من بغى للمحاور ينزل الملعبه

[الطائر المهاجر]

الجسر جنب بيتك عارفٍ مدربه = والشويب ببيته في صلاة العتيم
وين هذا لهذا فكرتك مهربه = لاتجرب حلاقه في رويس اليتيم

[نجم الإبداع]

ضربتك بالقوافي ياخوي معطبه = ويل من طب بين ايديك يغدي اديم
خابرك مير كلٌ شرفه مذهبه = مارزحنا ونجم الليل خلف السديم

[الطائر المهاجر]

كان تبغى السوالف ياهلا ومرحبه = خذ علومٍ وخبره وخل قلبك سليم
للاناثي صنوف وكل صنف اعربه = بين سمرا وشقرا او ذهب يالزعيم

[نجم الإبداع]

كل تاجر يحسب حيل في مكسبه = من هبط سوق لايصدر بغير الصريم
وانت سوق المعارف عالي المرتبه = من يلامس حروفك صار كنه فطيم

[الطائر المهاجر]

كان تبغى الدفى فالسمر لك مصحبه = في الشتاء تتقي بردٍ يهاجم لئيم
وان بغيته تصيف فاطلب مربربه = في بياض الثلوج وخل قلبك رحيم

[نجم الإبداع]

خابر السمر ريحتهن تقول اخشبه = والمربرب يموت الحيل قبل النهيم
حي لي راعيه للضان فيها الهَّبـــه = تتحمل طلوع اخليص واليوم هيم

[الطائر المهاجر]

ماعرفت العلوم وخبرتك كركبه = كان هذا مرادك فاطلبه يالرضيم
الفصول اربعه والعلم ما تطلبه = ليش ربي خلقهن باختلافٍ جسيم

[نجم الإبداع]

اهب ياعود واثرك مار بالتجربه = ماتخاف القبس وعذاب ذاك الحطيم
قصدنا بالحلال ومانبي العقربه = يمكن انحد للمسيار لو بت قيم

[الطائر المهاجر]

كل شي بحلال وفاهم مذهبه = ماعرفت الحرام ولا نويت الجحيم
من يقابل وحيده بالعصى ترطبه = ايتساوى معاها في حصاد الهشيم

[نجم الإبداع]

فاهمك ! يامعلمنا وذا مشتبه = فيه قانون مايسمح وحكمه مليم
حرّموا الرق هذا حق من يسـلبه = والمتعه حرمت من عند ربٍ حكيم