الا يالله غفار الذنوب وقابل التوبه

[الطائر المهاجر]

الا يالله غفار الذنوب وقابل التوبه = شمول برحمتك للي تهاون في مواجيبه
ولو هو يعبدك وحدك فهو متساهل ذنوبه= الين انه لقاها كالجبل في الكبر والهيبه
يحاول قد ما يقدر يرقع باقي غروبه= ولكن يذكر اللي فات مافكر بتحسيبه
زمانٍ كان به داله بدنيا كلها اكذوبه= يطيع النفس والشيطان مافكر بالاعيبه
يراكض مثل غيره لو وطى ثوبه بعرقوبه= يبي جاه ووجاه ونظرته ماتكشف لعيبه
ويوم انه صحى وافكر وراجع ماضي اسلوبه= لقى انه ماعرف دربه ولو عليت مراتيبه
ولقى الدنيا سراب يتبعه من ضيع دروبه= الين انه يطيح بحفرةٍ تدفنه وتغيبه
يروح بلا عيال و مال حتى مامعه ثوبه= ويبدا رحله لْدار النعيم او دار تعذيبه
الى دار الخلود بنار للكفار مشبوبه = والى دار الخلود بجنةٍ فيها هل االطيبه
فلا من واسطه تنفع ولا ظهرٍ له رتوبه= جميع الخلق تتساوى وكلٍ من مكاسيبه
فعلام الناس كلٍ سادرٍ في شبه غيبوبه= ولا احدٍ يتعظ لامن رحل خله او صحيبه
طموحات الفتى تعميه ما ينظر إلى عيوبه= ولو يظلم ولو يطغى ويمشي الكذب والغيبه
يبي زود الحلال ولو حرامٍ كل مكسوبه= ولو عنده كنوز الأرض ماتمنع مناهيبه
يبيع الدين والمبدأ يدور طيب مشروبه= فلا من ضامرٍ يحكمه دام الوضع به سيبه
ولا فكر بأن الله لو أجّل للعقوبه= تجيه بيوم داله به ولا بالظن محري به
بنفسه او باعز الناس من ولدٍ ومحبوبه= يتمنى يدفع اللي حيلته لو يفرغ لْجيبه
فكم من طاغيٍ شفنا معه من يقلب جنوبه= فلا هو حي او ميّت بعد ما خاب تطبيبه
وكم من ظالمٍ شفنا يعيش الحزن وكروبه= واذا من فاق من صدمه تجي اخرى لتأديبه
مثل هذا ولو يصحى يعود لْسالف دروبه= فدينه عاده ومظهر لاجل ياصل مطاليبه
واذا من حاط بك تيّار لا تسرع إلى ركوبه= مصيره ساحبٍ ربعه لعمق الذل والخيبه
فما اسس على الباطل تحرى لحظة غروبه= يجيه السيل ما يبطي ويجرف كل تركيبه
فعقيده مابها إيمان راسخ دوم معطوبه= فلا هي تحمي الإنسان لاحلت به مْصيبه
فاذا منك تبي الراحه فقم بالدين ورتوبه= بلا خوفٍ من الإنسان مهما كان ترتيبه
واذا من جات لك بلوى لربك اتجه صوبه= فلا خاب الذي يرجيه لو زادت لواهيبه

[عبدالعزيز العمار]

شاعرنا وقائد مسيرتنا

صح الله لسانك وفكرك وكلك

قصيدة عانقت السحاب بجمالها

ويشرفني ان اكون اول المتصفحين لهذه الرائعه

جزل يابوعبدالله ماتجيب الا الجزل معك

تقبل مروري وخالص تحياتي وتقديري

[منيع]

ماشاء الله
ابيات تنطق بالصدق والحكمة
فهل من متعظ
بارك الله فيكم ونفع بكم
تحياتي

[هترل]

صح لسانك يادكتور عثمان

ابيات جزله من راس جزل نفع الله بك

دمت بود

[عبدالله مذكر العقيلي]

الله يرحم الحال

صح لسانك

ودام نبضك

والله لايهينك


تحيتي

[عبدالعزيز الرقابي]

الله يجزاك خير يابو عبدالله
على هذا النص الطيب الواعظ الرزين

الله يعطيك العافيه
تحيتي وتقديري

[الخنساء]

الا يالله غفـار الذنـوب وقابـل التـوبـه

شمول برحمتك للي تهاون فـي مواجيبـه

ولو هو يعبدك وحدك فهو متساهل ذنوبـه

الين انه لقاها كالجبل في الكبـر والهيبـه

يحاول قد ما يقـدر يرقـع باقـي غروبـه

ولكن يذكر اللـي فـات مافكـر بتحسيبـه

صح لسانك مليووون ولايكفوووون

قصيدة ايمانيه تترجم روعة الاحساس
وصدق الايمان من شاعر متمكن

سلمت ودام حرفك

[عبير الورد]

صح لساااانك وسلم فكرك
ولاهانت الحكمة
سلمت وسلم منطوقك الجزل يامبدع
ربي يعطيك العافية

[حرف وشعر]

غالينا ابوعبدالله

ماعندي تعليق اقدر اقوله

الا انت ارخيت روابعي

حفظك الله وسدد خطاك الي كل خير

وغفر لنا ولك

[منصور العبدالله]

فعلام الناس كلٍ سادرٍ فـي شبـه غيبوبـه
ولا احدٍ يتعظ لامن رحل خلـه او صحيبـه
طموحات الفتى تعميه ما ينظر إلى عيوبـه
ولو يظلم ولو يطغى ويمشي الكذب والغيبه
يبي زود الحلال ولو حـرامٍ كـل مكسوبـه
ولو عنده كنـوز الأرض ماتمنـع مناهيبـه



الله الله ما راوعك يابو عبد الله

بقرب الشهر الكريم اهنيك

ومثل قصيادك ذى مطلب يابو عبدالله لاحرمنا متك ومنها

صح لسانك ملاييين