عبدالله السلوم

[الطائر المهاجر]

ماحلا المجلاس في وسط الزهر=والطيور اسراب حولك ساجعات
في رياض ربعت عقب المطر=مابها غير الوضيحي والمهاة
الجداول فيه تمشي كالنهر=والغصون الخضر فيها سابحات
ريحة القيصوم والشيح الخضر=والخزامى والنفل زادت حلاة
كل مافتح من الورد وظهر=شفت منه الوان حولك زاهيات
والسهر محلاه في ضي القمر=والنسايم بالشذى مسترسلات
واهني من عاش فيها لو شهر=ذاق بين زهورها طعم الحياة

[الطائر المهاجر]

يالله يالمعبود ياقايد الرجا=ترحم عليل يسهر الليل لادجا
ماذاق حلو النوم من مدة مضت=يعيش في همٍ ولامنه مخرجا
كن الهموم موكلات بلوعته=حاول يجنبها بصبره ولا نجا
عرضت حالي للاطباء وطبهم=وشاورت في مابي هل الراي والحجا
قالو بلاك الحب ياكود لوعته=وشلون ترضا به طريق ومنهجا
قلت ايه لو هي في يدي ما رضيت به=وسلكت غيره مسلك لو تعرجا
لا شك هذي دبرة الله وقسمته=يلزمني ارضاها عسى الامر يفرجا
ياعاذلين القلب كفّوا ملامتي=مامنكم اللي جاب لي علم يبهجا
وانتم تشوفون الجروح متمكنه=بين الضلوع وساهج الهم يسهجا
والفارس اللي صابني ما اكتفى بها=وقف جواد الغزو جاهز ومسرجا
لا نجدة جتني تفرج مصيبتي=ولا موت انهاني عن الياس والرجا
كني بها الدنيا ليا شفت حالتي=نموذج في جدول الموت مدرجا
ياصاح لوعات الليالي تلوعني=وانت السبب وشلون ما صرت محرجا
تدله وانا صرت الضحية لطيبتي=وتضحك وتسلى والزمن لك تبهرجا
وانا العليل اللي همومي تداركت=ولا عاد أميز مسلك البعد والنجا
أقضي نهاري فالتوجد وفالمنى=ويدلج علي الهم وان ليلي ادلجا
الحب سلطانه قوي ليا حكم=قد رد محسن ما اعتمر من ورى سجى
وعبد الرحيم اللي سمعنا بقصته=مطوع وشيقر شاهده طعس ابلجا
ومن الدجيما مات ما ذاق نفعته=وجلاّل عقب العز الاول تدرجا
وبصري وهو شايب ترك حبة الحجر=وطمّن على خد حسين مضرجا
وشواهده واجد ولالي بعدها=ماعنه لا مخرج ولامنه ملتجا
وانا تحملته وابسلك مجاهله=عليّ حمل مانقص عن جبل اجا
الله يبلغني سعادة نهايته=آمين يالمعبود ياقايد الرجا

[الطائر المهاجر]

نجديةٍ صادفتها بين الافواج=عرفتها مابين ساير بشرها
في ملتقى مفروض ماعنه منهاج=مكتوب يلحقني بلندن خطرها
طلبت لحظتها لو الدرب ينعاج=اخاف من عين حديد نظرها
أوليتنا في مركب بين الأمواج=نعيش غمرات الفرح في بحرها
نبعد عن أسباب المشاكل والازعاج=ونسعد نفوس حبها قد غمرها
في عينها من زايد السحر وهاج=ويضفي على الامتان خمري شعرها
لولي على درب مشت فيه معراج=سجيت لو بالحلم رجلي بثرها

[الطائر المهاجر]

ضحى البين كل شال واقفت رحايله=وانا كل مظهور عيوني تخايله
مع البيد يوم اقفوا وقفت ضعونهم=بدى الجفن دمع الحزن ينثر بلايله
وزمى دونهم من مهمه الجرد ما زمى=سرابه بنى ياسي وحامي قوايله
لحا الله نهار البين ماشين لوعته=فجعني بفرقا اللي صعيب عزاي له
وجلست افرك الكفين من زود حسرتي=وتحملت حمل منه واصبحت شايله
الا يانديمي يارفيقي وفزعتي=على جور وقت عدله اغداه مايله
لك الله لو الدنيا صفت لي وطاوعت=فلا والله اجحد من زماني جمايله
ولكن زماني بان جوره وضدني=سطت بي صغاره وادركتني جلايله
وانا الله ليا حل الدجا هجعة الملا=جلست اذكر الماضي وافتش رسايله
واراقب نجوم الليل من زايد الولع=واجاهد خفوق موجعتني دخايله
واسطر من اشعاري على صافي الورق=ابيها تخفف عن فوادي حمايله
رعى الله ليالي ذقت فيها نعيمها=تولت مثل نو تقافت مخايله
ولا عاد باقي غير ياسي وذكرها=أروم العزا واليوم ابقطع رجاي له
بقى لي من اسباب العنا ذكر ما مضى=واشوف الصبر ماهوب عني بزايله
متى الوقت يسعدني برجعة ضعونهم=وهك الجو عقب الجدب تخضر مسايله
وهك المغرم المياد يسرح مع الظبا=وانا اسرح بمسراحه واقيل بمقايله
فلا حاسد نخشاه يفسد غرامنا=ولا عاذل نصغي لما كان قايله
رجيته وابرجي لو سلامه يزورني=يجيني به الغربي بنسمة علايله
أنا اللي قنعت بما ذكر صاحب المثل=حقيقة ، فلا يعطي لك العفو سايله

[الطائر المهاجر]

ياحمام الورق وصل لي سلام=وصله بالله مني للحبيب
بلغ الغالي سلام واحترام=واخبره بالحال والجرح العطيب
من عقب فرقاه عيني ما تنام=صايرن النوم لعيوني حريب
ما بغت نفسي شراب ولا طعام=صابها شيٍ عقب بعدك عجيب
ياعذاب النفس يابدر التمام=ياعديم الجنس يالغصن الرطيب
ياحسين القد ياعذب الكلام=يامليح القد يالشكل الغريب
يامليك الروح يانور الظلام=وجهك المملوح خلاني صويب
ما يلحّق واحد مثلي ملام=لو يقول ان البعيد اخو القريب
أو يقول ان الخوال هم العمام=او يقول المخطي اخون للمصيب
كان صدك ياهوى المشتاق دام=ما نفعني لا علاج ولا طبيب

[الطائر المهاجر]

هيض الاشجان طيف مرني=في منامي عشت به لحظة سرور
طيفه اللي يوم جاني سرني=ليت راعي الطيف مع طيفه يزور
عشت ياوقت ابعرفه سرني=صاحب ما فيه زود ولا غرور
ان تفارقنا فراقه ضرني=وان تلاقينا غدا وقتي حبور
لو على شوك الكداده جرني=عندي ألين من براعيم الزهور

[الطائر المهاجر]

يقطع ربيع لو عيونك تراعيه=ما ذقت منه الا العنا والمضره
غلطان يوم انك تجي في حراويه=قد قالها العقال .. عشرين مره
اترك سبيل يوصله وش تبي فيه=مالك من المصلوح مثقال ذره
لا صار ما تطمع بنيله وترجيه=فالبعد عن طاريه عز ومسره

[نفحات حساسة]

تسلمون جميع وصح الله السنتكم

[عالي مستواها]

صح لسانه
يعطيك العافيه على النقل

[صنداح الزلامى]

صح لسانه
يعطيك العافيه على النقل
الجميل لمثل هذي القصائد القديمه