اضف قصائدك التي سرقت

[ولد بن هندي]

حبيت اوضح شيء

بعض الأعضاء في المنتديات يشوفوا قصيدة اعجبتهم

وينقلوها
طبعا ماينسبها لشاعر ولا ينسبها لنفسة
يمكن الرجال مو بعارف مين كاتب القصيدة

المهم بعد مانشرها بمنتدى
جاء اللي كتب القصيدة
وألتهمه بسرقة

السرقة الأدبية مو كذا السرقة هي أن اللي جايب القصيدة
ينسبها لنفسة

وأتمنى تفهموني

[الطائر المهاجر]

طالما لم يوضح انها له ، سواءا قبل يردون عليه الناس
او اثناء الردود ، وجاءت ردودهم عليه توحي بأنه صاحبها ... فهو سارق

[عبدالرحمن العنزي]

اخوي ابو عبدالله

الله يقويك على حفظ الحقوق

وبالعكس اللى تنسرق مثل ما قال اخوي محمد

هذا دليل ان قصايده جزله

[عبدالعزيز الرقابي]

الله يعطيك العافيه أبو عبدالله ..
طبعا ً إنت يابو عبدالله قصائدك المنشوره تقارب على 400 قصيده وكلها جميله وجزله ..
وش نقول حنا اللي لسى ببداية الطريق وتنسرق قصايدنا ..

طبعا ً لي قصيدتين كانت ولادتهما الاولى في منتدى الفطاحله وعلى مرئ الأستاذه .. الحين بالمنتديات بدون اسم أو منسوبه لأحد الاسماء ..

الاولى ..
نويت أكتب قصيده من دموع الوقت تكتبني ..
الثانيه ..
صباح الخير ياقلبي صباح الورد والكادي ..


بس مثل ماقالوا الاخوان لو مهي بجزله محد سرقها ولاأحد حركها من منتداها الادبي ..
شعور حلو أن اللي تكتبه يلاقي إستحسان .. وخل اللي يسرق يسرق دامها مثبوته .. ماهمني ..
تحياتي للجميع ..

[الطائر المهاجر]

اجل ابعلمكم عن اساليب بعض اصحاب المنتديات الخامله:
يصير عنده اكثر من معرف ، ويشوف القصيده اللي صاحبها مغمور
ويقوم ويلطشها وينشرها عنده ، طبعا رايح يدري صاحبها عن طريق قوقل
بل وربما دخل عليه في الموقع اللي ينشر فيه ويقول حبيت افعل خير ترى
قصيدتك لاطشها واحد وناشرها بهالرابط ، يروح صاحبها وهو زعلان ويسجل
ثم يرد ويقول هذي قصيدتي ، يدخل المشرف العام ويطيب خاطره بكلمتين ويقول
مالك إلا ما تأمرنا به ، وانت بصراحه شاعر نفتخر انك معنا ، صاحب القصيدة الضعيف
تنطلي عليه الحيله ويبدأ ينشر عندهم ، وبهذا حقق صاحب المنتدى هدفه في زيادة الشعار
عنده

الحمدلله

أنا فجأه شفت قصايدي
في مختلف المنتديات
ولكن ليست مسروقه
فـ مكتوب تحتها إسمي


اشكرك يا اخي والله يعينك
وصدقني : لا يُسرق إلا جزل

الله يجيرنا ويعيضك خير يادكتور

نتمنى تمنع المنتديات العريقة اللي مثلكم وشرواكم خدمة النسخ ، بوضع فلتر مثلاً يمنع نسخ القصايد .. رغم انه السالب ممكن يسلب مع وجود هالحركة ، لكنه على مايبدو اضعف الايمان

واتمنى بعد على اخواني الشعرا ، وضع قصايدهم في صورة .. بدل من وضعها بحروف .. مما قد يساهم في رأيي في حماية الشاعر وحقه الادبي ..

وانا اتمنى على المنتديات وروادها بشكل عام ، ان يكونوا همزة وصل بين الشاعر والمطبوعات .. فالنشر يساهم في حفظ الحقوق .. وسابقة النشر تعد دليلاً على ملكية الشاعر للنص وانه من ابداعه الخاص ..

انا عن نفسي لو انسرقت لي قصيدة اتمنى انه مايوصلني العلم بهذا الشي .. وربي يحفظك الجميع

تحياتي لكم ولقلوبكم الطاهرة

نصيحة اخويه الشاعر اللي ينشر بالنت قصيدته كامله مخطي الا اذا كان الموقع يضمن حقوقك

والحقيقه اني انشر القصيده لكن خمس ابيات او اكثر احذها من القصيده واحاول انها ماتاثر على
المضمون والمعنى .
لان الناس ومحبي الشعر مايحفضون القصيده كامله اذا قراوها يحفضون بيتين او ثلاثه بالكثير .
لكن اذا كنت في قناه اعلاميه او مجله لامانع من نشر القصيده كامله والجريده ماتضمن لك حقوقك بعد.

انا لقيت لي قصيده في منتدى ورديت على اللي سرقها بان القصيده لشاعر مشهور وقلت انها في
ديوان ابن جدلان ويجب عليك ذكر اسم الشاعر لا اسمك .ههههههههه

تحياتي

[حي الضمير]

ليت كل المنتديات كالفطاحله تدار بعقليه احترافيه ومبدأها الصدق وعدم التعدي على حقوق الغير
وانا يابو عبدالله سرقت مني قصيده وحده (من بعد ماجد خلاص اليوم عفناها)
والغبن بأن السارق
وجد حصانه من ادارة منتداه رغم التنبيه عليهم (قمة البجاحه) لاشيمه ولاتربيه ولادين
لكن لست مهتم بتلك السرقه طالما ان النهايه لايصح فيها الا الصحيح

ولاهنت ياغالينا ابا عبدالله وكثر الله من امثالك

[الآكيد]

وش الحل يابو عبدالله في القصائد المسروقه يااصحاب المنتديات