوم
رمية هدف من بندقـي لا مـن بـدا ويحولـي


لله دررررررررررررررررك


تحياتي
مع اسمى ايات الشكر فائق التقدير واطيب المنى رعاك الاله

[محمد الأحمري]

الله الله الله
ياشاعر الحس والمعنى
ما اجمل الشعر الغير متكلف
الذي يكون من القلب ويصل للقلب
بكل سهولة
ابحرت بنا في
صوره خيالية رائعة
وكأننا معك في رحلتك
وفي سيارتك
وفقك الله يا الجزل
واهنيييييييييييييك
على هذه الرائعة
بكل صدق
بيض الله وجهك
يا أبيض الوجه

[طلال سويعد]

عايض

صح لسانك واعتلى شانك

لاهنت
كل الود

[عذب القوافي]

الأخ الشاعر / عائض المقاطي

صح لسانك

نص يعانق السحاب بجماله

لله درك

تقديري,,,,,