15-07-2006, 02:59 PM
|
رقم المشاركة : 21 | |||
|
نونااا |
|||
|
|
16-07-2006, 01:46 PM
|
رقم المشاركة : 22 | ||
|
|
مشكوووووووووورة الريم على مرورك ولايهمك كل يوم ننزل جزء انت بس آمري الجزء الثاني عشر..
يوم الخميس الساعه 10 الصبح.. دخلت حصه الصالة وحصلت امها وخالها وحرمه خالها وعليا ووياها هلال الصغيرة وسلامه... سلمت عليهم كلهم ويلست حذال امها... ام فيصل كانت تتكلم في التيلفون مع اختها... والباقي يسولفون ويتريقون رباعه.. عليا: حصه اصبلج شاهي.؟ حصه: خلي عنج بصب ارووحي... بعد ماصبت لها شاهي .. حصه: امايه وين عبدالله؟ ام خالد: في الميلس يتريق ويا سعيد وفيصل... حصه: متى تبينا نسير؟..الساعه عشر احين..هبابنا نخلص.. عليا: وين بتسيرون؟ ام خالد: اختج تبا تتشرا قطع حق فستان تخرجها.. عليا: هييي..زين والله....من وين بتشترين؟ حصه: بسير مركز المنال..يمكن احصل شي حلوو.. عليا: نورة بتسير وياكم؟ حصه: والله مادريبها... هااا امايه اسير البس عباتي والا بعدج؟ ام خالد: لا لا..قومي لبسي عباتج وهاتي عباتي وياج... في هاللحظه سكرت ام فيصل عن اختها...وسمعتهم يطرون السيرة.. ام فيصل: ويدي..!!!.. وين بسييرووون؟ ام خالد: بنسير السوق ام فيصل.. بودي حصه تتشرا قطع.. ام فيصل: لااااه..؟ شقايل انتي بتسيرين واختي يايتنج...سمعت انج في الشارجه قالت يايتنكم في الطريج.. ام خالد: حلييلها ام خوله من زمااان عنها والله... خلاص عيل بنترياها... بطلت حصه عيونها ولصقت في امها تصاصرها... حصه: اماااااااايه...شو هذا بعد بنترياها.؟؟؟ ماشي وقت.. لاتسوين هالحركات فيني احين... ام خالد: يابنتي فظيحه نجفي بالحرمه يايه تزورنا ونحن نروح عنها... حصه: والحل يعني؟؟ مااسير؟ ام خالد: سيري انتي واخوج وانا بعطيج فلوس عشان تشترين اللي تبينه... حصه: هييي اذا جي اووكي...يالله اتصلي بعبدالله وخبريه.. في هاللحظه دخلت نوره معاها فاطمه والبنات منى ومنال.. نورة : السسسلام عليكم جميعاااا... الكل: وعليكم السلام.. يت نورة ووايهت علىامها وحبت خالها على راسه..ويلست عداله... نورة تمووت في خالها هلال...ويعيبها تسمع سوالفه... نورة: شحالك خاااالي؟؟..شو اصبحت؟ بو فيصل: بخير بنتي ..شحالج انتي؟ نورة: الحمد لله...(وصدت صوب حصه) حصووه سمعتج تقولين خبري عبدالله..شو تخبره؟ شوفيكم؟ حصه: ماشي امايه مابتسير ويايه ..بسير انا وعبدالله بس... نورة: اهاااااااااااااااا زين والله... فاطمه: وين بتسيرين حصه؟ حصه: بسير اشتري قطعه لفستان التخرج.. فاطمه بطلت عيونها وشافتها فرررصه.. فاطمه: حللللللللفي؟؟... ( وصدت صوب ابووها) ابوووووووووويه..فديتك انا بسير وياهم..؟ بو فيصل: شو عندج من الشغل تسيرين؟؟!!..والا بس هوامه..!! فاطمه: لا والله ابوويه . جي انا بعد ماشريت قطعه لفستان تخرجي.. بيسوون حفله في مدرستنا والبنات بيتكشخن وانا بعدني مافصلت لي شي...باخذلي قطعه كاشخه بس بسيطه..فديت رووحك انا.. بو فيصل: وقته هذا انتي بعد؟؟؟ وين بتتلصقين وياهم؟...بنت عمتج اخووها بيوديها... فاطمه: ابويه سعيييد بيوديني وياهم.... دخيلك لا تقول لا... مابتصيرلي فرصه حد يوديني عقب... بو فيصل: زين فكينا من حشرتج... ام فيصل عطيها بيزات هذي سدي حلجها... فاطمه: فديييييييييييتك انا يعلني ماخلى منك ياربي... وهوت على راس ابوها وحبته... فاطمه: نورة تعالي ويانا... ام خالد: لالا ..مالها حايه ماتسير... نورة: فطوم امبوونه انا مالي بارض عالسووق والمشي..خليني يالسه ابركلي... ام فيصل: سيري حجرتي بتحصلين البوك في التواليت.. خذيلج بيزات ... فاطمه: ان شاء الله امايه... حصه: انا بعد بسير اتلبس... امايه اتصلي بعبدالله خبريييه... ام خالد: احين بتصلبه.. الشباب في الميلس عبدالله وسعيد بعد ماترخص عنهم فيصل وسار يودي سيارته الوكاله... دق تيلفون عبدالله ورد عليه.. عبدالله: مررررررررحبا العيووز ام خالد: هلا ابووويه...يالسين في الميلس؟ عبدالله: هي نعم...شو فخاطرج؟ ام خالد: اباك تودي اختك السوووق.. عبدالله: وانتي؟ ام خالد: انا حرمه بتي تسلم عليه ماروم اجفييبها...وفاطمه بعد تبا تسير وياكم.. عبدالله: حياها الله... ام خالد: لا خالك يقول يوديها سعيد وياكم... عبدالله ظحك وهو يطالع سعيد..وقاله " ورطووك ويانا انته بعد" ... عبدالله: خلاص تمام امايه خليها تجهز انا هني بترياها.. ام خالد: خلاص ابوويه..الله يحفظك .. وهاا عن لخبال انته وسعيد ويا البنات.. عبدالله: افا عليج امايه..شو يهاال نحن؟ ام خالد: محشووم ياولدي بس اوصيك ... عبدالله: لا توصين حريص... يالله فمان الله ام خالد: مع السلامه . سكر عبدالله تيلفونه .. سعيد: شو بلاها عموه...؟ عبدالله: ماشي..توصي.. تباني اودي حصه السوق..واختك بعد تبا تسير عشان جي قال خالي لازم تي انته ويانا بعد.. سعيد: منو من خواتي؟ عبدالله: فاطمه.. سعيد: ييييييييييييييييييه يا هذي... يبالها ظرب عن هالسوق... عبدالله: خللها برايها دامها وياك ماعليها شر... وبعدين صراحه ابا اغير جوو انا وماريد اسير اروحي ويا حصووه.. سعيد: همممم مب مشكله...واحين وينهن هن؟ عبدالله: بيتلبسن عبيهن وبيين.... وبعد دقايق طلعوا الاربعه فسياره سعيد صوب دبي..وسعيد متحسف لان نورة مب وياهم.. وفي البيت وصلت اخت ام فيصل " ام خوله" وطبعا وياها بنتها خوله... دخلن الصالة وسلمن على الموجودين ( ام فيصل وام خالد ونورة وعليا وعيالها وشيخه ومنى ومنال) .. نورة من زمااان ماشافت خوله..وما اندمجت وياها وايد ..واللي تعرفه عنها اشياء بسيطه...وبعد السلامات يلست خوله عدال نورة.. خوله: شحالج يانوورة..؟ وين من زماااان ماشفنااج.. نورة: والله شو نسوي نحن بعد بالغصب نحصل فرصه وني الشارجه..شخبارج انتي؟ شو دخلتي من الجامعات؟ خوله: جامعة الشارجه.. نورة: هيي ياحيج والله...ما انخطبتي؟ خوله: ههههههههههه لا ..اترياهم يعزموووون...والا انا واثقه.. استغربت نورة من كلام خوله ... نورة: ههههههههه شو هاي بعد اترياهم يعزمون؟ يعني انخطبتي والا لا؟ خوله: همممممم رسميا لا....بس احس انه بيستوي قريب.. خوله من النوع الواثق من نفسه بغروور..كانت تفكر ساعتها بسعيد وهي تشوف نفسها الانسب له وانه بيخطبها قريب لا محاله.... وخصوصا بعد الموقف الاخير اللي اعتبرته ارضاءا لغرورها..انه غيييره من قبل سعيد عليها...ونورة مسكينه على نياتها ماعرفت شو تقصد وماحبت تدخل... نورة: هيي..ماشاء الله..بالبركه عيل.. الله يوفقج. خوله: الجميع ان شاء الله...اقولج..نسير حجرة فطيم..ابا ابدل عباتي والبس شيلة بيظا... نورة: يالله.. سارت نوره مع خوله فوق وتموا الباقي تحت...يوم وصلوا غرفه فطوم...قالت خوله.. خوله: اكييد راقده الطويله... ودخلت الغرفه واستغربت...فاظيه... خوله: وييينها فطوم؟ نورة: سارت السوووق ويا حصه وعبدالله اخويه وسعيد... رفعت خوله حواجبها وهي تعق شيلتها وعبالتها وتعلقهم في الكبت... خوله: معقووووووووووله ؟؟؟ نورة: شو اللي معقووله؟ يلست خوله على الشبرية وسكرت نورة باب الغرفه ويلست وياها... خوله: معقووله سعيد يودي فطووم السوق؟ نورة فز قلبها لطاري سعيد... نورة: ليش لا؟؟..اخوها... خوله: بس من بعد الموقف الاخير صراحه ماتوقعت انه يخليها تطلع من البيت... نورة: خيبه..!!..ليش شو مستوي بينهم؟؟ ماحد خبرني شي... خوله: ياختي سعيد وايد يغااااار... وورط فطوم المسكينه في السالفه.. بطلت نورة عيونها.... كانت حاسه انه السالفه فيها ان... بس مابتخلي خوله الا يوم اطلع منها كل العلووم اللي ماتدري عنها... نورة: سعيد يغار؟؟؟ يغار على منوووو؟ رفعت خوله حواجبها بتكبر... كانها مستغربه من هالسؤال... خوله: يغار عليه... على منو يعني بيغار؟.. بهتت نورة كان حد صافعنها طراق قوي.... سعيد.... سعيد حبيبي انا ...يغار على خوله..!!!!!!؟؟؟؟ ليش؟؟ شو تعنيله هي عشان يغار عليها ؟ تمالكت نورة اعصابها وحاولت تخلي ملامح ويهها طبيعية... نورة صحيح انها حساسه..بس قوية في مواجهة المواقف الصعبه عليها... نورة: خوله خبريني السالفه من اول... خوله: الله يسلمج تواعدنا انا ونورة نسير السوق ويا امايه..ويوم اتجهزنا حصلنا امايه تعبانه وقالت مافييني اسير وسيرن انتن رواحكن...شلينا نحن البشكاره والدريول ورحنا السوق...وانا اصلا ماتعودت اني اتغشى ..فطوم تنقبت بس انا كان ويهي مكشوف...المهم يوم ردينا شافني سعيد اني بلا غشوه..اول شي نازع فطوم..بس النزاع اللي ياها مايسوى شي عند النزاع اللي ياني انا...والله زعلت وسرت بيتنا اصيح...وامبوني حالفه ماطب هالبيت..لكن اول امس يا واستسمح مني وراضاني وقالي انا اغار عليج ووانا وانا ومادري اشوو ومن هالكلام... المهم ردولي اعتباري..وعقب عاده خذ مني وعد اني ماكشف ويهي جدام غريب.. وانا طاوعته ماروم اتم زعلانه عليه وارفض له طلب.... هذا سعييد...غيير... نورة كان يبل طاح على راسها... حست بالقهر...بالغضب... وبالغيره... كانت تقدر تذبح خوله في هاللحظه...بس خوله ماتهمها هي...اللي يهمها سعيد....كيف سعيد يسوي فيها جي كييف؟؟؟ امس بس واللي قبله كان بيقولها انه يحبها وهي اللي منعته...شو يعني هالكلام؟؟ يلعب عليها؟؟؟... يوم يشوفها يسوي نفسه يحبها ومن تروح يلعب بذييله مع بنت خالته؟؟.... لا ياربي لاااا... شو سويت انا عشان انصدم فاغلى انسان عندي....يارب ارحمني وبين لي ان كل هالخبر جذب ...سعيد مايسويها ..مستحيل يقص عليه انا... انتبهت خوله ان ملامح نورة تغيرت... خوله: نوره بلاج؟ تمالكت نورة نفسها...مهما كان اللي صار...مابتخلي نفسها ظعيفه جدام أي شخص... نورة: هااا.؟؟ لا ماشي بس كنت افكر....يعني سعيد هو اللي كنتي تقصدينه بانه بيي يخطبج قريب؟ خوله: طبعــــــا... منو يعني غير سعيد؟ نورة حست بالموووووت...وفعلا شي في قلبها مات... الامل بان سعيد بيكون لها تبخر... كيف خوله تتكلم بكل هالثقه؟؟..اكيد في شي معطنها كل هالثقه بان سعيد بيخطبها...هو مخبرنها؟ والا كلم حد من اهله بخصوصها؟؟؟ ووصلها الخبر؟؟... ابتسمت نوره بسخرية على نفسها... صدق اني كنت عايشه فحلم حلوو...بس كل حلم يخلص.. وانا احين اواجه نتيجه اغفالي عن الواقع.... طبعا سعيد يبا بنت خالته... يوميا مطيحه فبيتهم..واقرب له منها هي.. خوله موجوده عدالهم وفي الشارجه نفسها ودايما عندهم بالبيت...اكيد انه تعلق فيها ..اما نوره... تسلية بين فتره وفتره...وانا استاهل اللي ياني لاني صدقت عيونه واللي تقوله لي... حلال عليج ياخوله ان كان سعيد من هالنوع... خذيه ومابااه...نفسي عافته... نورة: اهااا...بالبركه ان شاء الله... خلينا نسير تحت عندهم.. خوله: اوكي.. لبست خوله شيلة بيظا من شيل فطوم ونزلت مع نورة تحت... نورة كانت ماسكه نفسها طول الوقت.. كانت معصبه لدرجه انها ماقدرت تصيح...ومر عليها الوقت وهي الافكار تدور بها..لين مارجعوا حصه وعبدالله وفطوم وسعيد من السوق...وكان الوقت موعد غدا..حصه وفطوم كانن يالسات في الصالة مع الحريم يراونهن شو تشرن من القطع.. نورة ماقدرت تتحمل الازعاج..شلت عمرها وركبت فوق في غرفه فطوم عشان تريح اعصابها شوي وتفكر بمصابها...مرت ربع ساعه وهي يالسه في غرفه فاطمه ومحد درى عنها..بس بعدين استحت على ويهها وقررت انها تنزل..اكيد بيسالون عنها وبيستغربون الحركه.. يوم طلعت من غرفه فطوم شافت سعيد طالع من غرفته هو بعد.. التفت صوبها ويوم شافها ابتسم كالعاده وظحك... زاد قهر نورة من سعيد...كيف تسوي فيني جي...؟؟ وتطلع بهالبراءة؟؟ .. ماا انلام يوم صدقتك يا سعيد دامك تعرف تمثل ...تمت نورة اطالعه بنظرة قهر وغيظ وماردت له ابتسامته..استغرب سعيد... اول مره نورة اطالعه بهالطريقه ..وعلى طول اختفت ابتسامته... سعيد: نورة بلاج؟ نزلت نورة عيونها ومشت ناوية تتخطاه وتنزل بدون ماترد... بس يوم قربت منه مسكها سعيد من ايدها وسحبها على ورا... استغربت نورة من هالجرأه... غمضت نورة عيونها وهي ميته من القهر... نورة: فجني... سعيد: مابفجج...رمسيني...بلاج؟ نورة: ماشي...فجني... سعيد: نوووره.... شوفيج؟؟ شو مضايقنج؟ التفتت نورة صوبه وهي اطالع في عيونه بطريقه عتاب... نورة: اللي مضايقني اني ماكنت اتوقع انك من هالنوع...لكن دام هذي تصرفاتك..مابيني وبينك كلام... مب بس الكلام....مابيني وبينك أي شي.... وسحبت ايدها من ايده بقو ونزلت بسرعه للطابق الارضي ودخلت الصالة قبل مايلحقها... سعيد انصدم من كلام نورة وتصرفاتها... شو هالنغمة اليديده بالكلام؟؟..شو صار بين امس واليوم؟؟ امس كانت تلمح له انها هي بعد تحبه...واليوم تقطع أي صلة بينها وبينه؟؟..لييييش ..شو صار؟؟ وعلى طول حس بالمرض والتعب...كله ولا نوره مايتحمل منها هالتصرف.. شو سويت انا؟؟... والله اني ماسويت لها شي ولا بسويلها شي بعد... يقدر يجرح كل الناس ماعدا هي... تعب من تساؤلاته وكان خاطره يرجع يدخل غرفته ومايشوف حد...لكن الواجب اجبره انه ينزل ويتغدى مع ابوه واخوه وولد عمته ويقعد معاهم... بعد الغدى بساعه كانوا اهل العين واقفين في الحوش مع اهل البيت ..يسلمون عليهم لانهم رادين العين.. الكل يظحك ويسولف ماعدا سعيد ونوره.. كل مارفع عينه عشان يشوفها يمكن يفهم شي من ويهها وعيوونها..كانت تصد وتنزل عيونها..ومات من القهر يوم شافها تطلع اول وحده من بيتهم وهي تتغشى... معقووله يانورة؟؟.. لهالدرجه طفرانه من بيتنا وتبين تردين؟؟... آآخ يالقهر لو ادري بس شو صار فيج وخلاج تتغيرين عليه... ردوا اهل العين لبيتهم ووصلوا المغرب...واول ماوصلوا البيت ركضت نورة صوب حجرتها وصكت الباب على نفسها... وفتحت لمشاعرها المكبوته حريتها وقعدت تصيح على حب حياتها اللي مات... |
||
|
|
|
16-07-2006, 05:43 PM
|
رقم المشاركة : 23 | |||||
|
الله يقلعها خوله ذي... اقتباس:
 بكل شي يجننون يختي بطريقة حياتهم وحتى تشددهم حلو يعني على سنع مو مثثلنا متشددين على سنع وبدون سنع!!  وكفاية ان بلدهم اتجنن مره  اقتباس:
بالتوفييييق يا قمر حلو تكلمين ماجستير ودكتوراه بعد انا ان شا الله مفكرهبهالشي واتمنى ابتعث بعد الله يحقق لنا افكارنا وامنياتنا يا ررررب
|
|||||
|
|
|
17-07-2006, 11:08 AM
|
رقم المشاركة : 24 | |||
|
|
اقتباس:
اللللله................الريم حتى انت توافقيني في الرأي.............. ايش رايك تنتظريني لما أخلص جامعه ونروح مع بعض ندرس هناك أخليك مع الجزء have fun  الجزء الثالث عشر كان الوقت بعد صلاة المغرب يوم نزلت حصه من فوق نازله الصالة حصلت امها يالسه ميرة وحمده.. والعيال.. سلمت عليهم وسارت على طول عند التيلفون..واتصلت بعنود على موبايلها... عنود: آآلوو,,, حصه: مرحبااا عنووده..السلام عليج.. عنود: هلااااا والله وغلاا بريحة الحبايب... حصه:هههههههههه ياويلي عليج انتي يالرايقه..شخبارج؟ عنود: بخير فديتج شحالج انتي؟ وعلومكم؟ حصه: بخير وسهاااله ... عنود: متى رديتوا من الشارجه؟ حصه: العصر والله... سكتي يا عنوووووده شريت لج ذيج القطعه اللي تسكت.. عنوود: واللــــــــــــــه؟!!.. حصلتي شي مناسب للموديل.. حصه: هي حصلت وايد حلوات لكن هذي دشت مزاجي على طول.. عنود: تمااااااااام عيل..شو لونها؟ حصه: لونها غريب..اخضر على ذهبي..اخضر محرووق..ماتعرفيله.. عنود: اوووش والله كشخه...بكم خذتيها؟ حصه: وانتي شووو لج تسالين عن السعر؟؟.. عنود: لا اتحسبين اني مابدفع عنها... حصه: جب جب... اعتبريها هدية التخرج... عنود: ياسلاااااااااام..وانا شو اييبلج هدية تخرج؟ حصه: كيفج بس انا ماارضى باي شي.. ابالي شي عليه القيمه.. عنود: همممممممممممممم....بيوزج اخووويه... انصدمت حصه وتمت ساكته.... وماتعرف ليش خذت الموضوع بجدية مع انها تعرف ان عنود تمزح... عنود: هههههههههه سكتت...آآلوووو... حصه: وياج.وابوي عليج شو هالرمسات بعد..!! عنود: اسوولف وياج ويا هالويه... ولو عزم اخوويه مابخبرج اصلا... حصه: ويا ويهج انتي واخوج..المهم متى بتين تشوفين القطعه؟ عنود: ويييييييييين اييي؟؟؟ حليلي والله... خليفه وحمدان محد سايرين البدع يلعبون بالدراجات... حصه: اسمعه عبدالله يتحظى في الدرب يقول فوتوا عليه سيرة البدع.... عنود: احسن يوم فوتوا عليه..اخافه يتكسر... حصه: ياويييييلي انا عالحب.. عنود: هي عيل شو على بالج... حصه: هههههههه الله يكمل عليج ان شاء الله..المهم بخليج بسير ايلس عندهم .. عنود: برايج الغاليه..ومشكوووره وايد عالقطعه... مردووده هالهدية ان شاء الله.. حصه: لا اتعبلين ولا شي مابينا نحن هالرسميات.. المهم سلمي على اهلج وعمي.. عنود: يبلغ ان شاء الله وانتي ردي السلام عليهم كلهم... حصه: ان شاء الله..فمان الله.. عنود: مع السلامه.. سكرت حصه التيلفون ويت ويلست عدال حمده.. وميرة وامها.. حمده: وينهانورة ماشفناها من يت؟ حصه: ظني الا رقدت.. اول مايينا من الشارجه على طول سارت حجرتها وصكت على عمرها الباب.. حتى شنطتها لين احين برااا في الممر.. مادخلتها.. ام خالد: حشى شو هالرقاد اللي ياها مره وحده؟..لايكون شي يعورها؟ حصه: والله ماحيدها مريضه امايه... ام خالد: تيمّـلي بنتي قومي شوفي اختج..اخافها مريضه.. حصه: ان شاء الله.. قامت حصه وسارت فوق ادق على نورة... وبعد فتره فتحت نورة الباب وويهها متنفخ ... حصه: بسم الله الرحمن الرحيم.. اللهم سكنهم في مساكنهم.... شو بلاج جي غاديه؟؟ّ!!!!! نورة: شو تبين؟ حصه: يتخبرون عنج تحت...بلاج نورووه؟؟؟ نورة: شو بلاني بعد .. كنت راقده... حصه: ماحيد ويهج جي يتنفخ يوم ترقدين... دخلت حصه حجرة نوره وفتحت الليت عشان تشوفها عدل...وهي كانت خايفه على اختها ..اول مره تشوفها بهالحاله... نورة: يمكن كنت راقده على ويهي... حطت حصه ايدها على خصرها..وهي متشككه... حصه: والله انج تجذبين.. نورة: مشكوره اختي.. حصه: نوروووه.... انتي راقده وانتي تصيحين..اعرفج... نورة: اوووففف..شو بيصيحني يعني حصيص...!!! حصه: هذا اللي ابا اعرفه.. انتي من كنا في الدرب صوب العين وانتي مويمه.. شو مستوي.. نورة: مب مستوي شي..ولا شي يستاهل اصلا اني اصيح عشانه..احين ممكن ماتفتحيلي تحقيق..وتروحين وتقوليلهم اني برقد لين باجر..؟؟ نورة من النوع اللي يوم يظايق يحب يرقد بشكل غير طبيعي..هي تفكيرها انها تشرد من الهم والتفكير لفتره وترتاح بالرقاد...بطلت حصه عيونها مستغربه من اختها...وهي في خاطرها تقول ابد..هالبنت مب طبيعية اليوم.. حصه: ماتبين عشا؟؟ نورة: لا.. حصه: هممممممممم صليتي العصر؟؟ نورة: استغفر الله.. لا ماصليت... حصه: والمغرب؟ نورة: بعد... حصه: همممم...يوم اقولج فيج شي والا ماحيدج تفوتين صلاتج.. نورة: حصوووه... كنت ...راقـ.... ــدة... فهمي.. حصه: خلاص لاترقدين احين تريي لين صلاة العشا صليهن كلهن وتعشي وعقب رقدي اذا تبين.. نورة: ان شاء الله... خلتها حصه ونزلت وهي قلبه مقبوض..نورة مب طبيعية فيها شي...وشي جايد... يوم وصلت عندهن تحت حصلت ان حمده ردت بيتها عشان تعشي العيال وترقدهم..وان خالد وصل البيت ويالس عدال امه وحرمته ويرمس عياله حمد ومحمد ويالسه في ثبانه شما بنته الصغيره.. يت حصه وسلمت عليه... حصه: هلاااااااااااا اخويه شحالك؟ خالد: بخيير حصيص الله يسلمج...شحالج انتي..؟ حصه: بخيير والله...وييييييييين من زمان ماشفتك ماتقولون ساكنين فبيت واحد...وتراك من زمان ماوديتنا البرر... خالد: عزموا انتوا وانا مابقول لا... حصه: بعد امتحاناتي ان شاء الله... ام خالد: شفتي اختج؟ حصه: هي امايه..الا راقده ..مافيها شي.. ام خالد: وعيتيها؟ حصه: هي وعيتها.. ميرة: يالله شباب قوموا بتتعشون وبعدها رقااد... وراكم مدارس..يالله شماني.. مدت ايدها وشلت شما ..ووقفت.. حمد: ماماااه مب الحييين بعديين... خالد: حمد قووم يالله تعشى وارقد..ماشي سهر... نش حمد وهو متظايق... وتبعوا امهم اللي سارت صوب بيتها تعشي عيالها وترقدهم..واول ماطلعت دش عبدالله ووياه ابووه... بو خالد + عبدالله: السسلام عليكم.. الكل: وعليكم السلام والرحمه... نشوا كلهم يسلمون عالشايب... وبعد مايلسوا.. حصه: ابويه اقولهم اييبون عشاك؟ بو خالد: لا صبري بصلي العشا اول بعدين بتعشى.. خالد: هاا ابوويه شو العزبه اليوم..؟ بو خالد: والله مثل كل يوم.. وباجر عندي تفحيم بنشر من الفجر.. خالد: ان شاء الله يسبقن عاد هالمره.. بو خالد : على الله... ( والتفت صوب عبدالله الي كان يشرب شاهي).. ابويه عبدالله تراني شفت عمك اليوم ورمسته عسب سالفة الملجه.. ارتبك عبدالله وحط كوبه في الصينية.... عبدالله: وشو رد عليك؟ بو خالد: يقول هو ماعنده مانع...لكن بيرمس البنت وخوانها الليله وبيردون علينا خبر... خالد: ليش تبا تملج بو الشباب.؟؟ عبدالله: هي والله خالد...بملج ان شاء الله.. خالد: حق شو الحين تملج؟ باقلك سنه عن التخرج ..يوم بترد املج... عبدالله: لا ياريال..اول مارد من امريكا بعرس..متى بملج؟؟؟ خالد: كيفك... عبدالله: ابويه انا ماريد الملجه احين... البنت بتتخرج ويا حصه واحين مشغوله بدراستها ..بعد ماتخلص بنملج ان شاء الله... بو خالد: على خير ان شاء الله.. في الطريج من البدع للعين.. خليفه كان يالس في الكرسي اللي عدال السايق... وماسك ايده وهو متعور.. وكان يسوقبه ربيعه سيف الشامسي (هو نفسه اللي شاف حصه في بيت قوم خليفه).. سيف ريال طيب وحبوب ربيع خليفه من ايام الثانوي... وهو اكبر منه بسنه.. بعد ماتخرج من جامعة الامارات بتخصص المحاسبة..اشتغل محاسب في وحده من الدوائر الحكومية... سيف كل شوي يطالع خليفه بنظرة قلق... سيف: هااا بعدها تعورك..؟؟ خليفه: هي والله .. الله يخس محمد اللي خلاني انجلب... سيف: بسيطه ان شاء الله... هزرك مكسوره؟ خليفه: والله مادريبها بس تعورني.. كم باقلنا عن نوصل العين؟؟ سيف: نص ساعه بالكثير وبنكون هناك...وتراني بوديك المستشفى سيده... خليفه: لااااااااااااا ...لا توديني ولا عندك خبر...بسير البيت والعيوز بتحط عليها كركم وملح وبتخف.. سيف: جب جب ... كركم وملح اون....يمكن مكسوووره... خليفه: سواف قسم بالله مافينا نتمرر بعدنا المستشفيات... سيف: اظن انا اللي اسوق مب انته... خليفه: الله يهديك... سيف: يهدي الجميع...اقول خلوف..تذكر ذاك اليوم يوم كنت فبيتكم.. ودخل علينا عبدالله العصر ؟؟ قبل كم يوم بس... خليفه: همممممممممم ..هي... سيف: يوم ظهرت شفت عرب فبيتكم... خليفه عقد حياته... خليفه: قوم عمي... اهل عبدالله.. سيف: اهااااااااااا... سكت سيف وبلع لسانه..مايروم يرمس ويقوله والله انا شفت بنت عمك في حوشكم وعيبتني... اقل شي بيسويه بيلمّه ببكس على ويهه... خليفه: ليش تسال؟؟ سيف: هممممممم ماشي بس فضول...عيبتني السياره اللي واقفه...ثرها سيارة عبدالله؟؟ خليفه: السودااا؟؟.. هي سيارة عبود.. ومرت هالسالفه على خير بدون مايشك خليفه باي شي.. وصلوا العين بعد نص ساعه وعلى طول سيف راح صوب المستشفى... حمدان كان هو اللي بيوصل خليفه العين بس سيف قاله انه هو راد اصلا العين وهو بيودي خليفه وبرايه حمدان يكمل لعبه لين الجمعه...فوافق حمدان ورد عند ربعه... في المستشفى قالوا لخليفه ان ايده مكسورة من المرفق كسر خفيف..وبيصح خلال اسابيع ...ربطوها له وجبسوها .. وعقب وصله سيف البيت وتعشى عندهم وروح صوب بيتهم.. دخل خليفه الصالة وكانت هناك عنود وامه وابوه .. اما سلطان وحميد تعشوا ويا خليفه وسيف وريال ثاني في الميلس..وبعد ماطلع سيف من عندهم طلع خليفه بعد ساير صوب بيتهم..وتم سلطان وحميد هناك ويا الريال... عنود اول ماشافت خليفه شهقت... عنود: خلووووووووووووف شوفيها يديييييييييك؟؟؟ خليفه: دخيلج لا تسوينها مناحه.... ترا العيوز يبالها سبب... وايهت اخوها وسار عقب وسلم على امه وابوه.... العيوز اول ماشافته حطت ايدها على صدرها... ام سلطان: وابووويه فديتك ياولدي بلاها يديييك..؟؟ خليفه: ماشي امايه بس طحت من الدراجه وانفجت.. بو سلطان: منفجه ويجبسونها لك..؟؟ والله انهامكسوووره... خليفه: ابويه كسر بسيط وقالولي بتصح بسرعه.. ام سلطان: وااااعليي عنك فديتك انا..انا قايلتلك لاتلعبون.. لكن هذا حمدان ساس البلا..هو اللي وزك على هاللعبه.. خليفه: لا تردين عليه امايه كلنا بغينا نروح.. واحد من الشباب هذا لف عليه وانجلبت والا انا مابنجلب.. بو سلطان: ومنو يابك انته من هناك؟ خليفه: يايبني سيف ربيعي.. امبونه راد العين ويييت وياه..حمدان بيرد باجر... ام سلطان: ماشبع من اللعب مسود الويه.... عنود: ههههههههه حليله حمدان اذنيه تعوره احين... المهم سلامااات اخووويه ماتشوف شر.. خليفه: الله يسلمج من كل شر.. صد بو سلطان صوب حرمته... بو سلطان: ياعزه.... مريت على بو خالد اليوم في العزبه... ام سلطان: انزيييين..وشو علوووومه ؟؟ بو سلطان: يسرج حااااله.. يقول عبدالله يبا يملج على بنتج وياي يشاورني في السالفه... صد خليفه صوب عنود وهو يطالعها بنظره مكاره..وعنود على طول قفط ويهها ويايه بتنش وبتسير عنهم... خليفه: وين سايره..؟؟!!.. يلسي يلسي... السالفه تخصج ونحن مابنرمس من وراج.. ردت عنود ويلست وهي ويهها مثل الطماطه... ام سلطان: والله يا بو سلطان الشور شورك انته وعيالك وشور عنود...ولو تبا رايي انا ماشوف فيها شي.. بو سلطان: وانا بعد ماعندي مانع .. بس يوم فكرت فيها..شفت انه سنه كامله وايد على ملجه... خليفه: ابووويه لا تنسى ان عبدالله بييسافر ويايه بعد شهر ونص..يعني في هالسنه اللي تطريها عبدالله مابيكون موجود في البلاد... بو سلطان: هي صدق.... وانته شو رايك؟ خليفه: تشاورني؟؟؟ والله انا اشوف انكم بتسوون فيهم خير وفيني انا بعد...تراه مأذني عليها في امريكا.. وظحكوا كلهم حتى عنود بس مستحاها زاد... وكانت مب رايمه ترفع راسها.. بو سلطان: هااا بنتي...وانتي شو رايج؟؟ عنود: احمم...والله يابويه الشور شورك وشور خواني... بس من احين اقولكم ملجه قبل امتحاناتي ماشي...لازم اتخرج اول وعقب جان تبون تسوون ملجه.. بو سلطان: وهذا هو شرط عبدالله بعد..بو خالد قالي اليوم اذا وافقنا الملجه بتكون بعد التخرج.. عنود: خلاص اللي تشوفونه.. بو سلطان: على بركة الله..انابعدني بشاور اخوانج الكبار... ولو انه السالفه مايبالها يعني...عبدالله ولدنا ومنّا وفينا.. .. وماظني حد يستاهل عنود شراته هو...ريال ماعليه قصوور...ماشاء الله عليه.. ام سلطان: والله انك صادق يا محمد... لو واحد ثاني غير عبدالله مابوافق على ملجه اتم سنه كامله... بس عبدالله ولدنا وواثقين فيه... يوم السبت بعد المغرب..نورة الكئيبة كانت قاعده مع حصه في الصالة يسولفن...دخل عليهن عبدالله وسلم.. عبدالله: السلام عليكم.. نورة وحصه: وعليكم السلام... عبدالله: تحجبن حمدان ويايه... قال هالكلام ورد طلع.. ونورة وحصه تحجبن .. وسارت نورة تغسل الاكواب .. ويوم يت حصلت حمدان واقف يسلم على حصه ..و عبدالله كان يعابل في الفيديو والتلفزيون ... حمدان: وشحاااااااااالج ياحصييييييص...وشخباااااااارج؟ حصه: بخير وعافيه ولد عمي..علومك انته..؟ من زمان عنك..! حمدان: والله هيااااته شو تبينا نقول... يت نورة وحطت الاكواب في صينية الشاي.... نورة: السلااام عليك حمدان... حمدان: اهلا اهلا...وعليج السلام يالعووووفه... نورة: مالت عليك وهذا انا اللي سايره اغسل لك الاكواب عشان تشرب شاي... حمدان: افا عليج بنت عمي..استريحي بس يايبلج فلم ولا تشوفينه في الاحلام... نورة: مالي بارض عالافلاام مشكووور... حمدان: مالت عليج هذا مب اي فلم... هذاتصوير سيرتنا البدع يوم نلعب بالدراجات...يلسي والله بتموتين من الظحك... نورة: اللـــه كشخه..دام فلم السيره بيلس اشوووف... عبدالله نش وهو متظايق... عبدالله: نورووه ماعرفت له هالفيديو... تعالي ركبي الكيمره عليه.. سارت نورة وظبطت الوايرات وشغلت الكاميرا على التلفزيوون... عبدالله كان متسامح مع يلستهن مع حمدان لانه حمدان اصغر عنهن...فكان يشوف الوضع عادي كانه حمدان واحد من اخوانهن... بس مع خليفه الوضع مختلف... حصه: اقول حمدان بتتعشى عندنا؟؟ حمدان: هي بنت عمي... حصه: بسير اقولهم عيل يسوولك اللي تباه... حمدان: والله انج فنانه انتي...دومج تحسين فيني.. حصه: هههههههههه ويا هالويه...لا تشغلون الفلم الايوم ايي.. سارت حصه وخبرت البشكاره تسويلهم ماكرونه بالباشاميل بعد...ويوم ردت شغلوا الفلم ويلسوا يطالعون الشباب وهم يتسابقون ويقفزون بالدراجات..كلهم كانوا متحمسين عالفلم..لانه صدق كان كشخه... حمدان كل شوي يوقف على لقطه ويراويهم شي ويعلق... في اللقطات اللي يت عقب كان اكثر شي مركز على خليفه.. اللي كان متلثم بسفرته ولابس نظارات شمسية ويخمس بالدراجه وشكله مستمتع... لين يت اللقطه اللي انجلب فيها ..وكلهم شهقوا لانه خليفه طيحته عوفه..وانجلب بعيد عن الدراجه.. عبدالله: خيييييييييييييييبه... منو هالسبال اللي لف على خليفه جي؟؟ حمدان: هذا محمد الله يهدييه... حصه: طالع خليفه ماسك ايده وتعوره مسكين والشباب كلهم متحاوطيبه.... (التفتت صوب حمدان) بعدها تعوره؟؟ حمدان: انتي وين عن الناس..؟؟؟.... انــكســــــرت... شهقت حصه ... حصه: احــــلــــــــف....!!!! حمدان: والله وجبسووها له... نورة: حليييييييييييييله خليفه مايستاهل والله.... عبدالله: وينه هوو الحين؟.. حمدان: ساير ويا سيف السينما... كملوا الفلم وهم يظحكون على سوالف الشباب.. وصدق كان الفلم روعه....وعقب ماخلص سكروا كل شي وردوا الكيمره للشنطه... حمدان: نوروووه.... ترومين تسجلين لي فلم الكيمره الصغير على واحد عود؟؟؟..ابا اراويه الشباب.. نورة: قول لو سمحتي اول... حمدان: اقول جلبي ويهج احسن... نورة: ههههههههه ويا هالراااس..... احترم اللي اكبر منك.. حمدان: انتي اللي ماتشكرين يايبلج فلم شحلاته اطالعينه وظحكتي لين ماقلتي بس ..واخر شي ماتخدمين؟؟؟ نورة: انزييين انزييين..حشاااااااااا...خليتني علووج فحلجك... حمدان: علوج طعمه خايس... نورة: خاست ريحتك مسود الويه.... حمدان: قسم بالله توني متسبح ومتعطر... وانتي اروحج اصلا تموتين عليه هالعطر... نورة: هات هات الفلم....خقاق واحد... حمدان: ياخي يحقلي...يحـــــقــــــــلـــــ ـي..... في هالفلم كله شفتي واحد احلى مني.؟؟ فذمتج تراااا.... نورة: هههههههههههه لا والله ماشفت....بس اذا سار عبدالله وياكم بيغطي عليك وعلى طوايفك كلها... عبدالله: احمممممممم.... اسمع وتعلم عن الذووووق... وتراني اسمعه يأذن..قم بنصلي.. حمدان: يالله.. نشوا عبدالله وحمدان يصلون العشا في المسيد... والبنات سارن يصلن فوق...ويوم ردن ينزلن حصوا الكل متيمع في الصاله..الشواب وخالد وناصر وحريمهم...وعبدالله وحمدان.. وتعشوا الريايل وعقب الحريم .. وبعد العشا طلع عبدالله مع حمدان والباقي سهروا شويه لين 11 عقب ساروا يرقدون.... عندي تعليق الريم حمدان بن محمد ولد عمهم مايذكرك اسمه بشي؟؟؟؟؟ |
|||
|
|
|
18-07-2006, 12:54 PM
|
رقم المشاركة : 25 | ||
|
|
الريم وينك الجزء الرابع عشر
قربت امتحانات البنات.. نورة وحصه وعنود وفاطمه اللي امتحاناتها ثانوية عامه.. والكل كان مختبص...بسبب الملجه بعد والتجهيزات... عبد الله كان ميت من الوناسه..وماخلى حد ماعزمه من ربعه... حتى سيف الشامسي عزمه هو واهله..وهذا حصلها فرصه... بيطرش امه تتعرف عليهم وتسال عن البنت..طبعا بعد مايوصفها لامه.. خليفه وحمدان ماخذين الموضوع عادي..صح مستانسين انه بتستوي عندهم ربشه بس انقهروا اكثر لانه اكثر الشغل طاح على روسهم خصوصا خليفه بسبب فظاوته..واللي كانت ايده قربت تصح وعليها ربطه خفيفه بس.. سعيد ونورة على حالتهم...نورة صح تلتهي بالربشه والتجهيزات واكثر شي امتحاناتها اللي تبدا قبل الكل... بس كان قلبها يعورها على الحال اللي وصلت له هي وسعيد ..من بعد ماكانوا عايشين احلى فتره فحياتهم... والنظرات اللي كانوا يتبادلونهاوالكلام البسيط كانت تعنيلهم اكثر من اي شي ثاني....بس كله هذا راح... نورة على بالها انها مخدوعه.. اما سعيد مب عارف بالضبط بشو يفكر وعلى منو يحط اللوم ...ومع الايام قام يفكر بان نورة غيرت رايها بخصوصه.واذا كانت تحبه صدق مابتصدق عليه كلام شين... وحتى لو سمعت المفروض تي وتقوله مب تصدق بكل بساطه وتتهمه باشياء هو ماسواها وتقطع اي صله لها وياه... وبدا الشيطان يوسوسله بانها هي اصلا تبا الفكه منه....وماصدقت تحصل سبب عليه.... وعلى هالحال هو نفسه عصب من هالسالفه وقرر انه يتخطى حب نورة...اذامابغته فيه الف بنت تتمناه... والواضح ان حبها له مب كافي والا ماصدقت عنه اي كلام ينقال... حصه امتحاناتها النهائية كانت شاغلتنها عن اي شي ثاني... وكانت تحمد ربها ان هالكورس عدا على خير بدون اي حرمان...وكانت مقرره ان نتايجها تكون زينه وايد لانه اخر كورس لها...بس مع ذلك تردد خليفه على بيتهم بسبب تجهيزات الملجه والحركات اللي كانت تصير بينهم... هذا غير النظرات اللي كان خليفه يوتر حصه بهم...كانت تاثر في تركيز حصه للدراسه.. حصه مب مثل نورة وعنود اللي شاغلات نفسهن بامور الحب..!!...كانت غير عن بنات جيلها.. اللي مايهتمن غير بهالسوالف..كانت دراستها اهم شي بالنسبه لها...وطبعا رضى والديها عليها اللي ماتروم تقولهم لا... بس خليفه وبتصرفاته الاخيره كانت تحيرها... هي ملاحظه انه مازال يعامل نورة برسمية مثل ماكان يعاملهن طول عمره.بس من رجعته الاخيره من السفر قام يلعب باعصابها... شو يبا مني؟؟... وليش انا يعني؟؟..توه بس انتبه لي وشافني؟؟ صح النوم ياخليفه... !!... وهي ماتنكر طبعا بانها في اللحظات القلييله جدا اللي كانت تفكر فيهن بالزواج...كانت دايما تتخيل شخص بملامح خليفه....ريال بطباع واخلاق خليفه...لانه وبكل اختصار يناسب ذوقها.. او يمكن لانها هي كبرت وهم يسمعونها انها بتكون لخليفه ولد عمها... لكن لا هو ولا هي اهتموا بهالسوالف الا الحين...ومن صوب خليفه بس...لان الحركات طالعه من صوبه مب من صوبها هي... هي لين الحين ماتدري وين الله حاطنها..واحسن لها تركز في امتحاناتها وتخلص وتفتك عقب بتتفرغ تفكر بكل هالسوالف...هذا اذا ماحصلت لعمرها شي تنشغل فيه مثل الشغل مثلا...هذا اذا خلوووها الاهل...!! عنود وعبدالله في عالم خيالي....عنود متخوفه ان بسبب كل هالانشغال بالملجه والتفكير بحياتها مع عبدالله بتيب نتايج مب عدله في امتحاناتها... عشان جي خلصت شغلها هي..حجزت عند صالون كنوز لبنان حقها وحق بنات عمها ..والفستان عند المشغل بعده ماخلص.. اما بخصوص اهتمامها الشخصي بنفسها فهي اصلا ماعليها كلام..البشره ماشاء الله صافيه ومنوره والجسم ولا احلى...عشان جي وكلت اهلها بكل الامور الباقيه وهي احسن لها تنتبه لامتحاناتها... لكن كل ماكانت تمسك كتاب كان خيالها يسرح...بعد اسبوعين ويومين بس بتكون بشكل رسمي زوجه عبدالله... اللي طول حياتها وهي تتمناه وماتشوف غيره... ماشي احلى من ان الواحد ياخذ انسان اختاره قلبه قبل مايختاره عقله... وكانت احيانا تتجرا واطرش له مسج على تيلفونه..بس يوم كانت تسوي هالشي كان يرد عليها بعشر مب بمسج وحده بس...وكانت تمسحهن بسبب خوفها ان حد يشوفهن... لكن المسج الوحيده اللي ماقدرت تمسحها كانت تقول:" والله يا عنود اني حبيتج من خاطري... وانتي ماتعرفين ولد عمج يوم يحب... بس مابقول غير اني اوعدج اخليج مستانسه بحياتج وياي ولا اقصر فيج...وتصبحين على الف خير ". هل الشارجه كانوا عايشين حايتهم طبيعي ماشي تغير عليهم..تاقلموا كلهم مع مزاج سعيد اليديد..ومحد قام يتنقرشبه او يغلس عليه ويمزح وياه لانه ماقام يتحمل السوالف..وصار جدي وايد بتعاملاته مع الناس..واهله... فطوم كانت ماكله الكتب اكل لانه امتحاناتها خلاص بدت....عندها طبع غريب بانها ماكانت تحب تذاكر في غرفتها او داخل البيت...اييها الرقاد...عشان جي كانت تطلع الحوش وتيلس هناك والا تروح فوق السطح وتقعد مثل الغراب وتدرس...والكل كان مخليها على راحتها ومهيئين لها الجو للدراسه... شيخة اختهم اختبصت فوق تحت هي بعد... ياينها خطييب... ويصير لها من بعيد من طرف امها... ريال مهيري وحبوب من دبي... ووافقوا عليه..وبجذي صارت شيخه مخطووبه بس بعدهم مااعلنوا الخبر..لين مايستوي كل شي رسمي.... عليا حرمه اخوهم..قررت انها تروح عند اهلها في العين اسبوووع..عشان تساعدهم في الترتيبات .. عاد ملجه الغالي عبدالله مستحيل ماتكون موجووده... ووافق فيصل غصبن عنه ولو انه مايصبر بلاها... وقرروا انهم يسيرون اخر الاسبوع ... عبدالله واهله قرروا يسوون خيمه برا بيت عمه للرياييل... ويخلون البيت والميالس اللي فيه للحريم.. لانهم وبدون توقع عزموا عرب وايدين...ويخافون انه مايكفيهم المكان... الشباب عبدالله وحمدان وخليفه قرروا بينهم وبين بعض انهم يسوون رزفه ويا ربعهم بعد مايخلص العشا ويروحون نص المعازيم... لانه يوم شاوروا الشواب قالوا حشى هذا عرس مب ملجه ..وماطاعوا... عشان جي خلوها بالسرر... عبدالله بالنسبه له هذا عرسه.. ولازم انه يفرح فيه قبل مايتغرب مره ثانيه لامريكا..ويبا يصور كل شي بالفيديو ويشل الاشرطه وياه...عشان يشوفهن هناك براحه...ويتصبربهن...وانقهر وايد يوم درى انه مابيدش على عنود وبيلبسها الدبله والشبكة في الملجه... العيايز احتشرن وماخلنه.. والكل قاله انه اخوانه ماسووها قبله بيي هو على اخر الزمن وبيدخل على البنت جنه معرس وبيلبسها؟؟ ..مستحـــــــــيـــــــــــــل ... وبلع لسانه عبدالله وماقال شي... يخاف يفركشون له السالفه بعد على اخر الاسبوع... ام خالد كانت توصي بناتها...بان قبل الملجه..عربهم اللي من صوب بو خالد بيتيمعون في بيتهم هني اول وبعدين بيسيرون رباعه وبيشلون الزهاب لبيت عمهن... وعلىهالحال لازم يجابلن الحريم ويقربن ويحربن... وهن يعرفن هالسوالف كلها بس اصرت انها توصيهن زياده.. ولو انها ماتحب بناتها يظهرن جدام الحريم... ماتبا اي حد يقول ان ام خالد مطلعه بناتها تراويهن العرب عشان يخطبونهن... وهذا تفكير عيايز اول ترا..يعني مايبت شي من عندي... المهم...خلصت توصياتها ورتبوا كل شي في بيتهم وراجعوا كل نقطه عشان ماتستوي خربطه وقت الملجه لانه اصلا الكل بيكون مرتبش... خلصن البنات امتحاناتهن على نهاية هالاسبوعين...عليا كانت في بيت اهلها... والكل كان فرحان بها.. نورة كانت كل ماتشل هلال الصغير تقبضها العبره... هالولد كل مايكبر يشبه عمه اكثر واكثر... ليش ياسعيد خربت اللي بينا بهالطريقه ليش؟...اما سعيد فــ مب عارف يسير الملجه او لا... عبدالله يوم اتصل له اصر عليه بقوو انه ايي... وهو بصراحه متردد..يسير هناك ويمكن تسمح له الفرصه انه يفهم شو فيها نوره..!!..والا ان كرامته ماتسمح له انه يسير ويقعد في بيتهم واتم هي مندسه عنه ماتبا تشوفه ولا حتى تسلم عليه..؟؟؟ ... بس في النهاية قرر انه السيره مب عشان خاطر عيونها هي... ماتبا تشوفه برايها لاتطلع ...هو اصلا ساير عشان ولد عمه وربيعه...وعيــــــــب انه يقصر فيه...في النهاية قرر انه يسير...ونورة ادق راسها بالايدار اذامب عايبنها وجوده... ~(لهالدرجه وصل سعيد من القهر على نورة)~ اليوم كان الاربعاء الصبح تواعدن الحريم كلهن ( عنود وميرة وعليا وحصه ونورة) يسيرن الصالون ويتحنن..وردن الظهر وتغدوا كل حد فبيته..والظهر هو موعد وصول هل الشارجه.... نورة كان بطنها يعورها بسبب وصولهم في اي لحظه.. جهزوا غرفتين الضيوف حقهم.. فيصل بيرقد مع حرمته في غرفتها الجديمه عدال غرفة حصه.... وخالها وحرمته بيرقدون في وحده من غرف الضيوف.. وامنه (الاخت العوده المعرسه ..مايبنا طاريها من قبل) ومنى ومنال بيرقدون في غرفة الضيوف الثانية..شيخة بترقد مع حصه...و فطوم بترقد ويا نورة كالعاده...وسعيد... آآآآخ يا سعيد... بيرقد في غرفة عبدالله.... المجابله لغرفة نورة.....والله يعين ان شاء الله..... على الساعه 3 الظهر كان بو خالد راقد... وخالد بعد رقد.. ناصر وعبدالله مع خليفه كانوا في الميلس يتريون هل الشارجه يوصلوون... اما في البيت فكانت ام خالد وحصه ونورة وعليا مع عيالها وحمده حرمه ناصر مع عيالها لطيفه وسهيل كلهم يالسين في الصالة...وكلهم يتريوون.. في الدرب ويا هل الشارجه... ام فيصل كانت راكبه ويا بو فيصل ووياهم منى ومنال.. امنه وعيالها الثلاثه وبنتها الصغيره كانوا راكبين ويا فيصل ..وفيصل سيارته مورسيدس ماتضم وايدين... اما شيخه وفاطمه ركبن مع سعيد في سيارته الـ اكس فايف البيضا.. وهو نفسه مع انه كان يكابر..بس كان فعلا متوتر... اذا شافها كيف بيتصرف؟؟ يلبسها؟ والا يمسكها غصب عشان يفهم منها السالفه..؟؟؟... وهو يدري ان المكابر وعزه النفس هذي مابتفيده بس مب قادر يتنازل... وكانت فكره ان نوره لو كانت تحبه صدق وواثقه فيه مابتصدق عنه اي شي سمعته, مسيطرة عليه ومقتنع بها كليا... بس اول مادخل العين ..وفي الطريج صوب بيتهم ..رد له شوقه لها...احبها ياناس ما اقدر انكر هالشي... وهي سباله انها فاهمه شي عني غلط...عنبوا ماتشوف اللي في عيوني يوم تي فعيونها..؟؟ والا عميا ؟؟.. بس ماعليج يانوروه والله دواج عندي... وبخليج تقاسين اللي انا قاسيته بسبب تصرفاتج الطفوليه هاي... اول ماوصلوا البيت وقفوا سياييرهم في القراجات اللي داخل البيت... بيت بو خالد مرتب ومسوي احتياطاته ... نزلوا كلهم والرياييل ساروا صوب الميالس لانه قوم ناصر وعبدالله وخليفه طلعوا من هناك....وام خالد وعليا وحصه طلعن بعد من البيت عشان يستقبلن الحريم ويسلمن بعد على الريايل..بوفيصل وعياله يوا صوب ام خالد وسلموا عليها ... سلامه بنت فيصل ربعت صوب ابوها وتلصقت فيه... سعيد يا يتبسم صوب عليا وقالها.. سعيد: هاتي ولي العهد... من اسبوع ماشفناه... وشله وياه وساربه الميلس.... ام فيصل وبناتها سلمن على البنات والحريم ودشن البيت... آمنه الاخت الكبيرة المعرسه عيالها الثلاثه ساروا ويا خوالهم فيصل وسعيد الميلس ..اما البنت فتمت وياها.... داخل البيت يت نوره وحمده اللي ماطاعن يطلعن... وسبب نورة معرووف..سلمن على باقي الحريم ويلسن يسولفن ويخربطن ويتفاولن ... اما سعيد اللي داخل الميلس منشغل ويا هلال الصغير..قلبه انقبض من اول مايا... حصه طلعت تسلم ..ونوره ماطلعت..شو القصد يعني؟؟ ماتباتشوووفني طبعا... بس مصيرها بتفهم وبتتعذر... خليفه كان حاله غريب...مب عارف بشوو بالضبط يحس اتجاه سعيد... مات قهر يوم شاف حصه طالعه تسلم عليهم... ولا هوو بعد بقوه عين ساير صوبهم وسولف شوي ويا عليا اللي كانت واقفه عدال حصه... آآخ يالقهر..ليش حصه تطلع له؟؟؟....لايكون حاطه العين عليه هذي بعد..!!!..يعني نورة الخريش ماطلعت..انتي الحشيم طلعتي..؟؟؟؟ . وهو يعرف عدل ان سعيد يقدر يخطب حصه لانه اكبر عنها بسنه.... وحصه جميله وحبوبه وحشيم ومدينه ..وتنحب الصراحه والا ماتعلقت بها انا ارووحي في فتره اسابيع هالكثر...وتمت الافكار تاخذه وتيبه بخصوص علاقة حصه بسعيد.... كل خوفه انه حاط عينه عليها... والله ياويله ...بجلع له عيونه عشان مايتم يشوف اي بنت غير...والا خله يحشم ويحترم نفسه ويعرف انه عندها ولد عم احق بها من الغير.... والا انا غلطان؟؟؟؟؟؟ شو رايكم انتوا؟ منو احق بها انا والا سعيد هذا...!!! المهم مر هاليوم على خير... بدون مشاكل..ولو ان الكل كان يغني على ليلااااه.... بس كانت اللمه حلوه وسوالفهم كلها بخصوص عبدالله وعنود..والملجه والتجهيزات...والفرحه كانت صايبتهم كلهم... كانهم سكرانين على اي شي بيضحكون... واللي فيه شي مظايقنه تناسى هالشي لفتره وفرح لفرحة باقي الاهل... حصه وتخرجت وخلصت امتحاناتها وارتاحت... ونورة افتكت من امتحاناتها ولو انها بتبدا صيفي بعد اسبوعين... وفطوم شو عليها..ثانوية عامه وتخرجت... وكلنا نعرف عن فرحه اي طالب بعد تخرجه من الثانوي... كلنا مرينا فيها واللي مامر فيها...بيمر ان شاء الله قريب... وبيجرب هالفرحه... اما شيخه ..فرحتها فرحة كل مخطوبه قريب...تراقب كل تجهيزات الملجه وتعرف انها بتمر بهالشي ارووحها قريب في ملجتها... يوم يت الساعه 11..الكل رقد...من التعب اللي فيهم... اما فطوم اللي كانت معزمه ترمس نورة في سالفته مع سعيد وتستفسر منها..لين الحين ماحصلت الفرصه..وكل ماكانت تيب طاري سعيد لنوره..تهربت وغيرت السالفه...لكن ماعليه هم يالسين لين الجمعه وان شاء الله بتحصل الفرصه المناسبه عشان تفهم منها كل المشكله... وسعيد لين الحين ماصارت له فرصه يشوف طرف شيلة نورة حتى... ويعرف ان الوضع فبيت عمته اصعب بوايد من بيتهم في الشارجه.. هني وايد متشددين وحريصين.. ويوم حد بيدش بيتهم مب بس بيسووله درب..الا بيفضوون له البيت كامل وبيخشون بناتهم في الغرف بس عشان محد يشوفهن وهو خاطف... وعلى نص الليل دخل هو وعبدالله البيت ورقدوا... وخليفه من عقب العشا طالع عنهم وهو يحترق... يالقهر جان سعيد بيرقد على بعد ممر واحد بس من حصه... لوطلعت دهمانه بلا شيله وشافها؟؟؟... وتم مسكين محترق من الغيره وهو بعده مب راضي يعترف انه يحب حصه بشكل جنوني...في ظرف شهر بس ... سبحان مغير الاحوال... الخميس الصبح كان كل البيت كانه خنخووش نمل..الكل يتحرك ومرتبش.. خصوصا في بيت عنود... عنود من الضحى يوم بغت اطرش الدريول للمشغل اييبون فستانها ماحصلت الدريول..طبعا مرتبش والكل يطرشه... وماحصلت غير حمدان يسير اييبهن... ومسكين مارام يقول لا..راح..وياب فستان عنود + فساتين بنات عمه ... الشيخه عنود موصتنه بهالشي.... وماتت عنود من الفرحه يوم شافت فستانها... كل شي مظبوط ومثل الموديل والقطعه طالعه روعه على لون بشرتها... صدت صوب حمدان..وهي حاطه الفستان عليها... عنود: هاا شو رايك؟ حمدان: الصراحه فنااااااااان... روعه اللون هذا... عنود: هيي....يستاهل الفلوس اللي دفعتهن عليه والله.. حمدان: المهم انا بسير تبين شي بعد؟؟.. عنود: هيي..اباك تكمل جمييلك وتوصل فساتين بنات عمي لبيتهم... حمدان: ياااااااااااااسلام..دريول عندكم انا انتي وبنات عمج.. عنود: فدييتك حمداان... دخيلك..ماعندهم حد اييب الفساتين .. حمدان: اوففف... عنود احين انا امج مطرشتني اسير اشوف تجهيزات الفواله والعشا..قسم بالله مب فاظي..ولازم اسير احين.. عنوود: ومتى بترد؟؟ حمدان: بعد مااخلص شغلي كامل...يمكن عالساعه اربع جي... عنود: خلاص خلهن في سيارتك ويوم تخلص شغلك مر عليهم وعطهم الفساتين...فديتك... حمدان: اووففف.. انزين هاتيهن.. شل كيسة الفساتين وروح عنها... في بيت قوم عبدالله... نورة وحصه وعليا.. من الظهر سارن صالون كنوز لبنان عشان يتعدلن.. ويتجهزن... وتمن فيه لين 5 العصر.. عليا خلت عيالها عند فطيم وشيخه.... بس يوم وصل العصر وعليابعدها مايت..راحت شيخه فوق عشان تجهز..وتتعدل وآمنه ومنى ومنال ويااها..وخلوا فاطمه اروحها لانها الوحيده اللي تعرف اجهز نفسها بسرعه .البنت خبيرة بالمكياج ومسويه برووفه وعارفه بالضبط شو بتسوي بشكلها وشعرها... .. وتمت فاطمه مسكينه يالسه في الصالة ويا سلامه وهلال الصغير.. ام خالد حدث ولاحرج..مسكينه حتى ماتسبحت لين الحين وهي مرتبشه... وطبعا ميرة كانت فبيت اهلها عند اختها العروس.. وحمده فبيتها تجهز وتجهز عيالها وياها... عبدالله وسعيد يسيرون رباعه وايوون رباعه..ماتفارقوا... .. يوم يت الساعه اربع العصر..حدر حمدان بيت عمه وشاف الكل يركض ولاهي..ظحك عليهم وعرف انه محد متفيجله.. وقف سيارته في الحوش ودخل "كعادته" الصالة بدون احم ولا هود.. ووقف محله وهو "مشدووه"... شاف الجمال كله جدامه ..لا وبعد مظايق... وهي فطوم... فطوم كانت لاهية ويا هلال واتابع سلامه بنظرها... وحمدان يتامل فيها بوقاحه..مستغرب منو هالحلوه اللي فبيت عمه... ومن وين يت..!!.. قرر انه يعرف بنفسه وبكل جرأة..تحنحن عند الباب وهو منزل راسه... حمدان: احم احممممممم..السلام عليكم.. فطوم من سمعت صوت ريال غريب شهقت وتغشت..وويهها قافط من فظيحتها... ووقفت وهي بعدها ماسكه هلال بين يديها... فاطمه: مرحبا وعليك السلام... حمدان الخبله رفع عينه صوبها و مانزلها عنها.. قاعد يطالعها ويقول ياحيها فيها معنى وتغشت عني..بس خساره ابا اشوفها.. وعلىهالحال مارفع عينه عنها.وهي مسكينه اصلاماتدريبه وين يطالع من غلظ غشوتها.. حمدان: شحالج الشيخه؟؟؟ استغربت فطوم...منو هذااللي حادر عليها ويسلم وشحالج ..ولا بعد قاعد يمشي و يجدم صوبي...!!!.خسك الله يالخسف ياللي مافيك ادب...ماتشوفني بنية اروحي في الصالة..!!!.. فاطمه: بخير الله يعافيك ...!!! منو بغيت؟ حمدان: هااا..؟؟... هي انا حمدان بن محمد.. ولد عم عبدالله... السموحه منج مادري ان حد غريب في البيت يوم حدرت.. عصبت فطوم...غريبه فعينك يالطوَ لوَ ل... هذا بيتنا بعد مثل ماهو بيتك وبسكن هني قريب عشان الجامعه... فاطمه: مسموح بس انامب غريبه... حالي حالك.. حمدان: افاااا ..بنت عمي وانا مادري عنج؟؟؟ فطوم...طالع هذا...!!..ينكت بعد..!!..طاح حظك ويا هالراس... فاطمه: لا مب بنت عمك.... انا بنت هلال السويدي .. وحرمه عمك تستوي عمتي... المهم شو بغيت اخوي؟ تعمد يتجاهلها... حمدان: ياحي هل الشارجه والله.... خت سعيد يعني انتي.. فطوم تتافف وبدت تتنرفز..لو مب الادب اللي فيها جان شلت العيال وخلته يتحرطم اروحه في الصاله.... فاطمه: هي نعم خت سعيد... حمدان: والولد هذا ولد منوو..البنت اعرفها بنت عليا... فاطمه: هذا هلال ولد فيصل..... ولد بنت عمك يا راعي البيت... حمدان في خاطره ..آآآآآخ خليت انطباع مب زين عند البنت.... بس ماروم اقاوم.. خلني اغلس عليها شوي... حمدان: لا والله..؟؟... ياحليله اخر مره شفته كان فبطن امه...هاتيه بحبه.. ومد ايده صوبها يبا يشل منها الولد... هو اصلا لا يبا يحبه ولا شي.. بس يبا يتقرب اكثر ويخوفها... البنت مسكينه حظنت الولد اكثر وردت على ورا.. فاطمه: صبر صبر...وين ياي؟؟ وقف حمدان وهو كاتم ظحكته...مب رايم يتحمل بينقع من الظحك في اي لحظه...قسم بالله فنانه البنت دشت المزاج... قعد يراقبها وهي تحط هلال الصغير في الكرسي ماله.... وابتعدت.. يا هو عاد وشل هلال وحبه..ورد حطه..وفطوم تراقب... حمدان: انزين الشيخه ..السموحه عالازعاج.هالكيس فيه فساتين نورة وحصه.... اذا ماعليج امر تعطينهن اياه يوم بتشوفينهن... فاطمه: ان شاء الله بعطيهن اياه... حمدان: بروح انا...شي في خاطرج علينا الشيخه.؟؟ فطوم في خاطرها..(مقفاك لو سمحت يعني)... اون شيخه وشيخه كل شوي...شاخ ويهك وطاحت ظروسك قول آمين.... فاطمه: سلامتك اخوي... حمدان: الله يسلمج الشيخه..فمان الله.. وطلع ..واول ماطلع من البيت نقع من الظحك... حمدان واحد مينون...ولا تهمه رمسة الناس وتفكيرهم فيه..المهم هو واثق من نفسه ومستانس..وهالبنت عيبته وحب يغلس عليها شوي... لان حمدان من يحط حد في باله خلاص هالشخص مايسلم...وفي النهاية يحصل اللي يباه...رغم كل شي... ومن احين اقولكم... هالبنت دشت مزاج حمدان وبالقو بعد.... اما فاطمه..الود ودها تنفيه لكوكب المريخ يعيش هناك احسن....قليل الادب..!!! على الساعه خمس وصلن خوات المعرس... وكل وحده منهن تقول للقمر قممم وانا بقعد مكانك...خصوصا حصه... مسوين لها مكياج هندي رهييب ويناسب على فستانسها الاسود.. ولفت شعرها بتسريحه نازله مثل ماموصنها خليفه... وماتدري بالضبط ليش تسمع كلامه...بس صدقه يمكن حد يحسد شعرها..بس بعد حتى وهو بتسريحته يبين انه كبير وطويل ... ..عليا حطولها مكياج خفيف يناسب فستانسها العنابي ولفت شعرها بتسريحه..نورة.. تشرطت في مكياجها لين ماتعبت راعية الصالون..بس النتيجه تستاهل.. نورة فاهمه على ويهها وتعرف شو مناسب حقها.. في النهاية طلعت غاية في الجماال والرقه والنعومه..مكياج كحلي طبعا مع خصله كحلية مشبوكه مع شعرها في التسريحه.. وطالعه جنان....بس رغم هذا حصه كانت شي ثاني الصراحه... اول ماوصلن البيت ركبن كلهن حجرة نورة وحصلن فطوم هناك .. سلامه تلعب وهلال راقد وهي مسكينه تعابل عمرها تتمكيج وتتعدل.. فاطمه: يييييتن...؟؟...اوووش اوووووش شو هالكشخه كلها ....قسم بالله مسكتاااات كلكن.... حرمه اخوووووويه.. فذمج ادقين لاخويه يشوفج قبل ماطلعين...خليه يتمعن فيج عدل.. عليا: هههههههه لاتوصين حريص... اكيد اني براويه..اصلا انا مااثق بنفسي الا يوم احصل مدحه من عند فصووولي... نورة: يالله يالله...فصوولي بعد....قسم بالله التدليع عليه غلط ريلج..من كثر ماهو صارم.. عليا: جب يالله...الا جدامكم هذا... فاطمه: هي والله...الحب كله يطلع عند عليا ... حصه: ههههههههه الله يخليكم لبعض يارب... فدييته هلال رقد..!! فاطمه: هي رقد عقب ماعذبني وفشلني جدام ولد عمكن.... امحق ولد عم... حصه: اي ولد عم.؟؟؟؟؟؟؟؟ فاطمه: واحد حدر عليه اسمه حمدان.. نورة: هههههههههههههههههههههههههههههه هه قسم بالله دريت انه هووو.... شو قالج؟ فاطمه: خليها مستوووره بس تراه قليل ادب... المهم ياب فساتينكن وعلقتهن في الكبت حقكن.. حصه: فديييتج والله..وماعليج من حمدان دواه عندي تراه مينون... سارت حصه وبطلت الكبت وطلعت الفساتين....مايحتاي اقول انهن بروعه فستان عنود...على طول البنات تلبسن هن وعليا وكل شوي كل وحده منهن تمدح في الثانيه... ونزلن نوره وحصه لانه عليا بعدها بتجهز سلامه وهلال... اول ماوصلن تحت عبدالله كان داش البيت مع سعيد..على طول ترابعن للصالة وسكرن الباب...بس عقب شووو.. سعيد شافهن..او بالاحرى شاف نورة وهو قلبه وصل حلجه..محلاها..ياربي محلاها... اول مره اشوفها بفستان ومتكشخه جي والشيله ساري..غربلج الله يانوروه بتنحسدين... عبدالله احترق ويهه من الموقف... الله يخسكن جان مابغيتن تنزلن الا يوم دشينا نحن البيت...مساعه داخل وماحصلت حد موجوود...!!..احين طلعتن..؟؟ عليكن توقيت... !!... بس طنش السالفه وقال لسعيد يترياه شوي..ودخل ورا خواته الصاله... من فرحته ماحب ينازعهن... يوم ملجته شو عليييه.... عبدالله: ياســـــــــــــــــلااااااااا ااااااااااام على هالكشخه كلها...انتن مب خواتي... اخبركن لاتحظرن اخافكن تغطن على حرمتي... حصه: ههههههههه شكرا شكرا عيونك الحلوه... عبدالله: لا الصراحه صدق صدق.... مسكتات...بتنخطبن ثنتيناكن اليوم.... نورة: الله لايقوووول...جان حصه برايها انا بعدني ماريد... حصه: لا والله..؟؟!! شو قصدج يعني تخرجت وصرت جاهزه للعرس على طول..؟؟؟ نورة: هي عيل شووو... عبدالله: اسكتن...المهم نحن نبا نسير فوق واخاف حد يطب فويووهنا...نبا حد يسويلنا درب.. نورة: منو بيطب عليكم؟؟ كلهن في الحجر ماعليكم.. ماعندنا حد يسويلكم درب ونحن مانروم نظهر.. عبدالله: ماعليه... سيرن عاونن امايه فديتها والله لين احين ماتجهزت....خلنها تفظى لعمرها شوي سدن عنها الشغل.. حصه: ترا نحن عشان جي نازلين من وقت.... عبدالله: خلاص برايكن... نورة اخبرج.. انا خليت كيمرة الفيديو في شنطتها في حجرتج... وحده منكن تمسك الكيمره وتصور لي عنوود...ابا تصوير عدل وتركيزعلى كل شي ... نورة: ولا يهمك..بنصور لك... عبدالله: هيي..وحدكن في التصوير لين 11..لاني بشل الكيمره وبصور الشباب.. بيني وبينكن هالرمسه بس ترا ناوين نسوي رزفه... حصه: اللـــــــــــــه كشخه...خلاص ترتوووب..يالله روح مسكين سعيد يترياك برااا.. عبدالله: براااايكن ...باي وطلع عنهن عبدالله وركبوا هو وسعيد فوق لحجرة عبدالله يتسبحون ويتكشخون.. وكان الوقت ذيج الساعه خلاص المغرب... بعد صلاة المغرب على طول بدن الحريم يتوافدن على البيتين.. نورة وحصة وعليا يستقبلن ويظيفن ويرحبن...كملوا ساعتين عقب كلهم ركبوا في السيارات سايرين صوب بيت العروس... خالد شل امه وياه ووياها حرمه خاله... فيصل شل عليا وعياله وامنه وعيالها..ويالله يالله سدتهم السياره.. سعيد شل فاطمه وشيخه ومنى ومنال وتبع باقي السيايير.. ناصر شل حرمته وروح.. نورة وحصه سارن ويا المعرس وهو حاشرنهن بالاغاني والربشه...وده يرزف من احين الريال... اما بو خالد وبو فيصل من العصر في بيت محمد ابو العروس.. اما باقي الحريم اللي كانن فبيت قوم بو خالد فكل وحده ركبت مع دريولها وتبعن السيايير...صوب بيت محمد... بعد ماوصلوا بيت محمد..الشباب نزلوا وعلى طووول ساروا صوب الخيمه وين باقي الرياييل..... والحريم كلهن نزلن وسارن صوب الميالس وين بيحطون الحريم...واصلا كان الميلس من قبل متروس حريم..الكل عاد سلم على الكل واستوت الخبصه... البنات نورة وحصه حليلهن كل شوي يسلمن على حرمه مايعرفنها...حتى انهن احيانا كانن يسلمن على الحرمه مرتين.. كلهن نفس الاشكال( براقع وشيل ومدربحات).. والكل كان يسال عنهن بنات منو ومخطوبات او لا...وانتوا تعرفون كيف الحال في الاعراس وحفلات الخطوبه والملجه...ماشي موضوع غير العرس والخطبه...ويوم طفح بهن الكيل قررن يروحن عند عنود ويقعدن عندها ويصورنها على راحه لين ماتنزل.. وبينزلن وياها... نورة زخت فطوم وسحبتها وياها وهي تقولها.. نورة: شو تبين تقعدين عند العيايز والحريم..؟؟..كل ساعه بيتخبرنج منو انتي ومخطوبه والا لا..تعالي ويانا ابرك... وسارت وياها فطوم بدون نقاش.. ووصلن لغرفة عنود بدون مايشوفن اي كندوره بيظا وحمدن ربهن على هالشي..يوم دخلن عليها حصلنها مخلصه مكياج وتسريحه وكل شي ..و كانت بكل بساطه..عروس بمعنى الكلمه بحلاتها..... ويالسه اروحها مسكينه بعد ماتخلووا عنها كلهم ونزلوا عند الحريم...وحليلها عنود فرحت يوم شافتهن..كانت مرتبكه مووووت.... بس البنات من كثر مايمدحن فيها ويشجعنها ريحنها شوي .. بطلت نورة الكاميرا وقعدت تصور .. واشتغل الخبال و كله طلع في التصوير... عنود ماخذه راحتها وقعدت تستهبل هي وبنات عمها ..والخبله نست انها عرووس..فطوم ماحبت تظهر في التصوير فقعدت ورا نوره اللي ماسكه الكيمرا.. وشغلن الاغاني وكل شوي حد من الحريم يدخل عليهن...مره ام سلطان..ومره ام خالد... ومره ميرة.... والا عليا..نورة كانت فارة الشيلة والعباة عشان تاخذ راحتها..وفطوم شيلتها على جتفها لانه محد غريب... حصه كانت يالسه عدال عنود كل شوي ترمسها وتعدل فيها شي وتظحكها.. بعد شوي بطل خليفه الباب وحدر على قوم عنود وهو بروحه مختبص ولا يدري ان عندها حد.. ركظت نورة ورا الباب واندست وفطوم تغشت وغيرت مكانها..مسكين خليفه يوم شاف البنات رد على طول يسكر الباب وهو لين احين ماشاف وحده منهن ولا عرف منو هذيلا.... وتمن البنات مب عارفات شو يسون.. نورة: حصووه طلعيله.. حصه: شو اطلع خبله انتي...شيلتي ماتغطي شي... نورة: تشوفيني انا بلا شيله ولاعباة يعني اناا للي اطلع..؟؟ سيري شوووفيه شو يبا.. تاففت حصه..صراحه فشله تطلع جدامه وشيلتها اصلا ماتغطي شي... يعني لو مب لابستنها احسن بعد... توكلت على الله وتغشت وطلعت له... ردة فعل خليفه حدث ولا حرج... بهّت مسكين وهو يشوف حصه جدامه بهالحلاة والكشخه...كل شي مبين طبعا الشيله ماتغطي ....وعطرها اللي فرر راسه فرررر... بس قفط ويهه ونزل راسه.... حصه: هلا خليفه..شوبغيت؟ خليفه: احمم.. حصه ماعليج امر عطي هالدفتر عنود وخليها توقع هني على وثيقة الزواج... حصه: اهااا..اوكي هاته.. شلت الدفتر منه وردت تدخل داخل وعقت غشوتها... وحطت الدفتر جدام عنود اللي ياها رعب فظيع من شافت الدفتر...وعرفت ان المساله خلاص مافيها تراجع...بس من شو هي خايفه...؟؟ .. هذا ارتباك لا اكثر.. حصه: اندوج حرمه اخويه الموقرة... توقيعج لو سمحتي... عنود: على ظمانتج ياحصيص ان اخوج ريال زين... تناقعن كلهن من الظحك... حصه: خسج الله يالحماره هذا من اولها تشكين بنزاهته؟؟.. انتي متربيه وياه وتعرفينه وتموتين فيه بعد..يالله وقعي بلادلع بنات..اخوج يتريا برااا... وقعت عنود ويديها تتنافض... وردت حصه تغشت وشلت الدفتر لخليفه.. وعطته اياه... ابتسم خليفه ابتسامه تخبل من هالابتسامات اللي ايـيـبـن لحصه اضطراب معوي... خليفه: مشكوووره..وعقبااااااااااااالج ياحصه... قفطت حصه... حصه: وعقبالك انته بعد ولد عمي... تامر عشي ثاني؟؟ خليفه: هممممممم بييكم سلطان وابويه بعد نص ساعه تقريبا يودون عنود صوب الميالس... خلكم جاهزين.. حصه: ان شاء الله..نحن من احين جاهزين... خليفه: تمام عيل...فمان الله.. حصه: الله وياك.. وردت تدخل تخبرهم باللي قاله خليفه.. عنود: ياوييييييييييييييييلكن ان خليتني برووحي وانا سايره... ترا بطلع لكن القروون يوم بتحول بيتكم..تسمعني؟ نورة: ههههههههههههه الله يعينا...من احين تتحلف لنا البنت... عنود: لو سمحتي انا مب بنت..خلاص وقعت واستويت حرمه... كل هذا والتصوير شغااال بالدس عشان عبدالله صدق يظحك على عنود ويعرف شو مسويه قبل ماتنزل... المهم مر الوقت ونزلوا عنود صوب الميالس ولبسووها الشبكه..ويلست وماتم حد ماسلم عليها..والتصوير شغال. من جهة ثانية..ام سيف الشامسي اللي كانت معزوومه وهي من اصلا من معارف ام سلطان.. تخبرت ام سلطان عن بنات حمد تبا تشوفهن..ويوم شافتهن..طابقت بالوصف اللي عطاها اياه سيف على البنات..وعرفت انه يقصد حصه...واعترفت بذوق ولدها الرفييع...لانه حصه ماعليها كلام... تخبرت ام سيف ام سلطان عن حصه .وعن وضعها.وقالت لها انها كبر عنود واسمها حصه وتوها متخرجه ومب مخطوبه ولا محيرة لحد... وعلىهالحال ارتاح قلب ام سيف لانه البنت صدق دخلت في خاطرها مثل مادخلت فخاطر ولدها قبلها.... تعشن الحريم وعلى الساعه عشر ونص و11 الكل قام ينسحب ... طبعا عبدالله ماخلووه يدش... ولو انه شن حمله اقناااع اخييره كمحاولة يائسه..لكن الشيبان رووسهم يابسه... No Way ومثل مايووا بيت محمد ..بنفس الترتيب رجعوا بيت بو خالد...عبدالله وسعيد وصلوا البنات وردوا يطلعون بعد ماشلوا الكاميرا صوب بيت محمد...عشان الرزفه اللي مرتبينها... وطبعا يوم وصلوا ماحصلوا حد من الرياييل الكبار..كلهم شباب... واشتغلت الرزفه لين الساعه 1..وماتم حد مارزف ويبس جدام الكاميرا... وشي اكيد ان حمدان الوسيم والخقاق غطى عليهم كلهم... وكانت فعلا بالنسبه لعبدالله ليله من العمر ماتنسى مووووووول...وحمد ربه ان كل شي تم على خير...وصارت عنود حرمته على سنه الله ورسوووله... ~( الله يوفقهم..قولوا آمين)~ بانتظار الردود  |
||
|
|
|
18-07-2006, 06:01 PM
|
رقم المشاركة : 26 | |||||
|
هلا نوناااااا صديقتي الصدوقة اقتباس:
قولي لي وش الي مفروض اتذكره؟  وتعليقي على الجزء 13/ احس ان سيف وخليفه بتصير بينهم مشاكل عشان حصه امممم صح وفي شي لفت انتباهي انهم مره يحبون مكرونة الباشميل يعني مو انا الحالي الي احبها  وصرااحة!! القصه مره مره حلووه وكل مالها وتحلوو اكثر تسلميين يا قمر اما تعليقي على الجزء ال14/ اقتباس:
هااو اجل متى بيدش ويلبسها الدبله والشبكه؟؟  موب صاحيين؟؟ خلاص هي زوجته الحييين لو بياخذها حلاله  صرااحه غيريببيين.؟؟ نونا كل الاماراتيين كذا وصرااحه من اكثر الشخصياات الي جد اعجبتني شخصية حمدان قسم بالله هالولد تحفه لوووول يسلمو يا قمر بدت القصه تحلوو والله والاحدااث تتطور بنتظاار الجزء 15
|
|||||
|
|
|
19-07-2006, 04:21 PM
|
رقم المشاركة : 27 | |||||||||
|
|
اقتباس:
اقتباس:
اقتباس:
مو مثل اسم الشيخ فزاع اسمه حمدان بن محمد بن راشد آل مكتوم هذا الشي صديقتي هي اللي نبهتني عليه بس أنا أصلا اذا جيت أتخيل حمدان ماقدر أتخيله الا بشكل فزاع اقتباس:
حبيبتي هذولي امارتيين تتوقعين يصير بينهم مشاكل عشان حرمه اقتباس:
اقتباس:
الاماراتيين عندهم أم المعرس هي اللي تلبس العروس الشبكه هذا اللي أعرفه حتى ان المعرس ممنوع انو يشوف العروس الا ليله العرس بعضهم طبعا مو كلهم اقتباس:
ههههههههههههههه.......أحلى شي يوم...........والا أقول اقريها انت الله يسلمج يالغلا>>>>>>ترها ناويه تقلب اماراتيه
|
|||||||||
|
|
|
19-07-2006, 04:26 PM
|
رقم المشاركة : 28 | ||
|
|
|
||
|
|
|
19-07-2006, 09:09 PM
|
رقم المشاركة : 29 | |||
|
يا حليلهممم والله |
|||
|
|
|
20-07-2006, 10:40 AM
|
رقم المشاركة : 30 | ||||
|
|
اقتباس:
جبتها على الجرح.............. هلا الغلا كيفك اقتباس:
أخليك مع البارت الجزء السادس عشر
يوم السبت بعد المغرب..كان عبدالله وخليفه يالسين في الميلس الصغير.وبينهم عنود.. ووويهها غادي طماطه... وعبدالله يطالع خليفه وهي مرصص عيونه.. وخليفه يغايظ ومستوي مثل الشوكه فباللعوم..مب طايع يطلع... عبدالله: ياخي فااااااااااااارج... خليفه: آسف جدا.... عبدالله: خلوووف ...قسم بالله عيب عليك...صارلي نص ساعه يالس ابا ارمس البنت ومب مخلني.. خليفه: عندك التيلفون ترمسها في اليوم كذا مره...تقعد وياها اروحك بعد ليش..؟؟ عبدالله يعرف ان هالمنطق مب منطق خليفه...بس يالس له يبا يغايظه لا اكثر....فظحك..ونش ومسك خليفه من ايده وهو يسحبه صوب الباب.. عبدالله: هههههه خلاص يابابا مالك سلطه عليها...انا ريلها احين وانته برااا... خليفه: قم قم عني... ريلها اون....عرس اول..عقب انفرد على كيفك بها... وعنود يالسه وتظحك عليهم... وعبدالله بدا يتنرفز... عبدالله: خلووووووف... لا تعصبي.. وقف خليفه مجابل عبدالله وهو يظحك...وفكر.. خيبه لو اخطب حصه كيف بيسبلبي عبدالله وهو ينتقم... احسن لي اوقف المغايض... مسك خليفه ويه عبدالله بيديه الثنتين وباسه على خده... خليفه: حبيبي انته... وخلاهم وطلع وسكر الباب وراه... صد عبدالله صوب عنود وهو يتبسم... عبدالله: شفتي اخوج يتروع مني... عنود: ماينلام...متخصص طب يخافك تسوي فيه تشريح والا شي... ظحك عبدالله وتقرب ويلس عدال عنود...واخيرااا ارووحه وياها ..وياسلاااام يشوف شعرها ..ويقدر يمسك ايدها بس مب متجرأ... قعد يسولف وياها ويظحك.ومر عليهم الوقت شوي....ويوم يابت طاري الشغل هز راسه بشكل قاطع... عبدالله: لا... عنود: عباادي..دخييلك..انته بتغيب سنه انا شو اسوي فاظيه هالكثر.؟؟ عبدالله: استعدي للعرس..تشري الزهاب وتمتعي..عنبو توج متخرجه تولهتي على الكد من احين تبين تشتغلين؟؟ عنود: شو ... استعد في سنه كامله عنبووو... عبادي دخيلك والله بتم ظايجه.. عبدالله: شييييييييلي هالفكره من بالج نهائيا عنوووود... مب محتايه الشغل انتي.. برطمت عنود... طالعها عبدالله بنص عين... عبدالله: لا تبرطمين لي..... بلاها هالاغراءات هاي... نسيت عنود زعلها وماتت من الظحك...اسميك ياعبدالله مفظوح... وهو ظحك بعد على عمره..وتمت عنود تظحك وتظحك وهي تفكر باشياء مايدري عنها عبدالله ومارامت تمسك عمرها عن الظحك...وهو يطالعها ويظحك عليها مايعرف شو اللي ظحكها هالكثر... ويوم مصختها مسك ايدها وعظها بقووو عشان تسكت... بس الخبله تظحك اكثر لين مادمعت عيونها.. عبدالله: بسسسسسسسسج...بسم الله اطالع الويه والعيون مدمعه...هههههههه شو يظحكج هالكثر.؟؟ عنود: ههههههههههههههههههه آآآآآخ تعبت من الظحك.... بموووت بطني يعورني.. عبدالله: بسم الله عليييييج....عشووو تظحكين بالله..؟؟؟ عنود: ههههههههههه مااااشي.....المهم احين شوووو؟؟ عبدالله: شووو شووو بعد؟؟.. بسيطه لا تبرطمين....وبس... عنود: هههههههههههه لا ويا هالويه...بخصوص سالفه الشغل... عبدالله: ماشي شغل..يوم بتحيدين ريلج فلسسس.... واهلج يشحتون في الشوارع.... ذيج الساعه قولي بشتغل. على هالحال طبت عنود سالفه الشغل..ماتروم تزعل عبدالله عليها..دامه مايباها تشتغل... مابتشتغل....بعد نص ساعه طلع عبدالله من عندهم لانه متواعد ويا ربعه يتعشى وياهم... حصه ونورة كانن يالسات في حجرة حصه..يسووولفن... نورة: تصدقين من امس رزفه حمدااان فبااالي...ياخي خطير ولد عمي ماشاء الله عليه.. حصه: اخييرا حنيتي علىالولد مسكين... نورة: اللي يسمعج يقول اني مذوبتنه..لالا ..ماباااه..طويل وايد عليه... حصه: تعالي شو سالفته ويا فطووووم؟؟؟ والله حركاته في الحوش تنقع من الظحك... عليه نظراااات...؟ نورة: والله مادريبها ماخبرتني شي عنه..بس شكلها طفرانه منه شي مسوبها... تحيدين عاد انتي حركات حمدان.. حصه: اسمعها تتقحطن عليه وتسبه...ههههههه بس بعدني بطلع منه السالفه.. نورة: تعالي ماخبرتيني سالفه الريال اللي يرزف ويا خليفه... حصه: هيييييييييي صح...تذكرين يوم كنا فبيت عمي قبل كم اسبوع....!! نورة: هي.. حصه: يوم نسيت الكاتلوج ورحت اييبه من تحت؟ نورة: وبعدين؟ حصه: طلع الكاتلوج في السياره..يوم سرت اييبه من السياره تلاقيت ويا هالريال طالع من الميلس وانا بلا غشوه بس كنت متحجبه..وشافني وشفته..بس مسكين نزل راسه وروح يوم انا تغشيت ودخلت بعد.. نورة: لا والله..؟؟؟.... ملامحه هادية وشكله حبوب... حصه: خليفه مايرابع الا اللي نفس طينته .... نورة: تعالي صدق...على طاري ولد العم خليفه الموقر... اشوفه حركات وياج...شو سالفتكم؟ انحرجت حصه....وفي خاطرها تقول تساليني؟؟ اروحي انا ماعرف شو سالفته... حصه: اي حركات انتي بعد..؟؟.. من متى خليفه والا انا نسوي حركات؟؟ نورة: لا والله خلي عنج... اشوفه انا يعاملج غير هالفتره...وانا لابسني كالعاده.. حصه: همممممممممم والله تبين الصدق يانورة...بروحي مادري عنه...انا ملاحظه ان تصرفاته تغيرت...بس لين هني وبس.. لا اكثر ولا اقل... نورة: اطاعي فويهي وصارحيني...اذا يا خليفه وخطبج....بتوافقين عليه؟ سكتت حصه وماقالت شي.... في خاطرها هي الجواب معروف.... هي بتوافق.... وميت مره بعد بتوافق على خليفه...ليش هي بتحصل حد احسن من ولد عمها؟؟..والحق يقال انها ماكانت تعتمد على مشاعرها ...بس كانت تنظر له بعين منطقية....خليفه مايعيبه شي وفوق هذا ولد عمها...ليش بالله ترفض؟؟؟ ... بس دست هالسالفه في قلبها... حصه: والله يانوروووه لا هو يا يخطب ولا انا حد شاورني به عشان اقولج موافقه والا لا...وبعدين مااظن.. نورة: ليش يعني؟ حصه: ما احس ان خليفه يبا يعرس احين...وبعدين انا من متى جدامه لو بغاني بيخطبني من سنين مب الحين....المهم طبي سوالف العرس خلينا ننزل تحت... وطبن السالفه هذي ونزلت ويا باقي الاهل عشان يتعشوون... بالباجر العصر ام سيف كانت تكلم ام سلطان في التيلفون...وترمسها عن سالفه حصه..وصارحتها بانها تبا تخطبها لولدها سيف... ام سلطان حزت في خاطرها السالفه..محد كثرها كان يتمنى حصه لخلفيه..لكن الولد رفض من زمان وماتبا تضغط عليه..وبنفس الوقت مابتقطع نصيب البنت... وقالت لها ان حصه ماعليها كلام واختيارهم ممتاز... وام سيف وكلت ام سلطان عشان تخبر ام خالد انهم بيمرون عليهم باجر المسا..عشان ترمسها في السالفه...ووعدتها ام سلطان بخير...وانها بتكلم ام خالد وبتظبط لها كل شي... اتصلت ام سلطان بام خالد..وخبرتهابالسالفه... وقالت لها ان الحرمه تبا تشوفهم وتتعرف عليهم عن قرب وتشوف البنات..بس وصتها ماتخبر البنات بالسالفه.. عشان يكونن على طبيعتهن..يعني عادي يطلعن ويسلمن عالحرمه..وبعدين بترمسها ام سيف بالسالفه... وام خالد رحبت بهم وقالت لها انها بتترياهم.. ام خالد غصبن عنها فرحت بهالسالفه... وهي تعرف ان قوم سيف الشامسي عرب ماعليهم كلام.... وسبحان الله يمكن هذا نصيب بنتها... واللي تعرفه عنهم ان سيف هو ثاني الاولاد.. وابوه متوفي ..وعنده اخو اكبر عنه معرس وعنده عيال.. اما اللي اصغر من سيف حد في الجامعه وحد في المدارس...وعنده اخت صغيره في المدرسه بعدها... وماكد سمعت ام خالد عن هالعرب شي شييين او يعيب...عشان جي خبرت شيبتها بالسالفه..وانهم يبون يخطبون حصه... ام خالد: شو رايك يابو خالد؟ بو خالد: على خير ياموزه...خلهم ايوون ويرمسون ..وبنتخبر نحن عن هالعرب... ام خالد: الريال اللي يبا يخطب حصه ..عمره 25 سنه..وربيع عيالنا..عبدالله وخليفه..وانا شفت امه في الملجه.. حرمه سنعه ماعليها قصور... وراعية واجب واصول...مزروعية من سويحان.. بو خالد: هيي...زين عيل يوم يعرفونه بيسهلون علينا السالفه...وعلى خير ان شاء الله.. ام خالد: بس انا قلت يابو خالد ان البنت..يمكن يباها ولد عمها....!! بو خالد: خليفه؟؟؟ ام خالد: هي خليفه... وانا الصراحه كنت اتمناه لحصه... ولدنا ومتربي عندنا... واخاف ان البنت فخاطره لكن مارمس لين الحين... بو خالد: والله ياموزه لو الولد يباها بيخطبها من زمااان...وهو لا رمس ولا لمح لاي حد ان يباها... ام خالد: والله مادري شو اقولك...انا خوفي انه يباها .... ليش ماتسالونه؟ بو خالد: شو نساله يابنت الناس...!!!...اسير اقوله تبا بنتي والا لا؟؟ بيستحي مني وبيقول هي اباها...حتى لو هو مايباها.... لالالا هذي خرابيط اول وانا مابحكم على بناتي بهالطريقه... نصييبها اييها لين عندها...وهالشي محد يتحكم فيه...النصيب نصيب... ام خالد: صح كلامك... على بركه الله ان شاء الله... والله يكتب اللي فيه الخير... وهذا اللي صار... الاثنين بعد صلاة المغرب وصلت ام سيف ووياها حرمه ولدها واسمها حسنه ويت وياهم ام سلطان....ام خالد وميرة وحمده استقبلن الحريم ودخلوهم الميلس الصغير ..وهم يسولفن وياخذن علوم بعض..بعد ربع ساعه نزلت حصه مع نورة وهن لابسات شي بسيط..جلابية مفصصه وشيله سودا..وروج بس... وطبعا محد خبرهن بالسالفه ان هالحريم يايات يخطبن... سلمن على الحريم ويلسن وياهم شوي... بس بعدها ماعيبتهن اليلسه..كلهن حريم وكبار وسوالفهن غير سوالف البنات...عشان جي شلن عمارهن وركبن فوق للصالة ..المهم انهن ادن الواجب وسلمن ويلسن شوي ...وام سيف بعد ماشافت البنت على طبيعتها وبدون مكياج..حلت في نظرها اكثر واكثر... تعرفون انتوا العيايز مايعيبهن التلطيخ في الويه....وتوكلت على الله وقررت انها ترمس في السالفه.. ام سيف: ام خالد..ياختي انتي تعرفين عشان شو نحن واصلينكم اليوم.. ولو انه نحن مقصرين بوصلكم..لكن ان شاء الله اليايات اكثر... بس اليوم انا يايه وابا اخطب بنتج حصه لولديه سيف... ميرة وحمده انصدمن...مايدرن ان السالفه فيها خطبه..بس سكتن..ولا قالن شي... ام خالد: هيي يام سيف...هاي الساعه المباركه والله... وترانا مابنحصل اخير عنكم... وان شاء الله اني بشاور البنت وابوها واخوانها.... وبنرد عليكم خبر في اقرب فرصه ان شاء الله... ام سيف: من حقكم يام خالد... والله انه نحن نتشرف بالقرب منكم.. وخذوا راحتكم امره بالسؤال عن الولد والتشاور بينكم...وردوا علينا خبر...والله يكتب اللي فيه الخير ان شاء الله.. ام خالد: آمين يام سيف... وان شاء الله مايصير خاطرج الا طيب... خبرت ام خالد شيبتها باللي صار..وقالها تاجل مشاور حصه لين ما يتخبر هو بنفسه عن الولد واطباعه واهله عقب اذاشافه مناسب حقها..بيشاورها.... وبالباجر وكان الثلاثاء .. زقر الشايب عياله الثلاثه بعد الغدا وسار وياهم الميلس...وخبرهم بالسالفه.. خالد وناصر كان الموضوع عندهم عادي تقريبا...عبدالله انصدم...سبحان الله كيف الدنيا صغيره..احين ربيع خليفه ياي يخطب..وخليفه نفسه مايا يخطب؟؟؟ وشو دراه ان عندنا بنات للعرس؟؟؟ اوه صح ثرها امه اظني حاظره الملجه... وسكت عبدالله...تظايق شوي لانه كان يبا خليفه ياخذ اخته...وطول عمره كان يتخيل هالشي....حاله حال الجميييع.... بو خالد: هااا عبدالله؟؟ انته الريال ربيعك وتعرفه اكثر عنا... عبدالله: والله يابويه شو اقولك....اذا على سيف ماعليه كلام ترا...ريال حشيم ومدين وخلووق..ومن عرب...ونعرفه من زمان ولا شفنا عليه شي يعيبه.... وعنده شهاده مااشاء الله ويشتغل وساد نفسه واهله بعد... ولو كان ياي حق نوره جان قتلكم وافقوا وانتوا مغمضين.... بس حصه...!!... مادري ابويه انا احس ان خليفه يباها... التفتوا كلهم لعبدالله وهم معقدين حياتهم... بو خالد: انته بعد بتسويلي رمسة امك.....!!!.. منو قالك انه يباها..؟؟ عبدالله: محد قالي بس انا احس جي.. بو خالد: كد صار ولمح لك انه يبا اختك؟ والا رمسك عشانها...؟؟...والا اي شي يدل انه يبا البنت؟؟ عبدالله: لا يابويه وانته تعرفه خليفه كتوم وايد وحشيم.. بو خالد: انا ادري بخليفه.. ومحبتكم له هي اللي تخليكم تتخيلون انه يبا اختكم.. لانكم تتمنونه لها.... بس الولد لا يباها ولا رمس عشانها...وهي جدامه من سنين ونحن نرد عنها عشان دراستها بس لو هو ياها مابنرده وهو يعرف هالشي...وراه عيل مايا يخطبها؟؟؟ سكت عبدالله وماقال شي...كلام ابوه منطقي....فعلا خليفه ماكد لمح لاي شخص انه يبا حصه...وحتى لو يباها..ليش ماخطبها من متى...!! بو خالد: لا تطرون سالفه الخطبه هاي لحد... لين مايستوي الموضوع رسمي عقب بنرمس ..اما خليفه مابنغصبه على بنتنا...وهو بيتم تراه ولدنا ونفتخربه... خالد: صح كلامك يابويه..بس بعد لازم نتخبر اكثر عنهم.. بو خالد: انتوا تخبروا عنهم... وخص انته ياعبدالله..بس مثل ماوصيتكم لا اطلعون هاي السالفه لحد..نحن بعدناماشاورنا البنت واحتمال ترفض..واذا رفضت مب زين ان الخبر ينتشر ان هالعرب يواوخطبوا من عندنا... ووعدوا ابوهم خير ونشوا...وكل حد منهم سار يشوف شغله ومصالحه...وفعلا تخبروا عن سيف واهله طوال يومين....وماسمعوا عنهم الاكل خير...عرب حشام وماعليهم كلام....ويوا خبروا ابوهم بهالامور كلها واللي سمعوه عن هل سيف...وقرر الشايب انه يشاور بنته بالموضوع..وكان يومها الخميس في الليل.. طرش عليها يزقرها لحجرته.. كانت ساعتها يالسه مع نورة...واستغربن من هالاستدعاء... راحت حصه تشوف شو في خاطر ابووها.. يوم يت.... اشر عليها تي تيلس عداله..وام خالد مجابلتنهم يالسه عالكرسي.. بو خالد: يابنتي انا ابا ارمسج فسالفه... بس ماباج لا تخافين ولا ترتبكين.. وقبل كل شي ترا محد غاصبنج على شي... حصه: خير يابووويه شو السالفه؟؟ حصه كان قلبها منقبض وخايفه... بو خالد: حصه..يايينج عرب حشام يبونج لولدهم... بهتت حصه فويه ابوها...ومسرع ما احمر ويهها ونزلت راسها... بس مب من المستحى احمر ويهها...من القهر... بهالسرعه عنبوو انخطب؟؟؟ مشاور ابوويه حقي معناته كلهم موافقين....وانا اخر وحده يشاوروونها..ودام كلهم موافقين انا بالله كيف بقول لا..؟؟؟.. بو خالد فسر حركة حصه علىانها مستحى.... بو خالد: يابنتي الريال ربيع اخوج عبدالله... واسمه سيف الشامسي.... وعمره 25 سنه متخرج من الجامعه ويشتغل....واذا على اخلاقه واطباعه ودينه تراه مثل اخوج عبدالله وخليفه...من سنين وهو ربيعهم والكل يمدح فيه... ونحن موافقين على الريال...وانتي اباج تفكرين بالسالفه هاي عدل...وتصلين استخاره...وتردين علي بقرارج...وارد اقولها لج...محد بيغصبج على شي...اللي تبينه قوليه.. حصه: ان شاء الله يابويه.. طلعت حصه من غرفة ابوها وسارت حجرتها على طول... وسكرت على عمرها الباب...وقعدت تصيح وتصيح ...وهي مب عارفه شو سبب الصياح هذا... بس بعدين استهدت بالله وسكتت....عنبو فيه بنت ايوونها خطاطيب وتصيح بسببهم؟؟... تمت في حجرتها تاخذها الافكار وتيبها ... شو تقرر...؟؟ شو تقولهم؟؟؟ مب قادره حتى تفكر بالموضوع...وهذيلا من وين شافوني عشان ايون يخطبوني..؟؟... ومعقوله يكون هذا نصيبي؟؟...وقعدت ساعات على هالحال....لين مر عبدالله في الممر وشاف ليت حجرتها مبطل...واستغرب انها واعيه لين هالحزه... دق عليها الباب... حصه: منووووو؟ عبدالله: انا ...بطلي الباب... نشت حصه وبطلت الباب...دقق عبدالله فملامحها وعرف من عيونهاانها كانت تصيح.... حز في خاطره ... مايحب يشوف وحده من خواته تصيح....بس ماطرى السالفه علشان مايحرجها... عبدالله: بلاج حصووه لين احين واعيه.؟؟ حصه: ماياني الرقاد.. دخل عبدالله وسكر الباب وراه..ويلس عالشبريه وقالها تقعد حذاله.. عبدالله: رمسج ابويه؟ حصه: هي رمسني ... كانت حصه على وشك انها تصيح مره ثانيه..والعبره خانقتنها.... وعبدالله حاس فيها... ومب عارف شو السبب.... عبدالله: حصوووه...محد بيغصبج لاتخافين... حصه: ادري... عبدالله: عيل ليش كنتي تصيحين؟؟؟.... ماتبينه؟ حصه: مادري ... عبدالله: اذا ماتبينه قولي لا تخافين... حصه: ماااااااااااادري عبدالله مافكرت بعدني... عبدالله: هممممممم... انتي طبعا ماتعرفينه وماتعرفين شكله.... حصه: وشو رايك انته؟...طبعا ماعرفه.. عبدالله: عيل صبري شوي ...برد لا تقفلين... وطلع من حجرتها وسار حجرته.... ويوم رد كان يايب كيمرة الفيديوو الصغيرة..وفيها فلم الرزفه....ويوم طلعت لقطه خليفه وسيف...قالها عبدالله.. عبدالله: هذا هوووو.... حصه كانت افكارها متشوشه..وماشافت في الشاشه الصغيرة للكاميرا غير خليفه..التفتت صوب عبدالله وعيونها تلمع من دموعها..ملامحها كانت ملامح وحده تترجى.. حصه: هذا خليـــفـــة.....!!!!! نبرة صوتها...وملامح ويهها... عطت عبدالله انطباع ان البنت فعلا مب شايفه غير خليفه....آآآخ ياخليفه وينك عنها ماتخطبها يالسبال....اذا كنت فاكر انك بتحصل احسن عن حصه تراك غلطان.... بس بعد هاي حياتهم ومايقدر يدخل.... دقق النظر فيها وفي عيونها.... والافكار تاخذه وتيبه... عبدالله: ماطري خليفه ياحصه...اطري اللي عدال خليفه.....سيف... ردت حصه اطالع في الشاشه.... وقلبها يدق بقووووو...مستحيييييييييييل.... هذا اللي شفته في بيت عمي.... مستحييييييييل انه هو اللي ياي يخطبني.... بس حافظت على ملامحها هادية عشان عبدالله مايشك بشي...وسكتت.... عبدالله: خلي الكيمره عندج واطالعي الفلم براحه... واذا بغيتي رايي ياحصه ترا ريال ماعليه كلام... وتبين الصدق تراه يستاهلج... بس انتي فكري...وصلي استخاره...وخبريهم بقرارج يوم تقررين... حصه: ان شاء الله... عبدالله: تصبحين على خير... وطلع من غرفتها وسكر الباب وراه وقلبه يعوره.... نادر ماكان احساس عبدالله يجذب عليه.... هو حاس ان خليفه يبا حصه....واحين ومن عقب نظرة حصه...حس انها هي بعد تباه...بس شو يقدر يسوي؟؟.ابوه ربط يديه ولسانه بعد يوم منعه انه يطري السالفه جدام حد...ومايروم يقول شي...سبحان الله يمكن هذا هو النصيب... ودخل حجرته ورقد... حصه..عادت وزادت في اللقطات اللي فيها سيف... وهي اطالع سيف شوي..واطالع خليفه شويااااات....وفي عيونها نظرة عتاب.... ولو انه خليفه مب داري عنها....بس توها عرفت بس انها ماتوقعت تاخذ اي شخص ثاني غير خليفه..... وهالخطبه مسويه لها صدمه.... بس خليفه لا يا ولا خطب... وفي قلبها حصه كانت تحس ان الايام ماعطت خليفه فرصه... كان عندها شعور بان خليفه بيخطبها هي لامحاله... بس الوقت مااسعفه...وربيعه اللي ما فارقه دقيقه في هالفلم هو اللي سبقه وقطع عليه..... ياترى خليفه يدري؟؟؟؟... الله اعلم... تعبت حصه من التفكير...والتساؤلات...نشت وتوضت وصلت استخاره وقرت لها صفحتين قرآن... وبعدها رقدت لها ساعتين لين اذان الفجر... في نفس هالفتره خليفه نفسه بعد ماقدر يرقد... كان يالس على مكتبه من حوالي ساعتين ويحاول انه يكتب رساله لحصه يقول فيها كل اللي في خاطره...بس المشكله ماشي كلمات ..كلها تشرد...ماشي تعبير عنده ومب قادر يوضح اللي في خاطره.... وبعد عشراااااااااااات المحاولات طلع برساااله لاباس فيها وكانت تقول:.. " الى بنت عمي حصه... اكتب لج هالرساله اليوم وانا كللي امل بانج تفهميني صح...وماتفهمين كلامي بفهوم ثاني.. الصراحه ان مب عارف كيف ابدا بالموضوع... وماحبيت اكلمج شخصيا لاني ماريد احرجج وتبين الصدق انا بروحي انحرج من مجرد التفكير باني بكلمج بموضوع مثل هذا..... وانا بدخل بالموضوع بشكل مباشر... انا اباج تكونين حرمتي على سنه الله ورسووله... ادري بتنصدمين من كلامي هذا..لاني ماكد بينت لج اني اباج... او يمكن في الفتره الاخيره حاولت ابين بس انتي مافهمتيني... المهم هذا اللي في خاطري...واللي انا اتمناه..انج تكونين من نصيبي... بس فيه مشكله بسيطه...او يمكن كبيره ماعرف...وهي اني ماريد اخطبج الا يوم اتخرج من امريكا السنه اليايه وارجع هني واشتغل واثبت نفسي وجدارتي... وبعدها بتقدم لج وانا واثق من نفسي ومرتاح ..يمكن ماتفهمين اللي في خاطري احين بسبب هالموضوع..بس انا ابا اثبت نفسي اول قبل مااتقدم لج... وماريد حد يغصبج عشاني انا ولد عمج... بعد كم يوم انا بسافر...وبتغرب سنه...والقرار احين بين ايديج... اذا موافقه عليه..ترييني...وارفضي اللي يتقدمون لج... وانا ادري ان هالشي صعب عليج ..بس تحملي اذا بغيتيني وصدقيني بكون محظوظ واكثر اذا وافقتي عليه...وان شاء الله اول مارجع واشتغل بخطبج...وانا اعرف انهم مابيردوني...عشان جي اعرف ان القرار قرارج انتي... بس اذا قررتي العكس..تراه النصيب..وبتمين تراج بنت عمي وغاليه عليه... بس انا اتمناج لنفسي.... وهالشي افكر فيه طوال هالشهرين اللي رديت فيهم البلاد.... انا مااتريا رد منج....ادري انه شي محرج انج تقوليلي موافقه او لا...عشان جي بصبر وبعرف قرارج بعد مارجع السنه اليايه.... يعني انتي عندج فتره سنه كامله تفكرين فيها... والله يوفقج ان شاء الله ...وادعيلنا....والسموحه عالتقصير... ولد عمج خليفه" بعد مااطمن من الرساله اللي كتبها انها توصل الكلام اللي في خاطره..طواها وحطها بظرف ولصقه عدل... وطوا الظرف ودسه فبوكه.عشان يكون دايما معاه ومايطيح في ايد اي شخص...ويوم يحصل الفرصه المناسبه بيعطيها الظرف... وبعد ماقرر اللي بيسويه... رد وهو تقريبا مرتاح البال... |
||||
|
|
 |
| مواقع النشر (المفضلة) |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
