ردي على قصيدة ناصر المسطح/من وحي النجوم

[عبدالله خالد البكر]

قصيدة ناصر المسطح الموجهة لي (وحي النجوم) اثلجت صدري واضافت عليه السرور واتمنى منه قبول ردي المتواضع وهي على الرابط
http://www.fatahilah.com/showthread.php?t=32580

يالجدي ردّ القول للي بعثنيك = ورَد الثناء عادات لاهل الفضيله
وياهاجسي ثن البيوت المحابيك = من ضامرٍ يسبل بيوتٍ جزيله
جانا جوابك وبمثيله نجازيك = ( يالمسطحي ) يابن عريب السليله
وغاب الحرار وإعتلا الماكر الديك = يوم السباع استوطنت بالنثيله
لادمت ياوقتٍ عجيبه مباديك = غابت بك رجال الفعول الجليله
الاّ الذي بالطيب ذكره يكفّيك = اللي تهاويل الدهــر ماتمـــيله
يالمسطحي وان كانه العسر حاديك = ياحيف لو ماهي متوني تشيله
في عمري الباقي وفي روحي افديك = والروح ترها دون قدرك قليله
يامارث رجالٍ تحلّ الشرابيك = تشهد لهم عِلط النّغَش بالدبيله
في جودك الضافي يلوذ المهاليك = ومدّة يدك لله ماهي بخيله
تفخر مساهيج النقا في خطاويك = وتشوم في عزّك رعاعٍٍ ذليله
وانا يابو خالد لشخصك احييك = انته خليل العز وانته عديله
ماكل رجلٍ جاد يقدر يشاديك = حيث البرايا تختلف بالفصيله
تطرب مساميعي نوادر قوافيك = بها يطيب اهل القلوب العليله
انت العديم الي عميقه مساطيك = عزّي لمن عاداك واعزتي له
لاشك شعري لامدح مايوفّيك = مير الغــلا بالقلب محدٍ يزيله
هذي تماثيل التميمي تغنّيك = من ضامر اللي مايجيب الهزيله
وختامها مني سلام وتباريك = تاصل جنابك مع عبير النفيله

[الطائر المهاجر]

رد طيب وجزل من راس طيب
صح لسانك ولا هنت
تحياتي الطيبة

[عذب القوافي]

الجزل / عبدالله البكر

نص وافي وكايف لله درك يالغالي

تقديري ,,,,,

[احمد الكثيري]

رد جميل بارك الله فيك على هذا النص
لك تقديري

[عبدالعزيز البليهد]

رد وافي وجزل صح لسانك يالغالي

[ترانيم المطر]

صح لسانك ولا هنت

تقبل من التحيه أغلاها

ودمت بود

[فارس القوافي]

هلا بك ياعبدالله

صدى رائع


ونص راقي


صح لسانك


لاهنت


يعطيك العافية


دمت بخير

[ناصر عبيد الهواوي]

البكر هذا هو جزل الكلام اللي الىقاله الرجل استحق لقب شاعر
ماه الكلام اللي يضيق الصدر
لله درك على هالرد وفيت وكفيت ولاهنت يالقرم
تحياتي واعجابي

[عدنان كريزم]

صح لسانك يالغالي



نص رائع وراقي



لا هنت

[داعي الشوق]

الله الله

رد طيب و وافي يالشاعر عبدالله

يستاهل المسطح

كفيت و أوفيت

صح لسانك مدد

مع التحية لك

،،،،،،،،،،،،،،،،،