الملعبه ياسهيل وابو انس وبو زياد ومن حضر

[الطائر المهاجر]

الا يا سهيل وش رايك اليا من هبت النسري = تجينا من ديار الشام وتترك طيب الفالي
غناديرٍ الى من اقبلن بالزين والسحري= يخلن من رهف قلبه سقيم النفس والحالي

[ابو زياد]

الا يا سهيل وش ضنك هواهم صاير يغري=يطير القلب لاهبت رياح الشام بالعالي
احسه كن له صوره وله عين وله خدري=واحسه شوق يبعث به رسول الطيب الغالي

[الطائر المهاجر]

اشوف سهيل ما قرّب وظنه ناوي يسري = بعد ما هيج المكنون شعر الشايب البالي
على ذاك الوتر دقيت ونا مالي بهم خبري= يكود اسمع من اللي سافروا للشام من تالي

[ابو زياد]

اشوفك ما اندمل جرحك وكنك بالمثل بصري=مسك ايدك ورُوحبك على زينات الازوالي
ولكنك تخاف انك تصير اليوم في خسري =تباعد عن مواطنهم وتمسك جانب الجالي

[الطائر المهاجر]

معذرة فقد كنت اتعلم نقل الصوتيات ، وتم بالفعل نقل بعض الجرات على الربابة

انا مثل اللي يبرق في الحسين وقاصر الشبري= اعرفه زين لكني اعرفه مثل تمثالي
يتمكيج لين من شافه يحسبه كوكبٍ دري = وهو في داخله كل البلا لو يلبس الشالي

[ابو زياد]

طويل الشبر لكنك بدرب الغي ماتسري=ودرب الخير اشوف انك تزرفل فيه زرفالي
دروب الطير ترقى به عن الدونات والحدري=وله هم(ن)تعلى به من اول عمره وتالي

[الطائر المهاجر]

الى من الرجل فكر بكل البيض والشقري= لقاهن كنهن ورد مصيره دوم الاهمالي
يروح الشكل والمنظر ويبقى طيب الذكري = فعليك بمن تلاقيها تسرك وقت زلزالي

[ابو زياد]

ولكنا إلى شفنا مليح القد والخصري=لبس لبس(ن)تزين به وفوق النحر سلسالي
وشفنا الخد والمبسم وشفنا شعره الخمري=تطير قلوبنا منا ونعشق ريقه الحالي

[الطائر المهاجر]

تظنه حالي ولا من تقرب تكتشف امري= بأن العين خداعه وقلبك فارغ خالي
لأنا من طلعنا انعزلنا عنهن بدري= وصاب البعض جوع مادرى سره بلاجمالي

[ابو أنس]

انا بدخل على غفله وابرجع ساحب(ن) عمري=ابا اسلم واتابعكم واباسهر لوي لحالي
على ذكر الغنادر نكتب القيفان بالحبري=نزعلهن ونعشقهن ونهواهن ولانبالي