الصديق المثالي

جتني هدايا العيد من كل غالي=وجتني هديه ما كماها هدية
من صاحب راح وتناسى وصالي=كيف يتجاهلني ما كني خويه
اللي فعيد الفطر عيّد بجالي=كيف يتناساني فعيد الضحية
وأنا أحسب إنه لي صديق مثالي=وأقول هذا أخوي مني وفيه
لو كان ما هو لي رفيق موالي=لكن صداقتنا صداقة قوية
ولا يبيّن الأصحاب غير الليالي=وقفاتهم تنبيك عن كل نيه
اطو الرشا من فوق هدف المحالي=وابك الصداقة والعلوم النقيه
وبالله ترفق يا كريم السبالي=اللي حصلي منك ماهو شويه
لو كان ما ودي فشد الحبالي=ياتنقطع فيديك واللا يديه
لكن أنا وإياك عند الرجالي=اللي تعرف الصايبه والخطيه
والحق واضح ما يبيله جدالي=ولابد ما نلقى حلول القضيه
وإن كان حصله صديق بدالي=الناس ماهي عن بعضها غنيه
من جاز عني عنه بيجوز حالي=والطيب يبقى والليالي مديه
مير العوض في شخص واحد بقالي=فيه العوض لو يذهبون البقيه
وأنا على أصحابي موصي عيالي=واحمد على صغره يحفظ الوصيه
قلت اكرموهم بالوفا والكمالي=ولا تقابلون الطيبه بالرديه
والمكسب اللي راح مع راس مالي=إما يجي واللا حسبته عطيه
وحلو وراه المر ما هو بحالي=وحسنه وراها مَنّ تحسب بسيه
ولا تنعثر فالدرب غير الهزالي=ولا تنكسر غير العظام الطريه
ولا يخيّل بعينه بروق الخيالي=يكود رجال دياره سنيه
وأهل المعالي يكسبون المعالي=واهل الحميه ماتكب الحميه
وياواردين العد وين المدالي=ما ودنا نكشف علوم خفيه
آرد على العد القراح الزلالي=ولا نارد اللا للعدود الرهيه
مير العرب قامت تعارض جمالي=وكل يقول انه مضيع مطيه
ماللذواهب في طرفنا مجالي=دور هناك ولا تدور هنيه
كل يقول أمجاد عمي وخالي=واقول انا امجادي دليلٍ عليه
وأنا بدالي فالعرب ما بدالي=لكن على ربك حساب البريه
واللي زبن للشمس يبغى الظلالي=هذاك ضايع بين رشده وغيه
لو عوّد لعقله بميز وعدالي=ياكيف يلقى فالملاهيب فيه
والطيب ما بين العرب لا يزالي=مادام للاجواد نيران حيه

[منصور العبدالله]

لـو كـان مـا هـو لـي رفيـق مـوالـي .........لـكــن صـداقـتـنـا صــداقــة قــويــة
ولا يبيّـن الأصـحـاب غـيـر الليـالـي ........وقفـاتـهـم تنـبـيـك عـــن كـــل نــيــه
اطو الرشا من فوق هـدف المحالـي .......وابــك الـصـداقـة والـعـلـوم النـقـيـه



صح لسانك يالحزل

تحياتى لفكرك

[ام العمده]

عماد

صح لسانك وعلا شانك
لاهنت

تحياتي وتقديري

[منيع]

والطيب مـا بيـن العـرب لا يزالـيمـــادام لـلاجــواد نـيــران حـيــه

ياسلام عليك ياعماد
ابداع وحكمة
تحياتي لك

[الطامي]

عماد الشريف
صح السانك وعاتلاشانك
جزلة من جزل لاهنت عيني

اشكركم على المرور الجميل

[الطائر المهاجر]

جزلة من جزل وشاعر متجدد الإبداع
صح لسانك واعتلا شانك
وسلم بنانك وفكرك
ولي عودة تليق بها
تحياتي وتقديري

[صوت الإحساس]

صح صح صح لسانك


ابدعت لله درك قصيدة تستحق الوقف والتأمل


لاتمل لله درك

حضورك يهمني وانتظره لثقتي بروعته وجماله وجودته

صاااادق الود

[سعيد الصاعدي]

الاخ الفاضل / عماد الشريف
صح لسانك لاهنت
وبيض الله وجهك
نص شعري راقي خلفه شاعر متمكن
تحياتي
أخــــــــــوك
س / ص

[ابومياس]

والطيـب مـا بيـن العـرب لا يـزالـي
.........................مــــ ادام لــلاجــواد نــيــران حــيــه


صدقت والله صدقت الطيب موجود

عماد الشريف

نص راقي وجزل

من شاعر جزل



صح لسانك وبيض الله وجهك

دمت بخير