29-08-2006, 10:49 PM
|
رقم المشاركة : 51 | ||
|
|
ههههههههه...الله يعينك أجل بس أتوقع باقي شوي يعني أسبوعين ثلاث بالكثير أخليك مع الأجزاء حبوبه الجزء السابع والخمسين
وصل سعيد البيت حوالي الساعه تسع ونص ..كان متنرفز حده..بس متلوم اكثر لانه ظرب اخته هالظربه الشينه...عمره مامد ايده ولا فكر يمد ايده على وحده منهن...وحمدان...!!..ياترى انا غلطان بربعتي لواحد مثله..؟!!.. والله اني مب مصدق اللي صار للحين...كيف يسوون فيني جي...ونوره...نووره اقرب انسان لي... تعرف اني اعارض هالشي ومايرضيني تقوم تشجع اختي على شي غلط..؟؟؟؟ معقوووووله..؟؟ ..آآآخ... حط سعيد ايده على ويهه وفركه شوي عشان يصحصح.. طلع السويج من السياره وطلع..قفل سيارته ودخل البيت.. في الصاله حصل امه وعليا وفيصل يالسين ..كان بيتخطاهم وبيسير غرفته سيده... بس زقروه... ام فيصل: يييت ابوويه...تعال انزين وين ساير...؟! وقف سعيد ويا صوبهم بتكاسل ... سعيد: السلام عليكم... الكل: وعليكم السلام.. ام فيصل: وين اختك مايبتها..؟؟؟ ارتفعت الحراره فصدر سعيد مره ثانيه.... سعيد: ليش اييبها ..؟؟ ام فيصل: وابوي العيد ورا باجر ولديه جان يبتها.... سعيد: انزين عليها دوام باجر... عليا: يوم واحد ماعليها بتغيب...احين منو بييبها.. سعيد: انا سرت اليوم...مافيني اسير باجر بعد...فيصل بيسير اييبها.. فيصل: لالا عين خير....مب انته اللي متكفل فيها..؟؟؟ بسيراتها وييياااتها..؟؟..انته سر هاتها بعدين انا باجر مشغول ماروم... تم سعيد يطالعهم يائس...انا وغبائي اللي ما تريييت شوي ترتب اغراضها ويبتها وياي...احين لازم سيره مره ثانيه... سعيد: يصير خير باجر... ام فيصل: شحالهم بيت عمتك..؟؟ تنهد سعيد بتعب..وقال وهو ينش من مكانه... سعيد: كلهم بخير.....يشقحون... ام فيصل: ماتبانا نحط لك عشا ابويه..؟!!.. سعيد: ماشتهي امايه بسير ارقد...تصبحون على خير.. الكل: وانته من اهل الخير... ركب سعيد الدري وراح حجرته... فيصل: شوفيه ولدج مب طبيعي..؟؟ ام فيصل: مادريبه والله ياولديه...احيده بخير ومستانس يوم ساير... عليا: يمكن تعبان بس...الخط يتعب.. فوق في الغرفه..دخل سعيد الحمام وتسبح وعقب ماطلع انسدح عشبريته.... التفكير بالموضوع يايبله صداع... شو الحل...؟ شو الحل شو اسوي..؟؟؟ كيف ابعد اختي عن الغلط..؟؟؟ مايصير اتم في بيت عموه مايصير...من وراي بتسوي امور وايده ولا عليها مني.... والسكن من جهة ثانيه مايمدحووونه....... امنعها عن الدراسه؟ .. لالا حرام.... ليش ماقولها انا تحول من جامعة الامارات للتقنية... والا جامعة الشارجه..ظرووري يعني جامعة الامارات..؟؟؟؟؟ ... برايها تتحمل..اذا جامعة الامارات تسكن في السكن..مافي غيره...بيت عموه مستحيل....حمدان ماينقطع عنهم هناك..دوم عندهم... قعد على الشبريه من بعد التسديحه وهو ظايج...متلوم من الطراق اللي عطاه فطيم... هي بروحها يابسه والهوا يطيرها...كيف ذاك الطراق اللي حطيت فيه من القوه مايعلم به الا الله....!!!..زين ما انكسر فجها البنت...بس تستاهل...شحقه تغلط هالغلطه.... معقووله عمووه بعد غافله عن طلعات فطوم جدام حمدان..؟؟؟ اكيد شافتها ودرت بس سكتت لانها ماتباتحرجها وهي فبيتها....!!..والا عموه مابتسكت... مسك تيلفونه واتصل على تيلفون فطيم...يدري انه المفروض مايتصل .. عشان ما يبين انه متلوم...بس يبا يطمن...ماتهون عليه...وبعد بيخبرها عشان تجهز لباجر...طول التيلفون وهو يرن...سكر سعيد...اكيد ماتبا ترد عليه... رد يتصل مره ثانيه...وهالمره ردت...بس مش فطوم... نورة: مرحباا... سعيد:................ اهلين... مالت نورة وهي في غرفة فطيم..يالسه عدالها عالشبريه.. حطت كيس الثلج على غزها الوارم... المسكينه باجر عليها امتحان سعي مضطره تروح الجامعه ماتروم تغيب بسبب غز وارم...تظايقت فطيم من البروده بس بعدين هدت.. نورة: وصلت بالسلامه..؟؟!!.. سعيد مب عارف شو يقول...زعلان عليها...لانها ادخلت بموضوع حرج مثل هذا... في نفس الوقت....هذي نوره..!!.... يحس بالتناقض... سعيد: هي الحمد لله.... وين فطيم.؟ نورة: هذي راقده...اوعيها لك.؟؟ سعيد:...............لا.... شو حالها؟؟!!.. نورة: شو حالها بعد ياسعيد..؟!!!.. منهاره والله.... سعيد:......................... .. نورة: سعيد ليش ظربتها جي..؟؟ ماحيدك تمد ايدك... سعيد: محد قالها تخون الثقه اوكي....حتى انتي خنتي الثقه... ارتبكت نوره... ماتعرف كيف بتحل وبتشرح مشكلتها هذي مع سعيد... نورة: نحن احين مب فيني انا... سعيد: غلطانه...نحن فيج انتي وفي فطيم وحمدان....كلكم والله خنتوا الثقه..ماتوقعت هالشي منكم الصراحه... حست نورة انها بتصيح...حاولت تتلهى بكيس الثلج وهي تثبته على ويه فطيم... نورة: سعيد .. عبدالله والا واحد من اخواني.. لو يدري اني طلعت معاك البحر وقلنا كل اللي قلناه ذاك اليوم..بيدفني انا وانت... سعيد: لا تقارنين.... الوضع مختلف... نورة: امبلى بقارن... لانه الوضع هو نفسه..بس انته دريت عن اختك ومارضيت عليها وهذا شي طبيعي لكن خلك متفهم شوي... حمدان من شاف فطيم انصعق بها... يحبها من الخاطر... والله مرت مواقف وايده وانا الشاهده عليها انه يخاف عليها اكثر من نفسه...وانا ادري انه يتريا يخلص دراسته ويشتغل عسب يخطب.. السالفه عنده مافيها لعب... مثل ما انته مفكر... سعيد: لو كان يحشم حد ولد عمج هذا جان ياااني انا ربيعه وقالي جي جي السالفه ..خاطري في اختك واباها على سنه الله ورسوله.. جان ماقلت شي ..بالعكس بحس بجديته بالموضوع...مب يمسكها ويقولها احبج... هذا مب اسلوب.... ومافيه حشمه لحد... نورة: سعيــــــد.... من متى حمدان يتصرف ويفكر مثلكم.؟؟؟...تدري انته انه حمدان غير..مايحط حواجز...ومنقود وغيره...يتصرف بطبيعته معظم الوقت...تلقاه مافكر بهالشي زين... سعيد: ياكثر ما ادافعين عنه....!!!!!!!... نورة: لاني ادري انك ظلمتهم... انا اكثر وحده اعرف شو مبينهم... على فكره مب مثلنا....هالثنينه من يتلاقون تغايظون ويظاربون..ديج وديايه... والمرات اللي لمح لها انه خاطره فيها ينعدن عالاصاابع... والا معظم الوقت يطفربها مب مثل ما انته متصور.. سعيد: لا والله..؟؟ واضح تراه من اخر مره كانوا رباعه....!!!... نورة: اليوم السالفه بينهم كانت غير.. فطيم ماسكه شي على حمدان وفاهمتنه غلط وحمدان ماتحمل وحب يوضح الموقف...ويشرح لها سوء الفهم...وطبيت انته عليهم... سعيد: وغلطان انا يوم طبيت عليهم لاه.؟؟ كان المفروض اخليلهم الجوو ...يقولون اللي فخواطرهم.. نورة: سعيد..والله انا مالووومك...هذي اختك وماترضى عليها... انا متظيجه لانك بس مديت ايدك عليها...مسكينه والله اني حاطه الثلج على غزها الحين لانه وارم..وباجر عليها امتحان سعي وماتروم تغيب... اطالع سعيد الارض باحراج...وهو متلوم من الخاطر على هالحركه...بس ماجنها تستاهل..؟؟؟ تستاهل... محد قالها انا ياما وصيتها بالحشمه ... تقوم تسوي جي من وراي..؟؟... سعيد: كنت معصب ولا حسيت بعمري.... ابتسمت نورة بتعاطف مع سعيد... تدري انه حنون وماتهوون عليه فطيم والدليل انه متصل الحين يطمن عليها.. بس مشكلته عصبي...يتصرف قبل ما يفكر.... نورة: عيل الله يعيني انا على الطراقات يوم بنعرس.... سكت سعيد... مايتخيل نفسه يعطي نورة طراقات.. احين عاد بيمسكوونه هالطراق وصمه عاااار عليه... سعيد: وانتي ويا ويهج كيف تدخلين بموضوع مثل هذا...كيف تقنعين اختي تطلع جدام حمدانووه... ؟؟ امبونها زينه شحقه تخربينها..؟؟ نورة: اهااا احين يا دوري..؟؟ سعيد: هي نعم...وحسابج عسير... نورة: انا شرحت لك ليش اقنعتها... قبل ما ارمسها بالموضوع كان حمدان يدخل البيت ودايما تصادفه مواقف محرجه مع فطيم...وكان كل مايشوفها يطفربها بشكل...وتيني مسكينه تشتكي.. قتلها انتي بروحج لساااان...عطيه من الحاااااااامي... وماعليج منه اعتبريه مثل اخوج مثلنا كلنا..نحن متعودين على غلاسه حمدان حتى ما نزعل عليه لو قال لنا شي يزعل... بس هي بتم متلعوزه منه..فاحسلها تتعود عليه..شوي شوي تاقلمت مع الوضع...وصار وجوده شي عادي بالنسبه لها... سعيد: شي عادي يانوره..؟؟؟ نورة: اوكي... مب شي عادي.. بس انته تعرف حمدان.. وتعرف انه يغسل مخ اي حد..واي شخص ينعجب فيه بسهووله... حس سعيد بالغيره.. سعيد: جـــــــــــــــــــــــــــــ ــــب..... مسودة الويه.... نورة: لا والله انا بيظا... سعيد: نوروه جب... ظحكت نورة.. نورة: شوفيك سعيد..؟؟ سعيد: والله اني مظيج منج.... نورة: ليش عااااده...؟؟؟ سعيد: انا مطرش اختي لكم اماااااانه..تقومين تخربينها..؟!!!.. نورة:..... اوكي انا آسفه... سعيد...غير رايك بخصوص السكن..اوعدك اني ماا اخلي لهم فرصه يتلاقون هني.. سعيد: لا... نورة: سعيد دخيلك... سعيد: قتلج لا....قوليلها..سعيد يقولج... يا اما ..تحول التقنية او جامعة الشارجه... يا انها تتحمل وتسكن في السكن....كيفها... نورة: مافي امل يعني تغير رايك..؟؟؟ حرام عليك...السكن عاد الله يعلم عند منو اطيح من البنات..؟!!!. سعيد: مابغير راي...وماعليها شر...كل البنات يسكنن في السكنات واختها من قبلها وماياهن شي... اللي حافظه نفسها من الغلط مابتخترب... لكنها عندكم خذت راحتها بزياده... نورة: .............................. .......... سعيد: وقوليلها بعد.. اني باجر بمر اشلها الشارجه عسب خلاص العيد ورا باجر...خليها اجهز عمرها لاني بمرها المغرب .... نورة: ان شاء الله... سكت سعيد وهو يدري بنوره زعلت...بس هو معصب وزعلان اكثر وخلهم يتادبون شوي.. سعيد: يالله برايج.. نورة: اوكي.. سعيد: فمان الله.. نورة: الله وياك سعيد... سكر سعيد قبل مايزل لسانه ويبدا يراضيها....خلها تزعل...محد قالها تدخل.... سكرت نورة التيلفون وحطته مكانه عالطاوله... خوزت كيس الثلج....مسكينه غزها كله محمر...مادري من الثلج والا من الطراق... بس الورم شكله قرب يخف...استمرت نوره تحط الثلج على خد فطوم لين ماتعبت وخلتها ترقد وطلعت عنها... السبت الصبح... نش حمدان من النوم...ويالله يالله تغسل وتلبس...الحمد لله ان اليسار اللي مكسوره مب اليمين..لو اليمين مابيعرف يسوي شي باليسار...كان متظايق من الخاطر بسبب الموقف الامساني...مب الحادث..اللي قبله...الحادث مايعنيله شي...مسكينه يافطوم...ياترا شو صار فيج..؟!!.. وقف عند مكتبه ورتب كتبه ودفتر الملاحظات..زين انه لاب توبه في اللوكر...مافيه يشله...حط سفرته على جتفه وشل كتبه وتيلفونه واغراضه الثانيه وطلع وسار غرفة خليفه...وعقب عباله بايد وحده..دق الباب.. بطل خليفه الباب ... خليفه: هااااااااا..؟؟ شو اصبحت..؟ دخل حمدان الغرفه وفر كتبه عالطاوله اللي عدال شبرية خليفه.. حمدان: الحمد لله ... خليفه: زين انك جاهز..مافيني اتاخر.. كان خليفه جاهز تقريبا ... حمدان: مب جاهز...تعال سفرني... ابتسم خليفه وكسر خاطره اخوه...حتى التسفيره مايروم عليها....الله يعينه... يلس حمدان عالشبريه ويا اخوه يسفره...وطفربه من كثر ما يتشرط..تسفيرة حمدان مختلفه وماايوزله اي شي... لين ماظبطت ما ارتاح... خليفه: يالله نسير... حمدان: الله يعيني على تحقيق امايه الحين...ماتدريبي.. خليفه: ههههههههههههههه... في بيت حمد.. فطيم كانت اطالع عمرها في المنظرة متاسفه على شكلها...غزها شوي وارم..حشى مب طراق عطاني اياه سعيد... اول مره انصفع.... دخلت عليها نورة .. نورة: صباح الخير.... صدت فطيم لنورة.. فطيم: صباح النور....عندج نقاب..؟؟؟ بطلت نورة عيونها.. نورة: ليش..؟؟ اشرت فطيم على ويهها بعصبية وقهر.. فطوم: ماقدر اروح الجامعه جي...الكل بيسالني... نورة: انا ماعندي نقاب..حصه عندها لكنها بتلبسه بتروح الشغل الحين... اشوف... تقربت نورة منها واطالعت ويهها عن قرب. نورة: اخف عن امس بوااايد.. لا تبالغين.. قوليلهم رقدت عليه بس... تمت فطيم مبرطمه...وخذت شنطتها وكتبها وطلعت وراها...وفعلا يوم نزلت تحت وسلمت على عمتها..سالتها هذي عن ويهها... وقالت لها فطيم انها رقدت عليه طول الليل...عشان جي وارم شوي بس عقب بيخوز..وبلعتها العيوووز...وصدقت.. في السياره..وبعد ما وصلوا حصه الشغل.. نورة: اقولج فطيم... سعيد امس اتصل... التفتت فطيم خايفه لنورة... فطوم: شو يبا..؟؟ نورة: صدق او لا تصدق...يطمن عليج.. نزلت فطيم نظرها لثبانها بحزن... فطوم: انا ما لوم سعيد...كذا مره موصني.... بس انا سباله...خليت مشاعري تعميني عن الغلط والصح.. نورة: انا اقنعتج يافطيم..اذا بتلومين حد لوميني انا... هزت فطيم راسها.. فطيم: ماكنت مجبووره اني اسمع كلامج... كله من تحت راسي انا... انا مب ياهل عشان حد يغسل مخي ويقنعني بشي ضد ارادتي...الاساس اني انا كنت ابا اطلع جدام حمدان واعتبر هالشي عادي وانتي عطيتيني الفرصه لا غير.. مدت نورة ايدها ومسكت ايد فطوم... نورة: اللي صار صار....حاولت اقنع سعيد امس بانه يغير رايه بخصوص السكن..قالي واحد من اثنين.. يا انها تحول من الجامعه للتقنية او جامعة الشارجه..وترجعين البيت..يا انج تسكنين في السكن وتتحملين... سكتت فطوم.. نورة: شو بتسوين..؟؟ التفتت فطيم على نورة.. فطيم: انتي شو رايج..؟؟؟ شوري علي.... ما احس نفسي بتاقلم مع بنات السكن... نورة: بتحولين التقنية..؟؟ همممممم لا تنسين التحويل له شروط...لازم يكون معدلج فوق الاثنين.. ولازم تكونين مخلصه اساسي وانتي ماخلصتي بعدج... فطيم: يعني..؟ مايصير احول.؟ نورة: تحويل الحين لا...جان بتسحبين اوراقج وبتقدمينهن في التقنية تبدين من اول ويديد يعني...يمكن... هزت راسها فطيم... فطيم: لالالالالا.... بكمل في الجامعه وبسكن في السكن...بتحمل.... ماشي بايدي غير هالشي... نورة: الله يعينج...هي صح قال شي ثاني... بيخطف عليج اليوم بيشلج الشارجه يقول زهبي اغراضج.. هزت فطيم راسها بصمت...متظايقه من الوضع كله....واكثر شي بالموضوع..مظايقه لانها طاحت من عين اخوها... حمدان ريال ويقدر يطلع نفسه من السالفه بسرعه ويتاقلم.... بس انا بنت..وسمعتي اهم ما عندي... اذا اخوي ما بيحترمني كيف الناس بتحترمني عيل..؟؟؟؟... وصلن الجامعه ونزلن وكل وحده راحت محاظراتها... حصه في الشغل..راحت وقدمت استقالتها.. باعذار انها بتتزوج وريلها مايسمح لها بالشغل وغيره..وهو جزئيا صحيح.. وبعد ماخلصت امورها ورتبت اوراقها واستقالت...ارتاحت نفسيا...اتصلت بالدريول عشان يمر عليها ويشلها...وودعت بنات القسم اللي عندها وكل الي تعرفت عليهم... ورجعت البيت... حمدان كان طول الوقت مبتلش...وايد محصل صعوبه في الحركه بسبب ايده المكسوره...الشباب ماقصروا ساعدوه وايد...اخر الدوام اتصل على خليفه علشان يمر عليه...وهذا اصلا كان مخلص دوامه وطالع..مر على حمدان وشله وياه...وروحوا البيت... حمدان طبعا مااسار الشركه... كفايه عليه دوام الكلية... وامه اصلا من شافته زين ما اغمى عليها...هالعيوز تسوي من كل شي ماساة..حالها حال العيايز كلهن...بعد صلاة العصر مسك حمدان تيلفونه واتصل بالريال اللي مدام وياه... لانه ماخذ امس رقمه عشان يصلح له سيارته بما انه هو الغلطان في الحادث.. وغيره من هالامور الروتينيه وبعد عشان يطمن عليه.. الريال اسمه سهيل ومن ليوا اساسا.. وعمره 26 سنه... وشكله ولد حلال وطيب... رمس وياه حمدان واطمن عليه اذا شي يعوره والريال طلع بخير ومافيه الا العافيه... واستسمح منه حمدان مره ثانيه وعزمه بعد عالعشا بس ذاك رفض لانه رد ليوا وقال مره ثانيه ان شاء الله...واتفق على باقي التفاصيل بخصوص السياره... سهيل ماكان يبغي حمدان يتكفل باي شي بس حمدان رفض واصررر عليه ... وبعد ماسكر عنه حمدان..رجع اتصل ببيت عمه.... حصه: آآلوو... حمدان: السلام عليكم...شحالج حصيص..؟؟ حصه: وعليكم السلام هلا ....بخير شحالج انتي..؟؟ حمدان: شو شحالج انتي ويا هالراس...؟؟ حصه: هههههههه هي والله كلهم قاعدين...امي وابويه وعبدالله وحرمته... حمدان: هههههههههه اهااااااا فهمت... وين نوروه؟؟.. حصه: في الجامعه..هي وفطيم بعدهن مارجعن... حمدان: ابا ارمس نورة ظرووري... حصه: بخصوص امس تقصدين..؟؟ حمدان:.................تدرين انتي بالموضوع...؟؟؟ حصه: هيي دريييت... حمدان: .. منو غيرج يدري..؟؟ حصه: محد... حمدان: اهااااا انزين ..خلي نورة تتصلبي لانها هي تروم تخبرني بالتفاصيل لانها كانت موجوده...انزين.. حصه: ان شاء الله.. حمدان: ولا تخبرين حد حصيص.. حصه: ان شاء الله... حمدان: يالله مع السلامه.. سكر حمدان ونسى حتى يخبر حصه عن الحادث اللي صارله..من كثرما هوو لابسنه ومب مهتم به...مايعتبره صار... دخل خليفه على حمدان وقال.. خليفه: اقول...عبود بيمر عليه بعد شوي..بنسير السوق نشتري نعلان وغتر وجي...وانا ابا اييب كناديرري...بتي ويانا..؟؟ حمدان: هي بسير...ماشريت لي شي انا لين الحين.. خليفه: يالله عيل بدل هالبجامه وانزل... طلع خليفه عنه ونزل..وحمدان بدل ثيابه وشل اغراضه وسفرته الي حطها على جتفه ونزل بعد وارتز جدام اخوه عشان يسفره مره ثانيه...والعيوز اطالعه وكاسر خاطرها وكل شوي تتفداه... عبدالله يوم وصل وسلم على الاهل..كان يايب عنوود معاه عشان تسلم على امها وابوها واخوانها وبتقعد لين في الليل عندهم... كان حمدان يالس في الصاله مع امه وخليفه وبو سلطان...يوم دخلوا قوم عبدالله وسلموا ..انتبهت عنود لايد اخوها..على طول ارتفعت ايدها لصدرها.. عنود: واااااي...اخويه حبيبي....شفيييييييييييك..؟؟ عبدالله انتبه بعد وعقد حياته... عبدالله: سلامااااااااااااات حمدان شفيك.؟؟ امس ساير عنا مافيك شي... حمدان: حادث بسيط لا غير... الله يسلمكم.. عبدالله: حادث كييييييييف..؟؟؟ ماحيدك ماتسوق عدل..!!! منو الغلطان..؟؟؟ حمدان: انا الغلطان.. والدعمة خفيفه والريال الثاني بخير وماياه شي ...سدوا السالفه خلونا نطلع... وبعد السوالف طلعوا الشباب وخلوا عنود مع امها وابوها... الساعه خمس رجعن البنات من الجامعه..تعبانات وحالتهن لله.. دخلن الصاله وسلمن على العيوز بما انه الشايب طلع العزبه... ام خالد: ياويلي على هالغز اللي ماصح للحين...يابنتي حطيلج ثلج والا شي يمكن شي لدغج.. فطوم: لا عموه لا تحاتين انا دوم اييني جي...ويخوز.. يلست فطيم عدال حصه..ونورة سارت تصب لها ماي... حصه: شو سويتي بامتحانج.. فطوم: زفت والله.... سمحولي انا بسير اجهز اغراضي سعيد بيي يشلني بعد المغرب.... ركبت فطيم لغرفتها ونورة وحصه يتبادلن نظرات فهم... نورة: قدمتي استقالتج..؟؟ حصه: هي..افتكيت.. ام خالد: والله يابنتي انه اخيرلج البيت..بروحج عثرتي عمرج من البدايه... حصه: ساعدني الشغل امايه في البدايه بس احين الظروف تغيرت ومابغيه... نورة: والله افتكيتي منه... بسير ابدل ثيابي انا... المغرب وصل سعيد...وتاخر وايد لين مانزل من سيارته..نورة كانت تراقبه من دااخل وتوايق من الدريشه...تعرف بشو يفكر...اكيد قاعد يعدل مزاجه عشان امي ماتحس بشي...بيتظاهر بالبرود احين...ان شاء الله بس مايطب حمدان هني وسعيد موجود... يوم نزل سعيد..تراجعت نورة عن الدريشه وسارت ويلست عدال امها... نورة: امايه ترا سعيد ياي... ام خالد: هيي فديته حياه الله..وانتي قومي يالله دشي داخل.. نورة: اجفي بالريال يعني صبري يوم بيسلم بسير... ام خالد: همممممممممم واغمي عليج انا...ادريبها علومج مابتقصين عليه... نورة: اكيد طالعه عليج عيل انتي كنتي تسوين هالحركات هاااااااا..؟!! ام خالد: ييييييييه يابنت حمد اشوف طولتي لسانج...قطعيها الرمسه وقومي ذلفي داخل... سعيد: هووووووووووووووووود.. خلاص وصل سعيد مافي مجال تطلع نورة.. ام خالد: اقــــــــــرب.. ابووويه...مرحبا مرحباااااااا... دخل سعيد ويوم شاف نورة غض النظر...اعطيها طراق ياناس...قاهرتني... سعيد: السسسلام عليكم... نشت ام خالد ونورة... يا سعيد ووايه عمته... ام خالد: وعليك السلام والرحمه...شحالك ابويه.؟؟ سعيد: بخير عموووه شحالج انتي...عساج طيبه..؟؟ ام خالد: بخير الغااالي شحالك انته وشحال هلك؟؟ سعيد: بخير وسهاااله الله يعافيج......احم.. (رفع عينه لنوره) ...شحالج نورة؟ ابتسمت نورة...ياحيه يوم ماطنشني...اوففففففف ياعصبيتك.... نورة: بخير سعيد شحالك انته؟ سعيد:.........بنعمه الحمد لله.. ام خالد: استريح بوووويه استريح.... يلس سعيد ويلست ام خالد..ويوم يلست نورة اطالعتها ام خالد بنظررررررره...وين تبا تقعد هاي بعد..؟!!.. مسكينه نورة ردت نشت وطلعت برااا وسارت فوق عند فاطمه.... شكله سعيد بعده زعلان عليها....زعلان عالعالم كلها.. دخلت على فكيم وشافتها يالسه عالشبريه وشنطتها عدالها..لابسه شيله سودا وعباتها في حظنها...شكلها يائس... نورة: هاااااااا فطوم...جاهزة.. فطوم: هي...يا سعيد.؟؟ نورة: هي يالس تحت عند امي... فطوم: بعده معصب..؟؟؟ نورة: شكله جي...بس اظن اهدا بوايد عن امس طبعا.. دخلت حصه في اللحظه... وشافت فطوم... حصه: انتي ليش متلبسه؟؟ فطوم: سعيد تحت..بسير الشارجه باجر العيد ترا....عيدكم مبارك من احين ههههه... نورة: ههههههه لا انا ما اعترف به هذا بتصلبج باجر... ابتسمت فطوم بحزن... نورة: لا تخافين فطوم...بتمر الامور اووكي... سعيد وايد وايد وايد يحبج اكثر عن خواته الباقيات... وماظني يسويبج اي شي مره ثانيه... فطوم: انا مب زايغه من الظرب...لو يظربني من اليوم لين باجر ..ماعليه..هذا اخويه وحقه علي كبير... ودومه واقف وياي ويحاتيني..بس انا زعلانه لاني طحت من عينه.. حصه: لا تقولين جي..لا طحتي من عينه ولا شي...ان شاء الله بيتفهم الموضوع.. انا اعرف حمدان..مستحيل يتم ساكت عالسالفه...اكيد بيتصرف.. حطت فطيم راسها بين ايديها...وهي قربت تصيح مره ثانيه.. فطيم: مايهمني حمدان ...مايهمني.... الله يلعن الساعه اللي عرفت فيها حمدان... ماريد اعرف اي شي عنه.... خلاص... نورة: حرام عليج فطووووم شو هالكلام...؟؟ .... حمدان يحبج.. وااااااايد بعد....... فطوم: ماريده... ماريد احبه بعد...خلاص...فصل وانتهى... حصه: وهو المسكين متصل اليوم يطمن عليج...يحاتيج من امس.. رفعت فطوم راسها وعيونها مليانه دموع...كان ويهها ملهوف... فطوم: حمدان اتصل..؟؟؟ شو قال...؟ ابتسمت حصه.. حصه: توه مايهمج.... فطيم: قولي عاد حصه.. حصه: يبا يطمن عليج ويعرف شو صار...طلب مني اقول لنوره تتصل فيه عشان تخبره بالتفاصيل.. التفتت فطوم لنورة.. فطوم: لا تخبرينه انه سعيد ظربني... نورة: الا بخبره... فطوم: لا لا تخبرينه...نورة اخاف يسوي مشكله والا شي... وبعدين بيتم متلوم وايد...انا استاهل اللي ياني... نورة: شو هالكلام السخيف...حمدان كان حاس انه سعيد بيظربج...وهدده بعد قبل مااييج سعيد...بس سعيد ما انتصح.. بعدين لازم يدري...وبخبره.. فطوم: حرام عليج.. حصه: خليه يعرف...يعني انتي تتحملين كل شي وهو ياخذها بارده مبرده..؟؟؟ خليه يدري احسن.. نورة: المهم انتي قومي نزلي الحين عند اخوج...لا يسويلنا سالفه بعد.. والشنطه بتنزلها الخدامه... نشت فطوم ونزلت تحت..اما نورة وحصه سارت البلكونه وقعدن عشان سعيد في الصاله... فطوم كانت ترتجف يوم دخلت الصاله.. فطوم: اسس...السلام عليكم... اطالعها سعيد بنظرة لا مبالاه...ووقف..يوم وايهها...شاف غزها الوارم...ضغط شفايفه على بعض يكتم ظيجته...جذي اسوي باختي..؟؟؟ جذيه شوهت لها ويهها..؟؟...صدق اني ماستحي..حس بالذنب..عيون فطوم مبين عليها انها كانت تصيح... وفوق هذا مبين عليها انها خايفه منه...من عقب ماكانت متعوده تواجهه بجرأه ومرح..احين منزله عيونها للارض.. فطوم: ...... شحالك سعيد..؟ هز راسه وابتعد عنها... سعيد: بخير..شحالج انتي؟ فطوم:....الحمد لله... سعيد: شو سويتي بامتحانج اليوم..؟؟ كان يبين على سعيد اللوم...لكن هي تدري ان سعيد ماينلام...لكن هذا من طيبه قلبه بس كسرت خاطره....لانها ماتهون عليه... اذا قالت له انها زفتت بيتلوم اكثر... فطوم: الحمد لله... يلست فطيم عالكرسي.. سعيد: عمووه ترا في الدبه ثلاجه السمج... اليوم خطف ابويه ويابلكم سمج طازج... ام خالد: يعلللللللللني ماخلى منه ياربي...مايقصر بو فيصل... قعد سعيد يسولف ويا عمته شوي لين مانزلوا ثلاجة السمج وفرغوها وردوها للسياره..ونزلوا شنطه فطوم بعد وحطوها.. عقب قال لفطوم يالله.... حاولت وياه العيوز يتريا العشا بس ماطاع عشان الدرب...سلمت فطيم على عمتها..وطلعت مع سعيد... برااا وعند المدخل صد سعيد ويوم شاف حصه وقف يسلم عليها.. سعيد: شحالج حصه...؟ حصه: هلا والله سعيد بخير..شحالك انته..؟؟ سعيد: الحمد لله....مبروك عالخطبه... حصه: الله يبارك فحياتك.. سعيد: يالله سمحولنا نحن بنروح.. نورة: سعيد...هالله هالله بفطيم.... اطالعها سعيد بنظره.... سعيد: توصيني على اختي..؟؟؟... انا وصيتج عليها من قبل وشوفي شو صار... نورة: يالله محد يطيح فلسانك هاليومين....بس اقولك يعني عن العوافه تراها ما تزداد... نزلت فطيم راسها..وسعيد اطالع نورة بنظرة قهر... مصرره تدخل في الموضوع... لازم تسوي مشاكل بينا يعني... سعيد: مع السلامه.... ماتريا ردها ونزل الدري وسار سيارته.. وفطوم ابتسمت بحزن حقهن واشرت بايدها "باي باي" ..كانها مختنقه وماتروم ترمس...ونزلت ورا اخوها وركبت وياه..وراحوا... حصه: معصب عليج شكله... نورة: الا مفوووول وزعلان... بس انا كاسره خاطري فطيم... سعيد شوي وبيرضى... حصه: وايد واثقه... نورة: لااني اعرفه عدل... عمر...مب سنه سنتين... حصه: تراج مادقيتي لحمدان... نورة: امي في الصاله وين تبيني ارمس..؟؟؟ بعدين صدق قومي نسير عندها يالسه اروحها... سارن البنات عند امهن وقعدن عندها... ومن بعد العشا قامن يرتبن الفواله مالت العيد ويساعدن امهن في كل شي.... في الدرب..سعيد كان لابس فطوم ومايكلمها....وفطوم تحس بثقل الصمت كل دقيقه يزيد...لين ماطفرت... فطيم: سعيد... سعيد:................. فطيم: انته زعلان مني..؟؟؟ سعيد:......... خيبتي ظني... فطيم بروحها ماتزداد شوي وبتصيح.. فطيم: انزين ..آسفه... والله مب قصدي مادري ليش سويت جي.. سعيد: كيف مب قصدج فطيم...احين مادري من كم شهر وانتي تسوين هالشي من وراي... فطوم: انزين...مادري ماحسيت ساعتها اني اسوي شي غلط بس الحين حسيت...لا اتم زعلان علي... سعيد: ................ فطوم: دخيلك...قسم بالله اكثر شي مظايقني في الموضوع انك مظيج علي ..والا...والا حمدان...ماعاد يهمني... التفت لها سعيد بحده...نزلت فطيم عيونها عنه...وعرف انها تجذب... حمدان مازال يعني لها الشي الكبير بس تقول هالكلام عشان ترضيه... سعيد: ماقدر اخليج فبيت عموه....شو قررتي.؟؟ فطوم: خلاص مابسير بيت عموه الا وياكم...وبسوي اللي تقول عليه بس بليز خلاص لا اتم زعلان علي... كسرت خاطره...شكلها صدق متندمه...التفت لها... سعيد: سوري بخصوص...الطراق... تعرفين اني مب من النوع اللي يمد ايده ..بس... قاطعته فطيم.. فطوم: انا مالوومك...استاهل اللي ياني وزياده... سعيد: همممم... شو بتقولين لقوم امايه عشان ويهج..؟؟ فطوم: بقولهم مثل ماقلت للباقين ..راقده عليه ... سعيد: من اصبحتي لين الحين وماخاز هالورم...بيبلعوونها..؟؟ فطوم: الله كريم...بحط له ثلج.. ابتسم سعيد غصبن عنه... فطوم: بلاك تظحك.؟؟.. سعيد: امس نورة بايته وحاطه الثلج على غزج..يوم اتصلت على تيلفونج هي ردت علي... فطوم: فديتها وايد متلومه... سعيد: هي بعد حماره.... فطوم: سعيد ماعليك من رمستها...انا محد بيروم يقنعني بشي مابغيه..انا اصلا كنت مستعده عشان جي سمعت رمستها...الغلط كله مني انا..لا تزعل منها... سعيد: كل وحده منكن تعق الغلط على عمرها وادافع عن الثانيه.... فطوم: شو رايك تسامحنا انا وهي ظربه وتنسى اللي صار... سعيد: صعب انسى وقفتج انتي وحمدان بهذيج الطريقه وكلامه لج فطيم...صعب.. سكتت فطيم مكتئبه... تدري ان الموضوع يباله فتره لين ماينساه سعيد...وزين منه انه يكلمها الحين...مابتضغط عليه اكثر من جذي... الشباب تاخروا وايد بالسوق...بس اهم شي خلصوا واشتروا اللي يبغونه..ومن بعدها وصلهم عبدالله البيت وشل عنود معاه وردوا بيتهم....وكان الوقت متاخر فرقدوا على طول.. صباح العيد..عنود تلعوزت مع ريلها اللي مب طايع ينش.... منجلب على بطنه في رقده مريحه جدا.. وايده وحده مدليه على طرف الشبريه لين الارض..والايد الثانيه حاظنه مخده صغيره..وشكله حالف انه مايقوم... عنود: ياربيييييييييييي....عبوووووووو وووووووود....قوم ويا هالراس...الساعه 8 متى بتنش..؟؟؟ عبدالله:...................... ...... يلست عداله عالشبريه.. تدريبه مابينش الا بهموز...بس هي مب متفيجه له الحين تهمزه...مع ذلك هوست على ظهره شوي ... ولاحظت تجاوب...يالمكار...قاص عليه مب راقد بس جي يتدلع... عنود: لا تحلم..ماشي هموز...وان مانشيت احين مابوعيك ثاني وبنزل عنك تحت... عبدالله: خمس دقايق بس... عنود: شو بتفرق خمس دقايق رقاد يعني..؟؟؟؟ عبدالله: خمس دقايق هموز ويا هالويه المعفن... عنود: انا ويهي معفن يالسبال... عبدالله: عيل حد يوعي ريله جي..ونحن تونا بس من اسبوعين معرسين...!!!.. عنود: آآآآآآآآخ منك يالبزي... مدت ايدها مره ثانيه وهمزته خمس دقايق...عقب نشت عن الشبريه عشان ينش...انجلب عبدالله بالعاااااااااااااااااافيه على ظهره..كسلاااااااااااااااان... وتسحب لين الحمام وتسبح...حطت له عنود ثيابه وسات تيب المدخن من عند حصه..لانها مسلمه عليها من نص ساعه....يابت المدخن ويوم رجعت حصلت عبدالله يصلي صلاة العيد...لانه فاتته الصلاة في المسيد.. قعدت تعدل له العوود في المدخن... وبعد ماخلص يا صوبها وباسها... عبدالله: مباركن عييييييدج... عنود: ههههههههه عساك من العايدين والسالمين... تعال بدخنك... وقف عبدالله يلبس السفره والعقال ويظبطها وعنود ادخن كندورته...يوم خلصت حطت المدخن عالتواليت... عنود: يالبزي حتى العقم مارمت عليهن تعقمهن..؟؟؟ عبدالله: انا من عرست وهذيلا صارن اختصاصج مالي خص فيهن... رفع عبدالله راسه وعنود تظحك وتعقم له المعاقم العصصصصصه...وعدلت له طربوشته وعطته المدخن يدخن سفرته.. عبدالله: وين دهن العوود... عطته عنود اياه وتعطر ....شو تعطر..؟!!.. الا تسبح به.... وبعد ماخلص... عبدالله: يالله انا بنزل...مابتنزلين..؟؟ عنود: بلى..وراك على طول.. عبدالله: حلوه والله اجننين لا تزيدين شي... عنود: هههههههه انزين يابوك مابزيد شي..نسير.. شلت المدخن وطلعت ورا ريلها... والكل سلم عالكل... طلع عبدالله بعد ساعه من الميلس مع اخوه ناصر..وساروا صوب بيت عمهم يسلمون ..ونفس الشي ناصر انصدم من ايد حمدان واستفسر عن السبب... الساعه 11 يا خليفه ومعاه حمدان..وسلموا على عمهم وخالد والرياييل الموجودين ويلسوا تفاولوا..وعقب نشوا عشان يسلمون على ام خالد... قربت بهم ام خالد من عند الباب وسلمت عليهم طبعا من عقب ماسوت لحمدان سين وجيم بسبب ايده...اللي كانت تدري عنها من قبل...ويوم دشوا الصاله حصلوا حصه ونوره يالسات ياكلن هريس...قفطت حصه ماكانت تتوقع انهم بيدشون... عدلت شيلتها بايد وحده بالسريع ومصت صبوعها..وهي قافطه.. نشت نورة وحصه ..وشهقن مره وحده يوم شافن حمدان.. حمدان: يووووووووووووووه علينا من يشوفني حد شهق....السلام عليكن بنات... خليفه كانت عينه على حصه...يطالعها من فوق لين تحت...اول مره يشوفها لابسه احمر..وروج احمر وجحال. وتعديل فنان...بصراحه كانت فنانه...وكتم ظحكته يوم مصت صبوعها عن الهريس..شكلها بيبي..ياويلي عليج.. حصه ونورة: وعليكم السلام... حصه: وابووووييي شوفيها يديك..؟؟؟ حمدان: اول مباركن عيدكن... حصه ونورة: عساك من العايدين... خليفه شحالج حصه؟؟ شحالج نورة؟؟ مباركن عيدكن... حصه: بخير الله يسلمك..عساك من عوادته يارب.. نورة: الحمد لله...عساك من العايدين ياخليفه...حمدان بلاها يديك..؟؟؟ حمدان: حادث بسيط... شكت نورة في الموضوع ورصصت عيونها.. حصه: سلامااااااااات ماتشوف شر... حمدان: الله يسلمج... يلس خليفه عالكرسي المجابل لحصه.. ويلس حمدان عداله.. نورة: متى صار الحادث؟؟؟ حمدان: يوم الجمعه في الليل... رفع نظرة لنورة وهو يعرف انها بتفهم باقي السالفه بروحها...نورة ماتحتاج حد يقولها ان سبب الحادث هو حالته السيئه وتفكيره بموضوع فطيم...وفعلا نورة برطمت ويلست وهي تحس بالاسف...مسكين ياحمدان..سويت حادث عسب فطيم وهي تقول امس انها ماتبا لها أي علاقه معاك...اووفف لو تدري فطيم.. بخبرها اكيد... طول الوقت وخليفه يطالع حصه...مستغل غياب العيوز عن الصاله وخذ راحته.. خليفه: شفتج امس في الدوام حصه... حصه: هيي...سرت افنش... خليفه: والله..؟؟ قدمتي استقالتج..؟ حصه: هي افتكييينا.. حمدان: زييييييييييين والله.... في هاللحظة دخلت عنوود اللي سارت ساعتين عند اهلها تسلم عليهم وردت مع عبدالله وناصر..دخلت الصاله وسلمت على اخوانها اللي ماتلاقت معاهم في البيت... وعقبها.. عنود: خليفه عبدالله يقولك سيرله الميلس... عقد خليفه حياته.. خليفه: شدراه اني هني... عنود: شاف سيارتك برااا... خليفه: شو عرفه اني داخل البيت مب داخل الميلس.. عنود: ههههههههه يالله تحقيق...دخل الميلس شوي ورد طلع وزعج عليه عشان اقولك تروحله... رفع خليفه نظرة لحصه وهو يظحك...وحمدان بعد ظحك..عبدالله حالف مايخلي خليفه يتهنى بحصه.. خليفه: شفتي اخوج شو يسوي فيني..؟؟؟ حالف مايخليني اتهنى .. ابتسمت حصه وقفطت ونزلت عيونها تحت... نش خليفه.. خليفه: كملي اكل حصيص...يالله فمان الله... طلع خليفه من البيت ..وسارت عنود وهي تظحك على اخوها فوق عشان تبدل ثيابها..وتعق عباتها.. استغل حمدان الفرصه والتفت لنورة... حمدان: خبريني.... نورة: هممممممممممممم...سعيد كان وايد معصب...ووو... غمض حمدان عيونه متالم من الفكره...مايتخيل فطوم تنظرب...مايتخيل ابدا... حمدان: ظربها.؟؟ نورة: عطاها طراق سنع... وبرطمت.. نش حمدان مب قادر يتنفس..ومشى بتوتر للدريشه...ووقف هناك فتره... الله يهديك ياسعيد...الله يهديك...لازم اروحله اليوم...وافهمه الموضووع كامل..مهما كان..هذا ربيعي ومايرضيني يفهمني غلط.. نورة: حمدان... فطوم صح انهارت اول بادي بس اعتقد انها بتصلح الامور مع سعيد.. فطوم قوية وتعرف تتصرف...وسعيد مب همجي لهالدرجه... حمدان: يقوم يظربها يا نورة..؟!!.. نورة: سعيد ماينلام كان معصب وشاف اخته في وضع غير مستحب...انصدم...لو انته مكانه بتسوي اخس عن جي ... حمدان: ادري انه ماينلام بس....بس فطوم... نورة: ادري... انته هد بالك .. ان شاء الله بترجع الامور مثل اول واحسن ..طبعا بدون ما تتلاقون...تحمل.. غمض حمدان عيونه مره ثانيه منقهر.. مايشوف فطوم..؟؟ بيمووت مايتحمل..... وطلع برا البيت وتم يالس عالدري...بروحه..وخلنه نورة وحمدان على راحته اكيد يبا يقعد بروحه ويفكر بالموضوع اكثر..ويوزنها صح... |
||
|
|
29-08-2006, 11:11 PM
|
رقم المشاركة : 52 | ||
|
|
الجزء الثامن والخمسين
بعد ماشبع حمدان من التفكير والقعده اروحه عالدري راح الميلس وقعد عندهم لين مايقرر خليفه يروح عشان يسير وياه...بما انه مايا بسيارته..مضطر يتم ويا خليفه..مسكت نورة التيلفون وسحبته للصالة الصغيره مالت الحريم ..عشان تكلم فطيم على راحتها... اتصلت على موبايل فطيم....اول مره ماردت...شكلها مب في الغرفه... اتصلت مره ثانيه...سعيد كان طالع من غرفته مبدل ثيابه من بعد ما خاست كندورته اسكريم كانت تاكله سلامه بنت فيصل...وسمع تيلفون فطيم يرن...دخل الغرفه ومسك التيلفون وعرف رقم العين...عرف بالغريزة انها نورة.. فكر يرد عليه...بس ماكان يبغي يرمسها...بعده منقهر من اللي سوته...شل التيلفون وهو يرن ونزل تحت ودخل الصاله وفره في ثبان فطوم الي كانت تسولف مع امها وطلع بدون أي كلمه ..ماعدى نظرة فيها لمحة عصبية خفيفه...مسكت فطوم التيلفون وردت عليه بسرعه.. فطوم: مرحبااا... نورة: وين انتي من الصبح ويا هالراس..؟؟.. مباركن عيييييييييييييييدج... فطوم: هلا والله..عساج من العايدين والسالمييين.. نورة: وين كنتي..؟؟ فطوم: ماكنت في الغرفه الا توه سعيد ياب تيلفوني في ايده وفره علي... سكتت نورة منصدمه... سعيد ..توصله الفرصه لين عنده انه يكلمني ويباركلي بالعيد ومايستغلها.؟؟؟؟ لااااااااااااااه شكله ماناوي يعدي الموضوع على خير.. حست فطوم بصدمتها..وتندمت انها قالت هالكلمه.. نشت فاطمه وسارت غرفة الضيوف لانه مافيها تركب فوق.. فطيم: لا تزعلين نوروه..تدرين انه يموت فيج لو شوووو سويتي...بس هو معصب حاليا... نورة: لين متى هالعصبيه يعني..؟؟ فطيم: اصبري مثل ماانا صابره... نورة: شخبار ويهج.؟؟ فطيم: لا الحمد لله..خف الورم...همممممممممم..... نورة: تبين تسالين عنه..؟؟ فطيم: هي... نورة: مادري كيف اقولج الصراحه...بس.. خافت فطيم...وتسارعت دقات قلبها... فطيم: شو صار..؟؟؟ نورة: هو بخير لا تخافين..بس..بعد اللي صار..يوم الجمعه في الليل ...حمدان سوا حادث ...(وشهقت فطيم بخوف بينما كملت نورة)... بسيط...حادث بسيط... فطوم: شوووووياااااااااه..؟؟؟؟ حست فطوم قلبها يعورها...وراسها داير من هالخبر...حمدااااان...حمدان سوا حادث ..اكيد انا السبب...اكيد من اللي صار تم يفكر وسوا الحادث هذا... نورة: ماياه شي فطيم لا تستوين هستيريه.... فطوم: تقولين حادث.... نوروووووووه قولي الصدق...شو ياه؟؟؟ نورة: انكسرت ايده....وشموخ بسيطه على ويهه ويبهته... بس... سمعت نورة باسف شهقات فطيم ولاحظت سكوتها وعرفت انها تصيح.... نورة: فطووووووووووم.. اكوه بخير يرقص ويناقز..مافيه شي صدقيني.... فطوم: كيف صار الحادث..؟؟ نورة: ماسالت صراحه..بسال بعدين...بس شكله الحادث خفيف وبسيط... فطوم: انكسرت ايد الريال وتقولين بسيط.. سكتت نورة وتذكرت فجاه سيف المرحوم.... نورة: ناس يموتون يافطيم.... قولي الحمد لله... فطيم: الحمد لله..صدق والله ماشي غير..؟؟ نورة: والله انه بخير من شوي طالع عناااا... فطيم: سال عني.؟؟ نورة: هي سال.. فطيم: خبرتيه لاه.. نورة: هي فطوم خبرته... وزعل وايد... فطيم: حرام عليج..ليش تزيدين عالريال بروحه كافيه اللي فيه... تنهدت نورة وسكتت..بينما فطيم كملت بتردد.. فطيم:آآآآآ ... نوروه... كم رقمه..؟؟ نورة: شوووووووو..؟؟؟ شو تبينه..؟؟ فطيم: بس ..بس بتشكرله بالسلامه... نورة: لا فطوم...مابعطيج...لا تزيدينها... قالت فطوم بياس.. فطيم: مابكلمه نوروه بس ..بس بطرش له مسج...بيزعل بيقول درت اني مسوي حادث ولا تشكرتلي بالسلامه... نورة: انا بوصل له سلامج وكل شي تبينه... فطيم: لا..نووروه عطيني الرقم... نورة: قتلج مابعطيج الرقم.. سعيد احين تلقينه يحاسبج عالوحده... ومب بعيد عنه يراقب فاتورة تيلفونج..والاتصالات السايره والراده... فطوم: التيلفون مب باسمه باسم ابويه... نورة: لا تنسين ان سعيد يشتغل في الاتصالات..ظنج بيحصل صعوبه انه يشوفها..؟؟ ..انسي الموضوع.. فطوم: المسج مايروم يتبعها...بس مسج وحده نوروه... نورة: لااااااااااااااء خلاص انسي السالفه.. انا اعرف حمدان ..من يعرف رقمج يقدر يتهور وانا اخاف ..الله مايضرب بعصا..كفايه اللي صار ... سكتت فطوم يائسه وزعلانه وتحس بظلم الحياة... نورة: شو تبيني اقوله..؟؟ فطوم: قوليله سلامات..ومايشوف شر...ووو...باركيله بالعيد....وقوليله ..آسفه عاللي صار...واذا كان بينساني...مابلومه... ابتسمت نورة.. نورة: اسميج ماعرفتي حمدان عدل....مادري ويا منو كنتي تظاربين طول هالشهور ههههههه.. فطوم: ههههههههههه... مع الشيخ حمدان بن محمد..الخقاق..الطويل... كملن سوالف وكل وحده ترفع من معنويات الثانية... في هاللحظات حمدان طلع من الميلس وهو يتكلم في التيلفون... عزوز: مباركن عييييييييييييييييييدك طويل العمر... حمدان: عساك من العايدين والسالمييين..شحالك عزوز؟ عزوز: بخير...ياريال وين انته مريت عليك البيت ماحصلتك هناك... حمدان: والله انا اسير وارد ويا خليفه...احين فبيت عمي..تعال.. عزوز: لا لالا ماكد سرت بيت عمك انا... حمدان: انزين..وهذي فرصه...شوفيها يعني..؟ عزوز: انته تعال بيتكم احين...والا نتلاقى فبيت رشود.؟ حمدان: لالا..انا ماروم اسوق. عزوز:......................... .شحقه.؟؟ حمدان: هممممم...ماشي خطير..ايدي انكسرت بس.. عزوز: شووووووووووو..متى انكسرت وكيف؟؟ حمدان: يوم الجمعه في الليل..سويت حادث بسيط ...لا تحاتي.. عزوز: سلاماااااااااااااااااات...افا يالخام..تسوي حادث وما تخبرنا.. حمدان: والله هذي مب بشاره ابشركم بها يا عزوز...ماشي خطير اقولك.. عزوز: امر عليك الحين واشلك.؟؟ حمدان: تروم؟ عزوز: هي نعم ارووم...خلاص دقايق وبكون عند بيت عمك... حمدان: تمام... فمان الله عزوز: مع السلامه.. وبعد عشر دقايق وصل عزوز واستسمح حمدان منهم وطلع وياه وركب سيارته...تم عزوز يطالع ايد حمدان المكسوره وهو كاسر خاطره....حمدااااااااااااان اللي كله حيويه تنكسر ايده؟؟ مسكين... عزوز: انا الوحيد اللي يدري من الربع ان ايدك مكسوره؟؟؟ حمدان: ههههههه هي... سكت عزوز وفتح السده النصفانية الي في السياره يدور شي... حمدان: شو ادور.؟؟؟ عزوز: قلم.. حمدان: ههههههههههه شو تباه؟؟ عزوز: احفظ حقووق الاكتشاف بعد شوو..؟ قعد حمدان يظحك على ربيعه ..وعزوز طلع قلم... وكتب على الجبس مال حمدان " انا اول من اكتشف .....عزوز" ... وحمدان يطالعه ويظحك... عقب عزوز شغل السياره وسار بها... عزوز: تبانا نسير عند رشود.؟؟ تذكر حمدان اخت رشود...كله من تحت راسها هي خربت كل شي علي... حمدان: اتصلبه اول اخافه مب في البيت...والا خلنا نسير بيت خلوود وقول حق راشد ايينا هناك... اتصل عزوز على راشد ووعقب خالد..واتفقوا على بيت خالد يتيمعون كلهم هناك.. وفي الدرب..سال حمدان.. حمدان: اقول...بتسير حق نسابتك في الشارجه اليوم؟؟ عزوز مالج على بنت خالته في الشارجه وهي من الخان تحديدا..... عزوز: العصر ان شاء الله... حمدان: ومتى بترد من هناك؟ عزوز: هممممممم يعني..يمكن يمسكوني عالعشا..بتعشى وبرد.. حسبها حمدان في عقله..اذا بيطلعون العصر ..بيوصلون المغرب..ولين العشا...ساعتين ثلاث..يكفن.. حمدان: شلني وياك..ابا اسير عند ربيعي ... والابتشل حد من هلك وياك؟ عزوز: فاااااااااااااالك طيب..لالا مب شال حد بسير اروحي... حمدان: خلاص تمام..يوم بتسير مر عليه البيت... عزوز: ان شاء الله... في مليس حمد الكتبي..عبدالله وخليفه وناصر وخالد وسلطان وحميد وكم واحد من ربعهم ..كلهم قاعدين... ناصر يوجه كلامه لعبدالله.. ناصر: احين انته بعدها اجازتك ماشيه؟؟. والا بتقطعها؟ عبدالله: لا مابقطعها...نحن ردينا عشان العيد بس..ومادري الصراحه شو بسوي بهالاسبوعين... التفت ناصر لسلطان ولد عمه.. ناصر: تبانا نجدم السيره..؟ سلطان: القنص؟ ناصر: هي.. سلطان: ماعندي مانع....بتسير ويانا عبدالله.. عبدالله: القنص..؟؟؟ ماعندي طير... قال واحد من ربعهم عمر: شل طيري عبدالله..انا مب ساير... سلطان: افاااااا بو لعمووور ليش مابتسير..؟؟؟ عمر: ماقدر والله الوالد تعبان شوي هالايام ماروم ابتعد عن البيت..محد عندهم غيري.. ناصر: الله يعينك... عبدالله: خلاص اذا بتعطيني طيرك بسير..غايته...بتسير خليفه؟ خليفه: لا للاسف.. عبدالله: لاااااااااااااه...ليش عادة النحاسه؟ خليفه: مب نحاسه ولا شي...اولا انا ماعندي اجازه...ومن فتره بسيطه بادي الدوام ومب حلوه من اولها اطلب اجازه..وثاني شي ناسي ولد عمك؟؟ حمدان مايروم يطلع الا جان انا بوصله هالفتره مايروم يسوق... عبدالله: انزين حميد في البيت...هو بيوصله.. خليفه: حميد مايقر في البيت...الا زامات وطواري وحالته حاله ماينعرفله... عبدالله: انزين الدريول.. التفت خليفه على عبدالله بقوو... وعقد حياته.. خليفه: وابوي عليك..تبا حمدان يسير ويا الدريول..؟؟؟ .. عبدالله: يعني مابتسير.؟ خليفه: لا والله...ان شاء الله مره ثانيه...سير انته واستانس.. ناصر: خلاص عيل الاسبوع الياي...اللي بيسير ويانا يتفرغ للاسبوع الياي...ويزهب عمره.. فكر عبدالله.. بانه لازم يستغل الايام الياييه كلها حواطه ويا عنود عشان ماتحتشر عسيرته القنص...بدينا عاد بالالتزامات ومشاور الحرمه...مبوني عزابي محد يتحكم بي....بس برايها دام عنوودي ..فديتها والله... المغرب ..قبل صلاة المغرب بعشر دقايق..وصل عزوز حمدان جدام بيت قوم سعيد...وارتاح يوم شاف سيارة سعيد موجووده..معناته في البيت...روح عزوز وتم حمدان واقف جدام الباب متردد...ادخل؟؟ ..لالا مابدخل عن يقول سعيد ياي يشوف فطيم والا شي...في هاللحظه هو ممكن يفكر باي شي مب زين بخصوصه...وهو ياي يراضي ربيعه ويتفاهم معاه مب يصب الزيت عالنار.... مسك تيلفونه واتصل بسعيد... سعيد في هاللحظه كان قاعد يلاعب هلال الصغير..في الصاله..معاه عليا وفطيم والبنات وكانت شيخه وامنه يايات بعد زياره يسلمن سلام العيد...يعني البيت متروس وهو قاعد بينهن....اما امه كانت مب موجوده ساير تسلم على عرب... رن تيلفون سعيد وحط هلال عالارض وهو يظحك وخش ايده في مخباه وطلع تيلفونه...يوم شاف الرقم اختفت الابتسامه..." الشيخ حمدان"...!!!..اسميك مب شيخ ولا شي وشكلي بغير هالاسم قريب...ردت له عصبيته مره ثانيه تجاه هالخاين.... سعيد: مرحبا.. حمدان: السلام عليكم...مباركن عيدك سعيد... سعيد: وعليكم السلام..وعساك من العايدين والسالمين... حمدان: شحالك؟ سعيد: بنعمه الحمد لله...... وانته؟ حمدان: الحمد لله على كل حال.....مشغول...؟ سعيد: لا بس قاعد مع الاهل... حمدان: اهااااا..اذا ماعليك امر..اطلع برا البيت.. سعيد: نعم؟ حمدان: انا واقف عند باب بيتكم الحين... انصدم سعيد...هذا شو يايبنه لين هني..؟؟؟...وتغلبت عليه اخلاق الضيافه... سعيد: افاا..اقرب انزين في الميلس... حمدان: قرييب ياسعيد بس..بس ماريد ادش ابا ارمسك فمكان مفتوح...برا البيت... تنهد سعيد...وراه مشادة كلاميه لازم يخوضها...وبعده هو معصب من تصرفات حمدان ويمكن مايروم يمسك نفسه ويمد ايده...وهو مايبا المشاكل.... سعيد: خلاص ياينك الحين.. فمان الله.. حمدان: الله وياك.. سكر حمدان وهو يراقب اليهال في الحاره قاعدين يلعبون كوره....ياحظكم...لاهين عن هالدنيا ولاتدرون بشي.. سكر سعيد التيلفون..وصد صوب فطوم بالاخص... سعيد: ولا وحده منكن تطلع للحوش تسمعني؟؟؟ قال كلمته وطلع من الصاله وفطوم تفكر بتهديده هذا بفضول....ماتخيلت للحظة انه يكون يقصد بان حمدان برا.... طلع سعيد وفتح الباب الخارجي وسكره وراه...ووقف مكانه وهو يطالع حمدان السرحان بصدمه....شو بلاها ايده..؟؟؟؟ للحظة تغلب عليه الحب والاهتمام اللي يحسبهن تجاه حمدان...تقرب صوبه وهو يطالع ايده..في هاللحظه انتبه له حمدان وصد صوبه وهو متوتر... سعيد: شو بلاها ايييييدك.؟؟؟ استانس حمدان على هالاهتمام....ولاول مره يشكر ربه علىهالحادث اذاكان بيرقق قلب سعيد عليه... حمدان: حادث بسيط.. سعيد: متى صار....؟؟ وكيف..؟؟ حمدان: انا كنت سرحان وطفت عن الاشاره واداعمت ويا واحد من ليوا..الحمد لله ماياه شي..بس انا ايدي انكسرت.. سعيد: متى هذا كله صار؟ حمدان: هممممممم الجمعه في الليل.. ارتفع راس سعيد بادراك..وابتعد شوي عن حمدان... وماعرف حمدان بشو بالضبط قاعد يفكر فيه سعيد في هاللحظه.. اما سعيد فتذكر فجاه تصرف حمدان تجاة اخته...وفقد اي اهتمام بايد حمدان...صح هو يلمح انه سوا الحادث بسبب المشكله اللي صارت... بس هذا مايبعد غلط حمدان عن بال سعيد... سعيد: مابتقرب الميلس..؟؟ هز حمدان راسه بـ "لا" ... حمدان: ماتسمع الاذان؟؟...خلنا نمشي لين المسيد...بنصلي ... مشوا لين المسيد القريب.. ويوم وصلوه اغلقوا تيلفوناتهم وتمسحوا ودخلوا يصلون...وبعد ماخلصوا طلعوا من المسيد وكانت الدنيا مظلمه... سعيد: خلنا ندش الميلس احسن.... حمدان: لالا سعيد...انا ياي اكلمك وابا مكان ...نقدر نصارخ فيه كيفنا... وابتسم...وغصبن عنه سعيد ابتسم بعد مع انه حاول يمسكها...تخيل الموقف ..انه هو وحمدان يتظاربون ويتنازعون وهذا شي بيصير طبيعي..وصدقه حمدان..مب حلوه انه يكون هالزعيج كله في الميلس ممكن اي حد يسمعهم... سعيد: تمام عيل...اركب.. ركبوا سيارة سعيد وابتعدوا عن البيت...مكان واحد كان يفكر فيه سعيد انه مناسب للزعيج...ومريح للاعصاب في نفس الوقت....البحر... واول ماوصلوا البحر.. نزلوا.. وابتعدوا عن رصيف الشارع ومشوا للبحر....ماكان فاظي كليا...فيه كم شخص هني وهناك..متفرقين..بس على الاقل..محد يعرفهم...ووقفوا مجابلين... كانه كل واحد يواجه خصم شديد....سعيد مب ناوي يتساهل....اما حمدان مب ناوي يستسلم.... سعيد: قول اللي عندك.... مسك حمدان ايده المكسوره بحركه متوتره...كانه خايف عليها من ظربه مفاجئه من ايد سعيد....شكله يقدر يسويها بسهوله ...مايتفاهم.... حمدان: ... انا آسف.... رفع سعيد حواجبه...مستغرب...اسف..؟؟ شو تسوي آسف هذي الحين؟؟ وين اصرفها بالله..؟!! سعيد: على..؟؟؟ حمدان: انا غلطت فحقك...وندمان لاني جرحت شخص عزيز عليه وايد...بدون قصد..بس انا مب ندمان باني عرفت فطيم وحبيتها.... توتر سعيد مكانه..وحاول يضبط اعصابه....الريال ايده مكسوره وبكون مب ريال صدق اذا مديت ايدي عليه في هاللحظه... سعيد: اسمع حمدان...يكون احسن لو ماتيب طاريها علسانك.....اوكي.. حمدان: بس انا ياي عشان اتكلم في هالمشكله كلها واحلها....وفطيم طرف اساسي من المشكله...عيبك والا ماعيبك... سكت سعيد وهو يحاول يضبط اعصابه.. حمدان: اسمع... انا ماريد اخسرك...وماريد اخسر فطيم بعد لاني من الخاطر احبها...تعرف شو يعني من الخاطر..؟؟؟ اوكي انا معاك طريقتي كانت غلط....كان المفروض اني ما ايي بيت عمي يوم دريت ان ساكنه عندهم بنت غريبه عني... بس ماقدرت امسك نفسي...وبصراحه ماشفت مشكله عند البنت كانت تعاملني عادي مثل نورة وحصه..مع الوقت حبيتها شو تباني اسوي...؟؟ سعيد: البنت وحصلت عقابها.... (واشر على ايد حمدان وكمل) وانته حصلت عقابك من رب العالمين...خلاص انسوا هالسالفه نهائيا..كانك ماعرفتها فيوم..تسمع..؟ ابتسم حمدان وهو مازال ماسك ايده..وقال بثقه.. حمدان: والله....وحلفت بربي...لو تكسر فيني كل عظم في جسمي مهما كان صغير...... بتم احب فطيم ومصررر عليها... تم سعيد يطالع فعيون حمدان وهو مرصص عيونه...وحمدان بعد..ماكسر عينه ولا بان اي تردد فيه... كان واثق من كلامه ويعنيه حرف بحرف....هالشي اللي خلى سعيد يفكر...معقوله يحب اختي لهالدرجه..؟؟؟ ليش لا..؟؟ اذا انا احب نورة اكثر من جذي...شمعنى حمدان مايقدر..؟؟؟ دامه واصل لين هني بايد مكسووره وهو يعرف اني ممكن اكسره زياده..وفوق هذا قاعد يواجهني بغلطه بكل جرأة ويبا يصلح الموقف....اوكي..يحبها..بس مازالت طريقته غلط....غلط × غلط... سعيد: اذا تباها...ادخل البيوت من ابوابها حمدان....جذي بتثبت لي حسن نيتك .... وبترجع الامور لمجاريها... ابتسم حمدان اكثر... حمدان: اذا ياك واحد...عمره 21 سنه.. مازال يدرس...شغله مؤقت..ومصروفه يادوب يكفيه هو بنفسه بس...بترضى فيه عشاان تامن مستقبل اختك..؟؟؟؟ سكت سعيد....لا مابيرضى فيه.... .. حمدان: انا عمري مانويت اني العب عليها...انا من ادركت اني اباها .. وانا مخطط باني بعد ما اتخرج واشتغل وتستقر امووري ..بدخل البيوت من ابوابها سعيد...صدقني ما فكرت ولو للحظه اني العب عليها.. يوم الجمعه كانت اول مره اقولها هالكلمه... ومابختلي بها بذيج الطريقه الا لانها فهمت شي عني غلط وقامت تعاملني بشكل فظيع...فحبيت اوضح لها الامور لا اكثر... ادري اني جرحتك بهالطريقه..بس قسم بالله مب قصدي... سعيد: هممممممممم.... والحين شو المطلوب..؟؟ حمداان: ابا ربعتنا ترجع مثل ماكانت...بخصوص فطيم...خلاص انا بطبه بيت عمي وهذا وعد لك مني...ولا بشوفها ولا بتلاقا وياها...وعقب ما تستقر اموري مثل ماخبرتك صدقني مابظيع ساعه وحده وبيي اخطبها على طول... سعيد: ماله داعي تقطع بيت عمك لاني طلبت من فطيم تحول السكن خلاص.... انصدم حمدان...بس ماحب يدخل في الموضوع...والافضل انه ماييب لسعيد طاري عن فطيم ابد... لين ما تكون غايته عاد ويسير يخطبها... حمدان: خلاص اللي يريحك...بس المهم ربعتنا ما تتاثر... سعيد: صعب ترد مثل ماكانت.....صعب.. حمدان: مع الوقت بترجع ان شاء الله..بس انته لا تستوي عصصصص ونكدي...خلاص الايام تمشي خلنا نمشي معاها مب نتم واقفين مكانا...بخصوص فطيم اطمن....وان شاء الله بتكون من نصيبي... وانته اول واحد بيدري يوم بنوي... وان شاء الله مع الوقت ربعتنا بترجع مثل ماكانت... سعيد حس بجدية حمدان بكلامه...مافي واحد بيقطع هالكثر عهوود والتزامات على عمره الا اذا كان جاد فعلا....وهو من عرف حمدان ماشافه جدي لهالدرجه...معناته هالموضوع يعنيله الشي الكبير...ماعليه انا بتساهل معاه وبشوف شو بيصير..اهم شي ابعد فطيم عنه ومايتلاقون...لين ما الله يحل هالمشكله..ويثبت حمدان حسن نيته... سعيد: حصل خير... ابتسم حمدان بارتياح.... حمدان: الحمد لله.....يعني خلاص... طاح الحطب..؟ سعيد: مب كله... حمدان: اوووف كيف عصصصص انته... انزين يالله خلنا نسير بقعه.. قاله سعيد عشان يختبره.....ويختبر كلامه... سعيد: ماتباناا نرد بيتنا..؟؟ بس حمدان ماطاع في الفخ...سعيد يبا يشوفه اذا عنده امل يتلاقى مع فطيم بالصدفه او لا... حمدان: لا.. نسير مكان ثاني.... ابتسم سعيد ابتسامه خفيفه وسار مع حمدان اماكن ثانيه ... وبعد ماتعشوا..اتصل بعزوز عشان يرجعون العين..وفعلا خطف عزوز عليه في المكان اللي كانوا فيه..وشله وروح..بينما سعيد رجع البيت...وهو مرتاح نفسيا من اللي صار... خليفه المسا كان يالس عند امه... خليفه: امايه متى بتسووون عرسي..؟؟؟ ام سلطان: يابويه تو النااااااس انته توك خاطب وبسرعه تبا تعرس.. خليفه: هي ابا اعرس بسرعه....عالاقل ملجه....عبدالله واقفلي فحلجي مايخليني اشوفها..ولا ارمسها ولا شي.. ظحكت ام سلطان.. ام سلطان: عبدالله يوم كان خاطب اختك ماكان يشوفها بعد..وكنت انته واقف فحلجه... خليفه: عاد هو وضعه مختلف...خطبته طولت وايد وملجته بعد طولت وايد....وانامافيني صبر الصراحه... خلونا نملج انزين... ام سلطان: شاور ابوووك... خليفه: قلت له من قبل وعادي عنده... ام سلطان: خلاص عيل خلني ارمس ام خالد وبنشوف شو بتقول البنت.... وثاني يوم العيد.. كانت عليا عندهم ..يايه الظهر مع ريلها..والعصر خلاها فيصل وروح عنها الشارجه لانها بتم هني يومين ثلاثه...كانت ام خالد توها مسكره عن ام سلطان..والبنات كلهن عندها وحريم العيال...ماعدى حمده كانت عند اهلها اليوم... ميرة: شو حالها امي..؟؟ ام خالد: بخير والله تسلم عليكم... الكل: الله يسلمج وياها من الشر.. عليا: من زمان والله ماسرت لقوم عمي...شكلي بسيرلهم باجر..اسلم عليهم.. نورة: امايه شو كانت تقولج وانتي قلتيلها بشاور البنت..؟؟ شو عندكم.؟ ام خالد: والله تقول خليفه يبا يملج.... رفعت حصه راسها بحده وهي مبطله عيونها منصدمه...ملجه..؟!!!....لا...لا لالالالالالالالا..ما شي ملجه... عنود: هههههههههههه ياحليله خلوف طفر من عبدالله..... نزلت حصه راسها مره ثانيه .... ام خالد: شو رايج يابنتي..؟؟ حصه: ....امايه...ماريد املج... ام خالد: ليش يابنتي..؟؟ حصه: ماريد اكرر هالغلطه مره ثانيه....ماريد املج...قبل العرس بكم يوم بنملج ان شاء الله... الكل تفهم موقف حصه.... ملجتها من سيف ماكانت سهله..وبصعووبه اقتنعت فيها...وبعد ماملجت تعلقت فريلها بشكل فظيع..وصار اللي صار...اكيد تخاف تكرر هالغلطه....زين انها وافقت عالخطبه...ولين هني كفايه وايد... خليفه يوم درى من عنود انه حصه رافضه الملجه..عصب وايد...لكنه في الاخير رجع تفهم الموضوع...مابيضغط عليها زياده...وعبدالله وغلاسته خلاص مابتمر عليه...حصه بنت عمه وخطيبته وبيشوفها متى ما يبغي وبيكلمها بعد متى مايبغي....لا عليه لا من عبدالله ولا غيره...ماصدقت على الله انا اني اخطبها....يقومون يحرموني من شوفتها؟؟ لا والله... عبدالله من يوم الثلاثاء لين يوم الجمعه وهو حواطه مع عنوووده...اول شي ساروا دبي.. وعقب منطقة حتى..وعقب ساروا عين خت....وبعدها ساروا برر راس الخيمه وكانت المنطقه من اروع مايمكن حتى انه المطر صب عليهم هنااك.... وعقب ساروا الفجيره لمنطقة اسمها عين مضب...وعقب خور فكان وهذي كانت اروع مايمكن واحلى مكانه سارووله...طبعا كل هالايام مارجعوا للعين...واغراضهم معاهم... ويوم وصل يوم الجمعه رجعوا العين مستانسين... الكل لاحظ تغير في اطباع حمدان...صار هادي زياده عن اللزوم بالمقارنه مع طبيعته العادية والحيويه.. نادر مايطلع من البيت.... بسبب ايده...سيارته تصلحت ورجعها خليفه البيت...بس مازال حمدان مايقدر يسوقها....مر اسبوع عالحادث...وهم قالوا انه يراجعهم بعد شهر...وهو من الحين زهقان من حالة ايده اللي مانعتنه عن اشياء وايده...والاهم من هذا كله..مانعتنه من السيره بيت عمه اللي مب متعود يقطعهم كل هالفتره... يدري انه فطوم بترجع بالجمعه..لبيت عمتها ..يعني اليوم...وهو مايقدر يشوفها....خلاص لازم يعود نفسه على هالشي... فطوم بتقعد بيت عمتها بشكل مؤقت لين ماتظبط امورها في الجامعه وترجع للسكن....هذا كلام نوره...ويوم بتخلص شغلها وبتروح السكن...بتبلغه نورة بهالشي عشان ياخذ راحته بالسيرة والييه على بيت عمه.....لكن وييييييييييين يسير بيت عمه دام فطوم مب فيه...يحس انه ماله طعم....بس مع ذلك مايقدر يستغني عن السيرات هناك....خلاص صار شي طبيعي انه يروح واذا ماراح ذيج الساعه يستوي شي مب طبيعي....لانه بيت عمه هو بيته الثاني... سعيد وصل فطيم بيت عمته ..وماوصاها على شي لانها هي بنفسها تعرف شو عليها وكيف لازم تتصرف...وبعد ساعتين...رجع سعيد الشارجه وهو شال عليا وعيالها معاه.. خلاص خلصت اجازة العيد...وكل حد بيرجع لدوامه... وهو حاز فخاطره انه لين الحين ماتراضى مع نورة...لا هي طرشت له ايميل ولا هو ارسل لها.... اكيد تعاند فيه الحماره...برايها...غلطانه ان ظنت اني انا اللي برسللها وبسال عنها.... من بداية يوم السبت .ناصر وسلطان وربعهم خذوا اجازات لاسبوعين عشان يسيرون القنص...عبدالله اولريدي عنده اجازه... خالد ماسار معاهم.. لانه شغله يحتم عليه هالشي.. وفوق هذا مب زين يخلي ابوه اروحه في البيت دام كل العيال بيسيرون... وساروا القنص...بعد ماسمعوا توصيات طويله وعريضه من العيوز..بانهم يديرون بالهم على نفسهم وعن الخبال.... وبعد اربع ايام بالتحديد يوم الثلاثاء...كانت نورة وامها وعنود وميره وحمده يالسات في الصاله .. ابو خالد كان في العزبه...كان الوقت المغرب...وحصه نايمه..لانها كانت سهرانه امس ومواصله.. سمعوا صوت سياره...وبعدها ركض على الرخام اللي جدام البيت...الحريم تلفتن لبعض..مستغربات...وبعدها...فتح عبدالله باب الصاله وكندورته كلها خايسه دم.....!!! |
||
|
|
|
30-08-2006, 03:43 AM
|
رقم المشاركة : 53 | ||
|
|
يااااااااااااااااااااااااااااا اااااربي |
||
|
|
|
01-09-2006, 06:46 PM
|
رقم المشاركة : 54 | |||
|
اووف |
|||
|
|
|
02-09-2006, 03:54 AM
|
رقم المشاركة : 55 | ||
|
|
هلا والله الهنوف مشكورة على مرورك وانشاء الله تكملين معانا باقي القصه الجزء التاسع والخمسين
وقف عبدالله عند باب الصاله.... مايتحرك..وايده مازالت على مقبض الباب... يدور بعيونه على ويوه الحريم اللي يطالعنه بعيونهن المفتوحه والمدهووشه..وهو صدره يرتفع وينزل...بسبب تنفسه السريع... كان شكله مبهدل وبلا سفره بعد... كان ناوي يخبرهم...بس من بعد نظرتهم المتخوفه ... ضعف... وماقدر...مايقدر يخبرهم...مش بهالطريقه... وقفت العيوز وهي حاطه ايدها على صدرها منصدمه.... بينما عنود يالسه مكانها متيبسه....وعيونها معلقه بكندورة ريلها الخايسه...وارتفعت انفاسها شوي شوي....الباقي كانت ردة فعلهم متوتره...متخوفه..وكانت رداة فعل مختلفه... ام خالد: عبدالله..!!!!!!....شفيك ياولدي عسى ماشر..؟ مشت صوبه وهي تمد ايدها تبا تمسك ولدها عشان تتاكد بنفسها انه بخير... بينما اشر عبدالله بايده عشان توقف مكانها وهو يهز راسه... عبدالله: مافيني شي...بخير...انا بخير...ماشي صاير لا تخافون... نورة: عبدالله ...شو هالدم على كندورتك...؟؟؟ عبدالله: آآآآآآ....مااااااااااشي...بس.. ..بس ...ووواحد من الربع انيرحت ايده..وانا عالجته...بس...ماصار شي.. ييت ابدل ثيابي...هو خيسني دم... مب دمي هذا... كان يتكلم بطريقه غير مترابطه وبشكل مشوش....وشكله ماكان طبيعي...لكن الام ولانها تبا تصدق هالشي ..صدقت..وحمدت ربها بان عيالها بخير...عنود ما ارضاها هالجواب..ويوم صد عبدالله وركب فوق وهو يركض..تبعته عشان تستفسر شو صاير....عبدالله بخير وهذا شي واضح .. لانه يتحرك بسهوله..مافيه شي يعوره..لكن حد ثاني فيه شي اكيد.... وطلعت وراه للطابق الفوقي.. نورة: مافيه شي امايه لاتخافين.... ياي يبدل ثيابه بس.. يلست العيوز عالكرسي وهي تتنهد.. ام خالد: خوفني حسبي الله عبليسه... شقا يدخل علينا جي روعنا...!!! نورة بعد كان قلبها منقبض.... اطالعت باب الصاله المفتوح...وهي تفكر... حمده: ماعليه عموه تلقينه مستعيل.. قالت الام بحسره.. ام خالد: حتى ماسلم عليه ولا حبني...مب عوايده..ماشفته من اربع ايام... ميرة: تلقيينه مدوووده ومستعيل ما انتبه عمووه..لا تشرهين عليه.... ام خالد: الله يهداهم الشباب دومهم خبايل ويركظون... نشت نورة في هاللحظه وطلعت برااا الصاله...ومن الممر للحوش... دارت على سيارة عبدالله مثل المفتش....السياره خايسه غبار وطين وشكلها فعلا يايه رأسا من البررر.... فتحت الباب الوراني وتنهدت...ليش ياربي كل ما اتشائم بشي يصير..ليش...؟؟ السيت الوراني كله خايس دم بعد...حد من اللي كان معاهم او حد من اهلي انا ياه شي...وعبدالله مغطي علينا السالفه....سكرت الباب وهي جاهزة للصياح من الحين....الليله مابتعدي على خير... عنود دخلت غرفتها وشافت عبدالله بوزار وفانيله فاتح الكبت ويفتش فيه بعصبيه عن كندوره مناسبه...بينما الكندوره الخايسه طايحه عالارض..واغراض عبدالله التيلفون والبوك والسويج عالشبريه... عنود: عبدالله....شفيك...؟؟!! .. كانت عنود ايدها ترتجف وخايفه من اي جواب ممكن يطلع منه...اطالعه من بعيد وبحذر..مب مجرأة تتقرب منه... عبدالله: ماشي.... طلع كندوره ولبسها بعصبيه... عنود: والله انه فيك شي....خبرني عبدالله.. عبدالله: مافيني شي تراني جدامج مااااااااااااافيني شي.... عنود: عبدالله لا تكلمني بهالطريقه... تنهد عبدالله بضيج وهو يحط بوكه والسويج في مخباه..والتيلفون في المخبا الثاني... وقام يعقم معاقم الكندوره بايد مرتجفه... عبدالله: طلعيلي سفرة حمرا عنود... انصاعت عنود للامر ويابت له سفره حمرا...وحطتها له عالشبريه...وقعدت تراقبه بحذر...وتراقب ايده المرتجفه وهي تتعثر بالمهمه المتوجبه عليها بتعقيم المعاقم... شي بسيط مب قادر يسويه...ليش هالتوتر..؟؟؟ خوز ايده وتنهد بظيج اقوى...وقتها تقربت عنود منه وعقمت له المعاقم اللي ماقدر عليهن...وتعمدت تتاخر عشان تستجوبه شوي.. عنود: مابتخبرني شو صاير..؟؟ تلفت عبدالله كانه فجاه مهتم بديكور الغرفه...وعيونه تلمع بشكل غريب كانه خايف...وتنفسه مب طبيعي بعد... قال بصوت مخنوق.. عبدالله: ...ماشي صاير .... قالت بعناد...وهي تمسك كندورته وتشدها... عنود: اذا ماقلت لي بتصل باخويه سلطان وبساله ترا....!! اطالعها عبدالله بنظرة غريبه...وفجاه امتلت عيونه دموع.... عبدالله: مابيرد عليج عنود... انصدمت عنود...فجت كندوره عبدالله وتراجعت على ورا ... عنود: لا....لااااااااااااا...... ياها عبدالله ومسكها من جتوفها يهزها... عبدالله: لا تخافين... ما مات... عنود خلج قوية عشاني...دخييلج لا تنهارين احين ما اتحمل اكثر... تنفست عنود بقوه عشان تتمالك نفسها... عنود: شو صاااااااار..؟؟؟ عبدالله: حادث....انجلبت السياره ماعرف كيف طارت جي وانجلبت جدامنا.. سلطان ان شاء الله بيكون بخير قالولنا في المستشفى انه بيكون بخير...انا ناصر اللي مخوفني... بطلت عنود عيونها... عنود: ناصر بعد..!!!!!!!!!... هز عبدالله راسه... عبدالله: ناصر اللي كان يسوق..وسلطان معاه... الدم اللي على كندورتي دم سلطان مب ناصر...ناصر..من برا..مافيه ولا شي..بس انا خايف من اللي داخل...ماعرف ماااعرف... مسك راسه بايده بشكل يائس...اما عنود انهارت عالشبريه ..ماقدرت تتحمل ثقل الاحداث...وايد عليهم اثنين منهم يستويبهم شي...واحد ممكن يتحملون بس اثنين..؟؟؟؟ .. يلس عبدالله عدالها ..وهو بروحه ماسك نفسه بالغصب... مايقدر يضعف الحين...اخوانه والعايله كلها محتاجتنه.. عبدالله: ماباج تخبرين اي حد ياعنود باللي صار....تسمعين..؟؟ ماظني امي تتحمل خبر مثل هذا ولا امج بعد...ولا حمده ولا ميره ولانورة....ولا حصه بعد...محد بيتحمل...لا ترمسين الا يوم اييب ابويه وخالد...تسمعين.؟؟ هزت عنود راسها وهي تمش دموعها.. عنود: انته دكتور...ظنك بيسلمون منها..؟؟؟ هز عبدالله راسه بحيره... عبدالله: ماعرف..ماااااااعرف... الله يستر.... نش شل سفرته بعصبيه وطلع من الغرفه ونزل تحت بسرعه ومر بالصاله من دون مايلتفت لها ولا فيه يدخل ويرمسهم..بيفتحوله تحقيق...لانه حاس انهم مابلعوها الجذبه....طلع من البيت ومشى بسرعه للسياره ...ووقف... نورة كانت متسانده عالسياره وشكلها تترياه...اطالعها بحيره..مب ناقصنها هذي بعد...نورة اول ماشافته عقدت يديها فوق صدرها.. نورة: منو منهم متعور جذي..؟؟؟ عقد عبدالله حياته...شو دراها هذي..؟؟؟.. ومارد عليها.. نورة: السيت الوراني كله خايس دم بعد....ماظني جرح في الايد يسوي هذا كله.. تنهد عبدالله...هالبنت مب هينه...فتح باب السايق وهو يقولها بعصبيه... عبدالله: اووووووووف....انتي المفروض حد يشغلج بالتحريات... سكر الباب وشغل السياره ونزل جامته.... عبدالله: بطلب منج شي واحد...لا تخوفين امايه.... وكلمي عنود وقوليلها عبدالله يقولج خبريني باللي صار..بس لا تطرين شي لامي ..ولا ترمسين بشي لين ما نوصل نحن فاهمه..؟؟؟ ماتريته نورة لين مايطلع بسيارته..ركظت للبيت وعلى طول ركبت فوق عند عنود..عشان تخبرها هذي باللي صاير.... عبدالله اول ماطلع بسيارته اتصل بخليفه... خليفه: مرحبااااا... عبدالله: هلا خلوف...اقولك....وين انته..؟؟ خليفه: وعليكم السلام والرحمه..انا بخير ونعمه شحالك انته...؟؟ عبدالله: اووفففففففففف..مافيني عليك الحين وعلى مصخرتك...وين انته..؟؟ خليفه: بسم الله بلاك...انا في الميلس يالس... عبدالله: وحمدان..؟؟ خليفه: وياي... عبدالله: وحميد..وعمي..؟؟ خليفه: حميد احيده في الصناعية...وابويه داخل البيت... عبدالله: تعال انت وحمدان وعمي بسرعه وبتلاقى وياكم فمستشفى توام...ولا تسرع.. باي.. سكر عبدالله فويهه بينما هو نفسه كان مطير لمستشفى توام... وخليفه بعد التيلفون عن اذنه واطالع فيه باستغراب... خليفه: اظني مقلب... حمدان: منو متصل..؟؟ خليفه: عبدالله..يقول تعال انته وحمدان وابوك لمستشفى توام بسرعه.... نقز حمدان من مكانه وهو ماسك ايده المكسوره...وملامح الخوف على ويهه... حمدان: شو مستوي بعد..؟؟؟؟ رفع خليفه كتوفه بحركه حيره.. خليفه: ماعرف... حمدان: خيبه احيدهم في القنص لايكون حد منهم صارله شي....قم قم...قـــــــــــــم طلع سيارتك وانا بسير بزقر ابويه... ركظ حمدان برا الميلس ساير صوب البيت...بينما خليفه طلع وراه للكراج يطلع سيارته الكوبي...كان بيتصل بعبدالله عشان يستفسر مره ثانيه لكن كان خايف من اللي بيسمعه... وقرر يتريا لين مايوصل هناك ويشوف بنفسه شو صاير..الله يستر... يوم وصلوا المستشفى..اتلاقوا مع عبدالله عند بوابه المستشفى... مش الطواري...الثانيه...وسلموا على بعض.. بو سلطان: ياولدي شوووو مستوي وقفتوا قلبي... حط عبدالله ايده على جتف عمه وهو يمشي معاه داخل المستشفى.. عبدالله: اذكر الله ياعمي...ان شاء الله ماشي الا كل خير..يوم بنوصل فوق بنخبرك.. عبدالله ماكانت عنده القوه يخبر هالناس والجماعه كلهم بهالخبر...بيخلي الموضوع لخالد ولابوووه..اللي يوا المستشفى اول الناس بعد ما اتصل عبدالله فيهم... ركبوا فوق لقسم العنايه المركزة...وخلاهم عبدالله هناك بينما هو راح لقسم الدكاتره ولبس اللاب كوت ماله وحط بطاقته...ويوم حط القلم...تذكر عليا..وقوم خاله..مايدرون...لازم يبلغونهم في وقت ياي... سال عبدالله الدكتور المعاين لحالة ناصر وسلطان.... لانه سوالهم اشعه اول ماوصلوا...وهذا عمل روتيني وطبيعي بالنسبه له لكن بالنسبه لعبدالله ..كان شي مصيري... سلطان كانت اصابته في الراس....ارتجاج في المخ... وشرخ بسيط جدا في الجمجمة...يحتاج عملية سريعه...لانه الخوف من نزيف داخلي كبير... بالنسبه لناصر..اصابته خطيره بالعمود الفقري... حركه السياره المفاجئه وتمسكه بالسكان سببت له اصابه عنيفه.. في اخر فقرات العمود الفقري... والعصب اللي في العمود معطوب...واحتمال الشلل كبير... لكن في امل بالنجاة اذا سفرووه وتم علاجه في الخارج علاج طبيعي..لانه الموضوع موضوع اعصاب لا غير..طبعا من بعد مايعالجون اخر الفقرات ويثبتونها بمسامير... عبدالله من سمع كلمه شلل دار راسه وضعفت ريوله..يلس عالكرسي وهو يغطي ويهه بايده....وهو يردد في نفسه..شلل..؟؟؟ مستحيل....اخوي ناصر...يتشلل..؟؟؟ ...لا...لا ياربي لا....ناصر يفضل الموت على مصير مثل هذا... اللهم لااعتراض...اللهم لا اعتراض ياربي لكن دخيلك تروف بحاله وحالنا..وتنجيه يالله يارب... بعد ماهدت شوي اعصاب عبدالله طلع من المكتب وراح لقسم العنايه ...وين الكل هناك كان منهار ويصيح... العايله والربع... ناصر وسلطان شباب محبوبين عند الكل...وطبيعي الكل يزعل عليهم... مشى عبدالله صوبهم وهو ماله خاطر يخبرهم بالمعلومات اللي سمعها توه.... التموا حواليه وهو ياشر بايده ويهديهم..بانه بيدخل بيشوف ناصر وسلطان وبيرجع لهم بعد شوي يخبرهم بكل شي يبغونه.. وبما انه دكتور كان مسموح له يدخل قسم العناية بحرية..اما هم فممنوع عليهم... تفجج منهم عبدالله ومادخل حد معاه لانه ممنوع...سار لغرفة سلطان اول لانها اقرب له...وشاف راسه المربوط...كان نايم طبعا...مسك ملفه وقعد يقرا... وكلم الدكتور عنه...وقال انه موعد عمليته بعد ساعتين... الله يشفيك ياسلطان...خلاه وراح لناصر.... اخوه ناصر...البشوش..الطيب والعطوف...اللي مايحب يرفض طلب لحد....طايح على هالشبريه غايب عن الوعي...مافي اي رضه او اي شمخ يدل على انه مب صاحي..كانه نايم فعلا....وتذكر وبعنف..اول شي ذكره ناصر يوم سحبوه من السياره سحاب... كان سلطان ولد عمه...وده يتطمن عليه...(سلطان بخير..شوفوا سلطان....سلطان بخير..؟؟؟).... مع انه ماكان فوعيه تماما بس كانت رغبته بالاطمئنان على ولد عمه ورفيق دربه من الصغر قويه وايد..بحيث نطق بهالكلمات... الحادث كان غريب فعلا... ناصر كان في المقدمه بينما عبدالله معاه رياييل اثنينه في سيارته وكان يمشي وراهم...والسياره الثالثه اخر شي.. كانوا يسوقون بسلاسه وطبيعية...صح مسرعين شوي ...بس في هذيج المنطقه السرعه كانت شي طبيعي وعادي...فجاه جي انزلقت السياره وطارت في الهوا وانجلبت كذا جلبه ... وعبدالله يراقبها بذهول..ورعب....اخوه وولد عمه في هذيج السياره وشي طبيعي انه يحس بالموت في هذيج اللحظه... اللي يشوف السياره يبصم بالعشر انه اللي طالعين منها ماتوا...الله سلم بس.... مسح دموعه اللي سالت من عيونه بدون مايحس...شلل ياناصر...؟؟ شلل..؟؟؟ ... الله لا قاله ان شاء الله... طلع من القسم وهو يشوف ان عدد المتواجدين زاد.... شي طبيعي...معارفهم واحبابهم وايد...خبرهم عبدالله وبشكل مختصر عن كلام الدكتور.. ويوم نطق بكلمه شلل...الكل هدى ..وانصدم....بس رجع يطمنهم بانه احتمال الشفاء موجود مع العلاج الطبيعي في الخارج.. وان شاء الله انهم بيسفرونه باسرع فرصه... بعدها عبدالله خذ اذن لابوه وعمه بس بالدخول عشان يشوفونهم... متى مايقدر بيطلع اذن للبقية عشان يشوفونهم بعد..بس مايقدر يخلي الدنيا سايبه لهم .. لانه القسم هو قسم عنايه وحساس ومايحتمل الازعاج والربشه... نورة من عرفت الخبر من عند عنود وهي مب في حاله...لكن قوت نفسها... هي تدري ان امها بتنهار..حصه بعد يمكن تنهار...لذا فهم محتاجين قوتها الحين.. خلت عنود بروحها في الغرفه لانه عنود مب متجرأه تنزل وتواجههم عن تفظح نفسها ...لانها مب قادره تتماسك....اما نوره فنزلت ولازمت امها ..وتظاهرت بالبرود وكانه ماشي صاير..ومافارقتها لانها تخاف اييها الخبر وهي مب موجوده...حصه نايمه...يابخت اللي نايم..ولاهي عن كل شي.. احسن لها والله خلها راقده لين ما ينتهي هالظرف... فطوم بعد من يت من الجامعه رقدت ومانشت للحين..وهي اصلا من يت من الشارجه قامت تلازم غرفتها بشكل كبير..بسبب خوفها من ان حمداان يطب عليهم كعادته..مع انه قاطع عهد على نفسه انه مايروح البيت دامه يدري ان فطيم هناك..عشان مايسببلها مشاكل اكثر من جذي.. بالنسبه لحمده وميره..كل وحده سارت تعشي عيالها وترقدهم استعدادا للمدارس باجر...وهن مب حاسات بشي.. شكلهن بلعن جذبه عبدالله مثل مابلعتها العيوز..لانهن بكل بساطه ..يبن يصدقن هالشي...يبن يصدقن ان الكل بخير ومافيهم شي عشان جي بالهن مرتاح... الساعه تسع ونص وصل بو خالد مع خالد.. وبو سلطان راح بيته بعد مع خليفه عشان يخبر اهله هو بعد... مصيبتهم كانت كبيره..ولازم يتكاتفون الحين ويصمدون لين ماتعدي على خير... بو خالد كان احساسه فظيع...واحد من عياله يطيح هالطيحه العوفه..صحيح هو جامد وقوي ولين الحين متظاهر بالصبر...لكنه مهما كان ..شيبه وكبير في السن..ومايهون عليه واحد من عياله اييه شي ويطيح جدام عيونه بهالطريقه... دخل هو وخالد الصاله... وطلب خالد من نوره تروح تزقر ميره بس... اما حمده بيخبرونها بالخبر بعدين...لانهم يدرون انها بتنهار هي الثانيه ومب زين يصير هالشي جدام خالد..الافضل تكون بروحها.. كانت العيوز اطالع في ويه ريلها مستغربه وقلبها منقبض...واطالع في ويه خالد المكتئب...وتدري ان الموضوع جايد وفيه شي.. ام خالد: شو صاير ياحمد....شو صاير خبروووني...؟؟؟ بو خالد: استهدي بالله ياموزه...صبري شوي.. ام خالد: لا اله الا الله...خبروووني شو فيكم...؟؟ شو صاير..؟؟ دخلت ميره واللهفة على ويهها.. ودخلت معاها نورة اللي بدا الحزن على ويهها...وقعدت عدال امها...تساندها.. اما ميره فيلست في كرسي مجابل عدال خالد... وتكلم خالد بهدوء...لانه ابوه خانقتنه العبره من الصبح... خالد: انا بقولكن..بس اباكن تقون نفووسكن....وتستهدن بالله...وتكثرن الدعاء..لانه اي شي ثاني مايصلح ولا يفيدنا في هاللحظه.... ناصر..وسلطان... همممم.. سووا حادث في البر.. (غمض عينه يوم سمع الشهقات ارتفعت..من ميره وامه..نوره كانت هادية)..وكلهم في العناية الحين...سلطان..بيسووله عمليه بعد (واطالع ساعته).. بعد نص ساعه..وان شاء الله بعدها بيكون بخير...اما ناصر...بنسفره باسرع وقت ان شاء الله .. اصابته خطيره في العمود الفقري... ولازم يتسفر... صرخت الام صرخه مخنووقه بينما مسكتها نورة ولوت عليها بقووو...وهي تصيح بهدوء..والام كانت منهاره وتصيح بصوت عالي ..والشايب يالس ويطالع الزوليه بكآبة .. بينما ميره مدت ايدها تمسك ايد خالد بقوو..ودموعها على ويهها...وحاولت تتماسك... اطالعها خالد بنظره حزينه.. ميرة: قوم امي يدرون..؟؟ خالد: اخوانج بس يدرون وعمي...بس احيده عمي رد مع خليفه البيت عشان يخبرون امج وحرمه سلطان بهالخبر.. ميرة: اصابه سلطان وين؟؟..ماقلت لي... خالد: اصابة سلطان في الراس...قالوا ارتجاج في المخ وشرخ بسيط في الجمجمه...وبيسووله عمليه وبعدها بيكون بخير ان شاء الله... نزلت ميره راسها وهي تصيح بشكل اكبر...مد خالد ايده وخذها بحظنه... مايباها تعب نفسها خصوصا عشان حملها ..لانها في الشهر السادس الحين... خالد: لا تخافين يام حمد...ان شاء الله اخوج ماعليه الا العافيه لاتخافين.... الشيبه كان ساكت طول الوقت...يطالع حرمته بعين حزينه... ماله قوه يهديها...بروحه هو مب في حاله...وقتها فكر... وين حصه..؟؟؟ ... قامت العيوز من حظن بنتها.. ام خالد: ودوني اشوف ولدي... بو خالد:.................... خالد: مب الحين يا امايه.... باجر الصبح بتسيرين انتي وحمده تشوفونه...الحين روحي ارتاحي وادعيله بيفيده اكثر... ام خالد: هو ما بيموت صح خالد...؟؟ لا تقص عليه دخيلك قولي ان ناصر مابيموت... بو خالد: ياحرمه ليش تفاولين عالولد... مافيه الا الخير ان شاء الله.... مسكت نورة امها... نورة: نسير امايه....نسير حجرتج...عشان اطيحين شوي ترتاحين... ام خالد: وين ارتااح وولدي في المستشفى ..وييييييين...!! خالد: امايه سيري طيحي واستهدي بالله...باجر الصبح بوديج تشوفينه لا تخافين... سارت الام مع نورة وحطتها في شبريتها ولحفتها.. وحطت لها كوب ماي عدال راسها...وسكرت الليت وطلعت... رجعت الصاله ..وين كانوا على حالهم.. نورة: منو بيخبر حمده بالموضوع..؟؟ خالد: وين حصه..؟؟ نورة: راقده من العصر...ماظني تنش احين... خالد: سيريلها انتي وميره...لا تفاجؤونها بالخبر عن تتخبل علينا... وصد لميره اللي كانت تصيح عداله.. خالد: ياميره استهدي بالله انتي بعد....شحقه تصيحون ..؟؟؟... ترومين تروحين تخبرينها والا..؟؟ هزرت راسها بصمت.. ومشت دموعها وقامت وطلعت مع نورة لبيت ناصر... بينما خالد يقنع ابوه يروح يطيح شوي في الغرفه ويرتاح... لانه خالد بيرجع المستشفى... فبيت ناصر.. ويه ميره اللي مليان دموع وعيونها المحمره قالن الكلام قبل اللسان.. بالتالي حمده انصدمت وحست بشي جايد...اندفعت ميره ولوت على حمده بقوو... حمده: شو مستوي ميره....؟؟ بلاج..؟؟ فكرت نورة..بانه مافي طريقه مبسطه تقدر تنقل فيه خبر مثل هذا لحمده...مهما كان..زوجها ..وحبيبها..وابو عيالها.... مابتتحمل... بينما ميره زادت الطين بله.. ميرة: قولي لا اله الله الله.... قالت حمده برعب.. حمده: قووولي شو مستوي....شوفيكم..ناصر فيه شي..؟؟؟؟ ميرة: قولي لا اله الا الله اول... حمده: لا اله الا الله...يالله خبريني... ميرة: سلطان وناصر...سووا حادث بسيط في البر....(شهقت حمده).. لا تخافين..كل شي ان شاء الله بيمر على خير.. كلهم في المستشفى احين... عقت حمده بثقل جسمها كله عالكرسي.... وهي اطالع في ويوههن مب مصدقه.. حمده:..ناصر..!!...لا....لااااا ااااا...مستحيل...انت ي جذابه.. قعدت نورة عدالها تهديها...وتخبرها بالتفاصيل..وميره معاها...لكن مثل ماقلنا من قبل...مافي اي طريقه سهله لنقل خبر مثل هذا...والنتيجه ان حمده انهارت..خصوصا يوم درت ان الظربه في العمود الفقري...حمده مثقفه وتعرف ان الظربه في العمود الفقري مب هينه ابدا... وممكن يتشلل بسببها... مع انه محد درى لانه خالد مارمس عن الشلل ابدا..ومحد حد في باله ان ناصر ممكن يتشلل...لكن هي عرفت بنفسها..بانه هالشي ممكن يصير....وهالشي اللي خلااها تنهار اكثر.. قعدت ميره معاها تهديها بينما نورة رجعت البيت ودخلت على امها وشافتها مثل ماهي ...منسدحه وتصيح...طلعت وركبت فوق..ودخلت على عنود اللي قاعده متربعه على كرسي صالتها الصغيره حاظنه التيلفون وسرحانه ... نورة: انتشر الخبر... باقي حصه..وفطيم... عنود: توني متصله بعبدالله....سلطان توه داخل غرفة العمليات... وناصر على حاله...شو حالها عموه..؟؟ يلست نورة عدالها.. نورة: شو تتوقعين..؟؟... منسدحه على شبريتها وتصيح.. الله يعينا على هالفتره... عنود: حمده حد خبرها... نورة: توني يايه من عندها... وخليت ميره وياها..وحالتها هي الثانيه ماتسر... عنود: امي بعد حالتها ما تسر...وحرمه سلطان اغمى عليها...قبل شوي مسكره عن خليفه... هزت نورة راسها باسف...الوضع كله مؤسف... ويزعل... عبدالله اتصل بسعيد ...مب زين مايخبرونهم ..بيزعلون وايد...وهم من الاهل ولازم يدرون...وخبره بكل شي...سعيد انصدم من الخاطر... واصر انه يعرف التفاصيل كلها..وحالة كل واحد منهم بالتفصيل....وبعد ماخلص ..سكر عن عبدالله وبلغ فيصل وابوه...وفيصل تولى مهمة انه يبلغ عليا بشكل مناسب...عليا مثل نورة..تتماسك في الظروف السيئه...وكانت عمليه جدا ..صح صاحت وزعلت وايد بس جهزت اغراض لها ولفيصل وعيالها ليومين... لازم تروح هناك تساندهم...بينا هلال ركب مع سعيد وطاروا للعين...فيصل شل عليا وراحوا وراهم هم بعد... وام فيصل تمت في البيت مع بناتها منى ومنال..ماتقدر تخليهم بروحهم وماتقدر تشلهم بعد.. ولو انه كان خاطرها تسير وتواسي ام خالد...بس ماباليد حيله.. الساعه 11 وصلوا هل الشارجه العين...سعيد وابوه ساروا المستشفى على طول وكان بينهم وبين عبدالله اتصال دايم.. بينما فيصل ودا عليا البيت وراح المستشفى بدوره... عنود استاذن من عبدالله بانها تروح مع الدريول لبيت اهلها عشان اتم مع امها في هالوقت.. لكنه ماطاع انها تروح مع الدريول..وقال انه هو بنفسه بيي يشلها وبيوديها هناك....وهذا اللي صار...الساعه 11 ونص كانت عنود مع امها...وباتت هناك وياها... بينما نورة دخلت على فطيم اللي كانت تدرس..وخبرتها بالسالفه كلها... مافي داعي اقولكم ان ذيج الليله محد منهم نام...والساعات كانت تمر ثقييله بشكل فظيع.. الساعه خمس الفجر....قامت حصه من النوم...وصلت صلاة الفجر... كانت شبعانه رقاد...بس يوعانه..وفكرت تنزل تسوي لها سندويش والا شي..لبست شيلتها البيظا ونزلت...واستغربت....شو صاير بالبيت.؟؟ الكل واعي... دخلت الصاله ووقفت منصدمه....وتاكدت من ساعتها..الساعه خمس الفجر...شو يسوون هذيلا كلهم في هالساعه هني..؟؟ نورة وفطيم وعليا وابوي وخالد وخالي هلال وسعيد وفيصل.... عدلت حصه شيلتها وسلمت بصوت ماينسمع...والكل يطالعها مدهوش..والتعب على ويوههم والحزن...مافيهم يخبرون حصه بعد.... تجدمت حصه وهي تبتسم باستغراب لعليا..وسلمت عليها.. حصه: انتي شو تسوويين هني..؟ متى ييتي..؟؟ سكتت عليا عنها وهي تبتسم لها بتعب.. مشت حصه لخالها..وسلمت عليه... حصه: انته بعد خالي هني...شو هالمفاجأة.. ماخبرتونا... بو فيصل: شحالج يابنتي.؟؟ هالكثر رقاد..؟ حصه: ههههههههه كنت سهرانه وبخيتها برقده... تراجعت حصه ..كانت مستحيه لانه كلهم متواجدين...ويلست عدال عليا.. حصه: شوفيكم عليا...؟؟ ليش واعين الحين.؟؟ عليا: مافينا شي... نورة: حرام عليج عليا...خبريها لا تخلينها جي... تلفتت حصه حواليها...كلهم على ويووههم نفس التعبير....التعب والحزن... حصه: شوووفيكم..؟؟؟؟ امي وين..؟؟؟ .. عليا: امي بخير لا تخافين.... حصه: عيل؟؟...منوووو..؟؟؟؟ شووووفيكم..؟؟؟ حصه كانت تدري ان عبدالله وناصر في القنص عشان جي ماشكت فيهم..على بالها بعدهم في القنص... عليا: اخوج ناصر في المستشفى حصه.... سكتت حصه...حست كانها تلقت صفعه قويه...ناصر في المستشفى.؟؟؟ حصه: ليش..؟؟ عليا: هو وولد عمج سلطان سووا حادث في البر... سلطان الحين بخير الحمد لله بس ناصر...حالته خطيره وهو في العناية الحين ولازم يتسفر... وماكثرت عليا اكثر من جذي... وحصه اطالع فيها وهي ما تشوفها اصلا....تذكرت سيف..والعناية....العناية ...العناية.... ليش كل اللي احبهم يروحون العناية..؟؟؟؟....قعدت حصه مكانهاهادية...وماذرفت ولا دمعه...كانت صدمة كبيره ماقدرت تتحملها وهي توها قايمه من النوم.... امس نايمه والكل مستانس وكل شي طبيعي..قمت وحصلت الوضع منجلب فوق تحت.... مب معقوول..!!!.. سعيد كان كل شوي يرفع نظرة لنورة اللي مجابلتنه من اخر الصاله...معجب بصمودها وقوتها....يدري انها داخليا مب متحمله الوضع حالها حالهم...لكنها عشانهم صامده....كان وده يروح يضمها و يواسيها وويخبرها بان اخوها بيكون بخير ان شاء الله.... لكن طبعا مب قادر... الرياييل كانوا يتكلمون ويشرحون كيف كان الحادث وكيف صارت الاصابه...ويتناقشون حول الموضوع وافضل بلاد يتسفر لها ناصر..باختصار..يتكلمون عن كل شي يدور حوالي هالموضوع...ويوم رمس الشايب اخيرا من بعد طول الصمت...ماسمعته نورة عن شو يتكلم بالضبط...كانت تراقبه وقلبها يعورها على حالة ابوها...فجاه الشايب صاح....بينما حظنه خالها هلال...ونورة تراقب...وماتحملت الوضع...ابوها يصيح..؟؟ اول مره تصير هذي...اول مره تشوفه بهالحاله...وماتحملت..وفجاه صاحت هي بعد ...لكنها قامت وطلعت برا الصاله وبرا البيت بعد ويلست في البلكونه تصيح... تتحمل اي شي...لكن شوفة ابوها يصيح ماتتحملها... سعيد كان يراقبها..وعوره قلبه عليها وعلى الشايب بنفس الوقت....دموعه كانت متجمعه فعينه لكن كل شوي يمشهن قبل ماينزلن... حصه قامت ودخلت غرفه امهاا اللي كانت يالسه عالشبريه وراسها بين ايديها... حصه: امايه... رفعت الام راسها ومدت ايدها وهي تصيح...وحظنت حصه وصاحت وصاحت ..وهي على بالها ان حصه يت تطلب المواساه..لكن اللي صار العكس..حصه قعدت تواسي امها...بينما هي بعدها مب مستوعبه اللي صار... الساعه سبع..تلبست الام مع حمده...وركبوا مع خالد ووداهم المستشفى..بينما بو خالد طاح شوي في الحجره عشان يرتاح لانه من امس مب راقد... وبو فيصل راح معاهم مع فيصل... نورة كانت بعدها في البلكونه...ومعاها فطيم....بينما حصه تمت مع عليا وميره...سعيد من الساعه ست دخل غرفة الضيوف يطيح شوي...لكنه رجع نش من بعد ماهنت له الرقده.. طلع من البيت وشاف نورة منزله راسها للطاوله اللي في البلكون..وحاظنتنه بين ايديها..وفاطمه يالسه عندها...كسرت خاطره ويا صوبهم ويلس عدالهن عالطاوله... رفعت نورة راسها مستغربه عشان تشوف منو اللي يا وانضم لهن...يوم شافت سعيد ابتسمت.. نورة: هلا سعيد... ونزلت نظرها لحظنها... وهي تتراجع عشان تتساند عالكرسي... بينما سعيد مد ايده ومسك ايدها وضغط عليها...متعاطف... سعيد: ناصر بيكون بخير...لا تحاتين نورة.... نورة: الله يسمع منك... ماعرف سعيد شو يقولها اكثر...غير انه متعاطف معاها... سعيد: انا بسير المستشفى احين....تامريني على شي.؟ نورة: اذا دخلت على ناصر وشافك..سلم عليه.. ابتسم سعيد سعيد: ان شاء الله بتسيرين عقب وبتسلمين عليه بنفسج...بس خلج قوية... نورة: ان شاء الله سعيد... ضغط على ايدها اكثر وعقب ابتعد عنها ووقف.. سعيد: فمان الله... نورة+ فطيم: الله وياك... خالد من بعد ماوصل الحريم للمستشفى وخلاهم عند خاله وعبدالله هناك .. خذ جواز ناصر واوراقه الضروريه وراح بوظبي.. لواحد من الشيوخ..وبما ان خالد منصبه عالي في الجيش...قدر ينظم سفره لناصر لالمانيا...وعلى حساب الجيش. مع مرافق...وخالد بيكون هذا المرافق.. |
||
|
|
|
02-09-2006, 04:09 AM
|
رقم المشاركة : 56 | ||
|
|
الجزء الستـــــوووون...
ام خالد وحمده كانن يبن يقعدن عند ناصر اكثر من جذي...لكن ماخلووهن لانه ممنوع...فرجعن البيت من الساعه ثمان ونص... الساعه 11 رجع خالد من بوظبي وراح راسا للمستشفى...وخبر ابوه واخوانه والجماعه هناك ان الطايره الخاصه بتكون جاهزة العصر..الساعه 5... بالتالي اتصل بميره وطلب منها تجهز له شنطه للسفر وتحط فيها ثياب من كل نوع... وطلب منها تخبر حمده بعد عشان اجهز لناصر شنطه هو الثاني.. عليا طلبت من فيصل انه ايي يوديها المستشفى عشان تشوف اخوها...وتبا تيب خواتها معاها ..طبعا اصرت على هالشي اكثر من بعد ماعرفت ان ناصر بيسافر العصر...لازم يشوفونه ويسلمون عليه... بالتالي يا فيصل البيت وشل عليا وحصه المدهوشة لين الحين ونورة...اما عيال عليا وفيصل خلوهم عند فطيم.... خليفه وحمدان وسعيد وعبدالله وخالد وابو خالد وابو سلطان وحميد وبو فيصل..الكل كان موجود في المستشفى..طبعا + الربع والمعارف اللي وقفوا معاهم من البدايه وقفه يشهد لها الكل...لانهم فعلا ماقصروا...وماخلوهم رواحهم..هذاك القسم كان مليان بس من ربعهم ومعارفهم... سلطان من بعد العمليه اطمنوا على حالته...بس قالوا انه بيخلونه يومين في العنايه للمراقبه لين ماتستقر حالته وتتماثل للشفا..كان غايب عن الوعي معظم الوقت.....عشان جي يوم اييه حد من اخوانه والا اهله يشوفه ويسلم عليه ماكان يحس بهم... اما ناصر..فكان مخدر بالكامل...لكنه يوم ايييه حد يفتح عيونه ويكلمهم بكلمات بسيطه جدا على قد مايقدر..ويرجع ينام مره ثانيه...كان مدرك ان حالته خطيره...لكن مابيده شي يسويه غير الصبر.. الساعه 12 ونص.. وصلن قوم عليا مع فيصل المستشفى.. كانت حصه تمشي معاهن وهي لين اللحظه مب مستوعبه ان اخوها ناصر في العنايه...وصلوا قسم العنايه...فيصل قالهم يمشون بسرعه عسب القسم متروس رياييل..وكان يمشي جدامهن بسرعه...عليا ونوره..سرعن من خطواتهن هن بعد ولحقن فيصل...لكن حصه من شافت باب قسم العنايه....ظاعت .... وقفت مكانها وهي تراقب عليا ونورة وفيصل يبتعدون ويختفون ورا باب العناية الي تسكر وراهم... تذكرت هالمشهد...تذكرت سيف ... وكيف كان متعور ساعتها...خافت...ماتبا تشوف ناصر بنفس الحاله او اكثر...ما تتحمل تشوفه متشوه...محد خبرها ساعتها ان ناصر ظاهريا مافيه اي شي وشكله طبيعي جدا....ماكانت تدري...عقلها ماكان يستوعب اي شي...وقفت بعيد عن باب العناية...عدال الايدار...بعيد شوي عن الرياييل المتجمعين...تحس بالضياع..ومب عارفه شو تسوي... خليفه كان واقف يكلم حميد اخوه بعيد شوي عن الرياييل...حميد كان يوصيه بانه اذا صار وكلم سلطان لايخبره عن حالة ناصر..ويقوله انه بخير...لا يخبره باي شي الا يوم تكون حالته مستقره تماما ويطلع من العنايه...بعد ماخلصوا رمسه راح حميد للمصاعد ومر من عدال حصه وماعرفها...طنشها على باله حرمه من الحريم وماله خص..دخل المصعد ونزل... اماخليفه اللي كان يراقب حميد وهو رايح بذهن شارد...انتبه عالبنت...ورصص عيونه يدقق..الطول..والجسم..وحركه الايد المتوتره....حصه.!!!!!!!.... تقرب منها بتردد...خوفه انه تكون مب حصه ويتفشل...وقف بعيد وقال.. خليفه: حصه..؟!!... ارتجفت حصه والتفتت له بخوف وهي تطلع من افكارها السودا...وعرف خليفه ساعتها ان هذي حصه فعلا...وثاار شي في نفسه...شو تسوي هذي واقفه هالوقفه هني بين الرياييل..؟؟ وينهم عنها ؟؟؟..منو مخلنها هني.؟ صدق مايستحون... تقرب منها لين وقف عدالها وهي اطالعه والخوف مبين على حركاتها..طبعا مايشوف ويهها لانها متغشيه...بس واضح من حركه ايدها وارتجافها الكامل انها خايفه... قال بانفعال.. خليفه: شو تسوين واقفه هني...؟؟؟؟ اشرت حصه على باب العناية بصبع مرتجف... حصه: آآآ.... قوم عليا.....ييت مع قوم عليا... مافهم خليفه شي... وتلفت حواليه بحيره... خليفه: تبيني ادخلج..؟؟ قالت على طول بدون تردد.. حصه:...لااااااااا... استغرب خليفه....ليش ماتبا تشوف اخوها.؟!!!... خليفه: اردج البيت.؟؟؟؟ هزرت راسها.. حصه: لاااا... خليفه: عيل شو تبين..؟؟؟...مايصير توقفين هني... اخوج بيسفرونه العصر ماتبين تسلمين عليه..؟؟ حصه: بلى.... خليفه: يالله عيل بدخلج داخل... حصه: لا..ماريد ادخل.... تلفت خليفه مره ثانيه بعصبيه...وقفتهم قامت تلفت الانتباه...وعيون وايد قامت تبصبص عليهم...بينما حصه بدت تصيح توها....توها بس استوعبت ان اخوها حالته خطيره...وبيتسفر العصر...ماعرف خليفه شو يسوي..وحصه تهدد بانها تنهار باي لحظه...يزقر حد من خوانها..؟؟؟ لالا...اخاف يهزبونها... مد ايده ومسكها ايدها وسحبها وراه للمصاعد... وفتح المصعد ودخل ودخلها وراه...كان هندي بعد موجود في المصعد... وحصه بعدها تصيح ومب حاسه باي شي حواليها...وخليفه مب عارف ان اللي يسويه صح والا غلط...هو اكيد غلط...بس ماعنده حل ثاني.. حصه ماتقدر تشوف اخوها احين ...شكلها مغصوبه عالييه هني... فتح المصعد وطلع على باله حصه بتمشي وراه..بس حصه يلست على ارضيه المصعد تصيح..بينما طلع الهندي وهي يطالعها باستغراب...وخليفه حن قلبه عليها...ليش يابوها هني؟؟ حرام عليهم.. تقرب ومسك باب المصعد بايد وحده عشان مايسكر...ومد ايده لايد حصه اللي مغطيه بها ويهها.. خليفه: حصه قوومي...استهدي بالله وقومي... مطها من ايدها ووقفها وهي بعدها تصيح...وطلعها من المصعد ووداها سيارته ..وركبها بالغصب..وسكر الباب وراها وركب هو مكان السايق..ويلس هناك...يتريا نوبه حصه تخلص.. لكن مرن عشر دقايق..ويشوفها كل ما اييها تزيد... في غرفة ناصر..عليا ونورة واقفات يكلمنه ويتشكرن له بالسلامه..وفيصل خلاهن وطلع برا.. محد منهم في حالتهم ذيج انتبه انه حصه اختفت...الا يوم سال ناصر.. ناصر: وين حصه؟ مايت..؟؟ تلفتت نورة برعب... وعليا استغربت وطلعت برا تشوف...محد في الممر... نورة: مادري والله ياناصر يت ويانا لكن مادري وين سارت... وعليا في الممر شافت عبدالله واقف مع ابوه يكلمه ويشرحله للمره العاشره تفاصيل حالة ظهر ناصر.. الشايب بعده مب مستوعب حالة ولده... عليا: عبدالله..تعال شوي.. تقرب عبدالله منها.. عبدالله: عونج... عليا: عانك الله يارب...اقول..ماشفت حصه.. عبدالله عقد حياته...وتلفت.. عبدالله: يت وياكم هي؟ عليا: هي بس توني انتبهت انها مادخلت ويانا...شوفها الله يخليك.. عبدالله: بشوفها احين... رجعت عليا تدخل داخل ودخل معاها ابو خالد.. وقالت لناصر ان حصه الحين بتي.. بينما عبدالله طلع برا وماشاف حد واقف..مسك حمدان وساله.. عبدالله: حمدان ماشفت حصه...؟ حمدان: لا...شفت حريم دخلن مادخلت وياهن؟؟ عبدالله: لا مادشت ...مادريبها وين راحت حسبي الله عبليسها.. راح عبدالله يسال حد ثاني اذا شافوا بنت كانت هني...وواحد منهم قاله انه شاف خليفه يتكلم مع بنت وراح معاها بعدين.... عرف عبدالله انها حصه..ابتعد بعيد واتصل على خليفه...اللي مبتلش مب عارفه شو يسوي بحصه.. خليفه: هلا عبدالله.. عبدالله: هلا...خلوووف..حصه عندك...؟؟؟ خليفه: هي..هذيه تصيح... عبدالله: ليش مادخلت؟؟؟ خليفه: مادريبها...متروعه ادش..ماتبا تدخل وماتبا تروح البيت..مب عارف شو اسوي..سحبتها للسياره مب زين الرياييل قاموا يطالعونا... عبدالله: ماتبا تسير البيت..؟؟ خليفه: لا ماتبا... عبدالله: شو هالخريط....هاتها...خلها تسلم على اخوها.. محد بييبهاعقب... خليفه: بحاول وياها....بس خلها تهدا شوي مقطعه عمرها من الصايح... عبدالله: يوووووووه شحقه ماصاحت في البيت وخلصت.... خليفه: مادري..شكلها بس توها استوعبت...المهم خلها تهدا انته وعقب بردها فوق.. عبدالله: همممممممم خلاص اوكي..باي سكر عبدالله عن خليفه... هو واثق منه... ويدري بخليفه ريال وماتقصد اللي صار... رجع للقسم يخبر قوم عليا بهالكلام... خليفه صد على حصه اللي هدت شوي وعقت غشوتها وقامت تمش دموعها وويها بكلينكس.. خليفه: ليش تصيحين حصه..؟؟ اخوج ماعليه الا العافيه ان شاء الله.. قالت حصه وهي تشاهق... حصه: ليش...ليش عيل..بيسفروونه..؟!!. تقطع قلب خليفه عليها...اول مره يشوفها تصيح...وماتحمل.. خليفه: يابنت الحلال يحتاج تسفير..علاج برا احسن عن هني حصه... حصه: ليش عيل مابيسفرون سلطان..؟؟ خليفه: سلطان اصابته مختلفه...والحين هو بخير... حصه: ليش وين اصابة ناصر..؟ خليفه: اصابته في العمود الفقري.. ويباله علاج طبيعي.. بهت ويه حصه وهي بتاكل ويه خليفه بعيونها... انصدمت... حصه: اخويه مشلول صح..؟؟؟ مابيقدر يمشي..؟ خليفه: حرام عليج ليش تفاولين عالريال..؟؟؟.. رجعت حصه تصيح مره ثانيه لمجرد تخيلها ناصر على كرسي متحرك...وحظنت ويهها بكفوفها وهي تصيح.. تقرب خليفه..ومد ايده...شوي وكان بيحظنها..بس انتبه لنفسه... وتراجع..غلط...ماعطوني الثقه عشان اسوي هالشي....غلط...هز راسه وطرد ابليس من راسه... خليفه: حصه....حصه اطالعيني...حصه... رفعت حصه راسها وسحبت كلينكس مره ثانيه ومشت ويهها... خليفه: اخوج بيكون بخير ان شاء الله... دام الدكاتره قالوا في امل... ان شاء الله فيه امل...انا ماحيدج ظعيفه جي احيدج قويه... اكيد ناصر بيحط فخاطره اذا ماسرتي تسلمين عليه... سكتت حصه شوي وردت سالت.. حصه: متشوه.؟؟؟ استغرب خليفه سؤالها.....متشوه..!!!..هذا اللي مخوفنها وماخلاها تدخل..؟؟... خليفه: شووو..؟؟؟... لا ابدا...كانه راقد مافيه شي ابدا...يالله قومي الله يطولي بعمرج..حطي الرحمن فصدرج وادعيله...ان شاء الله بيكون بخير.. حصه: هي صح....نسيت....(ورفعت نظرها له وحاولت تبتسم) .. تستاهل سلامة اخوك... ابتسم لها خليفه ابتسامه حلوه بامتنان... خليفه: الله يسلمج يارب...يالله تغشي خلينا نسير ..عبدالله محتشر.. سمعت كلامه حصه وتغشت وطلعت...كانوا يمشون منفصلين طول الوقت...لانه حصه كانت متشجعه هالمره..فما كان بحاجه انه يسحبها...لكن يوم وصلوا قسم العنايه ترددت الخبله مره ثانيه..وهالشي اضطر خليفه انه يمسك ايدها ويسحبها غصب..لين مادخلها قسم العنايه وحصل عبدالله في الممر..وفج ايد حصه..تقرب عبدالله منهم... وهو يطالع حصه بنظرة عطوف.. عبدالله: هااا حصه...شو حالج احين.؟؟ طاحت حصه بحظن اخوها ودموعها تارسه عيونها.. عبدالله: لا تخافين...ناصر بخير ماعليه شر.... حصه: انته..بتسافر وياه..؟؟ عبدالله: لا..خالد بيسافر وياه...بس يمكن الحقهم عقب.. يالله تعالي سلمي عليه..يسال عنج.. سار عبدالله مع اخته داخل الغرفه ..وخليفه طمن على حصه انها عند اخوانها واهلها وطلع من القسم وسار عند قوم سعيد وحمدان... حصه عقت غشوتها..وشافت ناصر..شبه مغمض..ووقفت عداله ودموعها تنزل بدون صياح...فعلا ناصر مافيه اي كدمه ..اي شمخ...مختلف كليا عن حالة سيف قبل ما.....قبل ما يتوفى.... عليا: وين كنتي انتي..؟؟؟؟ انتبه ناصر وفتح عيونه وطالع حصه..وابتسم لها..وابتسمت هي بعد.. حصه: حمدلله عالسلامه ياخوي...ماتستاهل والله... ناصر: الله يسلمج ياحصه... حصه: بتسافر اليوم العصر...تروح وترجع بالسلامه ان شاء الله... ناصر: ان شاء الله...ديروا بالكم على امايه...وحمده..وعيالي.. لا تحسسونهم اني غايب عنهم ياحصه.. حصه: عيالك فعيونا لاتحاتي...انته ماعليك الا من نفسك بس...نباك ترجع احسن من اول... ناصر: كله بايد الله... حصه: ونعم بالله ... سكت ناصر بعد ماتعب من هالحوار الصغير...وغمض عيونه مره ثانيه....وغاب في عالم مايعلمه غير رب العالمين.. بعد الغدا اللي محد اشتهى ياكله...رجعت ام خالد وحمده يسلمون على ناصر ويشوفونه قب مايسافر... ومن بعدها وبمساعده المستشفى وسياره الاسعاف.. راحوا الجماعه كلهم لمطار دبي...والكل راح معاهم يسلم على ناصر قبل مايسافر هو وخالد...ومن بعد ماسافروا...رجع سعيد وابوه لبيتهم ..اما فيصل رجع العين لانه عليا تباتقعد عند اهلها بعدها يومين.. ورجعوا بعد اهل العين كلهم... كان عبدالله راكب مع خليفه ومعاهم حمدان.. وصلوا العين وكانت الساعه9.. والتعب ماخذ منهم كل قوه...يومين كاملات محد رقد منهم.. خليفه وصل عبدالله البيت... عبدالله: مشكوورين...انزلوا تعشوا... خليفه: مشكوور عبدالله بنسير البيت... عبدالله: لا والله احين حزه عشا..واظني العشا زاهب...والله ياتنزلون تتعشون.. سحب عبدالله الكرسي وجدمه لجدام عشان يطلع حمدان منه...لانه السياره كوبي مافيها غير باب جدامي..طلع حمدان وطلع خليفه بعد..وساروا للميلس..وعبدالله دخل البيت يخبرهم يحطون العشا... وكان فيصل وابوه بو خالد وصلوا قبلهم...ويالسين في الميلس.. فاطمه ونورة كانن يواجن من الدريشه يوم سمعت صوت سياره.. شهقت فطيم يوم شافت ايد حمدان... قالت بصوت واطي فطيم: فديييييييييييييته... وتنهدت...باسف..على حالة حمدان.... بينما نورة ابتسمت بتعب.. نورة: تعالي نسير الصاله اشوف عبدالله ياي هالصوب ماباه يشوفنا نوايق عليهم.. دخلت نورة وفطيم الصاله عند عليا وميره وحصه وعنود... دخل عبدالله عليهن... عبدالله: السلام عليكم... الكل: وعليكم السلااااااااام.. عليا: هاا..سافروا بالسلامه.. عبدالله: هي الحمد لله...بيتصل خالد يوم بيوصلون ان شاء الله... اقول..عيال عمي في الميلس حطولنا عشا .. نورة: ان شاء الله... رد عبدالله طلع من الصاله ورجع للميلس... عليا: شكله تعباااان فديته... عنود: الا ميت من التعب بس مب رايم يرقد مب هاين عليه اخوه وولد عمه... نورة: قومي حصه..نسير المطبخ نشوف هالبقره شو مسويه عشا.. نشن البنات وسارت فاطمه معاهن ورتبن العشا وزادن عليه خفايف...وطرشنه للميلس.. من بعد العشا..رجعوا خليفه وحمدان البيت..والبقيه ساروا كلهم يرقدون وهم حيلهم منهد من عقب يوم طويل جدا... خالد اتصل بعبدالله الفجر بعد صلاة الفجر على طول..وطمنه بانهم بخير وبانه ناصر استقر في منطقة بون 2 اللي هي كلها مستوصفات صحية.. في المستشفى وبانهم حاليا يسوووله فحص شامل...وخالد عطوه غرفه مجاوره لناصر في المستشفى نفسه...بحيث مابيضطر انه يستاجر شقه...وبيكون دايما قريب من اخوه.. وبيرجع يتصل بهم بعدين ويطمنهم على نتايج الفحوصات وكل شي.. فطيم خلووها نهاية هالاسبوع في العين..بسبب ظروف العايله..واصلا الاسبوع الياي بيكون اخر اسبوع تقضيه في هالبيت لانها من بداية الاسبوع اللي بعده خلاص بتنتقل للسكن بعد مارتبت امورها مع الجامعه بس قالولها تتريا شوي عسب يفضوون لهاغرفه ويشوفون في اي سكن يحطوونها... بينما سعيد بيتولى شرح السبب لاهله وبان فطيم موكلتنه يخبرهم...خلال الاسبوع الياي... يوم الجمعه عليا وامها وخواتها + فطيم كانن قاعدات في الصاله..وكان الوقت ظهر..نزل عبدالله مع عنود وهي لابسه عباتها...وقال انهم بيسيرون عند سلطان بما انهم طلعوه من العناية الحين..... وراحوا.. سالت عليا بفضول.. عليا: على فكره ...لاحظت ايد حمدان بانها مجبسه... نورة وحصه كل وحده اطالع الثانيه بتوتر...بينما فطيم نزلت راسها للارض.. ام خالد: حادث يقول.. عليا: من متىى..؟؟ نورة: من اسبوعين جي تقريبا...او يمكن اكثر... عليا: مسكيين مايستاهل... شافت فطوم ان الوقت مناسب الحين عشان تخبر عمتها.. فطوم: على فكره عموووه...الاسبوع الياي اخر اسبوع اسكن عندكم هني.. ام خالد: ويدي.؟؟!!!...ليش يابنتي..؟؟؟... فطوم: عمووه سعيد مايباني اقعد هني بروحي بعد مايعرسن البنات..قالي السكن احسن لج وانا بعد بطول في الدراسه... ام خالد: وانتي شووو عليج هذا بيتج بعد...بتخليني ارووحي عقب مايعرسن بناتي.. فطوم: والله الود ودي ياعموه اني اسكن عندج لكن سعيد مب راضي.. ام خالد: ماعليج من سعيد انا برمسه.... ابتسمت نورة وحصه بينما فطيم حست بالخوف...ياويلي..انا شو سويت..؟؟ احين سعيد بيقول انتي شيشتي عموه عليه عشان تتوسط لج...الله يستر.. فطوم: عموووه لاترمسينه هو مصرر على رايه... ام خالد: ماعليج منه انزييين....وابووي عليه شو عليج انتي اذا يلستي فبيت عمتج...؟؟ لازم البنات يكونن موجودات يعني...مسود الويه... ظحكت نورة على رمسة امها...اول مره العيوز تسب سعيد..لانه غالي عندها....وان شاء الله يقتنع على ايدها..بس هي تدري بسعيد خلاص من يصرر على رايه مابيغيره... في المستشفى عبدالله وعنود حصلوا عند سلطان امه ام سلطان...سلموا عليها وعلى سلطان اللي كان قايم ساعتها... وبعد السلامات وغيره..مسك سلطان ايد عبدالله.. سلطان: شحاله ناصر..؟؟؟ سلطان ماكان يدري بعده انه ناصر تسفر المانيا... عبدالله: بخير...ناصر بخير..لا تحاتي.. سلطان: انا حاس انكم داسين عني شي...قولي الصدق عبدالله.. ام سلطان: ياولدي لا اتعب نفسك... سلطان: قولي الصدق... عبدالله: اسمع...ناصر..اصابته مب مثلك..ناصر اصابته في العمود الفقري..انزين...واول امس العصر سفرناه المانيا... بهت سلطان فويه عبدالله.. سلطان: كل هذا وماتخبرووني...لييييييييييش؟؟؟ عبدالله: اهدا....مابغينا نزعلك عليه الا يوم نطمن على حالتك انها استقرت اول...تباني اتصلبه عشان ترمسه.. سلطان: هي... اتصل عبدالله برقم خالد اللي مبدلنه من وصل المانيا... خالد: آآآلووو... عبدالله: هلا خاالد...شحاااااالك..؟؟ خالد: هلا والله عبدالله..بخير شحالكم انتوووا... عبدالله: الحمد لله انا يالس عند سلطان احين وهو بخير بعد ...شحاله ناصر... خالد: من شوي والله ظاهر من العمليات وراقد... عبدالله: عمليات شووووووووو..؟؟؟ ماقلت لي انه شي عمليه.. خالد: ولا انا دريت الا قبل مايدخلوونه.. عبدالله: شوفيه انزين... خالد: من بعد الفحوصات اكتشفوا انه عنده كم ظلع مكسووور...تخيل توام الحيواااان وفحصه الخام... عبدالله: لا اله الا الله.... انزييييييييين..؟؟ واحين بخير..؟ خالد: الحمد لله... عالجوا له ظلووعه وحطوله مسامير في اخر الفقرات مال الظهر..والحين راقد.. عبدالله: سلم عليه وايد..وانته شحالك مب محتاج شي ولا غيره.. خالد: لا الحمد لله انا بخير وكلنا امورنا مستقره...والاسلطان بخير.؟؟ عبدالله: هي الحمد لله... خالد: عطني ارمسه... عبدالله: اوكي.. صد عبدالله على سلطان وعطاه التيلفون.. عبدالله: هذا خالد..ناصر مايروم يرمس الحين.. اندوك كلمه.. خذ سلطان التيلفون وكلم خالد وسال عن احوالهم وخصوصا ناصر..وخذ رقمه عشان يكلمه بعدين ويكلم ناصر... |
||
|
|
|
02-09-2006, 04:54 AM
|
رقم المشاركة : 57 | ||
|
|
الجزء الواحد والستون
اليوم هو السبت... بيت محمد الكتبي امورهم انعفست من عقب طيحه سلطان في المستشفى...وناصر في المانيا..وشركه المقاولات بدون رقيب ولا حسيب.... فكر الشايب في خليفه..لكن خليفه اعتذر بسبب دوامه..مايقدر يخليه ويروح للشركه...ثانيا ماعنده توكيل عشان يمشي الامور... اما بخصوص حمدان...بروحه مسكين ايده مكسووره وفوق هذا عنده دراسه....وهالشي اضطر الششايب انه يستعيد قوته لفتره ويدير شركته بنفسه...وبينما هو قاعد يتريق قبل مايروح الشركه.. وخليفه وحمدان والعيوز معاهم....والشباب يطالعون بعض ويظحكون ظحكات مكتومه... ام سلطان: بتخبركم انتوا عاد على شو وايد مستانسين وتظاحكون.. بو سلطان: خليهم خليهم....انا ادري على شو مسخسخين هالكثر... نقع حمدان من الظحك مارام يتحمل... حمدان: عااااااااااد ابويه..قلنا انك بترجع لايام شبابك وبداوم في الشركه من اول ويديد...بس صراااااااااحه... ماله حايه يعني هالكشخه كلها والخقه.... ام سلطان: اي كشخه هذي..؟؟؟... خليفه: ماتشوفينه ريلج... الغتره والعقال على ينب مثل ايام اول..والقلم المذهب.. والمسباح....ابويه نسيت البشت... بو سلطان: عنلااااااااااااااتكم زاد....قوموا يالله سيروا دواماتكم.. خليفه: ههههههههههههههه ان شاء الله ان شاء الله.... حمدان: على فكره ابويه...ترا سلطان ولدك غير السكرتير مصطفى وحط وحده لبنانيه... ام سلطان: فذمتك.؟؟؟؟؟؟؟....افااااااا وانته شو بيسيرك عيل..؟؟؟ كانت تكلم ريلها منقهره من سالفه اللبنانيه..وخليفه ميت من الظحك... وبو سلطان يطالع ولده بنص عين مب مصدق ان سلطان يسوي هالشي...ويعرف انه يبا يمشكله...طالع عليه..لازم بيعرف حركاته... حمدان: امايه مثل مذيعات القناة اللبنانيه...تلبس لين فوق الركب... وشعرها احمر.. ام سلطان: لا والله..؟؟ مسود الويه سلطان.... اليوم تروغها يامحمد تسمعني..؟؟ رجع مصطفى...ماشي اخير عنه هالمصري...الا عيالك يدورون الضياع.. بو سلطان: يلوووووووووووت عليج هذا صدقتي عاد انتي...عالدقه امرره.... حمدان: ههههههههههههههههههههههههههههاي ... خليفه: قم قم...خل عنك الخريط احين..بتاخر على دوامي.. ام سلطان: وابوي خل اخوك يكمل جاهييييييييه...!!! خليفه: مايبا مايبا...قــــــــــم...!!! حمدان: ذليتني تراك يالدريول....!! خليفه: انا دريول...عنلاات صيرك...اقعد هني عيل خل الشايب يوصلك..فمان الله.. حمدان: لالالالالالالا دخيييييييييييلك كل شي ولا اروح ويا ابويه... مايحاسب عالمطبات ولا الاشاير بيكسرني زياده... ام سلطان: والله انك صادق...انه يوم اسير وياه العزبه طول الدرب وهو ينقزني لين سقف السياره... بو سلطان: هههههههههههههههه محد قالج تركبين وياي... حمدان: وانا اقووووووووووول ليش مخج دومه ظارب امايه .. خليفه: ههههههههههههههههههههههاي حلوه..يالله يالله نسير.. طلع حمدان مع خليفه وركبوا الكوبي وراحوا..وبعد خمس دقايق طلع وراهم بو سلطان..بينما ام سلطان راحت عند ولدها سلطان..تطمن عليه..وتقعد معاه لين عقب.. ماتقدر تروحله المسا لانه الشباب والرياييل وايد يكونون عنده يسلمون عليه.. مر الاسبوع بشكل عادي...لكن يوم الاربعاء يوم يا سعيد يشل فطيم...اللي كانت الدمعه فعيونها وهي تلم اغراضها كلهن وهي مب مستعده بعدها انها تودع هالبيت اللي عاشت فيه احلى شهور من عمرها كله... دخل سعيد البيت على طلب ام خالد...ويلس عدالها..وعبدالله في الطرف الثاني يبتسم..شكلها العيوز في خاطرها تهزب حد... سعيد: آآآآآمري ياعمووه..خير؟؟ طالبتني...!! ام خالد: انته بتخبرك...شو يااااااااينك على اختك.؟؟؟؟ رفع سعيد حواجبه مستغرب... سعيد: شو يايني عليها.؟؟ ماشي.. ام خالد: شعنه ماتباها تقعد عندي..؟؟؟ سعيد: هههههههههههه عموه..لو انتي فبيت بروحج ووياج عمي حمد..جان خليتها..لكن بيتكم ماشاء الله مايخلى...وانتي ادرى.. ام خالد: البنت حشيم وماعليها..وعيالي مثل اخوانها...ونادر ماتتلاقى وياهم..وين تباها تقعد ويا بنات الغرب في السكنات؟؟ لالالالالالا...انا خلاص ماصبر عن فطيم ..اباها عندي.. تنهد سعيد..ياهي ورطه طحنا فيها...احين شو بيفججنا من لسان العيوز...!!! سعيد: عمووه.. انتي تدرين.. عيال محمد الشباب قوم خليفه وحمدان دوم مطيحين هني...وانتي بروحج ماترظين على بناتج يطلعن حتى جدامي او يقعدن عندي فتره طويله...كيف تبيني انا ارضى على اختي..؟؟؟ ام خالد: ياولدي قلت لك البنت حشيم وماعليها.. هز سعيد راسه معاند.. سعيد: لالالالالالالا عموه..سمحيلي..ماودي اكسر كلمتج والا اني اردج فطلب ...لكن فطيم امانه عندي..وابويه موكلني عليها..لاني انا تكفلت بها...واقنعت ابويه انها تسكن هني..لانه الوضع بيريحها..وهو فعلا ريحها واستانست وياكم بس للاسف ماريحني انا..ماقدر اخلي اختي فمكان ممكن انها تصادف الغرب فيه.. بدون ماتدري..وانا ماقصد عيالج..وانتي تعرفين هالشي.. ام خالد: يابوويه فطيم مابتروم عليهن بنات السكن اخاف يلعبن بعقلها وينقص عليها...ياما سمعنا سوالفهن..اخاف عليها..خلها عندنا وانا بتكفل فيها.. سعيد: لالا عموه..ماعليها شر...السكن يمكن فيه بنات خايسات لكن فيه بعد بنات حشام وبنات عرب..وان شاء الله انها بترتاح هناك وربعها بيكونن بنات حشام..ترا شيخه درست في السكن ولاياها شي بالعكس ردت من هناك ملتزمه بدينها اكثر عن قبل...وبعدين نوره معاها في الجامعه بتنصحها وبتفهمها الامور اللي ماتعرفها...انتي لا تحاتينها..انا اسوي هالشي لمصلحتها... ام خالد: لاحول ولا قوه الا بالله...انته مثل ابوك صعب.... ظحك سعيد.. سعيد: وانتي عاد اونج امره ماخذتي منه ..!!...الا صدق عموه... متى تبونا نملج..؟؟؟ زهقت عمووه من متى وانا خاطب... عبدالله: بدييييينا عاد... سعيد: جب...انته يوم بغيت تملج محد رمس...ملجت قبل عرسك بسنه.. عبدالله: هههههههه اشتغلت الغياره...انا كان عندي ظرف... سعيد: مالي خص...ابا املج.. ام خالد: انزين انته تبا تملج..يمكن البنت ماتبا... سعيد: نوروه ماتبا...هاتيها هني وبنشوف..بقنعها لج... ام خالد: ههههههههه عين خير...شو تبا بالملجه انته الحين ؟؟ حدد اول موعد العرس عقب بنشوف سالفة الملجه.. سعيد: تبيني اعرس بعرس باجر..لكن بنتج معاوره... عبدالله: اول حصه...بعدين انتوا... سعيد: ياسلااااااااام..!!!..نحن خاطبين قبل... عبدالله: بس هم اكبر.. سعيد: عيل ماشي..نعرس رباعه... عبدالله: لا والله..؟؟؟..والزفه.؟؟؟ نزفك جدام حصه ونزفه هو جدام نوره..وكل حد يشوف حرمه الثاني ها..؟؟؟ سعيد: مب لازم ننزف جدام الحريم...عقب مايخلص العرس كل واحد يدخل على حرمته... عبدالله: مب ترتووووب... سعيد: اوص انته خلينا الترتوب لك... هاه عمووه شرايج..؟؟ ام خالد: انا بعد شو لي من الشور..؟؟ بنشوف الشايب والبنات بعد لازم نشاورهن... سعيد: لا تشاورين نوره...ادريبها بطلع لج علله وبتقنعج بالعكس...همها بس تاجل العرس ليش مادري.. عبدالله: ههههههههههه يمكن ماتباك... سعيد: ههههههه ماتباني..؟؟ قولولها تفج الخطبه عيل...انا وايد بنات يبن يخطبني.. عبدالله: ههههههههههههههههههه...بتشوف بقولها.. سعيد: لالا ..لا تقول ولا عندك خبر...نوروه خبله تصدق...مب ناقص انا... المهم عمووه استعيلوا..والله ابا اعرس.. عبدالله: ههههههه مستقطع الريال.. ام خالد: انته شو اخبار بيتك..؟؟ سعيد: يشطبون عليه...يباله شهرين ثلاثه وان شاء الله بيكون خالص... عبدالله: ماشاء الله مسوي بيت؟؟ غلبتنا يابو عسكور.. سعيد: عشان تعرف اني جاد...بس الله يعيني خسرني اللي وراي واللي دوني... عبدالله: عيل وين تبا تعرس وانته ماعندك سيوووووووله.. سعيد: افا...بتطلع السيوله جان الا حق عرسي... انته بس لاتوقف فحلجي ... عبدالله: ههههههه اوكي انا مالي خص... نورة وفطيم اللي كانن يتسمعن من ورا الباب..زعلن في البدايه على اصرار سعيد على قراره..لكن ردن ظحكن عليه يوم سمعنه مصر على العرس.. ابتعدن عن الباب وطلعن للبلكونه... نورة: شفتي اخوج السياسي...مايباني اتهنى بعرس ارووحي... فطوم: هههههههه الله يعينج عليه..احين بيتم حاط الفكره فباله... نورة: تعرفين انا اللي غلطانه لاني دخلتها فباله..بس كنت اقوله اياها بمزح.. مادريت انه بيصدق ويا راسه.. ابتسمت فطيم بحزن... فطيم: مب مصدقه اني خلاص بطلع عن هالبيت..نوروه خلاص تعودت..ماريد اروح السكن ماريد... نورة: والله حتى انا...بس شو نسوي..حكم القوي عالضعيف.. ان شاء الله انا بييج هناك دوم..وبريكاتي كلها بقضيها عندج هههههه... فطوم: غصبن عنج اصلا....ان شاء الله اطيح على بنات زينات عاد.. نورة: ان شاء الله...واذا بخصوص بعض الناس..بييبلج اخبارهم اول باول...وبقولهم يكتبولج رسايل بعد هههههههه.. فطوم: هههههههههههه هي انتي..خربيني بعد زياده... والله اتمنى...عالاقل اتصبر بهن...نورة..قولي الصدق..انتي تشوفين فيه امل بينا..؟؟ نورة: اذا صبرتي كفايه...هي .ان شاء الله... فطوم: والله خايفه اتعلق بامل يخدعني.. واتحطم اخر شي.. نورة: خلي ايمانج بالله قوي...في هالوقت انتي اهتمي بدراستج احسن شي... فطوم: ان شاء الله... في هاللحظة رن تيلفون فطيم..وكان سعيد.. سعيد: ها فطيم...؟ جاهزة؟؟ قالت فطيم باسف فطيم: احين بنسير.؟؟؟ سعيد: هي ورانا درب...يالله اجهزي.. فطيم: اوووكي.. سكرت فطيم عن سعيد وهي تبا تصيح... فطيم: احين بنسير..قومي تعالي وياي فوق ساعديني... نشن ونوره حاطه ايدها على كتوف فطيم تواسيها وهي بروحها زعلانه لانها بتروح عن بيتهم...ركبن فوق وزقرن الخدامه تنزل الشنط.. تمت شنطه صغيره شلتها فاطمه..بينما نوره حظنت الدبدوب الكبير عشان تنزله.. مرت فاطمه على صالة عنود وين كانن قاعدات عنود وحصه..وسلمت عليهن وحظنتهن كانها مابتشوفهن ابدا بعد اليوم....نزلن معاها تحت... فجت فطيم باب الصاله ووايقت..شافها سعيد... سعيد: تعالي سلمي على عمتج... دخلت فطيم مستحيه من عبدالله..لكن عبدالله نش.. عبدالله: بسير اسويلك درب... طلع عبدالله من الصاله وفطوم دخلت ولوت على عمتها... ام خالد: فديتج يابنتي والله مب هاين عليه تروحين عنا.. فطيم: ولا انا ياعموه..بس السموحه منج..لازم اسير..لكني ان شاء الله مابقطعكم.. عبدالله برا كان واقف مع عنود وحصه..كلمهن شوي وقالهن يدخلن الصاله الصغيره..عشان سعيد بيطلع.. وعقب هو بروحه طلع ووقف عدال سياره سعيد.. ونورة غافلت عبدالله ودخلت الصاله تسلم على سعيد وهي بعدها حاظنه الدبدوب العود..شافها سعيد وابتسم..مب لها..على شكلها الطفولي..بينما نورة ابتسمت بدلع.. وهي لاويه عالدبدوب من راسه والباقي منه يطلوح تحت لانه كبير وايد... نورة: شحالك سعيييييييد..؟!! سعيد: بخير نورة شحالج انتي... نورة: الحمد لله... سعيد: فطوم وهذا لازم يسير وياج وين ماتروحين..؟؟ كان ياشر على دبدوب حمدان.... فطيم: هييييييييييييه ما ستغني عنه.... سعيد: انزين..يالله خلصي سلامات ولحقيني السياره... فمان الله عموه..شي فخاطرج؟ ام خالد: سلامتك ياولدي..عن السرعه..وسلم على اهلك... سعيد: ان شاء الله..فمان الله... مشى سعيد صوب نوره وين ماكانت واقفه عدال الباب وهو يبتسم لها..وقف عدالها شوي اونه يفتح الباب.. سعيد: ياحظه هالدبدوب... ابتسمت نورة لتلميحه ونزلت عيونها.. سعيد: ابا املج...يالله عزمي عاد... هزت نوره راسها "لا" ..عنادا فيه.... سعيد: ماعليه دواج عقب... ظحكت نورة وهي بعدها منزله راسها..بينما سعيد طلع من الصاله وسار الحوش عند عبدالله جدام السياره... سولفت شوي فطوم مع عمتها وسمعت توصياتها بخصوص السكن...وسلمت عليها وطلعت مع نورة للحوش... وصلتها نوره لين السياره وهي لابسه سعيد..منقهره منه لانه معزم يشل فطوم عنهم...ماصارت غلطه غلطتها يعاقبهم كلهم بهالطريقه القاسيه... في نفس الوقت حمدان كان في البيت يالس في حجرته يدرس لامتحان باجر..يحاول يشرد من التفكير...من استوت سالفه فطوم وهو يدرس بلا قياس..بس عشان يشرد من التفكير..يدري ان سعيد حاليا متواجد في العين..وانه بيشل فطوم للشارجه ومن بعدها خلاص..مابتسكن هني...وكان يتالم لهالفكره..مايتخيل بيت عمه من دونها... صدق انه الواحد مايعرف قيمه الغالي عنده الا يوم يفارقه... من يوم حرموه من شوفه فطيم وهو يصبح ويمسي وهو يفكر فيها...وشو تسوي الحين...وشو حالتها..؟؟ ومتالمه لفكره فراقه او لا..؟؟ . قاطع تفكيره صياح التيلفون...مسكه وشاف الرقم رقم العين..رقم بيت..بس ماعرف الرقم...رد عليه.. حمدان: آآلووو.. مريم: ..اس...السلام ..عليكم.... حمدان: وعليكم السلام والرحمه... عقد حمدان حياته ماتعرف على الصوت في حالته ذيج..لانه باله كان فمكان ثاني... مريم: شحالك ؟ حمدان: بخير منو معاي..؟؟ مريم: انا مريم... حمدان: منو مريم..؟؟ مريم: ....اخت راشد... غمض حمدان عيونه منقهر....هذي وبعدين وياها..؟؟ مب كافي اللي صار بسبتها..؟؟؟ لو مب هي واتصالها ذاك جان ما اختلى بفطيم بذيج الطريقه عشان يشرحلها الي صار ..بالتالي مابيصير كل هذا...وبتكون الامور طبيعيه....لكن هي مصره تخرب حياته اكثر... سكت عنها... مريم: آآللوووو...!! حمدان: يابنت الناس شو تبين فيني..؟؟ مب كافي اللي صار بسبتج..؟؟ مريم: ليش شووو صار..؟؟ حمدان: مايهم...ليش متصله انتي الحين.؟ شو تبين ..؟؟ وبعدين يالغبيه ليش متصله من تيلفون بيتكم..؟ مريم: انا فبيت ربيعتي مب في بيتنا... حمدان: اهلا..تورطين ربيعتج بعد في الموضوع... مريم: حمدان..انا فاهمه انك ماتباني...انا بس اتصلت لاني كنت اباك لنفسي..اسفه اذا سببت لك مشاكل..اتصلت اليوم عشان اتاكد اذا خبرت راشد باي شي..؟؟؟ عن اتصالي..؟؟ حمدان: ليش شو شايفتني..؟؟؟ ولد شوارع مايعرف السنع..؟؟ مريم: ماقلت انا جي...بس...بس راشد...راشد متغير علينا من كم يوم..وانا من زود خوفي تحسبتك خبرته بشي.. فكر حمدان....هو كان لاهي عن ربعه في الفتره الاخيره بسبب حادث اخوه وولد عمه وكل المشاكل..مافتكر ينتبه لراشد وحالته....او يسال عنه.... حمدان: لا ماقلت له شي ولا بقوله بعد..اطمني...وراشد اكيد في باله موضوع ثاني مب بسببكم.. مريم: الحمد لله... حمدان:..... اوكي مع السلامه وياريت ماتتصليبي مره ثانيه بليز.. ماتريا حمدان ردها وسكر فويهها... هالبنت شو معدنها..؟؟؟... قسم بالله لو يدري راشد....بيجتلها بدون تفكير... هذا بعد شوفيه مظايق..؟؟؟ اوهووووووو ناقصين نحن مشاكل... مسك تيلفونه مره ثانيه واتصل براشد...ولاحظ بروده في الكلام بس المهم عرف انه يالس في البيت...سكر عنه واتصل بواحد من ربعه اسمه خالد... خالد: هلااااااااااااااااا بالمزاييين.... خالد هذا دوم يقول عن حمدان مزيون...يرفع معنوياته دوم.. حمدان: هلا والله خلود..شحالك؟؟ خالد: انا محظوظ لانك تلطفت عليه باتصال ...تعرف اني مغرم فيك من سنين.. حمدان: ههههههههه عنبو هالويه لك طب هالسوالف مالي مزاج... خالد: ههههههه..شخباره سلطان؟؟ وولد عمك علومهم ربهم الا بخير..؟؟ حمدان: الحمد لله سلطان بعد يومين بيطلع من المستشفى...وناصر مستقره حالته في المانيا..يعالجونه علاج طبيعي.. خالد: الله يشفيهم..درست لامتحان باجر..؟؟ حمدان: درست نص الكميه...وانته..؟؟ خالد: انا مادرست والدليل اني شارد الحين وساير العين مول..ههههههههه.. حمدان: عنلااااااااتك ...هههههههه ويا منو ساير.؟؟ خالد: ويا قوم عزووز... حمدان: اهااااا..وينك عن بيتنا؟؟ قريب والا بعيد؟؟ خالد: تباني اييك..؟؟ حمدان: ابا اسير عند راشد...خليفه محد في البيت مادريبه وين يحوط... خالد: فالك طيب..احين بييك.. خطف خالد على حمدان وشله معاه وخطفه على بيت راشد وخلاه هناك وراح العين مول... دخل حمدان الميلس وشاف راشد يالس اروحه يطالع التلفزيون... حمدان: السسسسسسسسسسسسلام عليكم... فز راشد من مكانه وسلم على حمدان.. راشد: وعليكم السلاااااااااااااااااااااااام والرحمه...هلا والله... حمدان: وشحاااااااااااالك... راشد: بخير وسهاله..علومك انته؟ ماقتلي انك بتي.. حمدان: سبرااااااااااااااااايز... راشد: هههههههههههه سكر سكر حلجك..اخاف تدخل ذبابه فيه... يلسوا عالكراسي.. حمدان: ههههههههه تتمناااه انته هالحلج... راشد: شو اتمنى فيه بالله عليك... المهم منو يابك.؟؟ حمدان: يابني خلود..وسار العين مول..متواعد ويا قوم عزوز..الهرم شارد عن الدراسه.. راشد: قول لعمرك انته بعد شارد.. حمدان: عالاقل انا درست نص الكميه...المهم انته بلاك؟؟ راشد: بلايه..؟؟ مابلايه شي..!!! حمدان: بلى فيك شي...مويم...مب مثل قبل... تنهد راشد.. راشد: مظارب ويا امي... حمدان: افااا...شو السبب... راشد: اتفقت هي وابويه..وربعت ترمس قوم خالي..عشان تخطبلي بنتهم... حمدان: مبرووووووووووووووووووووك... اطالعه راشد بعصبيه... راشد: عنبو هالويه لك....اقولك من دون شوري تقولي مبروك.؟؟ تشوفني انطنط من الفرحه يعني.؟؟؟ حمدان: هههههههههه ياريال هد اعصابك...الا رمسه حريم هي ماشي رسمي... راشد: اللي قاهرني انه مب رمسه حريم....ابويه رمس خالي على طول والبنت موافقه ... حمدان: هممممممممممم... وانته حاط وحده ثانيه فبالك..؟؟ راشد: لا..بس قايلك من قبل ماريد من العايله.. حمدان: شو بلاها البنت..؟؟؟ راشد: مافيها شي بالعكس الكل يمدح فيها من كل النواحي... حمدان: والله انك بطراااااااان...حد محصل بنت زينه ومن اهله ويرفض..؟؟؟ راشد: انا ماريد من اهلي..مااااااااااااااااااريد من اهلي ياناس.. حمدان: راشد عن الدلع...اهلك يبون مصلحتك ويمكن هالبنت اللي الله كاتبنها لك ..وان شاء الله بترتاح معاها... راشد: بالله عليك فيه عرس..طرف من اطرافه مغصوووب على هالعرس..ويستانسون بحياتهم..؟؟؟ حمدان: فيه وايد..احيانا الطرفين مغصووبين عالعرس وبعد يستانسون...انته بس وكل ربك.. راشد: لا اله الا الله.... بس انا مب مرتاح ياحمدان...احس انهم غشووووني... حمدان: تشوفها انته البنت.؟؟ راشد: لا ماشفتها الا يوم هي صغيره من عدها مادري كيف شكلها...ولااعرف شي عنها غير عنها تدرس بالجامعه ويا اختي... توتر حمدان من طاري هالاخت اللي وين مايسير يحصلها بدربه... حمدان: انزين عيل كيف تحكم عليها وانته ماتعرف شي عنها...خلاص دامهم خطبوها لك حاول تتعرف على هالخطيبه يمكن تعيبك...واذا ما اتفقت معاها فجوا الخطبه بكل سهوله... راشد: جي وين عايشين نحن؟؟ فمصر.؟؟؟ تعرف عليها اون... احين اكثر بيدسووونها عني وبيرفضون اي احتكاك لي معاها.. تعرفهم انته كيف.. حمدان: هههههههههه املج انزين وبتتعرف عليها... راشد: هي ويطيح الفاس بالراس... عقب مايستوي فج خطبه يستوي طلاق... حمدان: الله لا قاله ياريال شحقه تفاول على عمرك.. راشد: ماباها...ابا اخذ على مزاجي.... حمدان: قسم بالله انتوا عيال هالجيل خراطين... راشد: لا تخليني ادعي عليك ان امك تخطبلك وحده عمرك ماشفتها وتبتلش فيها عشان تحس... حمدان: لالالالالالالالالالالالالا دخيلك ..دخيل والديك لا تدعي علي بروحي مب ناقص مشاكل.. مر شهر على الحادث... والكل استقرت امووووره... فطيم.. استقرت في السكن والحمد لله طلعت البنت اللي معاها بنت عرب وحشيم..تعرفت عليها فطيم وحبتها.. لكنها واجهت صعوبه في البدايه خصوصا بالنوم...مب قادره تستوعب المكان اللي هي فيه..لكنها شوي شوي تاقلمت..وكانت نورة تزورها يوميا وتيبلها كل الاخبار والعلوم مهما كانت تافهه...واذا صار وكان حمدان يالس في الصاله عندهم يسولف.تربع تتصل بفطيم وتسوي عمرها تكلم ربيعتها وتسمعها صوت حمدان وهو يتكلم مع حصه او مع الشايب او اين كان...المهم صوته وسوالفه..وكانت فطيم وايد تستانس من هالحركه... وتتصبر شوي..على فراق حمدان... نورة كانت الايميلات بينها وبين سعيد شغاله خصوصا انه قلل زياراته بسبب فطوم الي في السكن..وماعنده اعذار وايد يسير العين..فكان مشغول بالتشييك على بيته المستقبلي.. وحياته روتينيه.. اما نوره كانت مخلصه امتحاناتها المنتصف...ونجحت فيهن كلهن ويابت علامات حلوه... حصه... كانت دايما مع عنود..مستانسه بانها انتقلت عندهم في البيت...وجود عنود في البيت ساعد حصه على فهم شخصيه خليفه بشكل اكبر...لانه عنود دايما تتكلم عنه...وحصه بعد يوم يصيرلها موقف مع خليفه او تشوفه تخبر عنود بهالشي وتبدا عاد سوالفهن عنه... اما بخصوص خليفه.. فكان ماشاء الله عليه يدخر جزء من معاشه عشان يكون له راس مال بنفسه..ويساعده وقت ما ينوي العرس..وكان دايما يسير بيت عمه وكل مايسير يصادف حصه...زاد حبه لهالبنت بشكل غير طبيعي...هداوتها ونعومتها تخبلبه...صدق هذي اللي يسمونها بنوته ... كان منقهر من قرارها بتاخير الملجه من الخاطر لانه يبا يتقرب منها...مازال يحس بانه حصه مب متقبلتنه كزوج..مايحس انها تحبه كفايه... عبدالله وعنود....سمنه على عسل.... ناصر وخالد في الغربه.... خالد ماكان مقصر مع اخوه ابدا...ناصر كان متابع للعلاج الطبيعي... طبعا يتريون فقرات الظهر يرجعن مثل كانن ويقون شوي قبل مايشيلون المسامير بعمليه ثانيه له... اتصالات الاهل وزوجته له وعيال عمه وربعه محد كان مقصر فيه... وخصوصا سلطان اللي من طلع من المستشفى وتشافى كليا..حجز تذكره لالمانيا وقعد مع ولد عمه اسبوعين...وبعدها رجع عسب الشركه... لكنه ما اطمن الا يوم سارله بنفسه وشافه واطمن على حالته المستقره .... حمدان...راح المستشفى وفجوا الجبس عن ايده..وحطوا بدالها ربطه بسيطه عشان تشد العظم لا غير...وصار يقدر واخيييييييرا انه يسوق بنفسه ... وصار يقدر يروح ويرد بروحه متى مايبغي... حمدان مثل الطير...حرر..ويحب يتحرك بحريه وبمزاجه... مايحب ينحبس او يعتمد على احد بتنقلاته اللي ماتخلص... واول ماسار سار لبيت عمه...وكان الوقت المغرب...دخل الميلس ماحصل حد فيه....سياره عبدالله محد..وشكله محد في البيت من الرياييل..لانه حتى سياره عمه البيك اب اللي يسيربها العزبه محد...دخل البيت ومن بعده الصاله وشاف نوره يالسه بروحها ترمس في التيلفون..دخل وسلم بصوت واطي يالله ينسمع ..عشان مايزعجها..ردت عليه هي بعد السلام بصوت واطي وايد... حمدان: وينهم عيل..؟؟ اشرت نوره بصبعها لفوق...كانها تقوله انهم فوق... عقد حمدان حياته واشر لها بايده .. " منو تكلمين"... حركت نوره شفايفها وهي تبتسم وتقوله "فطوم"... انتفض قلب حمدان من مكانه...صح انها مارمست بصوت عالي بس فهم حمدان انها تكلم فطوم...الشيخه فاطمه..حبيبة القلب والروح... بدون حاسيه مد ايده وسحب السماعه من اذن نوره وحطها على اذنه...واول ماسمع صوت فطوم غمض عينه وتساند عالايدار اللي وراه..وايده وحده فمخباه...كان وايد متاثر بصوتها....متوله عليه شكثر... ونوره اطالعه وتبتسم ..وخلته ياخذ السماعه لانه كسر خاطرها..من متى ماسمع او شاف او عرف اي شي عن فطوم.. اكيد متوله عليها وايد وهالشي واضح من ويهه وتاثره بصوتها... كانت فطيم ترمس وتقول سالفه لنوره عن استاذها الكمبيوتر اللي يسوي حركات..وهي كل شوي تظحك وهي تكمل سالفتها..وحمدان عاظ على شفايفه ويظحك معاها بصوت مكتوم...مستمتع بصوتها حاليا..واجل الغيره اللي بيحس فيها بسبب استاذ الكمبيوتر مال فطيم اللي يسوي حركات لبعدين..مب وقته يغار الحين.. احين هو متوله على فطيم...ويوم حس ان فطيم بتخلص سالفتها...رجع السماعه لنوره وراح الطرف الثاني من الصاله عند التلفزيون وهو يبتسم مستانس.. ونوره على طول حطت السماعه على اذنها..وسمعت فطيم.. فطيم: هههههههههههههههه..مينون والله انه هالاستاذ... كملت نوره معاها على اساس اونها سمعت السالفه كامله... نورة: ههههههههههههههههههههههاي هي والله انه خبل... وكملت سوالف معاها شوي وسكرت... والتفتت لحمدان الي قاعد يشرب شاهي ويطالع التلفزيون.. نورة: هاااااااه.؟؟ بردت الدوده..؟؟؟ حمدان: ههههههههههه... شخبارها؟؟ مرتاحه في السكن..؟؟ نورة: مب مثل راحتها هني... لكن امشيييه حالها.. اللي معاها بنت حشيييم وبنت عرب يعني ان شاء الله ماعليها خوف... حمدان: الحمد لله...هي متصله والاانتي؟ كان فعلا حمدان يحاتيها ويحاتي قعدتها مع بنات غرب.... لكن ان شاء الله انه ماعليها شر...وهي بنت لسانها اطول عنها يعني تقدر ادبر امورها...وهالشي اللي جذبه صوبها من الاساس...انها مب هينه... نورة: لالا هي متصله....مبرووووووووك فجوا الجبس عنك... حمدان: هييي..افتكيت منه..مانعني من كل شي... عيل وينهم؟؟ وين عبدالله؟ نورة: طلع العصر مع عنود.. وحصه فوق احيدها تتسبح.. حمدان: عمي مارد من عزبته... وامج.؟؟ نورة: امي سارت مع حرمه ناصر المستشفى.. حمدان: خير ان شاء الله..؟؟ نورة: هههههههههه ماشي...حامل ... حمدان: هييييييي حليلها تستاهل... نورة: هي..ناصر استانس وايد عالخبر...بسير ازقر حصه... طلعت نورة من الصاله وخلت حمدان بروحه..اللي كان يراقبها وهي تطلع ..نش من مكانه وطلع راسه من الباب وتاكد من انها ركبت فوق..طار صوب التيلفون وشاف الكاشف..اخر رقم كان رقم فطيم...مسك تيلفونه ونقل الرقم بسرعه وخزنه ورجع لمكانه في الصاله...يكمل شرب شاهي بكل برود..ولاجنه سارق شي مهم من شوي.... نزلن بعدها حصه ونوره ...سولف معاهن شوي..وروح عند راشد.. اللي قرر من عقب محايل واقناع..انه يتقبل بنت خالته كزوجه له...شرط انه يملج قبل بوقت عشان يتعرف عليها ويتقبلها...واستانس حمدان لهالخبر وهذا يعني انه راشد بيطلع حصه من باله نهائيا..صح هي طلعت من باله من زمان..بس ماكان حاب حتى انه يفكر فيها مجرد تفكير...وكونه خاطب بنت ثانيه بينشغل فيها عن التفكير بحصه... حصه من جهه ثانيه ملعوزه خليفه...طلعت لها بمنكر يديد...اون ماتبا تعرس الا يوم يرجع ناصر من المانيا...والكل يعرف انه شغله ناصر بطول وايد يمكن سنه وشي وهو مايقدر يصبر اكثر من جذي...كفايه اللي صبره من زمان... لكنه مايكون خليفه اذا سكت عنها ووافقها... كان عند عمه في الصاله يرمسه في الموضوع...والعم بو خالد اقتنع بوجهة نظر خليفه وشافها عين الصواب...ناصر يمكن شغلته اطول وحرام يعطلون الريال اكثر من جذي..كفايه ان اختها الثانيه تترياها لين ماتعرس عشان هي تعرس من بعدها.. وفوق هذا مب زين يطولون الخطبه اكثر من جذي... قام الشويبه وقال لعبدالله الي قاعد معاهم يزقر حصه..عشان يتفاهمون كلهم عالسالفه..لانه مافيه على عوار الراس ويتم مرسال بينهم يقول خليفه وتقول حصه.. دخلت حصه متردده ونظرتها خايفه.. حصه: السلام عليكم.... بو خالد+ خليفه: وعليكم السلام والرحمه... بو خالد: تعالي بنتي يلسي... عدلت حصه حجابها ويت صوب ابوها..وعبدالله من وراها سار ويلس في كرسي منفصل كانه عضو محايد.. حصه: شحالك خليفه..؟؟ خليفه: بخير حصه شحالج انتي..؟ حصه: الحمد لله... يلست حصه عدال ابوها... بو خالد: بنتي.... خليفه مستعيل عالعرس..شو قلتي.؟؟ تلفتت حصه ..تنقل نظراتها بين ويه ابوها الجامد وويه خليفه المتآمر... وعقدت حياتها.. حصه: اعرس وناصر محد ابويه..؟؟؟ بو خالد: ناصر يابنتي بيبطي في علاجه... حصه: بترياه... التفت بو خالد لخليفه..عشان يرمس...بينماخليفه عصب....بتترياه..؟؟؟ شو بعد هذي بترياه؟؟ كم يعني بتترياه لين متى..؟؟؟ خليفه: حصه تراج دلوعه الصراحه....كل مابغينا نسوي شي طلعتي بسبب واهي...ماله اي معنى... حصه: احين يوم اني ابغي اخويه يفرح بعرسي صار بلامعنى..؟؟ خليفه: اخوج بيفرح لج سواء هني موجود والا اخر الدنيا....وانتي تعرفين انه بيتاخر في المانيا... حصه: اوكي..ناصر محد .وخالد بعد محد..؟؟؟ منو بيحظر عيل من اخواني غير عبدالله..؟؟؟ منو بيزفك ياخليفه..؟؟ حصه كانت متوتره ومعصبه.... من حقها تطلب ان اخوانها يحظرون عرسها...اي بنت تبا اهلها حواليها في هاليوم...شو تسوي يعني اذا الظروف حكمت عليهم بالعكس..؟؟ خليفه: اذاعلى سالفة خالد...اقدر ادبرها لج..اي واحد من رباعه ناصر اللي حاشرينه يبون ايوونه بيسير اسبوع بيقعد معاه فيها..وخالد بيرجع يحظر العرس وبيرد لاخوه عقب...هذي بسيطه.. بو خالد: سمعيني ياحصه...ولد عمج عنده حق الصراحه... ونحن مانبا ناخر بالعرس...وانتي ماوراج شي لادراسه ولا شي...خلي عنج سوالف البنات هذي...وخلونا نحدد موعد العرس اول الصيف...بعد ماتسكر المدارس عشان اختج... حصه كانت فعلا تبا ناصر يحظر عرسها...ما تتخيل عرسها واخوانها محد خصوصا ناصر...وكانت شوي وبتصيح على هالاستبداد...عندهاوجهة نظر... حصه: بس انا جي مابستانس ابووويه.... سكت بو خالد ..وخليفه يطالع ويه حصه وهو مفوووول من العصبيه....وانجرح من الخاطر من كلامها... خليفه: مابتستانسين..؟؟؟ احين وناستج استوت بوجود اخوج عندج بس..مب بسبب زواجج مني يعني.؟؟...الصراحه ياحصه انتي اصلا ماتبيني.. شكلج الا انغصبتي علي..وعمرج مابتستانسين لانج بتستوين حرمتي...اذا ماتبيني ماعليج الا تقولين هالشي ومايصير خاطرج الا طيب... نش خليفه وهو معصب حده وطلع من الصاله ..وطلع معاه عبدالله من بعد ما اطالع حصه بنظرة تأنيب حاااره... وحصه نزلت راسها وعيونها مليانه دموع....جرحت خليفه من دون قصد....والله من دون قصد..مب هذا قصدي...بس انا ابا اخواني معاي في العرس ...طلبي وايد يعني..؟؟؟ بو خالد: زين جي زعلتي ولد عمج..؟؟ مب زين عليج ياحصه....انتي عقلج اكبر من هالسوالف...والزواج مب لعبه تمشينها على كيفج..انتي وافقتي على خليفه من دون ما حد يضغط عليج...وبما انج قبلتيه زوج لج يعني خلاص ترضين فيه بكل الحالات....ان شاء الله اهلج كلهم مايوون عرسج المهم كلمه ريلج في الاخير... قالت حصه باصرار.. حصه: اول بكلم ناصر ..وبشوفه متى بيررجع ..وبنشوف شو يصير...اسمحلي ابوويه... طلعت هي بعد من الصاله وركبت حجرتها وهي حاز فخاطرها كلام خليفه صوبها...احين انا ما اباك..؟؟؟ حرام عليك والله.... ماشفت اللي فخاطري صوبك والا ماقلت جي... خليفه جدام سيارته يسمع كلام عبدالله اللي قاعد يهديه... عبدالله: ياريال هد اعصابك.. خليفه: بوي اختك ماتباني...واضح من البدايه انها ماتباني... عبدالله: لا ماعليك الا دلع بنات... خليفه: شودلع بنات ياعبدالله.... اولا حصه مب من النوع اللي بيدلع في موضوع مثل هذا.... اول بادي تاخرت اربع ايام في التفكير اذا توافق علي او لا...وعقب يوم قلنا بنملج قالت لا مابملج الا قبل العرس بكم يوم..مشيناها لها وراعينا ظروفها...وفهمنا موقفها...احين تقولي تريا سنه والا سنتين لين ما ايي اخوي من العلاج..؟؟؟؟ مب حاله هذي... عبدالله: حصه وايد تحب ناصر انته بروحك تذكرها كيف كانت في المستشفى...وان شاء الله بتعرس في الصيف ماعليك من رمستها... خلها عليه.. خليفه: لا... انا كرامتي ماتسمحلي اخذ بنت مغصوبه علي ... عبدالله: شووووو بلاك انته ؟؟ ليش منو نحن عشان نغصب اختنا على اي شخص..حتى لو ولد عمنا... خليفه: انته ماكنت موجود اوكي..وماتعرف منو اللي غصبها علي..اكيد حد رص عليها من البدايه.. عبدالله: انا سالت...وهي بروحها خبرتني اصلا انها محد غصبها عليك وخذت راحتها بالتفكير.. خليفه: عيل تراجعت الحين... والا مابتحط بينا هالعراقيل كلها... رمس اختك بوي اذا ماتباني ترمس بنفج الخطبه بكل سهوله ... عبدالله مظايق من موقف خليفه ومن موقف حصه اكثر....وهو اكثر واحد يعرف شكثر خليفه يحب حصه ويتمناها ..ويعرف ان جرحه الحين كبير.... وفعلا حصه مبينه للكل وخصوصا لخليفه انها ماتباه ومب متشجعه على اي ارتباط معاه...ليش تسوي جي؟ مع انه يدري من سوالف عنود عن حصه وخليفه انه حصه تباه من خاطرها ومستانسه بارتباطهم... عبدالله: خلوف...حصه تباك..والله انها تباك ... السالفه مب متعقله فيك متعلقه بناصر بس.. خليفه: عيل نملج... عبدالله: وليش هي رافضه الملجه..؟؟ خليفه: اون ماريد اكرر غلطه....شفت خريط اختك عاد..؟؟؟؟...بوي ودوووها عند طبيب نفسي مب صاحيه والله... قال خليفه الجمله الاخيره بشكل مزح وهو يبتسم بسخريه...ظحك عبدالله..وصفع خليفه كف عالخفيف.. عبدالله: ههههههه لا تقول جي عن اختي... بنتفاهم معاها.. خليفه: قلت لك لا...ماريد حد يغصبها علي... بس قولها يقولج خليفه اذا ماتبينه رمسي.... عبدالله: افا...تهون عليك حصه تفج خطبتك عليها ياخلوف..؟؟؟ خليفه: ماتهون علي كرامتي ياعبدالله اني اخذ وحده ماتباني مهما كان حبي لها كبير...وهي تدري...والله انها تدري اني احبها بس جي تبا تلعب بي... ابتسم عبدالله.. وتقرب من خليفه و باسه على خده بغلاااسه.. بس عشان يغير مزاجه النكدي هذا..وهو يدري بانه خليفه مايحب حد يلمسه... وفعلا دفره خلوف بعيد بنرفزه.. خليفه: اوهوووووو لصق...بوي حرمتك فوق روح بوس فيها مافيني عليك.... عبدالله: ههههههههه خلوف حبيبي انته... غير هالمزاج ماتهون علي اشوفك جي.. خليفه: خلني اسير البيت... عبدالله: لا والله بتتعشى وياي...انا عازمنك... خليفه: ماريد عزومتك بروح البيت تعبان... عبدالله: عيل والله انته بتعزمني غصب...اركب... خليفه: ويييين تباااااااا...؟؟؟ طنشه عبدالله وركب الكوبي وسكر الباب وراه...ابتسم خليفه وهز راسه..عبدالله هذا مينون...ركب السياره وطلع هو وعبدالله من البيت... |
||
|
|
|
04-09-2006, 04:13 AM
|
رقم المشاركة : 58 | |||
|
يا حراام يا ناصر ما يستاهل والله |
|||
|
|
|
05-09-2006, 05:53 AM
|
رقم المشاركة : 59 | ||
|
|
العفو حبيبتي تامرين أمر الحين باحط الأجزاء كلللللللللها لين النهايه انشاءالله الجزء الثاني والستين...
ام خالد وحمده كانن يبن يقعدن عند ناصر اكثر من جذي...لكن ماخلووهن لانه ممنوع...فرجعن البيت من الساعه ثمان ونص... الساعه 11 رجع خالد من بوظبي وراح راسا للمستشفى...وخبر ابوه واخوانه والجماعه هناك ان الطايره الخاصه بتكون جاهزة العصر..الساعه 5... بالتالي اتصل بميره وطلب منها تجهز له شنطه للسفر وتحط فيها ثياب من كل نوع... وطلب منها تخبر حمده بعد عشان اجهز لناصر شنطه هو الثاني.. عليا طلبت من فيصل انه ايي يوديها المستشفى عشان تشوف اخوها...وتبا تيب خواتها معاها ..طبعا اصرت على هالشي اكثر من بعد ماعرفت ان ناصر بيسافر العصر...لازم يشوفونه ويسلمون عليه... بالتالي يا فيصل البيت وشل عليا وحصه المدهوشة لين الحين ونورة...اما عيال عليا وفيصل خلوهم عند فطيم.... خليفه وحمدان وسعيد وعبدالله وخالد وابو خالد وابو سلطان وحميد وبو فيصل..الكل كان موجود في المستشفى..طبعا + الربع والمعارف اللي وقفوا معاهم من البدايه وقفه يشهد لها الكل...لانهم فعلا ماقصروا...وماخلوهم رواحهم..هذاك القسم كان مليان بس من ربعهم ومعارفهم... سلطان من بعد العمليه اطمنوا على حالته...بس قالوا انه بيخلونه يومين في العنايه للمراقبه لين ماتستقر حالته وتتماثل للشفا..كان غايب عن الوعي معظم الوقت.....عشان جي يوم اييه حد من اخوانه والا اهله يشوفه ويسلم عليه ماكان يحس بهم... اما ناصر..فكان مخدر بالكامل...لكنه يوم ايييه حد يفتح عيونه ويكلمهم بكلمات بسيطه جدا على قد مايقدر..ويرجع ينام مره ثانيه...كان مدرك ان حالته خطيره...لكن مابيده شي يسويه غير الصبر.. الساعه 12 ونص.. وصلن قوم عليا مع فيصل المستشفى.. كانت حصه تمشي معاهن وهي لين اللحظه مب مستوعبه ان اخوها ناصر في العنايه...وصلوا قسم العنايه...فيصل قالهم يمشون بسرعه عسب القسم متروس رياييل..وكان يمشي جدامهن بسرعه...عليا ونوره..سرعن من خطواتهن هن بعد ولحقن فيصل...لكن حصه من شافت باب قسم العنايه....ظاعت .... وقفت مكانها وهي تراقب عليا ونورة وفيصل يبتعدون ويختفون ورا باب العناية الي تسكر وراهم... تذكرت هالمشهد...تذكرت سيف ... وكيف كان متعور ساعتها...خافت...ماتبا تشوف ناصر بنفس الحاله او اكثر...ما تتحمل تشوفه متشوه...محد خبرها ساعتها ان ناصر ظاهريا مافيه اي شي وشكله طبيعي جدا....ماكانت تدري...عقلها ماكان يستوعب اي شي...وقفت بعيد عن باب العناية...عدال الايدار...بعيد شوي عن الرياييل المتجمعين...تحس بالضياع..ومب عارفه شو تسوي... خليفه كان واقف يكلم حميد اخوه بعيد شوي عن الرياييل...حميد كان يوصيه بانه اذا صار وكلم سلطان لايخبره عن حالة ناصر..ويقوله انه بخير...لا يخبره باي شي الا يوم تكون حالته مستقره تماما ويطلع من العنايه...بعد ماخلصوا رمسه راح حميد للمصاعد ومر من عدال حصه وماعرفها...طنشها على باله حرمه من الحريم وماله خص..دخل المصعد ونزل... اماخليفه اللي كان يراقب حميد وهو رايح بذهن شارد...انتبه عالبنت...ورصص عيونه يدقق..الطول..والجسم..وحركه الايد المتوتره....حصه.!!!!!!!.... تقرب منها بتردد...خوفه انه تكون مب حصه ويتفشل...وقف بعيد وقال.. خليفه: حصه..؟!!... ارتجفت حصه والتفتت له بخوف وهي تطلع من افكارها السودا...وعرف خليفه ساعتها ان هذي حصه فعلا...وثاار شي في نفسه...شو تسوي هذي واقفه هالوقفه هني بين الرياييل..؟؟ وينهم عنها ؟؟؟..منو مخلنها هني.؟ صدق مايستحون... تقرب منها لين وقف عدالها وهي اطالعه والخوف مبين على حركاتها..طبعا مايشوف ويهها لانها متغشيه...بس واضح من حركه ايدها وارتجافها الكامل انها خايفه... قال بانفعال.. خليفه: شو تسوين واقفه هني...؟؟؟؟ اشرت حصه على باب العناية بصبع مرتجف... حصه: آآآ.... قوم عليا.....ييت مع قوم عليا... مافهم خليفه شي... وتلفت حواليه بحيره... خليفه: تبيني ادخلج..؟؟ قالت على طول بدون تردد.. حصه:...لااااااااا... استغرب خليفه....ليش ماتبا تشوف اخوها.؟!!!... خليفه: اردج البيت.؟؟؟؟ هزرت راسها.. حصه: لاااا... خليفه: عيل شو تبين..؟؟؟...مايصير توقفين هني... اخوج بيسفرونه العصر ماتبين تسلمين عليه..؟؟ حصه: بلى.... خليفه: يالله عيل بدخلج داخل... حصه: لا..ماريد ادخل.... تلفت خليفه مره ثانيه بعصبيه...وقفتهم قامت تلفت الانتباه...وعيون وايد قامت تبصبص عليهم...بينما حصه بدت تصيح توها....توها بس استوعبت ان اخوها حالته خطيره...وبيتسفر العصر...ماعرف خليفه شو يسوي..وحصه تهدد بانها تنهار باي لحظه...يزقر حد من خوانها..؟؟؟ لالا...اخاف يهزبونها... مد ايده ومسكها ايدها وسحبها وراه للمصاعد... وفتح المصعد ودخل ودخلها وراه...كان هندي بعد موجود في المصعد... وحصه بعدها تصيح ومب حاسه باي شي حواليها...وخليفه مب عارف ان اللي يسويه صح والا غلط...هو اكيد غلط...بس ماعنده حل ثاني.. حصه ماتقدر تشوف اخوها احين ...شكلها مغصوبه عالييه هني... فتح المصعد وطلع على باله حصه بتمشي وراه..بس حصه يلست على ارضيه المصعد تصيح..بينما طلع الهندي وهو يطالعها باستغراب...وخليفه حن قلبه عليها...ليش يابوها هني؟؟ حرام عليهم.. تقرب ومسك باب المصعد بايد وحده عشان مايسكر...ومد ايده لايد حصه اللي مغطيه بها ويهها.. خليفه: حصه قوومي...استهدي بالله وقومي... مطها من ايدها ووقفها وهي بعدها تصيح...وطلعها من المصعد ووداها سيارته ..وركبها بالغصب..وسكر الباب وراها وركب هو مكان السايق..ويلس هناك...يتريا نوبه حصه تخلص.. لكن مرن عشر دقايق..ويشوفها كل ما اييها تزيد... في غرفة ناصر..عليا ونورة واقفات يكلمنه ويتشكرن له بالسلامه..وفيصل خلاهن وطلع برا.. محد منهم في حالتهم ذيج انتبه انه حصه اختفت...الا يوم سال ناصر.. ناصر: وين حصه؟ مايت..؟؟ تلفتت نورة برعب... وعليا استغربت وطلعت برا تشوف...محد في الممر... نورة: مادري والله ياناصر يت ويانا لكن مادري وين سارت... وعليا في الممر شافت عبدالله واقف مع ابوه يكلمه ويشرحله للمره العاشره تفاصيل حالة ظهر ناصر.. الشايب بعده مب مستوعب حالة ولده... عليا: عبدالله..تعال شوي.. تقرب عبدالله منها.. عبدالله: عونج... عليا: عانك الله يارب...اقول..ماشفت حصه.. عبدالله عقد حياته...وتلفت.. عبدالله: يت وياكم هي؟ عليا: هي بس توني انتبهت انها مادخلت ويانا...شوفها الله يخليك.. عبدالله: بشوفها احين... رجعت عليا تدخل داخل ودخل معاها ابو خالد.. وقالت لناصر ان حصه الحين بتي.. بينما عبدالله طلع برا وماشاف حد واقف..مسك حمدان وساله.. عبدالله: حمدان ماشفت حصه...؟ حمدان: لا...شفت حريم دخلن مادخلت وياهن؟؟ عبدالله: لا مادشت ...مادريبها وين راحت حسبي الله عبليسها.. راح عبدالله يسال حد ثاني اذا شافوا بنت كانت هني...وواحد منهم قاله انه شاف خليفه يتكلم مع بنت وراح معاها بعدين.... عرف عبدالله انها حصه..ابتعد بعيد واتصل على خليفه...اللي مبتلش مب عارفه شو يسوي بحصه.. خليفه: هلا عبدالله.. عبدالله: هلا...خلوووف..حصه عندك...؟؟؟ خليفه: هي..هذيه تصيح... عبدالله: ليش مادخلت؟؟؟ خليفه: مادريبها...متروعه ادش..ماتبا تدخل وماتبا تروح البيت..مب عارف شو اسوي..سحبتها للسياره مب زين الرياييل قاموا يطالعونا... عبدالله: ماتبا تسير البيت..؟؟ خليفه: لا ماتبا... عبدالله: شو هالخريط....هاتها...خلها تسلم على اخوها.. محد بييبهاعقب... خليفه: بحاول وياها....بس خلها تهدا شوي مقطعه عمرها من الصايح... عبدالله: يوووووووه شحقه ماصاحت في البيت وخلصت.... خليفه: مادري..شكلها بس توها استوعبت...المهم خلها تهدا انته وعقب بردها فوق.. عبدالله: همممممممم خلاص اوكي..باي سكر عبدالله عن خليفه... هو واثق منه... ويدري بخليفه ريال وماتقصد اللي صار... رجع للقسم يخبر قوم عليا بهالكلام... خليفه صد على حصه اللي هدت شوي وعقت غشوتها وقامت تمش دموعها وويها بكلينكس.. خليفه: ليش تصيحين حصه..؟؟ اخوج ماعليه الا العافيه ان شاء الله.. قالت حصه وهي تشاهق... حصه: ليش...ليش عيل..بيسفروونه..؟!!. تقطع قلب خليفه عليها...اول مره يشوفها تصيح...وماتحمل.. خليفه: يابنت الحلال يحتاج تسفير..علاج برا احسن عن هني حصه... حصه: ليش عيل مابيسفرون سلطان..؟؟ خليفه: سلطان اصابته مختلفه...والحين هو بخير... حصه: ليش وين اصابة ناصر..؟ خليفه: اصابته في العمود الفقري.. ويباله علاج طبيعي.. بهت ويه حصه وهي بتاكل ويه خليفه بعيونها... انصدمت... حصه: اخويه مشلول صح..؟؟؟ مابيقدر يمشي..؟ خليفه: حرام عليج ليش تفاولين عالريال..؟؟؟.. رجعت حصه تصيح مره ثانيه لمجرد تخيلها ناصر على كرسي متحرك...وحظنت ويهها بكفوفها وهي تصيح.. تقرب خليفه..ومد ايده...شوي وكان بيحظنها..بس انتبه لنفسه... وتراجع..غلط...ماعطوني الثقه عشان اسوي هالشي....غلط...هز راسه وطرد ابليس من راسه... خليفه: حصه....حصه اطالعيني...حصه... رفعت حصه راسها وسحبت كلينكس مره ثانيه ومشت ويهها... خليفه: اخوج بيكون بخير ان شاء الله... دام الدكاتره قالوا في امل... ان شاء الله فيه امل...انا ماحيدج ظعيفه جي احيدج قويه... اكيد ناصر بيحط فخاطره اذا ماسرتي تسلمين عليه... سكتت حصه شوي وردت سالت.. حصه: متشوه.؟؟؟ استغرب خليفه سؤالها.....متشوه..!!!..هذا اللي مخوفنها وماخلاها تدخل..؟؟... خليفه: شووو..؟؟؟... لا ابدا...كانه راقد مافيه شي ابدا...يالله قومي الله يطولي بعمرج..حطي الرحمن فصدرج وادعيله...ان شاء الله بيكون بخير.. حصه: هي صح....نسيت....(ورفعت نظرها له وحاولت تبتسم) .. تستاهل سلامة اخوك... ابتسم لها خليفه ابتسامه حلوه بامتنان... خليفه: الله يسلمج يارب...يالله تغشي خلينا نسير ..عبدالله محتشر.. سمعت كلامه حصه وتغشت وطلعت...كانوا يمشون منفصلين طول الوقت...لانه حصه كانت متشجعه هالمره..فما كان بحاجه انه يسحبها...لكن يوم وصلوا قسم العنايه ترددت الخبله مره ثانيه..وهالشي اضطر خليفه انه يمسك ايدها ويسحبها غصب..لين مادخلها قسم العنايه وحصل عبدالله في الممر..وفج ايد حصه..تقرب عبدالله منهم... وهو يطالع حصه بنظرة عطوف.. عبدالله: هااا حصه...شو حالج احين.؟؟ طاحت حصه بحظن اخوها ودموعها تارسه عيونها.. عبدالله: لا تخافين...ناصر بخير ماعليه شر.... حصه: انته..بتسافر وياه..؟؟ عبدالله: لا..خالد بيسافر وياه...بس يمكن الحقهم عقب.. يالله تعالي سلمي عليه..يسال عنج.. سار عبدالله مع اخته داخل الغرفه ..وخليفه اطمن على حصه انها عند اخوانها واهلها وطلع من القسم وسار عند قوم سعيد وحمدان... حصه عقت غشوتها..وشافت ناصر..شبه مغمض..ووقفت عداله ودموعها تنزل بدون صياح...فعلا ناصر مافيه اي كدمه ..اي شمخ...مختلف كليا عن حالة سيف قبل ما.....قبل ما يتوفى.... عليا: وين كنتي انتي..؟؟؟؟ انتبه ناصر وفتح عيونه وطالع حصه..وابتسم لها..وابتسمت هي بعد.. حصه: حمدلله عالسلامه ياخوي...ماتستاهل والله... ناصر: الله يسلمج ياحصه... حصه: بتسافر اليوم العصر...تروح وترجع بالسلامه ان شاء الله... ناصر: ان شاء الله...ديروا بالكم على امايه...وحمده..وعيالي.. لا تحسسونهم اني غايب عنهم ياحصه.. حصه: عيالك فعيونا لاتحاتي...انته ماعليك الا من نفسك بس...نباك ترجع احسن من اول... ناصر: كله بايد الله... حصه: ونعم بالله ... سكت ناصر بعد ماتعب من هالحوار الصغير...وغمض عيونه مره ثانيه....وغاب في عالم مايعلمه غير رب العالمين.. بعد الغدا اللي محد اشتهى ياكله...رجعت ام خالد وحمده يسلمون على ناصر ويشوفونه قبل مايسافر... ومن بعدها وبمساعده المستشفى وسياره الاسعاف.. راحوا الجماعه كلهم لمطار دبي...والكل راح معاهم يسلم على ناصر قبل مايسافر هو وخالد...ومن بعد ماسافروا...رجع سعيد وابوه لبيتهم ..اما فيصل رجع العين لانه عليا تباتقعد عند اهلها بعدها يومين.. ورجعوا بعد اهل العين كلهم... كان عبدالله راكب مع خليفه ومعاهم حمدان.. وصلوا العين وكانت الساعه9.. والتعب ماخذ منهم كل قوه...يومين كاملات محد رقد منهم.. خليفه وصل عبدالله البيت... عبدالله: مشكوورين...انزلوا تعشوا... خليفه: مشكوور عبدالله بنسير البيت... عبدالله: لا والله احين حزه عشا..واظني العشا زاهب...والله ياتنزلون تتعشون.. سحب عبدالله الكرسي وجدمه لجدام عشان يطلع حمدان منه...لانه السياره كوبي مافيها غير باب جدامي..طلع حمدان وطلع خليفه بعد..وساروا للميلس..وعبدالله دخل البيت يخبرهم يحطون العشا... وكان فيصل و بو خالد وصلوا قبلهم...ويالسين في الميلس.. فاطمه ونورة كانن يواجن من الدريشه يوم سمعن صوت سياره.. شهقت فطيم يوم شافت ايد حمدان... قالت بصوت واطي فطيم: فديييييييييييييته... وتنهدت...باسف..على حالة حمدان.... بينما نورة ابتسمت بتعب.. نورة: تعالي نسير الصاله اشوف عبدالله ياي هالصوب ماباه يشوفنا نوايق عليهم.. دخلت نورة وفطيم الصاله عند عليا وميره وحصه وعنود... دخل عبدالله عليهن... عبدالله: السلام عليكم... الكل: وعليكم السلااااااااام.. عليا: هاا..سافروا بالسلامه.. عبدالله: هي الحمد لله...بيتصل خالد يوم بيوصلون ان شاء الله... اقول..عيال عمي في الميلس حطولنا عشا .. نورة: ان شاء الله... رد عبدالله طلع من الصاله ورجع للميلس... عليا: شكله تعباااان فديته... عنود: الا ميت من التعب بس مب رايم يرقد مب هاين عليه اخوه وولد عمه... نورة: قومي حصه..نسير المطبخ نشوف هالبقره شو مسويه عشا.. نشن البنات وسارت فاطمه معاهن ورتبن العشا وزادن عليه خفايف...وطرشنه للميلس.. من بعد العشا..رجعوا خليفه وحمدان البيت..والبقيه ساروا كلهم يرقدون وهم حيلهم منهد من عقب يوم طويل جدا... خالد اتصل بعبدالله الفجر بعد صلاة الفجر على طول..وطمنه بانهم بخير وبانه ناصر استقر في منطقة بون 2 اللي هي كلها مستوصفات صحية.. في المستشفى وبانهم حاليا يسوووله فحص شامل...وخالد عطوه غرفه مجاوره لناصر في المستشفى نفسه...بحيث مابيضطر انه يستاجر شقه...وبيكون دايما قريب من اخوه.. وبيرجع يتصل بهم بعدين ويطمنهم على نتايج الفحوصات وكل شي.. فطيم خلووها نهاية هالاسبوع في العين..بسبب ظروف العايله..واصلا الاسبوع الياي بيكون اخر اسبوع تقضيه في هالبيت لانها من بداية الاسبوع اللي بعده خلاص بتنتقل للسكن بعد مارتبت امورها مع الجامعه بس قالولها تتريا شوي عسب يفضوون لهاغرفه ويشوفون في اي سكن يحطوونها... بينما سعيد بيتولى شرح السبب لاهله وبان فطيم موكلتنه يخبرهم...خلال الاسبوع الياي... يوم الجمعه عليا وامها وخواتها + فطيم كانن قاعدات في الصاله..وكان الوقت ظهر..نزل عبدالله مع عنود وهي لابسه عباتها...وقال انهم بيسيرون عند سلطان بما انهم طلعوه من العناية الحين..... وراحوا.. سالت عليا بفضول.. عليا: على فكره ...لاحظت ايد حمدان بانها مجبسه... نورة وحصه كل وحده اطالع الثانيه بتوتر...بينما فطيم نزلت راسها للارض.. ام خالد: حادث يقول.. عليا: من متىى..؟؟ نورة: من اسبوعين جي تقريبا...او يمكن اكثر... عليا: مسكيين مايستاهل... شافت فطوم ان الوقت مناسب الحين عشان تخبر عمتها.. فطوم: على فكره عموووه...الاسبوع الياي اخر اسبوع اسكن عندكم هني.. ام خالد: ويدي.؟؟!!!...ليش يابنتي..؟؟؟... فطوم: عمووه سعيد مايباني اقعد هني بروحي بعد مايعرسن البنات..قالي السكن احسن لج وانا بعد بطول في الدراسه... ام خالد: وانتي شووو عليج هذا بيتج بعد...بتخليني ارووحي عقب مايعرسن بناتي.. فطوم: والله الود ودي ياعموه اني اسكن عندج لكن سعيد مب راضي.. ام خالد: ماعليج من سعيد انا برمسه.... ابتسمت نورة وحصه بينما فطيم حست بالخوف...ياويلي..انا شو سويت..؟؟ احين سعيد بيقول انتي شيشتي عموه عليه عشان تتوسط لج...الله يستر.. فطوم: عموووه لاترمسينه هو مصرر على رايه... ام خالد: ماعليج منه انزييين....وابووي عليه شو عليج انتي اذا يلستي فبيت عمتج...؟؟ لازم البنات يكونن موجودات يعني...مسود الويه... ظحكت نورة على رمسة امها...اول مره العيوز تسب سعيد..لانه غالي عندها....وان شاء الله يقتنع على ايدها..بس هي تدري بسعيد خلاص من يصرر على رايه مابيغيره... في المستشفى عبدالله وعنود حصلوا عند سلطان امه ام سلطان...سلموا عليها وعلى سلطان اللي كان قايم ساعتها... وبعد السلامات وغيره..مسك سلطان ايد عبدالله.. سلطان: شحاله ناصر..؟؟؟ سلطان ماكان يدري بعده انه ناصر تسفر المانيا... عبدالله: بخير...ناصر بخير..لا تحاتي.. سلطان: انا حاس انكم داسين عني شي...قولي الصدق عبدالله.. ام سلطان: ياولدي لا اتعب نفسك... سلطان: قولي الصدق... عبدالله: اسمع...ناصر..اصابته مب مثلك..ناصر اصابته في العمود الفقري..انزين...واول امس العصر سفرناه المانيا... بهت سلطان فويه عبدالله.. سلطان: كل هذا وماتخبرووني...لييييييييييش؟؟؟ عبدالله: اهدا....مابغينا نزعلك عليه الا يوم نطمن على حالتك انها استقرت اول...تباني اتصلبه عشان ترمسه.. سلطان: هي... اتصل عبدالله برقم خالد اللي مبدلنه من وصل المانيا... خالد: آآآلووو... عبدالله: هلا خاالد...شحاااااالك..؟؟ خالد: هلا والله عبدالله..بخير شحالكم انتوووا... عبدالله: الحمد لله انا يالس عند سلطان احين وهو بخير بعد ...شحاله ناصر... خالد: من شوي والله ظاهر من العمليات وراقد... عبدالله: عمليات شووووووووو..؟؟؟ ماقلت لي انه شي عمليه.. خالد: ولا انا دريت الا قبل مايدخلوونه.. عبدالله: شوفيه انزين... خالد: من بعد الفحوصات اكتشفوا انه عنده كم ظلع مكسووور...تخيل توام الحيواااان وفحصه الخام... عبدالله: لا اله الا الله.... انزييييييييين..؟؟ واحين بخير..؟ خالد: الحمد لله... عالجوا له ظلووعه وحطوله مسامير في اخر الفقرات مال الظهر..والحين راقد.. عبدالله: سلم عليه وايد..وانته شحالك مب محتاج شي ولا غيره.. خالد: لا الحمد لله انا بخير وكلنا امورنا مستقره...والاسلطان بخير.؟؟ عبدالله: هي الحمد لله... خالد: عطني ارمسه... عبدالله: اوكي.. صد عبدالله على سلطان وعطاه التيلفون.. عبدالله: هذا خالد..ناصر مايروم يرمس الحين.. اندوك كلمه.. خذ سلطان التيلفون وكلم خالد وسال عن احوالهم وخصوصا ناصر..وخذ رقمه عشان يكلمه بعدين ويكلم ناصر... |
||
|
|
|
05-09-2006, 05:56 AM
|
رقم المشاركة : 60 | ||
|
|
الجزء الثالث والستون
اليوم هو السبت... بيت محمد الكتبي امورهم انعفست من عقب طيحه سلطان في المستشفى...وناصر في المانيا..وشركه المقاولات بدون رقيب ولا حسيب.... فكر الشايب في خليفه..لكن خليفه اعتذر بسبب دوامه..مايقدر يخليه ويروح للشركه...ثانيا ماعنده توكيل عشان يمشي الامور... اما بخصوص حمدان...بروحه مسكين ايده مكسووره وفوق هذا عنده دراسه....وهالشي اضطر الششايب انه يستعيد قوته لفتره ويدير شركته بنفسه...وبينما هو قاعد يتريق قبل مايروح الشركه.. وخليفه وحمدان والعيوز معاهم....والشباب يطالعون بعض ويظحكون ظحكات مكتومه... ام سلطان: بتخبركم انتوا عاد على شو وايد مستانسين وتظاحكون.. بو سلطان: خليهم خليهم....انا ادري على شو مسخسخين هالكثر... نقع حمدان من الظحك مارام يتحمل... حمدان: عااااااااااد ابويه..قلنا انك بترجع لايام شبابك وبداوم في الشركه من اول ويديد...بس صراااااااااحه... ماله حايه يعني هالكشخه كلها والخقه.... ام سلطان: اي كشخه هذي..؟؟؟... خليفه: ماتشوفينه ريلج... الغتره والعقال على ينب مثل ايام اول..والقلم المذهب.. والمسباح....ابويه نسيت البشت... بو سلطان: عنلااااااااااااااتكم زاد....قوموا يالله سيروا دواماتكم.. خليفه: ههههههههههههههه ان شاء الله ان شاء الله.... حمدان: على فكره ابويه...ترا سلطان ولدك غير السكرتير مصطفى وحط وحده لبنانيه... ام سلطان: فذمتك.؟؟؟؟؟؟؟....افااااااا وانته شو بيسيرك عيل..؟؟؟ كانت تكلم ريلها منقهره من سالفه اللبنانيه..وخليفه ميت من الظحك... وبو سلطان يطالع ولده بنص عين مب مصدق ان سلطان يسوي هالشي...ويعرف انه يبا يمشكله...طالع عليه..لازم بيعرف حركاته... حمدان: امايه مثل مذيعات القناة اللبنانيه...تلبس لين فوق الركب... وشعرها احمر.. ام سلطان: لا والله..؟؟ مسود الويه سلطان.... اليوم تروغها يامحمد تسمعني..؟؟ رجع مصطفى...ماشي اخير عنه هالمصري...الا عيالك يدورون الضياع.. بو سلطان: يلوووووووووووت عليج هذا صدقتي عاد انتي...عالدقه امرره.... حمدان: ههههههههههههههههههههههههههههاي ... خليفه: قم قم...خل عنك الخريط احين..بتاخر على دوامي.. ام سلطان: وابوي خل اخوك يكمل جاهييييييييه...!!! خليفه: مايبا مايبا...قــــــــــم...!!! حمدان: ذليتني تراك يالدريول....!! خليفه: انا دريول...عنلاات صيرك...اقعد هني عيل خل الشايب يوصلك..فمان الله.. حمدان: لالالالالالالا دخيييييييييييلك كل شي ولا اروح ويا ابويه... مايحاسب عالمطبات ولا الاشاير بيكسرني زياده... ام سلطان: والله انك صادق...انه يوم اسير وياه العزبه طول الدرب وهو ينقزني لين سقف السياره... بو سلطان: هههههههههههههههه محد قالج تركبين وياي... حمدان: وانا اقووووووووووول ليش مخج دومه ظارب امايه .. خليفه: ههههههههههههههههههههههاي حلوه..يالله يالله نسير.. طلع حمدان مع خليفه وركبوا الكوبي وراحوا..وبعد خمس دقايق طلع وراهم بو سلطان..بينما ام سلطان راحت عند ولدها سلطان..تطمن عليه..وتقعد معاه لين عقب.. ماتقدر تروحله المسا لانه الشباب والرياييل وايد يكونون عنده يسلمون عليه.. مر الاسبوع بشكل عادي...لكن يوم الاربعاء يوم يا سعيد يشل فطيم...اللي كانت الدمعه فعيونها وهي تلم اغراضها كلهن وهي مب مستعده بعدها انها تودع هالبيت اللي عاشت فيه احلى شهور من عمرها كله... دخل سعيد البيت على طلب ام خالد...ويلس عدالها..وعبدالله في الطرف الثاني يبتسم..شكلها العيوز في خاطرها تهزب حد... سعيد: آآآآآمري ياعمووه..خير؟؟ طالبتني...!! ام خالد: انته بتخبرك...شو يااااااااينك على اختك.؟؟؟؟ رفع سعيد حواجبه مستغرب... سعيد: شو يايني عليها.؟؟ ماشي.. ام خالد: شعنه ماتباها تقعد عندي..؟؟؟ سعيد: هههههههههههه عموه..لو انتي فبيت بروحج ووياج عمي حمد..جان خليتها..لكن بيتكم ماشاء الله مايخلى...وانتي ادرى.. ام خالد: البنت حشيم وماعليها..وعيالي مثل اخوانها...ونادر ماتتلاقى وياهم..وين تباها تقعد ويا بنات الغرب في السكنات؟؟ لالالالالالا...انا خلاص ماصبر عن فطيم ..اباها عندي.. تنهد سعيد..ياهي ورطه طحنا فيها...احين شو بيفججنا من لسان العيوز...!!! سعيد: عمووه.. انتي تدرين.. عيال محمد الشباب قوم خليفه وحمدان دوم مطيحين هني...وانتي بروحج ماترظين على بناتج يطلعن حتى جدامي او يقعدن عندي فتره طويله...كيف تبيني انا ارضى على اختي..؟؟؟ ام خالد: ياولدي قلت لك البنت حشيم وماعليها.. هز سعيد راسه معاند.. سعيد: لالالالالالالا عموه..سمحيلي..ماودي اكسر كلمتج والا اني اردج فطلب ...لكن فطيم امانه عندي..وابويه موكلني عليها..لاني انا تكفلت بها...واقنعت ابويه انها تسكن هني..لانه الوضع بيريحها..وهو فعلا ريحها واستانست وياكم بس للاسف ماريحني انا..ماقدر اخلي اختي فمكان ممكن انها تصادف الغرب فيه.. بدون ماتدري..وانا ماقصد عيالج..وانتي تعرفين هالشي.. ام خالد: يابوويه فطيم مابتروم عليهن بنات السكن اخاف يلعبن بعقلها وينقص عليها...ياما سمعنا سوالفهن..اخاف عليها..خلها عندنا وانا بتكفل فيها.. سعيد: لالا عموه..ماعليها شر...السكن يمكن فيه بنات خايسات لكن فيه بعد بنات حشام وبنات عرب..وان شاء الله انها بترتاح هناك وربعها بيكونن بنات حشام..ترا شيخه درست في السكن ولاياها شي بالعكس ردت من هناك ملتزمه بدينها اكثر عن قبل...وبعدين نوره معاها في الجامعه بتنصحها وبتفهمها الامور اللي ماتعرفها...انتي لا تحاتينها..انا اسوي هالشي لمصلحتها... ام خالد: لاحول ولا قوه الا بالله...انته مثل ابوك صعب.... ظحك سعيد.. سعيد: وانتي عاد اونج امره ماخذتي منه ..!!...الا صدق عموه... متى تبونا نملج..؟؟؟ زهقت عمووه من متى وانا خاطب... عبدالله: بدييييينا عاد... سعيد: جب...انته يوم بغيت تملج محد رمس...ملجت قبل عرسك بسنه.. عبدالله: هههههههه اشتغلت الغياره...انا كان عندي ظرف... سعيد: مالي خص...ابا املج.. ام خالد: انزين انته تبا تملج..يمكن البنت ماتبا... سعيد: نوروه ماتبا...هاتيها هني وبنشوف..بقنعها لج... ام خالد: ههههههههه عين خير...شو تبا بالملجه انته الحين ؟؟ حدد اول موعد العرس عقب بنشوف سالفة الملجه.. سعيد: تبيني اعرس بعرس باجر..لكن بنتج معاوره... عبدالله: اول حصه...بعدين انتوا... سعيد: ياسلااااااااام..!!!..نحن خاطبين قبل... عبدالله: بس هم اكبر.. سعيد: عيل ماشي..نعرس رباعه... عبدالله: لا والله..؟؟؟..والزفه.؟؟؟ نزفك جدام حصه ونزفه هو جدام نوره..وكل حد يشوف حرمه الثاني ها..؟؟؟ سعيد: مب لازم ننزف جدام الحريم...عقب مايخلص العرس كل واحد يدخل على حرمته... عبدالله: مب ترتووووب... سعيد: اوص انته خلينا الترتوب لك... هاه عمووه شرايج..؟؟ ام خالد: انا بعد شو لي من الشور..؟؟ بنشوف الشايب والبنات بعد لازم نشاورهن... سعيد: لا تشاورين نوره...ادريبها بطلع لج علله وبتقنعج بالعكس...همها بس تاجل العرس ليش مادري.. عبدالله: ههههههههههه يمكن ماتباك... سعيد: ههههههه ماتباني..؟؟ قولولها تفج الخطبه عيل...انا وايد بنات يبن يخطبني.. عبدالله: ههههههههههههههههههه...بتشوف بقولها.. سعيد: لالا ..لا تقول ولا عندك خبر...نوروه خبله تصدق...مب ناقص انا... المهم عمووه استعيلوا..والله ابا اعرس.. عبدالله: ههههههه مستقطع الريال.. ام خالد: انته شو اخبار بيتك..؟؟ سعيد: يشطبون عليه...يباله شهرين ثلاثه وان شاء الله بيكون خالص... عبدالله: ماشاء الله مسوي بيت؟؟ غلبتنا يابو عسكور.. سعيد: عشان تعرف اني جاد...بس الله يعيني خسرني اللي وراي واللي دوني... عبدالله: عيل وين تبا تعرس وانته ماعندك سيوووووووله.. سعيد: افا...بتطلع السيوله جان الا حق عرسي... انته بس لاتوقف فحلجي ... عبدالله: ههههههه اوكي انا مالي خص... نورة وفطيم اللي كانن يتسمعن من ورا الباب..زعلن في البدايه على اصرار سعيد على قراره..لكن ردن ظحكن عليه يوم سمعنه مصر على العرس.. ابتعدن عن الباب وطلعن للبلكونه... نورة: شفتي اخوج السياسي...مايباني اتهنى بعرس ارووحي... فطوم: هههههههه الله يعينج عليه..احين بيتم حاط الفكره فباله... نورة: تعرفين انا اللي غلطانه لاني دخلتها فباله..بس كنت اقوله اياها بمزح.. مادريت انه بيصدق ويا راسه.. ابتسمت فطيم بحزن... فطيم: مب مصدقه اني خلاص بطلع عن هالبيت..نوروه خلاص تعودت..ماريد اروح السكن ماريد... نورة: والله حتى انا...بس شو نسوي..حكم القوي عالضعيف.. ان شاء الله انا بييج هناك دوم..وبريكاتي كلها بقضيها عندج هههههه... فطوم: غصبن عنج اصلا....ان شاء الله اطيح على بنات زينات عاد.. نورة: ان شاء الله...واذا بخصوص بعض الناس..بييبلج اخبارهم اول باول...وبقولهم يكتبولج رسايل بعد هههههههه.. فطوم: هههههههههههه هي انتي..خربيني بعد زياده... والله اتمنى...عالاقل اتصبر بهن...نورة..قولي الصدق..انتي تشوفين فيه امل بينا..؟؟ نورة: اذا صبرتي كفايه...هي .ان شاء الله... فطوم: والله خايفه اتعلق بامل يخدعني.. واتحطم اخر شي.. نورة: خلي ايمانج بالله قوي...في هالوقت انتي اهتمي بدراستج احسن شي... فطوم: ان شاء الله... في هاللحظة رن تيلفون فطيم..وكان سعيد.. سعيد: ها فطيم...؟ جاهزة؟؟ قالت فطيم باسف فطيم: احين بنسير.؟؟؟ سعيد: هي ورانا درب...يالله اجهزي.. فطيم: اوووكي.. سكرت فطيم عن سعيد وهي تبا تصيح... فطيم: احين بنسير..قومي تعالي وياي فوق ساعديني... نشن ونوره حاطه ايدها على كتوف فطيم تواسيها وهي بروحها زعلانه لانها بتروح عن بيتهم...ركبن فوق وزقرن الخدامه تنزل الشنط.. تمت شنطه صغيره شلتها فاطمه..بينما نوره حظنت الدبدوب الكبير عشان تنزله.. مرت فاطمه على صالة عنود وين كانن قاعدات عنود وحصه..وسلمت عليهن وحظنتهن كانها مابتشوفهن ابدا بعد اليوم....نزلن معاها تحت... فجت فطيم باب الصاله ووايقت..شافها سعيد... سعيد: تعالي سلمي على عمتج... دخلت فطيم مستحيه من عبدالله..لكن عبدالله نش.. عبدالله: بسير اسويلك درب... طلع عبدالله من الصاله وفطوم دخلت ولوت على عمتها... ام خالد: فديتج يابنتي والله مب هاين عليه تروحين عنا.. فطيم: ولا انا ياعموه..بس السموحه منج..لازم اسير..لكني ان شاء الله مابقطعكم.. عبدالله برا كان واقف مع عنود وحصه..كلمهن شوي وقالهن يدخلن الصاله الصغيره..عشان سعيد بيطلع.. وعقب هو بروحه طلع ووقف عدال سياره سعيد.. ونورة غافلت عبدالله ودخلت الصاله تسلم على سعيد وهي بعدها حاظنه الدبدوب العود..شافها سعيد وابتسم..مب لها..على شكلها الطفولي..بينما نورة ابتسمت بدلع.. وهي لاويه عالدبدوب من راسه والباقي منه يطلوح تحت لانه كبير وايد... نورة: شحالك سعيييييييد..؟!! سعيد: بخير نورة شحالج انتي... نورة: الحمد لله... سعيد: فطوم وهذا لازم يسير وياج وين ماتروحين..؟؟ كان ياشر على دبدوب حمدان.... فطيم: هييييييييييييه ما ستغني عنه.... سعيد: انزين..يالله خلصي سلامات ولحقيني السياره... فمان الله عموه..شي فخاطرج؟ ام خالد: سلامتك ياولدي..عن السرعه..وسلم على اهلك... سعيد: ان شاء الله..فمان الله... مشى سعيد صوب نوره وين ماكانت واقفه عدال الباب وهو يبتسم لها..وقف عدالها شوي اونه يفتح الباب.. سعيد: ياحظه هالدبدوب... ابتسمت نورة لتلميحه ونزلت عيونها.. سعيد: ابا املج...يالله عزمي عاد... هزت نوره راسها "لا" ..عنادا فيه.... سعيد: ماعليه دواج عقب... ظحكت نورة وهي بعدها منزله راسها..بينما سعيد طلع من الصاله وسار الحوش عند عبدالله جدام السياره... سولفت شوي فطوم مع عمتها وسمعت توصياتها بخصوص السكن...وسلمت عليها وطلعت مع نورة للحوش... وصلتها نوره لين السياره وهي لابسه سعيد..منقهره منه لانه معزم يشل فطوم عنهم...ماصارت غلطه غلطتها يعاقبهم كلهم بهالطريقه القاسيه... في نفس الوقت حمدان كان في البيت يالس في حجرته يدرس لامتحان باجر..يحاول يشرد من التفكير...من استوت سالفه فطوم وهو يدرس بلا قياس..بس عشان يشرد من التفكير..يدري ان سعيد حاليا متواجد في العين..وانه بيشل فطوم للشارجه ومن بعدها خلاص..مابتسكن هني...وكان يتالم لهالفكره..مايتخيل بيت عمه من دونها... صدق انه الواحد مايعرف قيمه الغالي عنده الا يوم يفارقه... من يوم حرموه من شوفه فطيم وهو يصبح ويمسي وهو يفكر فيها...وشو تسوي الحين...وشو حالتها..؟؟ ومتالمه لفكره فراقه او لا..؟؟ . قاطع تفكيره صياح التيلفون...مسكه وشاف الرقم رقم العين..رقم بيت..بس ماعرف الرقم...رد عليه.. حمدان: آآلووو.. مريم: ..اس...السلام ..عليكم.... حمدان: وعليكم السلام والرحمه... عقد حمدان حياته ماتعرف على الصوت في حالته ذيج..لانه باله كان فمكان ثاني... مريم: شحالك ؟ حمدان: بخير منو معاي..؟؟ مريم: انا مريم... حمدان: منو مريم..؟؟ مريم: ....اخت راشد... غمض حمدان عيونه منقهر....هذي وبعدين وياها..؟؟ مب كافي اللي صار بسبتها..؟؟؟ لو مب هي واتصالها ذاك جان ما اختلى بفطيم بذيج الطريقه عشان يشرحلها الي صار ..بالتالي مابيصير كل هذا...وبتكون الامور طبيعيه....لكن هي مصره تخرب حياته اكثر... سكت عنها... مريم: آآللوووو...!! حمدان: يابنت الناس شو تبين فيني..؟؟ مب كافي اللي صار بسبتج..؟؟ مريم: ليش شووو صار..؟؟ حمدان: مايهم...ليش متصله انتي الحين.؟ شو تبين ..؟؟ وبعدين يالغبيه ليش متصله من تيلفون بيتكم..؟ مريم: انا فبيت ربيعتي مب في بيتنا... حمدان: اهلا..تورطين ربيعتج بعد في الموضوع... مريم: حمدان..انا فاهمه انك ماتباني...انا بس اتصلت لاني كنت اباك لنفسي..اسفه اذا سببت لك مشاكل..اتصلت اليوم عشان اتاكد اذا خبرت راشد باي شي..؟؟؟ عن اتصالي..؟؟ حمدان: ليش شو شايفتني..؟؟؟ ولد شوارع مايعرف السنع..؟؟ مريم: ماقلت انا جي...بس...بس راشد...راشد متغير علينا من كم يوم..وانا من زود خوفي تحسبتك خبرته بشي.. فكر حمدان....هو كان لاهي عن ربعه في الفتره الاخيره بسبب حادث اخوه وولد عمه وكل المشاكل..مافتكر ينتبه لراشد وحالته....او يسال عنه.... حمدان: لا ماقلت له شي ولا بقوله بعد..اطمني...وراشد اكيد في باله موضوع ثاني مب بسببكم.. مريم: الحمد لله... حمدان:..... اوكي مع السلامه وياريت ماتتصليبي مره ثانيه بليز.. ماتريا حمدان ردها وسكر فويهها... هالبنت شو معدنها..؟؟؟... قسم بالله لو يدري راشد....بيجتلها بدون تفكير... هذا بعد شوفيه مظايق..؟؟؟ اوهووووووو ناقصين نحن مشاكل... مسك تيلفونه مره ثانيه واتصل براشد...ولاحظ بروده في الكلام بس المهم عرف انه يالس في البيت...سكر عنه واتصل بواحد من ربعه اسمه خالد... خالد: هلااااااااااااااااا بالمزاييين.... خالد هذا دوم يقول عن حمدان مزيون...يرفع معنوياته دوم.. حمدان: هلا والله خلود..شحالك؟؟ خالد: انا محظوظ لانك تلطفت عليه باتصال ...تعرف اني مغرم فيك من سنين.. حمدان: ههههههههه عنبو هالويه لك طب هالسوالف مالي مزاج... خالد: ههههههه..شخباره سلطان؟؟ وولد عمك علومهم ربهم الا بخير..؟؟ حمدان: الحمد لله سلطان بعد يومين بيطلع من المستشفى...وناصر مستقره حالته في المانيا..يعالجونه علاج طبيعي.. خالد: الله يشفيهم..درست لامتحان باجر..؟؟ حمدان: درست نص الكميه...وانته..؟؟ خالد: انا مادرست والدليل اني شارد الحين وساير العين مول..ههههههههه.. حمدان: عنلااااااااتك ...هههههههه ويا منو ساير.؟؟ خالد: ويا قوم عزووز... حمدان: اهااااا..وينك عن بيتنا؟؟ قريب والا بعيد؟؟ خالد: تباني اييك..؟؟ حمدان: ابا اسير عند راشد...خليفه محد في البيت مادريبه وين يحوط... خالد: فالك طيب..احين بييك.. خطف خالد على حمدان وشله معاه وخطفه على بيت راشد وخلاه هناك وراح العين مول... دخل حمدان الميلس وشاف راشد يالس اروحه يطالع التلفزيون... حمدان: السسسسسسسسسسسسلام عليكم... فز راشد من مكانه وسلم على حمدان.. راشد: وعليكم السلاااااااااااااااااااااااام والرحمه...هلا والله... حمدان: وشحاااااااااااالك... راشد: بخير وسهاله..علومك انته؟ ماقتلي انك بتي.. حمدان: سبرااااااااااااااااايز... راشد: هههههههههههه سكر سكر حلجك..اخاف تدخل ذبابه فيه... يلسوا عالكراسي.. حمدان: ههههههههه تتمناااه انته هالحلج... راشد: شو اتمنى فيه بالله عليك... المهم منو يابك.؟؟ حمدان: يابني خلود..وسار العين مول..متواعد ويا قوم عزوز..الهرم شارد عن الدراسه.. راشد: قول لعمرك انته بعد شارد.. حمدان: عالاقل انا درست نص الكميه...المهم انته بلاك؟؟ راشد: بلايه..؟؟ مابلايه شي..!!! حمدان: بلى فيك شي...مويم...مب مثل قبل... تنهد راشد.. راشد: مظارب ويا امي... حمدان: افااا...شو السبب... راشد: اتفقت هي وابويه..وربعت ترمس قوم خالي..عشان تخطبلي بنتهم... حمدان: مبرووووووووووووووووووووك... اطالعه راشد بعصبيه... راشد: عنبو هالويه لك....اقولك من دون شوري تقولي مبروك.؟؟ تشوفني انطنط من الفرحه يعني.؟؟؟ حمدان: هههههههههه ياريال هد اعصابك...الا رمسه حريم هي ماشي رسمي... راشد: اللي قاهرني انه مب رمسه حريم....ابويه رمس خالي على طول والبنت موافقه ... حمدان: هممممممممممم... وانته حاط وحده ثانيه فبالك..؟؟ راشد: لا..بس قايلك من قبل ماريد من العايله.. حمدان: شو بلاها البنت..؟؟؟ راشد: مافيها شي بالعكس الكل يمدح فيها من كل النواحي... حمدان: والله انك بطراااااااان...حد محصل بنت زينه ومن اهله ويرفض..؟؟؟ راشد: انا ماريد من اهلي..مااااااااااااااااااريد من اهلي ياناس.. حمدان: راشد عن الدلع...اهلك يبون مصلحتك ويمكن هالبنت اللي الله كاتبنها لك ..وان شاء الله بترتاح معاها... راشد: بالله عليك فيه عرس..طرف من اطرافه مغصوووب على هالعرس..ويستانسون بحياتهم..؟؟؟ حمدان: فيه وايد..احيانا الطرفين مغصووبين عالعرس وبعد يستانسون...انته بس وكل ربك.. راشد: لا اله الا الله.... بس انا مب مرتاح ياحمدان...احس انهم غشووووني... حمدان: تشوفها انته البنت.؟؟ راشد: لا ماشفتها الا يوم هي صغيره من عدها مادري كيف شكلها...ولااعرف شي عنها غير عنها تدرس بالجامعه ويا اختي... توتر حمدان من طاري هالاخت اللي وين مايسير يحصلها بدربه... حمدان: انزين عيل كيف تحكم عليها وانته ماتعرف شي عنها...خلاص دامهم خطبوها لك حاول تتعرف على هالخطيبه يمكن تعيبك...واذا ما اتفقت معاها فجوا الخطبه بكل سهوله... راشد: جي وين عايشين نحن؟؟ فمصر.؟؟؟ تعرف عليها اون... احين اكثر بيدسووونها عني وبيرفضون اي احتكاك لي معاها.. تعرفهم انته كيف.. حمدان: هههههههههه املج انزين وبتتعرف عليها... راشد: هي ويطيح الفاس بالراس... عقب مايستوي فج خطبه يستوي طلاق... حمدان: الله لا قاله ياريال شحقه تفاول على عمرك.. راشد: ماباها...ابا اخذ على مزاجي.... حمدان: قسم بالله انتوا عيال هالجيل خراطين... راشد: لا تخليني ادعي عليك ان امك تخطبلك وحده عمرك ماشفتها وتبتلش فيها عشان تحس... حمدان: لالالالالالالالالالالالالا دخيلك ..دخيل والديك لا تدعي علي بروحي مب ناقص مشاكل.. مر شهر على الحادث... والكل استقرت امووووره... فطيم.. استقرت في السكن والحمد لله طلعت البنت اللي معاها بنت عرب وحشيم..تعرفت عليها فطيم وحبتها.. لكنها واجهت صعوبه في البدايه خصوصا بالنوم...مب قادره تستوعب المكان اللي هي فيه..لكنها شوي شوي تاقلمت..وكانت نورة تزورها يوميا وتيبلها كل الاخبار والعلوم مهما كانت تافهه...واذا صار وكان حمدان يالس في الصاله عندهم يسولف.تربع تتصل بفطيم وتسوي عمرها تكلم ربيعتها وتسمعها صوت حمدان وهو يتكلم مع حصه او مع الشايب او اين كان...المهم صوته وسوالفه..وكانت فطيم وايد تستانس من هالحركه... وتتصبر شوي..على فراق حمدان... نورة كانت الايميلات بينها وبين سعيد شغاله خصوصا انه قلل زياراته بسبب فطوم الي في السكن..وماعنده اعذار وايد يسير العين..فكان مشغول بالتشييك على بيته المستقبلي.. وحياته روتينيه.. اما نوره كانت مخلصه امتحاناتها المنتصف...ونجحت فيهن كلهن ويابت علامات حلوه... حصه... كانت دايما مع عنود..مستانسه بانها انتقلت عندهم في البيت...وجود عنود في البيت ساعد حصه على فهم شخصيه خليفه بشكل اكبر...لانه عنود دايما تتكلم عنه...وحصه بعد يوم يصيرلها موقف مع خليفه او تشوفه تخبر عنود بهالشي وتبدا عاد سوالفهن عنه... اما بخصوص خليفه.. فكان ماشاء الله عليه يدخر جزء من معاشه عشان يكون له راس مال بنفسه..ويساعده وقت ما ينوي العرس..وكان دايما يسير بيت عمه وكل مايسير يصادف حصه...زاد حبه لهالبنت بشكل غير طبيعي...هداوتها ونعومتها تخبلبه...صدق هذي اللي يسمونها بنوته ... كان منقهر من قرارها بتاخير الملجه من الخاطر لانه يبا يتقرب منها...مازال يحس بانه حصه مب متقبلتنه كزوج..مايحس انها تحبه كفايه... عبدالله وعنود....سمنه على عسل.... ناصر وخالد في الغربه.... خالد ماكان مقصر مع اخوه ابدا...ناصر كان متابع للعلاج الطبيعي... طبعا يتريون فقرات الظهر يرجعن مثل كانن ويقون شوي قبل مايشيلون المسامير بعمليه ثانيه له... اتصالات الاهل وزوجته له وعيال عمه وربعه محد كان مقصر فيه... وخصوصا سلطان اللي من طلع من المستشفى وتشافى كليا..حجز تذكره لالمانيا وقعد مع ولد عمه اسبوعين...وبعدها رجع عسب الشركه... لكنه ما اطمن الا يوم سارله بنفسه وشافه واطمن على حالته المستقره .... حمدان...راح المستشفى وفجوا الجبس عن ايده..وحطوا بدالها ربطه بسيطه عشان تشد العظم لا غير...وصار يقدر واخيييييييرا انه يسوق بنفسه ... وصار يقدر يروح ويرد بروحه متى مايبغي... حمدان مثل الطير...حرر..ويحب يتحرك بحريه وبمزاجه... مايحب ينحبس او يعتمد على احد بتنقلاته اللي ماتخلص... واول ماسار سار لبيت عمه...وكان الوقت المغرب...دخل الميلس ماحصل حد فيه....سياره عبدالله محد..وشكله محد في البيت من الرياييل..لانه حتى سياره عمه البيك اب اللي يسيربها العزبه محد...دخل البيت ومن بعده الصاله وشاف نوره يالسه بروحها ترمس في التيلفون..دخل وسلم بصوت واطي يالله ينسمع ..عشان مايزعجها..ردت عليه هي بعد السلام بصوت واطي وايد... حمدان: وينهم عيل..؟؟ اشرت نوره بصبعها لفوق...كانها تقوله انهم فوق... عقد حمدان حياته واشر لها بايده .. " منو تكلمين"... حركت نوره شفايفها وهي تبتسم وتقوله "فطوم"... انتفض قلب حمدان من مكانه...صح انها مارمست بصوت عالي بس فهم حمدان انها تكلم فطوم...الشيخه فاطمه..حبيبة القلب والروح... بدون حاسيه مد ايده وسحب السماعه من اذن نوره وحطها على اذنه...واول ماسمع صوت فطوم غمض عينه وتساند عالايدار اللي وراه..وايده وحده فمخباه...كان وايد متاثر بصوتها....متوله عليه شكثر... ونوره اطالعه وتبتسم ..وخلته ياخذ السماعه لانه كسر خاطرها..من متى ماسمع او شاف او عرف اي شي عن فطوم.. اكيد متوله عليها وايد وهالشي واضح من ويهه وتاثره بصوتها... كانت فطيم ترمس وتقول سالفه لنوره عن استاذها الكمبيوتر اللي يسوي حركات..وهي كل شوي تظحك وهي تكمل سالفتها..وحمدان عاظ على شفايفه ويظحك معاها بصوت مكتوم...مستمتع بصوتها حاليا..واجل الغيره اللي بيحس فيها بسبب استاذ الكمبيوتر مال فطيم اللي يسوي حركات لبعدين..مب وقته يغار الحين.. احين هو متوله على فطيم...ويوم حس ان فطيم بتخلص سالفتها...رجع السماعه لنوره وراح الطرف الثاني من الصاله عند التلفزيون وهو يبتسم مستانس.. ونوره على طول حطت السماعه على اذنها..وسمعت فطيم.. فطيم: هههههههههههههههه..مينون والله انه هالاستاذ... كملت نوره معاها على اساس اونها سمعت السالفه كامله... نورة: ههههههههههههههههههههههاي هي والله انه خبل... وكملت سوالف معاها شوي وسكرت... والتفتت لحمدان الي قاعد يشرب شاهي ويطالع التلفزيون.. نورة: هاااااااه.؟؟ بردت الدوده..؟؟؟ حمدان: ههههههههههه... شخبارها؟؟ مرتاحه في السكن..؟؟ نورة: مب مثل راحتها هني... لكن امشيييه حالها.. اللي معاها بنت حشيييم وبنت عرب يعني ان شاء الله ماعليها خوف... حمدان: الحمد لله...هي متصله والاانتي؟ كان فعلا حمدان يحاتيها ويحاتي قعدتها مع بنات غرب.... لكن ان شاء الله انه ماعليها شر...وهي بنت لسانها اطول عنها يعني تقدر ادبر امورها...وهالشي اللي جذبه صوبها من الاساس...انها مب هينه... نورة: لالا هي متصله....مبرووووووووك فجوا الجبس عنك... حمدان: هييي..افتكيت منه..مانعني من كل شي... عيل وينهم؟؟ وين عبدالله؟ نورة: طلع العصر مع عنود.. وحصه فوق احيدها تتسبح.. حمدان: عمي مارد من عزبته... وامج.؟؟ نورة: امي سارت مع حرمه ناصر المستشفى.. حمدان: خير ان شاء الله..؟؟ نورة: هههههههههه ماشي...حامل ... حمدان: هييييييي حليلها تستاهل... نورة: هي..ناصر استانس وايد عالخبر...بسير ازقر حصه... طلعت نورة من الصاله وخلت حمدان بروحه..اللي كان يراقبها وهي تطلع ..نش من مكانه وطلع راسه من الباب وتاكد من انها ركبت فوق..طار صوب التيلفون وشاف الكاشف..اخر رقم كان رقم فطيم...مسك تيلفونه ونقل الرقم بسرعه وخزنه ورجع لمكانه في الصاله...يكمل شرب شاهي بكل برود..ولاجنه سارق شي مهم من شوي.... نزلن بعدها حصه ونوره ...سولف معاهن شوي..وروح عند راشد.. اللي قرر من عقب محايل واقناع..انه يتقبل بنت خالته كزوجه له...شرط انه يملج قبل بوقت عشان يتعرف عليها ويتقبلها...واستانس حمدان لهالخبر وهذا يعني انه راشد بيطلع حصه من باله نهائيا..صح هي طلعت من باله من زمان..بس ماكان حاب حتى انه يفكر فيها مجرد تفكير...وكونه خاطب بنت ثانيه بينشغل فيها عن التفكير بحصه... حصه من جهه ثانيه ملعوزه خليفه...طلعت لها بمنكر يديد...اون ماتبا تعرس الا يوم يرجع ناصر من المانيا...والكل يعرف انه شغله ناصر بطول وايد يمكن سنه وشي وهو مايقدر يصبر اكثر من جذي...كفايه اللي صبره من زمان... لكنه مايكون خليفه اذا سكت عنها ووافقها... كان عند عمه في الصاله يرمسه في الموضوع...والعم بو خالد اقتنع بوجهة نظر خليفه وشافها عين الصواب...ناصر يمكن شغلته اطول وحرام يعطلون الريال اكثر من جذي..كفايه ان اختها الثانيه تترياها لين ماتعرس عشان هي تعرس من بعدها.. وفوق هذا مب زين يطولون الخطبه اكثر من جذي... قام الشويبه وقال لعبدالله الي قاعد معاهم يزقر حصه..عشان يتفاهمون كلهم عالسالفه..لانه مافيه على عوار الراس ويتم مرسال بينهم يقول خليفه وتقول حصه.. دخلت حصه متردده ونظرتها خايفه.. حصه: السلام عليكم.... بو خالد+ خليفه: وعليكم السلام والرحمه... بو خالد: تعالي بنتي يلسي... عدلت حصه حجابها ويت صوب ابوها..وعبدالله من وراها سار ويلس في كرسي منفصل كانه عضو محايد.. حصه: شحالك خليفه..؟؟ خليفه: بخير حصه شحالج انتي..؟ حصه: الحمد لله... يلست حصه عدال ابوها... بو خالد: بنتي.... خليفه مستعيل عالعرس..شو قلتي.؟؟ تلفتت حصه ..تنقل نظراتها بين ويه ابوها الجامد وويه خليفه المتآمر... وعقدت حياتها.. حصه: اعرس وناصر محد ابويه..؟؟؟ بو خالد: ناصر يابنتي بيبطي في علاجه... حصه: بترياه... التفت بو خالد لخليفه..عشان يرمس...بينماخليفه عصب....بتترياه..؟؟؟ شو بعد هذي بترياه؟؟ كم يعني بتترياه لين متى..؟؟؟ خليفه: حصه تراج دلوعه الصراحه....كل مابغينا نسوي شي طلعتي بسبب واهي...ماله اي معنى... حصه: احين يوم اني ابغي اخويه يفرح بعرسي صار بلامعنى..؟؟ خليفه: اخوج بيفرح لج سواء هني موجود والا اخر الدنيا....وانتي تعرفين انه بيتاخر في المانيا... حصه: اوكي..ناصر محد .وخالد بعد محد..؟؟؟ منو بيحظر عيل من اخواني غير عبدالله..؟؟؟ منو بيزفك ياخليفه..؟؟ حصه كانت متوتره ومعصبه.... من حقها تطلب ان اخوانها يحظرون عرسها...اي بنت تبا اهلها حواليها في هاليوم...شو تسوي يعني اذا الظروف حكمت عليهم بالعكس..؟؟ خليفه: اذاعلى سالفة خالد...اقدر ادبرها لج..اي واحد من رباعه ناصر اللي حاشرينه يبون ايوونه بيسير اسبوع بيقعد معاه فيها..وخالد بيرجع يحظر العرس وبيرد لاخوه عقب...هذي بسيطه.. بو خالد: سمعيني ياحصه...ولد عمج عنده حق الصراحه... ونحن مانبا ناخر بالعرس...وانتي ماوراج شي لادراسه ولا شي...خلي عنج سوالف البنات هذي...وخلونا نحدد موعد العرس اول الصيف...بعد ماتسكر المدارس عشان اختج... حصه كانت فعلا تبا ناصر يحظر عرسها...ما تتخيل عرسها واخوانها محد خصوصا ناصر...وكانت شوي وبتصيح على هالاستبداد...عندهاوجهة نظر... حصه: بس انا جي مابستانس ابووويه.... سكت بو خالد ..وخليفه يطالع ويه حصه وهو مفوووول من العصبيه....وانجرح من الخاطر من كلامها... خليفه: مابتستانسين..؟؟؟ احين وناستج استوت بوجود اخوج عندج بس..مب بسبب زواجج مني يعني.؟؟...الصراحه ياحصه انتي اصلا ماتبيني.. شكلج الا انغصبتي علي..وعمرج مابتستانسين لانج بتستوين حرمتي...اذا ماتبيني ماعليج الا تقولين هالشي ومايصير خاطرج الا طيب... نش خليفه وهو معصب حده وطلع من الصاله ..وطلع معاه عبدالله من بعد ما اطالع حصه بنظرة تأنيب حاااره... وحصه نزلت راسها وعيونها مليانه دموع....جرحت خليفه من دون قصد....والله من دون قصد..مب هذا قصدي...بس انا ابا اخواني معاي في العرس ...طلبي وايد يعني..؟؟؟ بو خالد: زين جي زعلتي ولد عمج..؟؟ مب زين عليج ياحصه....انتي عقلج اكبر من هالسوالف...والزواج مب لعبه تمشينها على كيفج..انتي وافقتي على خليفه من دون ما حد يضغط عليج...وبما انج قبلتيه زوج لج يعني خلاص ترضين فيه بكل الحالات....ان شاء الله اهلج كلهم مايوون عرسج المهم كلمه ريلج في الاخير... قالت حصه باصرار.. حصه: اول بكلم ناصر ..وبشوفه متى بيررجع ..وبنشوف شو يصير...اسمحلي ابوويه... طلعت هي بعد من الصاله وركبت حجرتها وهي حاز فخاطرها كلام خليفه صوبها...احين انا ما اباك..؟؟؟ حرام عليك والله.... ماشفت اللي فخاطري صوبك والا ماقلت جي... خليفه جدام سيارته يسمع كلام عبدالله اللي قاعد يهديه... عبدالله: ياريال هد اعصابك.. خليفه: بوي اختك ماتباني...واضح من البدايه انها ماتباني... عبدالله: لا ماعليك الا دلع بنات... خليفه: شودلع بنات ياعبدالله.... اولا حصه مب من النوع اللي بيدلع في موضوع مثل هذا.... اول بادي تاخرت اربع ايام في التفكير اذا توافق علي او لا...وعقب يوم قلنا بنملج قالت لا مابملج الا قبل العرس بكم يوم..مشيناها لها وراعينا ظروفها...وفهمنا موقفها...احين تقولي تريا سنه والا سنتين لين ما ايي اخوي من العلاج..؟؟؟؟ مب حاله هذي... عبدالله: حصه وايد تحب ناصر انته بروحك تذكرها كيف كانت في المستشفى...وان شاء الله بتعرس في الصيف ماعليك من رمستها... خلها عليه.. خليفه: لا... انا كرامتي ماتسمحلي اخذ بنت مغصوبه علي ... عبدالله: شووووو بلاك انته ؟؟ ليش منو نحن عشان نغصب اختنا على اي شخص..حتى لو ولد عمنا... خليفه: انته ماكنت موجود اوكي..وماتعرف منو اللي غصبها علي..اكيد حد رص عليها من البدايه.. عبدالله: انا سالت...وهي بروحها خبرتني اصلا انها محد غصبها عليك وخذت راحتها بالتفكير.. خليفه: عيل تراجعت الحين... والا مابتحط بينا هالعراقيل كلها... رمس اختك بوي اذا ماتباني ترمس بنفج الخطبه بكل سهوله ... عبدالله مظايق من موقف خليفه ومن موقف حصه اكثر....وهو اكثر واحد يعرف شكثر خليفه يحب حصه ويتمناها ..ويعرف ان جرحه الحين كبير.... وفعلا حصه مبينه للكل وخصوصا لخليفه انها ماتباه ومب متشجعه على اي ارتباط معاه...ليش تسوي جي؟ مع انه يدري من سوالف عنود عن حصه وخليفه انه حصه تباه من خاطرها ومستانسه بارتباطهم... عبدالله: خلوف...حصه تباك..والله انها تباك ... السالفه مب متعقله فيك متعلقه بناصر بس.. خليفه: عيل نملج... عبدالله: وليش هي رافضه الملجه..؟؟ خليفه: اون ماريد اكرر غلطه....شفت خريط اختك عاد..؟؟؟؟...بوي ودوووها عند طبيب نفسي مب صاحيه والله... قال خليفه الجمله الاخيره بشكل مزح وهو يبتسم بسخريه...ظحك عبدالله..وصفع خليفه كف عالخفيف.. عبدالله: ههههههه لا تقول جي عن اختي... بنتفاهم معاها.. خليفه: قلت لك لا...ماريد حد يغصبها علي... بس قولها يقولج خليفه اذا ماتبينه رمسي.... عبدالله: افا...تهون عليك حصه تفج خطبتك عليها ياخلوف..؟؟؟ خليفه: ماتهون علي كرامتي ياعبدالله اني اخذ وحده ماتباني مهما كان حبي لها كبير...وهي تدري...والله انها تدري اني احبها بس جي تبا تلعب بي... ابتسم عبدالله.. وتقرب من خليفه و باسه على خده بغلاااسه.. بس عشان يغير مزاجه النكدي هذا..وهو يدري بانه خليفه مايحب حد يلمسه... وفعلا دفره خلوف بعيد بنرفزه.. خليفه: اوهوووووو لصق...بوي حرمتك فوق روح بوس فيها مافيني عليك.... عبدالله: ههههههههه خلوف حبيبي انته... غير هالمزاج ماتهون علي اشوفك جي.. خليفه: خلني اسير البيت... عبدالله: لا والله بتتعشى وياي...انا عازمنك... خليفه: ماريد عزومتك بروح البيت تعبان... عبدالله: عيل والله انته بتعزمني غصب...اركب... خليفه: ويييين تباااااااا...؟؟؟ طنشه عبدالله وركب الكوبي وسكر الباب وراه...ابتسم خليفه وهز راسه..عبدالله هذا مينون...ركب السياره وطلع هو وعبدالله من البيت... |
||
|
|
 |
| مواقع النشر (المفضلة) |
| الذين يشاهدون محتوى الموضوع الآن : 3 ( الأعضاء 0 والزوار 3) | |
|
|
